ལོ་ལྟར་གྱི་ཟླ་12ཚེས་4ཉིན་ནི་རྒྱལ་ཁབ་ཀྱིས་གཏན་ལ་འཁེལ་བའི་རྩ་ཁྲིམས་དྲིལ་བསྒྲགས་ཉིན་མོ་ཡིན་པ་དང་། ད་ལོ་ནི་རྩ་ཁྲིམས་དྲིལ་བསྒྲགས་ཉིན་མོ་ཐེངས་དགུ་པ་དེ་རེད། 1982ལོའི་ཟླ་12ཚེས་4ཉིན་ཀྲུང་གོའི་ད་ལྟའི་རྩ་ཁྲིམས་དེ་དངོས་སུ་ལག་བསྟར་བྱས་པ་ནས་བཟུང་། ཉིན་དེ་རྩ་ཁྲིམས་ཁྱབ་གདལ་ཉིན་མོར་གཏན་འཁེལ་བྱས་ཤིང་། རྒྱལ་ཁབ་ཀྱི་རྩ་ཁྲིམས་དྲིལ་བསྒྲགས་ཉིན་མོ་འཛུགས་དོན་ནི་དྲན་གསོའི་ཉིན་མོ་ཞིག་མང་དུ་གཏོང་ཆེད་དང་། རྒྱལ་ཡོངས་ཀྱི་གོང་འོག་ཀུན་གྱིས་རྩ་ཁྲིམས་ལ་བརྩི་བཀུར་དང་། རྩ་ཁྲིམས་གཙིགས་སུ་འཛིན་པ། རྩ་ཁྲིམས་ལ་བརྟེན་ནས་ཁེ་དབང་སྲུང་བའི་སྤྱི་ཚོགས་ཀྱི་རྣམ་པ་ཞིག་ཆགས་པའི་ཆེད་དུ་རེད་ལ། རང་ལྗོངས་ལ་མཚོན་ནས་བརྗོད་ན་དེ་བས་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་རྩ་ཁྲིམས་ཀྱི་འདུ་ཤེས་ཟབ་ཏུ་བཏང་ནས་རྩ་ཁྲིམས་གོང་བཀུར་དང་། རྩ་ཁྲིམས་སློབ་སྦྱོང་། རྩ་ཁྲིམས་བརྩི་སྲུང་། རྩ་ཁྲིམས་བེད་སྤྱོད་བཅས་བྱས་ཏེ་ཁྲིམས་བཞིན་བོད་སྐྱོང་གི་རྣམ་པ་གསར་པ་རྒྱུན་ཆད་མེད་པར་གཏོད་རྒྱུར་སློབ་གསོ་ཁྲིད་སྟོན་བྱ་རྒྱུ་དེ་རེད།

རྩ་ཁྲིམས་ནི་རྒྱལ་ཁབ་ཀྱི་རྩ་བའི་བཅའ་ཁྲིམས་དང་། རྒྱལ་སྐྱོང་བདེ་འཁོད་ཀྱི་སྤྱིའི་སྒྲིག་ཡིག ཏང་དང་མི་དམངས་ཀྱི་འདོད་འདུན་གཅིག་སྡུད་མཚོན་ཚུལ་བཅས་རེད། སྤྱི་ཚོགས་རིང་ལུགས་ཀྱི་ཁྲིམས་སྐྱོང་གིས་ངེས་པར་དུ་ཏང་གི་འགོ་ཁྲིད་མཐའ་འཁྱོངས་བྱེད་དགོས་པ་དང་། ཏང་གི་འགོ་ཁྲིད་ངེས་པར་དུ་སྤྱི་ཚོགས་རིང་ལུགས་ཀྱི་ཁྲིམས་སྐྱོང་ལ་བརྟེན་དགོས། རྩ་ཁྲིམས་ཕྱོགས་ཡོངས་ནས་ལག་བསྟར་འགན་ལེན་གྱི་སྒྲིག་སྲོལ་ལམ་སྲོལ་འཐུས་སྒོ་ཚང་དུ་གཏོང་བར། གནས་བབ་ཨང་དང་པོར་འཇོག་རྒྱུ་ནི་ཆབ་སྲིད་ཀྱི་ཚུགས་གནས་སྔར་བས་མཐོ་རུ་བཏང་ནས“འདུ་ཤེས་བཞི”ཟབ་ཏུ་གཏོང་བ་དང་། “གདེང་ཚོད་བཞི”བརྟན་དུ་གཏོང་བ། “སྲུང་སྐྱོང་གཉིས”ཐུབ་པ་བྱེད་པ། རྩ་ཁྲིམས་ཀྱི་དབང་གྲགས་སྲུང་སྐྱོང་བྱེད་པའི་བྱ་སྤྱོད་ངོ་མའི་ཐོག་ནས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་ཏང་ཀྲུང་དབྱང་གི་སྲོག་ཤིང་དང་། ཏང་ཡོངས་ཀྱི་སྲོག་ཤིང་གི་གནས་བབ་སྲུང་སྐྱོང་བྱེད་པ། ཏང་ཀྲུང་དབྱང་གི་དབང་གྲགས་དང་གཅིག་སྡུད་གཅིག་གྱུར་གྱི་འགོ་ཁྲིད་སྲུང་སྐྱོང་བྱེད་པ།  སྤྱི་ཁྱབ་ཧྲུའུ་ཅིའི་ཏང་ཀྲུང་དབྱང་གི་སྲོག་ཤིང་དང་། ཏང་ཡོངས་ཀྱི་སྲོག་ཤིང་གི་གནས་བབ་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་སེམས་སུ་གཏིང་ཟབ་ཟུག་པ། སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པ་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་ཁྲག་རྒྱུན་ནང་འདྲེས་པ་བཅས་བྱས་ནས་ཏང་ཡོངས་ཀྱི་སྲོག་ཤིང་དང་། དམག་དཔུང་གི་དམག་སྤྱི། མི་དམངས་ཀྱི་གཙོ་འཛིན་བཅས་ལ་གོང་བཀུར་དང་། ཡིད་ཆེས། ལྷག་བསམ་རྣམ་དག་གིས་སྲུང་སྐྱོབ་བཅས་བྱ་རྒྱུ་དེ་མི་རིགས་ཁག་གི་ལས་བྱེད་པ་དང་མང་ཚོགས་ཀྱི་ཆབ་སྲིད་ཀྱི་རང་རྟོགས་དང་། བསམ་བློའི་རང་རྟོགས། བྱ་སྤྱོད་ཀྱི་རང་རྟོགས་བཅས་སུ་འགྱུར་བ་བྱ་རྒྱུ་དེ་ཡིན།

རྩ་ཁྲིམས་ཀྱི་རྨང་གཞི་དེ་མི་དམངས་ཀྱིས་སེམས་གཏིང་ནས་བརྩི་སྲུང་ཞུ་རྒྱུར་ཐུག་པ་དང་། རྩ་ཁྲིམས་ཀྱི་སྟོབས་ཤུགས་ཆེན་པོ་ནི་མི་དམངས་མང་ཚོགས་ཚོའི་ཟོལ་མེད་དད་མོས་ལ་ཐུག་ཡོད།  རྩ་ཁྲིམས་མི་སེམས་སུ་གཏིང་ཟབ་ཟུག་ཚེ། ལག་བསྟར་བྱ་རྒྱུ་དེ་མི་དམངས་ཀྱི་རང་རྟོགས་བྱ་སྤྱོད་ལ་དངོས་འབྲེལ་འགྱུར་ཐུབ། རྩ་ཁྲིམས་དྲིལ་བསྒྲགས་དང་སློབ་གསོ་གཏོང་རྒྱུ་དེ་ཁྲིམས་སྐྱོང་དྲིལ་བསྒྲགས་སློབ་གསོའི་ལྟེ་བའི་ནང་དོན་ལ་བརྩི་བ་དང་། རྩ་ཁྲིམས་ཀྱི་དགོངས་དོན་མི་སེམས་ལ་ཟུག་པ་བྱས་ཐོག རྩ་ཁྲིམས་ལ་བརྩི་སྲུང་ཞུ་རྒྱུ་དེ་མི་དམངས་ཡོངས་ཀྱི་རང་རྟོགས་བྱ་སྤྱོད་ལ་འགྱུར་བ་བྱེད་དགོས། 

