ཉེ་ཆར། གསར་འགོད་པར་ལྷ་ས་གྲོང་ཁྱེར་སྡོད་ཁང་མ་དངུལ་དོ་དམ་ལྟེ་གནས་ནས་ཤེས་རྟོགས་བྱུང་བར། སྡོད་ཁང་སྤྱི་གསོག་མ་དངུལ་ལོ་མཇུག་ཏུ་འཕྲོས་སྒྱུར་དང་ལོ་མཇུག་གི་ནོར་དོན་ངེས་རྩིས་ལས་དོན་བདེ་བླག་ངང་སྤེལ་ཐུབ་པའི་འགན་ལེན་བྱ་ཆེད། 2022ལོའི་ཟླ་12ཚེས་26ཉིན་ནས་2023ལོའི་ཟླ་1ཚེས་9ཉིན་བར། ལྷ་ས་གྲོང་ཁྱེར་རིམ་གསུམ་སྲིད་དོན་ཞབས་ཞུ་ཚོམས་ཆེན་དང་དེ་བཞིན་སྡོད་ཁང་སྤྱི་གསོག་མ་དངུལ་བདག་སྤྲོད་བྱེད་སའི་དངུལ་ཁང་ཁག་གིས་སྡོད་ཁང་སྤྱི་གསོག་མ་དངུལ་བཅོལ་བ་དང་། འདོན་པ། དངུལ་བུན་གཡར་བ་སོགས་ཀྱི་ལས་སྒོ་གནས་སྐབས་གཉེར་མཚམས་འཇོག་རྒྱུ་དང་། 2022ལོའི་ཟླ་12ཚེས་20ཉིན་ནས་བཟུང་སྡོད་ཁང་སྤྱི་གསོག་མ་དངུལ་གྱི་དངུལ་བུན་གཡར་བའི་ལས་སྒོ་གསར་པ་བདག་སྤྲོད་བྱེད་ཀྱི་མེད་པ་དང་། 2023ལོའི་ཟླ་1ཚེས་10ཉིན་ནས་བཟུང་ལས་སྒོ་སླར་གསོ་བྱ་རྒྱུ་རེད་འདུག

ལས་ཁུངས་ཁག་གི་སྡོད་ཁང་སྤྱི་གསོག་མ་དངུལ་ལས་སྒོ་གཉེར་མཁན་གྱིས་ལས་བཟོའི་སྡོད་ཁང་སྤྱི་གསོག་མ་དངུལ་བཅོལ་བའི་ལས་སྒོ་རྒྱུན་གཏན་ལྟར་གཉེར་ཐུབ་པ་བྱ་ཆེད། ཟླ་12ཚེས་26ཉིན་གྱི་གོང་2022ལོའི་ལོ་འཁོར་གྱི་སྡོད་ཁང་སྤྱི་གསོག་མ་དངུལ་བཅོལ་བར་ཡོང་དགོས། གལ་ཏེ་ད་ལོའི་ལོ་འཁོར་གྱི་སྡོད་ཁང་སྤྱི་གསོག་མ་དངུལ་དུས་ཐོག་ཏུ་མ་བཅོལ་པའི་དབང་གིས། ལས་བཟོའི་སྡོད་ཁང་སྤྱི་གསོག་མ་དངུལ་ལེན་པ་དང་། དངུལ་བུན་གཡར་བ། རྩིས་ཁྲ་སྒྱུར་བ་སོགས་ཀྱི་ལས་སྒོ་གཉེར་བར་ཤུགས་རྐྱེན་ཐེབས་ཚེ་ལས་ཁུངས་སོ་སོས་འགན་འཁུར་དགོས།