ཉེ་ཆར། གསར་འགོད་པས་བོད་རང་སྐྱོང་ལྗོངས་ཚོང་དོན་ཐིང་ནས་ཤེས་རྟོགས་བྱས་པར་གཞིགས་ན། ལྷ་ས་གྲོང་ཁྱེར་ལ་རྒྱལ་ཁབ་རྒྱལ་སྒྲོལ་དྲ་ཐོག་ཚོང་དོན་ཕྱོགས་བསྡུས་ཚོད་ལྟ་ཁུལ་བསྐྲུན་རྒྱུའི་ཆོག་མཆན་ཐོབ་པས་བོད་དུ་རྒྱལ་སྒྲོལ་དྲ་ཐོག་ཚོང་དོན་ཕྱོགས་བསྡུས་ཚོད་ལྟ་ཁུལ་མེད་པའི་སྟོང་ཆ་གསབ་རྒྱུ་རེད།

ཀྲུང་གོ(ལྷ་ས)རྒྱལ་སྒྲོལ་དྲ་ཐོག་ཚོང་དོན་ཕྱོགས་བསྡུས་ཚོད་ལྟ་ཁུལ་བསྐྲུན་རྒྱུ་དེས་ཨེ་ཤེ་ཡ་ལྷོ་མ་དང་ཨེ་ཤེ་ཡ་ཤར་ལྷོའི་སྒོ་དབྱེ་མཉམ་ལས་དང“རྒྱུད་གཅིག་ལམ་གཅིག”གི་ས་ཁོངས་དཔལ་འབྱོར་འཕེལ་རྒྱས་དང་དེ་བཞིན་སྒྲིག་སྲོལ་གསར་གཏོད་ཁྲོད་ཀྱི་ལྷ་སའི་སྣེ་ཁྲིད་ནུས་པ་འདོན་སྤེལ་བྱས་ནས་ཨེ་ཤེ་ཡ་ལྷོ་མ་དང་ཨེ་ཤེ་ཡ་ཤར་ལྷོར་གཞི་ཚུགས་པ་དང་གོ་ལ་ཧྲིལ་པོར་ཕྱོགས་པའི་རྒྱལ་སྒྲོལ་དྲ་ཐོག་ཚོང་དོན་རྟེན་གཞི་བསྐྲུན་རྒྱུ་རེད།

ཤེས་རྟོགས་བྱུང་བར་གཞིགས་ན། 2025ལོར་སླེབས་སྐབས་ལྷ་སས་རྒྱལ་སྒྲོལ་དྲ་ཐོག་ཚོང་དོན་གྱི་སྣེ་འདྲེན་ཁེ་ལས་2ནས་3བར་ནང་འདྲེན་དང་སྐྱེད་སྲིང་བྱས་ཏེ་ལྷ་སའི་ཁྱད་ཆོས་ལྡན་པའི་རྒྱལ་སྒྲོལ་དྲ་ཐོག་ཚོང་དོན་གྱི་ཕྱོགས་བསྡུས་ཚོད་ལྟ་ཁུལ་རིམ་བཞིན་བསྐྲུན་ནས་ལྷ་ས་གྲོང་ཁྱེར་དང་ལྗོངས་ཡོངས་ཀྱི་ཚོང་དོན་སྤུས་ཚད་མཐོ་བའི་ངང་འཕེལ་རྒྱས་འགྲོ་རྒྱུར་སྐུལ་འདེད་གཏོང་རྒྱུ་རེད།

རྒྱལ་ཁབ་དང་བོད་ལྗོངས་ཀྱིས་བཀོད་སྒྲིག་ཤུགས་ཆེན་བྱས་པ་ལས་ལྷ་སར་ཨེ་ཤེ་ཡ་ལྷོ་མའི་རྒྱལ་ཁབ་དང་རྒྱལ་སྒྲོལ་དྲ་ཐོག་ཚོང་དོན་སྤེལ་བའི་དམིགས་བསལ་གྱི་ལེགས་ཆ་ལྡན་ཡོད། “ལོ་ལྔ་ཚན་བཅུ་གསུམ་པའི”དུས་མཇུག་ཏུ་སླེབས་སྐབས་བོད་ལྗོངས་སུ་ལྷ་སའི་མཁའ་འགྲུལ་འགག་སྒོ་ཚུད་པའི་སྒོ་དབྱེ་ཟིན་པའི་རྒྱལ་སྤྱིའམ་ཡང་ན་ཕྱོགས་གཉིས་རང་བཞིན་གྱི་འགག་སྒོ་5དང་། རྒྱལ་ཁབ་རིམ་པའི་གསར་སྤེལ་ཁུལ་1 ཕྱོགས་བསྡུས་ཁྲལ་སྲུང་ཁུལ1བཅས་ཡོད། 2021ལོའི་ལོ་མཇུག་ཏུ་ལྷ་སའི་སྐམ་སའི་རྒྱལ་ཁབ་ཟོག་འགྲེམས་ལྟེ་གནས“ལོ་ལྔ་ཚན་བཅུ་བཞི་པའི”རྒྱལ་ཁབ་ཟོག་འགྲེམས་ལྟེ་གནས་ཁག་དང་པོའི་མིང་ཐོར་དངོས་སུ་བཅུག་པས། ལྷ་སའི་རྒྱལ་སྒྲོལ་དྲ་ཐོག་ཚོང་དོན་རྒྱལ་སྤྱིའི་ཟོག་འགྲེམས་བགྲོད་ལམ་ཞིག་རགས་ཙམ་ཆགས་ཡོད། དེ་དག་ཚང་མས་ཀྲུང་གོའི(ལྷ་ས)རྒྱལ་སྒྲོལ་དྲ་ཐོག་ཚོང་དོན་ཕྱོགས་བསྡུས་ཚོད་ལྟ་ཁུལ་སྐྲུན་པར་རྨང་གཞི་བརྟན་པོ་བཏིང་ཡོད།