སང་ལོ་ནི་ཏང་གི་ཚོགས་ཆེན་ཉི་ཤུ་པའི་དགོངས་དོན་ཕྱོགས་ཡོངས་ནས་ལག་བསྟར་དོན་འཁྱོལ་བྱེད་པའི་འགོ་ཚུགས་ལོ་ཞིག་དང་། རིམས་ནད་སྔོན་འགོག་དང་ཚོད་འཛིན་དུས་མཚམས་གསར་པར་སླེབས་པའི་གལ་ཆེའི་ལོ་ཞིག་རེད། རང་རྒྱལ་གྱི་དཔལ་འབྱོར་འཕེལ་རྒྱས་ལ་དམིགས་ཚད་མང་པོ་དང་གཅུན་སྡོམ་མང་པོའི་འོག་སྣེ་མང་རྙོག་འཛིང་ཆེ་བའི་གདམ་ག་མང་དག་ཅིག་འཕྲད་རྒྱུ་རེད། ཀྲུང་དབྱང་གི་དཔལ་འབྱོར་ལས་དོན་ཚོགས་འདུའི་ཐོག་བརྒྱུད་རིམ་གྱི་ལྟ་བ་དང་གཞུང་འཁྱོངས་གསར་འབྱེད་མཐའ་འཁྱོངས་ཀྱིས“སྤྱི་འདོམས་དྲུག”ཁ་གསལ་བཏོན་ཏེ་དཔལ་འབྱོར་འཁོར་སྐྱོད་སྤྱི་ཡོངས་ནས་ཡག་པོ་ཡོང་བར་བྱེད་དགོས་པའི་ནན་བཤད་གནང་ཡོད། “སྤྱི་འདོམས་དྲུག”བཏོན་པར་ལོ་འཁོར་གྱི་དམིཌ་སའི་རང་བཞིན་དང་གནད་དོན་གྱི་ཕྱོཌ་སྟོན་རང་བཞིན་ཧ་ཅང་ཆེན་པོ་ལྡན་ཡོད།
རིམས་ནད་སྔོན་འགོག་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤྱི་འདོམས་དེ་བས་ལེགས་པ་བྱེད་དགོས། ཏོག་གསར་གློ་ཚད་རིམས་ནད་ཐོན་ཚུན། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག ང་ཚོས་ལོ་གསུམ་ཙམ་དཀའ་སྤྱད་འབད་འཐབ་བྱས་པ་བརྒྱུད་གོ་ལ་ཧྲིལ་པོའི་རིམས་ནད་ཀྱི་རྡབ་རྡེག་ཐེངས་ལྔ་ལ་ཁ་གཏད་ནུས་ལྡན་བཅག་པས། མི་དམངས་ཀྱི་ཚེ་སྲོག་བདེ་འཇགས་དང་གཟུགས་གཞི་བདེ་ཐང་ལ་སྲུང་སྐྱོང་ནུས་ལྡན་ཐུབ་པ་དང་དཔལ་འབྱོར་ལོ་རེར་ཆ་སྙོམས་4.5%ཡས་མས་འཕར་ཏེ་རིམས་ནད་སྔོན་འགོག་དང་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ལ་སྤྱི་འདོམས་བྱས་པར་དགེ་མཚན་ལྡན་པའི་གྲུབ་འབྲས་ཧ་ཅང་ཆེན་པོ་ཐོབ་ཡོད།
རིམས་ནད་སྔོན་འགོག་དང་ཚོད་འཛིན་གྱི་སྲིད་ཇུས་བྱ་ཐབས་ཁག་ལེགས་སུ་བཏང་ནས་ལག་བསྟར་བྱས་པ་དང་སྦྲགས། རང་རྒྱལ་གྱི་དཔལ་འབྱོར་དང་སྤྱི་ཚོགས་སྒྲིག་ལམ་གང་མགྱོགས་སླར་གསོ་བྱུང་སྟེ་དཔལ་འབྱོར་འཁོར་སྐྱོད་བཟང་པོར་སྐུལ་འདེད་ཐུབ་ནས་གསོན་ཤུགས་ཆེན་པོ་རྒྱས་ངེས་རེད།
