གྲོང་མི་རྣམ་པ་ཚོ།

 2023ལོའི་ལྷ་ས་གྲོང་ཁྱེར་གྱི་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་ནང་ཞུགས་པའི་ཐོ་འགོད་གྲབས་ཡོད་པ་དང་། ལྷ་ས་གྲོང་ཁྱེར་གྱི་གྲོང་ཁྱེར་དང་གྲོང་གསེབ་ཀྱི་གྲོང་མིའི་གཞི་རྩའི་སྨན་བཅོས་འགན་བཅོལ་གྱི་མི་སྒེར་གྱི་གྲོན་དངུལ་འཇལ་བའི་ཚད་གཞི་དེ་རང་སྐྱོང་ལྗོངས་ཀྱི་གཅིག་གྱུར་བླང་བྱ་ལྟར། མི་རེར་ལོ་རེར་སྒོར་160དང་སྒོར་350ཡི་གྲོན་འཇལ་རིམ་པ་གཉིས་བཟོས་ཡོད་ཅིང་། གཅིག་སྡུད་འགན་བཅོལ་ནང་ཞུགས་པའི་ཐོ་འགོད་ཀྱི་དུས་ཚོད་2022ལོའི་ཟླ་12ཚེས་31ཉིན་ནས་2023ལོའི་ཟླ་4ཚེས་30ཉིན་བར་ཡིན་པ་རེད།

 མུ་མཐུད་འགན་བཅོལ་ནང་ཞུགས་མཁན་གྱིས་ཐད་ཀར་གྲོན་དངུལ་འཇལ་ནས་འགན་བཅོལ་ལ་ཞུགས་ན་ཆོག་པ་དང་། གསར་དུ་འགན་བཅོལ་ནང་ཞུགས་མཁན་གྱིས་སྒེར་གྱི་གོ་ཆོད་ཐོབ་ཐང་ལག་ཁྱེར་ཁྱེར་ནས་རང་ཉིད་ཀྱི་ཐེམ་ཐོ་ཡོད་སའི་ཚན་པའམ་ཡང་ན་གྲོང་མི་ཨུ་ལྷན་དུ་གཅིག་གྱུར་ཐོག་འགན་བཅོལ་ནང་ཞུགས་པའི་ཐོ་འགོད་དགོས། དེ་རྗེས་ཚན་པའམ་ཡང་ན་གྲོང་མི་ཨུ་ལྷན་གྱིས་ཁོངས་གཏོགས་ཀྱི་སྨན་བཅོས་འགན་བཅོལ་སྒྲུབ་གཉེར་སྡེ་ཚན་དུ་ཐོ་འགོད་དགོས་པ་དང་། ཐོ་བཀོད་རྗེས་ངེས་པར་དུ་ཁྲལ་དོན་སྡེ་ཚན་དང་དུས་ཐོག་ཏུ་སྦྲེལ་མཐུད་བྱས་ནས་གྲོན་དངུལ་འཇལ་དགོས། ཁྲལ་དོན་སྡེ་ཚན་གྱིས་སྤྲད་པའི་མཛོད་འཇུག་ཆ་འཕྲིན་དེ་སྨན་བཅོས་འགན་བཅོལ་སྒྲུབ་གཉེར་སྡེ་ཚན་གྱིས་འགན་བཅོལ་ནང་ཞུགས་མཁན་གྱི་ཁེ་དབང་ཐོ་འགོད་ལག་ཁྱེར་ལ་བརྩིས་ནས། འགན་བཅོལ་ནང་ཞུགས་མཁན་ལ་དུས་ཐོག་ཏུ་དེ་མཚུངས་ཀྱི་སྨན་བཅོས་འགན་ལེན་ཐོབ་ཐང་ལོངས་སྤྱོད་བྱེད་དུ་འཇུག་གི་ཡོད་པ་རེད།

ཆེད་དུ་སྤྱི་བསྒྲགས་འདི་སྤེལ།

ལྷ་ས་གྲོང་ཁྱེར་སྨན་བཅོས་འགན་སྲུང་ཅུས་ནས།

2022ལོའི་ཟླ་12ཚེས་28ཉིན།