རྒྱ་ཆེའི་གྲོང་མི་རྣམས་ལ།

ལོ་གསུམ་རིང་གི་རིམས་ནད་སྔོན་འགོག་གི་རྩ་ཆེའི་ཉམས་མྱོང་ལས། ཁ་རས་ཡག་པོ་རྒྱག་པ་ནི་ཏོག་གསར་གློ་ཚད་འགོ་བའི་ཉེན་ཁ་ཆུང་དུ་གཏོང་བའི་བྱེད་ཐབས་ནུས་ལྡན་དང་། རིམས་ནད་མ་མཆེད་སྔོན་འགོག་གི་གོང་ཆུང་ཤོས་དང་། གོ་ཆོད་ཤོས། སྟབས་བདེ་ཤོས་བཅས་ཀྱི་བྱ་ཐབས་ཡིན་པ་ཤེས་རྟོགས་བྱུང་ཡོད། དབུགས་ལམ་གྱི་ནད་དུག་སྣ་ཚོགས་མཆེད་ཚད་དམའ་རུ་གཏོང་ཆེད། ང་ཚོས་གཤམ་གསལ་གྱི་གྲོས་འགོ་འདོན་རྒྱུ་ཡིན།

གཅིག དམངས་ཡོངས་ཀྱིས་ཁ་རས་རྒྱག་དགོས།

ཚང་མས་ཁ་རས་ཡག་པོ་བརྒྱབ་པ་ན། ཁྱིམ་ཚང་ཚང་མར་བདེ་ཐང་ལོས་ཀྱིས་ཡོང་། ལྷ་ས་གྲོང་ཁྱེར་དུ་ལས་ཀ་བྱེད་པ་དང་། འཚོ་བ་སྐྱེལ་བ། སློབ་སྦྱོང་བྱེད་པ། གཞུང་དོན་སྒྲུབ་པ། ཡུལ་སྐོར་དུ་ཡོང་མཁན་བཅས་གང་ཞིག་ཡིན་རུང་། ཚང་མས་ཁ་རས་རྒྱག་པའི་ཡ་རབས་ཀྱི་བྱ་སྤྱོད་ནང་ཧུར་ཐག་ཞུགས་ནས། ཁ་རས་རྒྱག་པའི་འགན་འཁྲི་དང་འོས་འགན་ཡག་པོ་བསྒྲུབས་ཏེ། རང་ཉིད་ནས་འགོ་བཙུགས་པའི“བྱ་སྤྱོད་ཆུང་ངུ”ལ་བརྟེན་ནས་རིམས་འགོག་གི“སྟོབས་ཤུགས་ཆེན་པོ”ཆགས་པར་བྱེད་དགོས།

གཉིས། གཙོ་གནད་མི་ཚོགས་ཀྱིས་ངེས་པར་དུ་ཁ་རས་རྒྱག་དགོས།

ཉེན་ཆེའི་མི་སྣ་དང་ཁ་རས་རྒྱག་དགོས་པ་ཚང་མས་ཁ་རས་རྒྱག་དགོས་ཤིང་། སྨན་དོན་དང་། མྱུར་སྐྱེལ། མངགས་སྐྱེལ། བཟའ་བཏུང་སོགས་གཙོ་གནད་ལས་རིགས་གཉེར་མཁན་དང་། ནད་འགོག་ནུས་པ་ཞན་པའི་རྒན་རྒོན་དང་། བྱིས་པ། གཅོང་ནད་ཡོད་མཁན། དེ་བཞིན་ངེས་པར་དུ་ཁ་རས་རྒྱག་དགོས་པའི་གཙོ་གནད་ལས་རིགས་ཀྱི་མི་ཚོགས་དང་འབྲེལ་ཡོད་ལས་གནས་ཀྱི་མི་སྣ་བཅས་ཀྱིས་ལས་ཀ་བྱེད་སྐབས་དང་ཕྱིར་སྐྱོད་སྐབས་ངེས་པར་དུ་ཁ་རས་ཡག་པོ་རྒྱག་དགོས།

གསུམ། ཕྱིར་སྐྱོད་སྐབས་བརྒྱུད་རིམ་ཧྲིལ་པོར་ཁ་རས་རྒྱག་དགོས།

ཕར་འགྲོ་ཚུར་འོང་བྱེད་པའི་དུས། ཁ་རས་བརྒྱབ་ན་བློ་བདེ་ཡོང་། སྨན་བཅོས་སྒྲིག་གཞི་དང་། ཚོང་ཁང་། སྒོ་རྩིས་ཚོང་ཁང་། གསོལ་མགྲོན་ཁང་དང་མགྲོན་ཁང་། སློབ་གྲྭ། ལས་ཁུངས་དང་ཁེ་ལས་བྱ་གཞག་ཚན་པ་སོགས་སྤྱི་པའི་འདུ་གནས་སུ་སྐྱོད་པ་དང་། ཁྲོམ་ར་ཁྲོམ་གཞུང་དང་། ཞིང(འདུ་ཚོགས)ཞོར་ཉོ་ཚོང་ཁྲོམ་ར། སྤྱི་སྤྱོད་རླངས་འཁོར་འབབ་ཚུགས། རིམས་འགོག་སྨན་ཁབ་རྒྱག་ས། ཉིང་སྐྱུར་བརྟག་དཔྱད་བྱ་ཡུལ་སོགས་མི་འདུ་འཛོམས་བྱ་ཡུལ་དུ་སྐྱོད་པ། སྤྱི་སྤྱོད་རླངས་འཁོར་དང་། བདལ་གཏོང་རླངས་འཁོར། དྲ་འབོད་རླངས་འཁོར་སོགས་སྤྱི་པའི་འགྲིམ་འགྲུལ་འཕྲུལ་ཆས་ལ་སྡོད་པ། གློག་སྐས་དང་སྤྱི་པའི་གསང་སྤྱོད་སོགས་རླུང་འགྲོ་ཡག་པོ་མེད་སར་སྐྱོད་པ། ཁང་པའི་ནང་གི་ཚོགས་འདུ་དང་འགྲེམས་སྟོན་སོགས་ཚོགས་སྤྱིའི་རང་བཞིན་གྱི་བྱེད་སྒོར་ཞུགས་པ་བཅས་ཀྱི་སྐབས་སུ་ངེས་པར་དུ་ཁ་རས་བརྒྱབ་ནས་ཕུད་རྒྱུ་མེད།