དཔལ་འབྱོར་གྱི་སྤུས་ཚད་ལེགས་སུ་ནུས་ལྡན་གཏོང་བ་དང་གྲངས་འབོར་ལུགས་མཐུན་ངང་མང་དུ་གཏོང་རྒྱུར་སྤྱི་འདོམས་གང་ལེགས་བྱེད་དགོས། དཔལ་འབྱོར་འཕེལ་རྒྱས་ནི་སྤུས་ཚད་དང་གྲངས་འབོར་གྱི་གཅིག་གྱུར་ནུས་ལྡན་ཞིག་ཡིན་པ་དང་། སྤུས་ཚད་ལེགས་སུ་གཏོང་རྒྱུ་དེས་གྲངས་འབོར་མང་དུ་གཏོང་བར་རྒྱུན་མཐུད་སྒུལ་ཤུགས་མཁོ་འདོན་བྱེད་པ་དང་གྲངས་འབོར་མང་དུ་གཏོང་རྒྱུ་དེས་སྤུས་ཚད་ལེགས་སུ་གཏོང་བར་རྨང་གཞི་གལ་ཆེན་མཁོ་འདོན་བྱེད་ཀྱི་ཡོད། སྤུས་ཚད་ལ་བརྟེན་ནས་རྒྱལ་ཁ་ལེན་རྒྱུ་མཐའ་འཁྱོངས་བྱས་ཏེ། གྲངས་འབོར་གྱི་འགྱུར་ལྡོག་གསོག་འཇོག་ལ་བརྟེན་ནས་སྤུས་ཚད་ཀྱི་འགྱུར་ལྡོག་ཡོང་བ་བྱས་ཏེ་སྤུས་ཚད་མཐོ་བའི་ཕན་འབྲས་ཆེ་རུ་བཏང་བའི་རྨང་གཞིའི་ཐོག་ལུགས་མཐུན་གྱི་དཔལ་འབྱོར་འཕར་རྒྱུ་རྒྱུན་འཁྱོངས་བྱེད་དགོས།
མཁོ་སྤྲོད་ཕྱོགས་ཀྱི་གྲུབ་ཆའི་རང་བཞིན་གྱི་སྒྱུར་བཅོས་དང་ནང་མཁོ་རྒྱ་ཆེར་གཏོང་བར་སྤྱི་འདོམས་གང་ལེགས་བྱེད་དགོས། མིག་སྔའི་དགོས་མཁོ་མི་འདང་བ་ནི་རང་རྒྱལ་ལ་འཕྲད་པའི་མངོན་གསལ་དོད་པའི་འགལ་ཟླ་ཞིག་ཡིན་པས། འཛད་སྤྱོད་སླར་གསོ་དང་རྒྱ་སྐྱེད་གཏོང་རྒྱུ་དེ་སྔོན་ལ་འཇོག་པའི་གནས་བབ་ཏུ་བཞག་སྟེ། འཛད་སྤྱོད་ཀྱི་ནུས་པ་ཆེ་རུ་གཏོང་བ་དང་། འཛད་སྤྱོད་ཀྱི་ཆ་རྐྱེན་ལེགས་སུ་གཏོང་བ། འཛད་སྤྱོད་ཀྱི་རྣམ་པ་གསར་གཏོད་བཅས་བྱས་ནས་ཐབས་ལམ་མང་པོར་བརྟེན་ཏེ་གྲོང་ཁྱེར་དང་གྲོང་གསེབ་ཀྱི་གྲོང་མིའི་ཡོང་འབབ་མང་དུ་གཏོང་དགོས། སྡོད་ཁང་ལེགས་བཅོས་དང་། ནུས་རྒྱུ་གསར་པའི་རླངས་འཁོར། རྒན་གསོའི་ཞབས་ཞུ་སོགས་ཀྱི་འཛད་སྤྱོད་ལ་རྒྱབ་སྐྱོར་བྱེད་དགོས། སྤུས་ཚད་མཐོ་བའི་མཁོ་སྤྲོད་ལ་བརྟེན་ནས་ནུས་ལྡན་གྱི་དགོས་མཁོ་བཏོད་དེ་དགོས་མཁོ་ཡོད་ཀྱང