ཚེས་26ཉིན་གྱི་དགོང་མོ་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་གྱིས་སྤྱི་བསྒྲགས་སྤེལ་ནས།
གཅིག ཏོག་དབྱིབས་ནད་དུག་གསར་པའི་གློ་ཚད་དེ་ཏོག་དབྱིབས་ནད་དུག་གསར་པའི་འགོ་ནད་ལ་མིང་བསྒྱུར་རྒྱུ་དང་།
གཉིས། རྒྱལ་སྲིད་སྤྱི་ཁྱབ་ཁང་གི་ཆོག་མཆན་ཐོབ་པ་བརྒྱུད། 2023ལོའི་ཟླ་1ཚེས་8ཉིན་ནས་བཟུང་། ཏོག་དབྱིབས་ནད་དུག་གསར་པའི་འགོ་ནད་ལ་སྤྱད་པའི《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་འགོ་ནད་འགོག་བཅོས་བཅའ་ཁྲིམས》ནང་གཏན་འབེབས་བྱས་པའི་འགོ་ནད་ཀ་པའི་རིགས་སྔོན་འགོག་དང་ཚོད་འཛིན་བྱ་ཐབས་མེད་པར་བཟོ་རྒྱུ་དང་། ཏོག་དབྱིབས་ནད་དུག་གསར་པའི་འགོ་ནད་དེ《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་རྒྱལ་མཚམས་འཕྲོད་བསྟེན་ནད་ཡམས་ཞིབ་བཤེར་བཅའ་ཁྲིམས》ནང་གཏན་འབེབས་བྱས་པའི་ནད་ཡམས་ཞིབ་བཤེར་དོ་དམ་བྱེད་ཁོངས་སུ་བཅུག་རྒྱུ་མིན་པའི་གཏན་འཁེལ་བྱས་འདུག
“ཏོག་གསར་གློ་ཚད”དེ“ཏོག་དབྱིབས་ནད་དུག་གསར་པའི་འགོ་ནད”ཅེས་པར་མིང་བསྒྱུར་དོན་ཅི་ཡིན།
ཨོ་མེ་ཁི་རོང་གི་ངོ་འགྱུར་དུག་སྲིན་དེ་འགོ་ཁྱབ་ཏུ་འགྲོ་བའི་དུག་སྲིན་དུ་གྱུར་རྗེས་ནད་གཞི་སློང་ཤུགས་ཇེ་ཆུང་དུ་སོང་བས་ནད་པ་ཉུང་ཤས་ཤིག་ལ་མ་གཏོགས་གློ་ཚད་ཕོག་གི་མེད། དེས་ན། གློ་ཚད་ཀྱིས་ནད་དུག་འགོས་རྗེས་ནད་ཚབས་ལྕི་བའི་གནས་ཚུལ་ཁོ་ན་མཚོན་པ་ལས་འགོ་ནད་འགོས་པ་ཚང་མའི་ནད་ཐོག་ཁྱད་ཆོས་གཅིག་སྡུད་ཀྱིས་མཚོན་མི་ཐུབ་པར་བརྟེན། “ཏོག་གསར་གློ་ཚད”དེ“ཏོག་དབྱིབས་ནད་དུག་གསར་པའི་འགོ་ནད”ཅེས་པར་བསྒྱུར་བ་ནི། མིག་སྔའི་ནད་གཞིའི་ཁྱད་ཆོས་དང་གནོད་འཚེ་དང་སྔར་བས་མཐུན་ཡོད།
“འགོ་ནད་ཁ་པའི་རིགས་སུ་བཅུག་ནས་ཁ་པའི་དོ་དམ་བྱེད་སྟངས”ལག་བསྟར་བྱས་རྗེས་ལས་ཀའི་དམིགས་ཚད་ལ་ལེགས་སྒྲིག་གང་འདྲ་བྱེད་དགོས།
2023ལོའི་ཟླ་1ཚེས་8ཉིན་ནས་བཟུང་། ཏོག་དབྱིབས་ནད་དུག་གསར་པའི་འགོ་ནད་ལ“འགོ་ནད་ཁ་པའི་རིགས་སུ་བཅུག་ནས་ཁ་པའི་དོ་དམ་བྱེད་སྟངས”ལག་བསྟར་བྱ་རྒྱུ་ཡིན་ཞིང་། “འགོ་ནད་ཁ་པའི་རིགས་སུ་བཅུག་ནས་ཁ་པའི་དོ་དམ་བྱེད་སྟངས”ལག་བསྟར་བྱས་རྗེས། སྔོན་འགོག་དང་ཚོད་འཛིན་ལས་དོན་གྱི་དམིགས་ཚད་དེ“བདེ་ཐང་འགན་ལེན་དང་ནད་ལྕི་སྔོན་འགོག”ལ་དམིགས་ཏེ་དེ་མཚུངས་ཀྱི་བྱ་ཐབས་སྤྱད་ནས་མི་དམངས་མང་ཚོགས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་སྲུང་སྐྱོང་གང་ཐུབ་དང་། དཔལ་འབྱོར་དང་སྤྱི་ཚོགས་འཕེལ་རྒྱས་ལ་ཐོན་པའི་རིམས་ནད་ཀྱི་ཤུགས་རྐྱེན་ཆུང་དུ་གཏོང་གང་ཐུབ་བྱ་རྒྱུ་དེ་རེད།