ཤིན་ཧྭ་གསར་འགྱུར་ཁང་པེ་ཅིང་ནས་ཟླ་12ཚེས་3ཉིན་གློག་འཕྲིན་འབྱོར་གསལ། ཉེ་ཆར་ཕྱི་འབྲེལ་པུས《དུས་རབས་གསར་པའི་ཀྲུང་ཨའི་མཉམ་ལས་སྙན་ཞུ》ཁྱབ་བསྒྲགས་བྱས་ནས། ཀྲུང་གོ་དང་ཨ་རབ་རྒྱལ་ཁབ་དབར་གྱི་མཛའ་མཐུན་སྤེལ་རེས་ཀྱི་ལོ་རྒྱུས་ལ་ཕྱིར་མིག་བལྟས་པ་དང་། ཀྲུང་གོ་གསར་པ་དབུ་བརྙེས་རྗེས་དང་ལྷག་པར་དུ་དུས་རབས་གསར་པ་དང་དུས་མཚམས་གསར་པའི་ཀྲུང་གོ་དང་ཨ་རབ་དབར་གྱི་མཛའ་མཐུན་སྤེལ་རེས་ཀྱི་ལག་ལེན་གསེད་བཀྲོལ་བྱས་པ། ཀྲུང་གོ་དང་ཨ་རབ་ཀྱི་ལས་དབང་གཅིག་མཐུན་འདུས་གྲུབ་གཏོད་པའི་མདུན་ལམ་དང་ཁ་ཕྱོགས་ལ་རྒྱང་ལྟ་བྱས་པ་རེད།

《སྙན་ཞུའི》ནང་བསྟན་དོན། ཀྲུང་གོ་དང་ཨ་རབ་རྒྱལ་ཁབ་དབར་གྱི་འབྲེལ་བར་ལོ་རྒྱུས་ཡུན་རིང་ལྡན་ཡོད། ཞི་བདེ་མཉམ་ལས་དང་། སྒོ་དབྱེ་བསྟུན་མཁས། ཕན་ཚུན་སློབ་སྦྱོང་དང་དཔྱད་གཞིར་འཛིན་པ། གཉིས་ཁེ་གཉིས་ཕན་བཅས་ནི་ཐོག་མཐའ་བར་གསུམ་དུ་ཀྲུང་གོ་དང་ཨ་རབ་ཀྱི་ལོ་རྒྱུས་སྤེལ་རེས་བྱེད་པའི་བརྗོད་དོན་གཙོ་བོ་ཡིན། ཀྲུང་གོ་གསར་པ་དབུ་བརྙེས་རྗེས་ཀྱི་ལོ་70ལྷག་ཙམ་རིང་ཕྱོགས་གཉིས་པོའི་མཛའ་མཐུན་མཉམ་ལས་ཀྱི་ཁྱབ་རྒྱ་དང་གཏིང་ཟབ་ཚད་ཚང་མར་ལོ་རྒྱུས་རང་བཞིན་གྱི་མཆོང་སྐྱོད་བྱུང་ནས་ལྷོ་ལྷོ་མཉམ་ལས་ཀྱི་དཔེ་མཚོན་ཞིག་ཏུ་གྱུར་ཡོད། 2012ལོ་ནས་བཟུང་ཀྲུང་ཨའི་འཐབ་ཇུས་རོགས་ཟླའི་འབྲེལ་བར་མུ་མཐུད་འཕེལ་རྒྱས་གསར་པ་བྱུང་བ་དང“རྒྱུད་གཅིག་ལམ་གཅིག”མཉམ་བསྐྲུན་རྒྱུན་ཆད་མེད་པར་སྐས་རིམ་གསར་པ་ཞིག་ཏུ་སླེབས་ཡོད་པ་རེད།

《སྙན་ཞུའི》ནང་བསྟན་དོན། ཀྲུང་གོས་ཀྲུང་ཨའི་དབུ་ཚོགས་སྐབས་དང་པོ་འཚོགས་པ་དེ་གོ་སྐབས་སུ་བརྩིས་ནས། ཨ་རབ་རྒྱལ་ཁབ་ཁག་དང་མཉམ་དུ་ཀྲུང་གོ་དང་ཨ་རབ་ཀྱི་སྲོལ་རྒྱུན་མཛའ་གྲོགས་དར་སྤེལ་གཏོང་བ་དང་། ཀྲུང་གོ་དང་ཨ་རབ་ཀྱི་ཕྱོགས་ཡོངས་དང་། རིམ་པ་མང་བ། ཁྱབ་ཁོངས་ཆེ་བ་བཅས་ཀྱི་མཉམ་ལས་རྣམ་པ་རྒྱུན་ཆད་མེད་པར་འཐུས་སྒོ་ཚང་དུ་དང་གཏིང་ཟབ་ཏུ་གཏོང་བ། དུས་རབས་གསར་པར་ཕྱོགས་པའི་ཀྲུང་གོ་དང་ཨ་རབ་ཀྱི་ལས་དབང་གཅིག་མཐུན་འདུས་གྲུབ་ལག་གདང་སྦྲེལ་ནས་གཏོད་པ། ཀྲུང་གོ་དང་ཨ་རབ་ཕྱོགས་གཉིས་པོའི་མི་དམངས་ལ་བདེ་སྐྱིད་སྐྲུན་པ། འཕེལ་རྒྱས་འགྲོ་བཞིན་པའི་རྒྱལ་ཁབ་མཐུན་སྒྲིལ་མཉམ་ལས་བྱ་རྒྱུར་སྐུལ་ཁྲིད་བཅས་བྱས་ནས། འཛམ་གླིང་ཞི་བདེ་དང་འཕེལ་རྒྱས་ཀྱི་བྱ་གཞག་ལ་ཐུན་མོང་ཐོག་སྲུང་སྐྱོང་བྱེད་འདོད་ཡོད་པ་རེད།