་ཁ་སྐོང་ནུས་ལྡན་མ་ཐུབ་པའི་ཁྱབ་ཁོངས་སུ་མཁོ་སྤྲོད་ཀྱི་གྲུབ་ཆ་མགྱོགས་མྱུར་ལེགས་སུ་གཏོང་བ་དང་འབྲེལ་ཐོན་ལས་གསར་པ་དང་། ལག་རྩལ་གསར་པ། ཐོན་རྫས་གསར་པ། ལས་རྣམ་གསར་པ་བཅས་འཕེལ་རྒྱས་འགྲོ་རྒྱུར་སྐུལ་འདེད་བཏང་ནས་མཁོ་སྤྲོད་གསར་པར་བརྟེན་ཏེ་དགོས་མཁོ་གསར་པ་གཏོད་དགོས།
དཔལ་འབྱོར་གྱི་སྲིད་ཇུས་དང་སྲིད་ཇུས་གཞན་དག་ལ་སྤྱི་འདོམས་དེ་བས་ལེགས་པ་བྱེད་དགོས། སྤུས་ཚད་མཐོ་བའི་འཕེལ་རྒྱས་ནི་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཕྱོགས་ཡོངས་ནས་འཛུགས་སྐྲུན་བྱེད་པའི་ལས་འགན་ཨང་དང་པོ་ཡིན་པས། ཕྱོགས་གང་ཅིའི་ཐད་ཀྱི་སྲིད་ཇུས་ཚང་མས་མཉམ་དུ་ཤུགས་རྒྱག་པ་དང་། གསབ་རེས་མཉམ་རོགས་བྱས་ཏེ་ཐུན་མོང་ཐོག་སྤུས་ཚད་མཐོ་བའི་འཕེལ་རྒྱས་ཀྱི་སྤྱི་ཡོངས་ལ་ཞབས་འདེགས་ཞུ་དགོས། སྤྱི་ཡོངས་ཀྱི་ལྟ་བ་ཟབ་ཏུ་བཏང་ནས་སྤུས་ཚད་མཐོ་བའི་འཕེལ་རྒྱས་ལ་ཐུན་མོང་ཐོག་སྐུལ་འདེད་གཏོང་བའི་མཉམ་ཤུགས་ཤིག་ཆགས་པར་བྱེད་དགོས། གཞི་ཆེའི་སྲིད་ཇུས་དང་ཁ་ཕྱོགས་གཅིག་མཐུན་རང་བཞིན་གྱི་དཔྱད་དཔོག་བྱེད་པར་ཤུགས་སྣོན་རྒྱག་པ་དང་སྤུས་ཚད་མཐོ་བའི་འཕེལ་རྒྱས་དང་མི་མཐུན་པའི་སྲིད་ཇུས་ཀྱི་ཡིག་ཆ་གཙང་བཤེར་དང་མཚམས་འཇོག་བྱེད་དགོས།
རྒྱལ་ནང་གི་འཁོར་སྐྱོད་དང་རྒྱལ་སྤྱིའི་འཁོར་སྐྱོད་ལ་སྤྱི་འདོམས་དེ་བས་ལེགས་པ་བྱེད་དགོས། རྒྱལ་ནང་གི་འཁོར་སྐྱོད་ཆེན་པོའི་ནང་སྒུལ་ཤུགས་དང་བློས་འགེལ་ཆོག་པའི་རང་བཞིན་ཆེ་རུ་བཏང་ནས་རང་རྒྱལ་གྱི་ཐོན་ལས་འཁོར་འབྲེལ་དང་མཁོ་སྤྲོད་འཁོར་འབྲེལ་གྱི་ཞན་ཆ་གང་མགྱོགས་སེལ་ནས་ཐོན་ལས་མ་ལག་རང་བརྟེན་ཚོད་འཛིན་ཐུབ་པ་དང་བདེ་འཇགས་བློས་འགེལ་ཆོག་པའི་འགན་ལེན་བྱས་ཏེ་རྒྱལ་དམངས་དཔལ་འབྱོར་འཁོར་སྐྱོད་བདེ་བླག་ཡོང་བའི་འགན་ལེན་བྱེད་དགོས། རང་རྒྱལ་གྱི་གཞི་ཁྱོན་ཤིན་ཏུ་ཆེ་བའི་ཁྲོམ་