བཞི། ཁ་རས་ཡག་པོ་རྒྱག་པ་སེམས་ལ་བརྟན་པོར་ངེས་དགོས།

ཁ་རས་ཡག་པོ་རྒྱག་པ་སེམས་ལ་བརྟན་པོར་ངེས་དགོས། ཁ་རས་རྒྱག་སྐབས་ཕྱི་ནང་མ་ནོར་བར་ཁ་སྣ་གཉིས་ཡག་པོ་བཏུམས་ནས་ལྕགས་སྐུད་ཀྱི་དམ་ལྷོད་འཚམ་པོ་བཟོ་དགོས་པ་དང་དེ་བཞིན་དུས་ཐོག་ཏུ་ཁ་རས་བརྗེ་དགོས། ཁ་རས་ཀྱི་ཕྱི་ནང་དང་། མིག ཁ་སྣ་བཅས་ལ་ལག་པས་མ་རེག་པ་དང་། ཁ་རས་རློན་པ་ཆགས་པ་དང་། བཙོག་པར་གྱུར་བ། རྙིང་པར་འགྱུར་ན་དུས་ཐོག་ཏུ་བརྗེ་དགོས། ཁ་རས་མ་བརྗེས་གོང་ལག་པ་བཀྲུ་དགོས་པ་དང་བརྗེས་པའི་ཁ་རས་གད་སྙིགས་རིགས་དབྱེའི་བླང་བྱ་གཞིར་བཟུང་གང་བྱུང་དུ་དབྱུགས་མི་ཆོག

ལྔ། རང་འགུལ་ངང་ཁ་རས་རྒྱག་པའི་གོམས་གཤིས་འཇགས་པར་བྱེད་དགོས།

གོམས་གཤིས་འཇགས་པར་གལ་འགངས་ཆེ། ཡ་རབས་ལྡན་པར་རང་འགུལ་བྱེད། ཚན་རིག་དང་མཐུན་ཞིང་ཚད་དང་ལྡན་པའི་ངང་ཁ་རས་རྒྱག་པའི་ཡ་རབས་ཀྱི་གོམས་གཤིས་བཟང་པོ་འཇགས་པར་བྱས་ནས། སོ་སོའི་བདེ་ཐང་གི་འགན་འཁུར་བ་ཨང་དང་པོ་ཡག་པོ་བྱས་ཏེ། དམངས་ཡོངས་ཀྱིས་ཁ་རས་རྒྱག་པའི་བྱ་སྤྱོད་ཀྱི“ལག་ལེན་པ”དང་། “ལྟ་སྐུལ་བ” “དྲིལ་བསྒྲགས་པ”བཅས་བརྩོན་ལེན་ཧུར་ཐག་བྱས་ནས། ཉེ་འགྲམ་གྱི་མི་སྣ་དང་གཉེན་ཉེ་གྲོགས་པོ་ཚོས་རང་འགུལ་ངང་ཁ་རས་རྒྱག་པར་ཁ་ཏ་སློབ་སྟོན་དང་ཁ་རས་ཡག་པོ་མི་རྒྱག་མཁན་ལ་ཡག་པོ་རྒྱག་ཏུ་འཇུག་དགོས།

ཁ་རས་ཡག་པོ་བརྒྱབ་ནས་བདེ་ཐང་ལ་སྲུང་སྐྱོང་དང་ཡ་རབས་དར་སྤེལ་གཏོང་དགོས། ཁ་རས་སྲབ་ཀྱང་ནད་དུག་འགོ་བར་སྔོན་འགོག་ཐུབ་ལ། ཁ་རས་ཆུང་ཡང་དེ་ལས་ཡ་རབས་ཀྱི་སྤྱོད་པ་མངོན། ང་ཚོས་མཉམ་དུ་རང་ཉིད་ནས་འགོ་འཛུགས་པ་དང་ད་ལྟ་ནས་འགོ་བཙུགས་ཏེ་ཡ་རབས་ཀྱི་བྱ་སྤྱོད་ལག་ལེན་བསྟར་ནས་མཛེས་སྡུག་ལྡན་པའི་འཚོ་བ་གཏོད་དགོས་ཤིང་། ཚན་རིག་དང་མཐུན་པའི་ངང་རིམས་ནད་འགོག་པར་མི་ཚང་མར་འགན་འཁྲི་ཡོད་པས། ང་ཚོས་བདེ་ཐང་གི་ལྷ་སའི་ཆེད་དུ་མཉམ་དུ་བྱ་སྤྱོད་སྤེལ་དགོས།

ལྷ་ས་གྲོང་ཁྱེར་ཤེས་དཔལ་གཞུང་ལས་ཁང་ནས།

2022ལོའི་ཟླ་12ཚེས་17ཉིན།