རྩ་ཁྲིམས་ཀྱི་ནུས་པ་ནི་ལག་ལེན་ལ་ཐུག་ཡོད་ལ། རྩ་ཁྲིམས་ཀྱི་དབང་གྲགས་ཀྱང་ལག་ལེན་ལ་ཐུག་ཡོད། རྩ་ཁྲིམས་ཕྱོགས་ཡོངས་ནས་ལག་བསྟར་འགན་ལེན་གྱི་སྒྲིག་སྲོལ་ལམ་སྲོལ་འཐུས་སྒོ་ཚང་དུ་གཏོང་བའི་བཀོད་སྒྲིག་བླང་བྱ་གཞིར་བཟུང་། རྩ་ཁྲིམས་ལག་ལེན་བསྟར་རྒྱུ་གནས་བབ་དེ་བས་མཐོ་བའི་ཐོག་འཇོག་པ་དང་། གལ་ཆེའི་གྲོས་རིམ་ནང་འཇུག་པ། ཚན་རིག་དང་མཐུན་པའི་ངང་ཁྲིམས་འཛུགས་པ། ཁྲིམས་འཛིན་ནན་པོ་བྱེད་པ། གཞུང་དྲང་ཁྲིམས་འཛིན་བྱེད་པ་བཅས་བྱེད་དགོས་པ་དང་། ལྷག་དོན་དུ་བོད་ཀྱི་དོན་དངོས་ལ་གཞིགས་ནས་རྩ་ཁྲིམས་ཀྱི་སྒྲོམ་གཞིའི་འོག སྤྱི་ཚོགས་བརྟན་ལྷིང་སྲུང་སྐྱོང་དང་། ཁ་ཕྲལ་ལ་ངོ་རྒོལ། མི་རིགས་མཐུན་སྒྲིལ་ལ་ཤུགས་སྣོན་སོགས་ཐད་ཀྱི་བཅའ་ཁྲིམས་ཁྲིམས་སྲོལ་བཟོ་རྒྱུར་ཞིབ་འཇུག་བྱེད་པ་དང་། བཅའ་ཁྲིམས་དང་སྒྲིག་སྲོལ་བཞིན་འགན་ནུས་སྒྲུབ་པའི་གཞི་རིམ་གྱི་ནུས་པ་ཆེ་རུ་ནུས་ལྡན་གཏོང་བ། རང་ལྗོངས་སུ་རྩ་ཁྲིམས་ལག་བསྟར་ནུས་ལྡན་ཐུབ་པའི་འགན་ལེན་བཅས་བྱས་ནས་མི་དམངས་མང་ཚོགས་ཚང་མས་ཁྲིམས་འཛིན་གྱོད་གཞིའི་ཁྲོད་དྲང་གཞག་དྲང་བདེན་ཚོར་བར་བྱེད་དགོས། ཚང་མས་རྩ་ཁྲིམས་གོང་བཀུར་དང་རྩ་ཁྲིམས་སློབ་སྦྱོང་། རྩ་ཁྲིམས་ལ་བརྩི་སྲུང་། རྩ་ཁྲིམས་བེད་སྤྱོད་བཅས་ཀྱི་དཔེ་བཟང་བ་བྱེད་པ་དང་། ཁྲིམས་བཞིན་ཇུས་འགོད་དང་། ཁྲིམས་བཞིན་དོན་སྒྲུབ། ཁྲིམས་བཞིན་དོ་དམ་བཅས་ཀྱི་ནུས་པ་རྒྱུན་ཆད་མེད་པར་ཆེ་རུ་གཏོང་བ་བཅས་བྱས་ནས་དབང་ཆ་ཐོག་མཐའ་བར་གསུམ་དུ་ཁྲིམས་སྐྱོང་གི་བགྲོད་ལམ་ཐོག་སྤྱད་དེ་མི་དམངས་ལ་ཞབས་འདེགས་ཞུ་བ་དང་མི་དམངས་ལ་བདེ་སྐྱིད་སྐྲུན་ཐུབ་པ་བྱེད་དགོས།