རའི་ལེགས་ཆར་བརྟེན་ནས་གོ་ལ་ཧྲིལ་པོའི་ཐོན་ཁུངས་ཀྱི་གཞི་རྒྱུའི་ཡིད་དབང་བཀུག་སྟེ་རྒྱལ་སྤྱིའི་འཁོར་སྐྱོད་ལ་བརྟེན་ནས་རྒྱལ་ནང་གི་འཁོར་སྐྱོད་ཆེན་པོའི་ལས་ཕྱོད་དང་ཆུ་ཚད་མཐོ་རུ་བཏང་སྟེ་རྒྱལ་ནང་དང་རྒྱལ་སྤྱིའི་འཁོར་སྐྱོད་གཉིས་ལ་ཕན་ཚུན་སྐུལ་འདེད་གཏོང་དགོས།
མིག་སྔ་དང་ཕུགས་ལ་སྤྱི་འདོམས་གང་ལེགས་བྱེད་དགོས། མིག་སྔ་དང་ཕུགས་ནི་རྩོད་སྒྲུབ་ཀྱི་གཅིག་གྱུར་ཡིན་པ་དང་། ཕན་ཚུན་ཆ་རྐྱེན་དུ་གྱུར་པ་དང་། གཅིག་ལ་གཅིག་བརྟེན་ཡིན། མིག་སྔའི་ལས་དོན་ཡག་པོ་སྒྲུབ་པར་གཞི་ཚུགས་ནས་ང་ཚོའི་མདུན་དུ་ལྷག་པའི་ཁ་ཚ་དགོས་གཏུགས་ཀྱི་གནད་དོན་ཐག་གཅོད་བྱས་ཏེ་གྲུབ་འབྲས་ཡག་པོ་ཐོབ་རྒྱུར་འབད་བརྩོན་བྱེད་དགོས་ལ་རྒྱང་ལྟའི་རང་བཞིན་གྱི་བསམ་གཞིག་ཀྱང་བྱས་ནས་སླད་ཕྱིན་གྱི་འཕེལ་རྒྱས་ཆེད་འབྲེལ་མཐུད་ཡག་པོ་བྱས་ཏེ་ལྷ་ཤིང་ཤུག་པ་བྲག་ལ་ཚུགས་པ་ལྟར་དམ་འཛིན་ལྷོད་མེད་ཀྱིས་འཆར་འགོད་མཐར་ཕྱིན་པ་བཟོ་དགོས།
བརྒྱུད་རིམ་གྱི་ལྟ་བ་དང་གཞུང་འཁྱོངས་གསར་འབྱེད་བྱེད་རྒྱུ་ནི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་བརྟག་ཐབས་སྨྲ་བ་གལ་ཆེན་ཞིག་རེད། “སྤྱི་འདོམས་དྲུག”གིས་སང་ལོའི་དཔལ་འབྱོར་ལས་དོན་ཡག་པོ་སྒྲུབ་པར་བསམ་བློའི་མཛུབ་ཁྲིད་གལ་ཆེན་མཁོ་འདོན་བྱས་པ་དེ་ལས་རང་རེའི་ཏང་གིས་ཡོངས་ཁྱབ་འབྲེལ་བ་ཡོད་པ་དང་། ཕྱོགས་ཡོངས་བརྒྱུད་རིམ་ལྡན་པ། འཕེལ་རྒྱས་འགྱུར་ལྡོག་བཅས་ཀྱི་ལྟ་བར་བརྟེན་ནས་ལས་ཀར་ལྟ་ཞིབ་དང་སྐུལ་འདེད་གཏོང་བའི་སྲོལ་རྒྱུན་བཟང་པོ་གང་ལེགས་མཚོན་པས། ངེས་པར་དུ་ལས་དོན་ཁག་གི་ཁྲོད་དུ་སློབ་སྦྱོང་ཡག་པོ་དང་། བེད་སྤྱོད་ཡག་པོ། ལག་བསྟར་ཡག་པོ་བཅས་བྱས་ཏེ། སང་ལོའི་དཔལ་འབྱོར་འཁོར་སྐྱོད་སྤྱིའི་ཆ་ནས་བསྐྱར་འཕར་དང་རྣམ་པ་གསར་རྐྱང་ཞིག་ཡོང་བར་སྐུལ་འདེད་ཧུར་ཐག་གཏོང་དགོས།