འདི་ནི་2022ལོའི་ཟླ་9ཚེས་25ཉིན་པར་བླངས་པའི་ཀྲུང་གོ་གློག་སྐྲུན་ནན་ཨོ་གཙང་པོ་འབབ་རྒྱུད་ཀྱི་སྐས་རིམ་ཆུ་གློག་རྣམ་གྲངས་ཀྱི་ལོ་སིའི་བྱང་རྒྱུད་ཀྱི་ཧྥེང་ཧྲ་ལི་ཞིང་ཆེན་དུ་གནས་པའི་རིམ་བཞིའི་གློག་ཁང་ཡིན་པ།

“ལོ་མང་རིང་ཧྥེང་ཧྲ་ལི་རུ་ཡོང་མྱོང་མེད། ཀྲུང་གོ་གློག་ཤུགས་འཛུགས་སྐྲུན་ཀུང་སིས་ནན་ཨོ་གཙང་པོའི་ཐོག་ཆུ་ཤུགས་གློག་ཁང་མང་པོ་བསྐྲུན་པ་དང་། ཁོང་ཚོས་ས་གནས་དེ་གར་གྲོང་ཚོ་གསར་པ་དང་གཞུང་ལམ་སྐྲུན་རོགས་བྱས་ནས། གྲོང་མིའི་འཚོ་བ་ཉིན་རེ་ལས་མ་འདས་པར་ལེགས་སུ་ཕྱིན་པ་མཐོང་སྐབས་ཧང་སངས་བྱུང་། འདི་གར་འགྱུར་ལྡོག་ཧ་ཅང་ཆེན་པོ་བྱུང་བས། ངས་སེམས་གཏིང་ནས་ཀྲུང་གོ་གློག་ཤུགས་འཛུགས་སྐྲུན་ཚོགས་པ་ཚད་ཡོད་ཀུང་སིར་ཐུགས་རྗེ་ཆེ་ཞུ་ཡི་ཡིན”ཞེས་ལོ་སིའི《སྤྱི་ཚོགས་དཔལ་འབྱོར་ཚགས་པར》གྱི་གསར་འགོད་པ་ལ་ས་སྨིས་ཉིན་ཤས་གོང་ལོ་ཀྲུང་མཐའ་མཚམས་ས་ཁུལ་གྱི་ཧྥེང་ཧྲ་ལི་ཞིང་ཆེན་དུ་ཤིན་ཧྭ་གསར་འགྱུར་ཁང་གི་གསར་འགོད་པར་དེ་ལྟར་བརྗོད།

ལ་ས་སྨིས་བརྗོད་པ་ནི་ཀྲུང་གོ་གློག་ཤུགས་འཛུགས་སྐྲུན་གྱི་ནན་ཨོ་གཙང་པོ་འབབ་རྒྱུད་ཀྱི་སྐས་རིམ་ཆུ་ཤུགས་གློག་ཁང་རྣམ་གྲངས་ཤིག་ཡིན་པ་དང་དེ་ནི་ལོ་སིའི་མངའ་ཁོངས་སུ་རྒྱུག་པའི་ཆུ་ཕྲན་ཆེ་ཤོས་ནན་ཨོ་གཙང་པོའི་ཐོག་བསྐྲུན་ཡོད། དེ་ནི་ཀྲུང་གོའི་ཁེ་ལས་ཀྱིས་ཕྱི་རྒྱལ་དུ་འབབ་རྒྱུད་ཧྲིལ་པོར་སྤྱི་ཡོངས་ཀྱི་འཆར་འགོད་དང་མ་འཇོག་འཛུགས་སྐྲུན་གྱི་རྣམ་གྲངས་ཐོག་མ་དེ་ཡིན། རྣམ་གྲངས་དེ་ལོ་སིའི་བྱང་རྒྱུད་ལང་པོ་ལ་མངའ་སྡེ་དང་ཧྥེང་ཧྲ་ལི་ཞིང་ཆེན་དུ་གནས་པ་དང་རྣམ་གྲངས་ནང་སྐས་རིམ་གློག་ཁང་7ཚུད་ཡོད་པ་དང་འཕྲུལ་ཚན་ཨ་མ་ནས་གློག་གཏོང་ཚད་ཆན་ཝ་ཁྲི་127.2ཟིན་ནས་2021ལོའི་ཟླ་9པའི་ཟླ་མཇུག་ཏུ་ཚང་མ་སྤྱོད་འགོ་ཚུགས་ཡོད་པ་རེད།

“ང་ཚོ་ཀྲ་ལུན་གྲོང་ཚོར་དུད་ཚང་71དང་མི་གྲངས་500ལྷག་ཙམ་ཡོད། གློག་ཁང་བསྐྲུན་པའི་དབང་གིས་2016ལོར་དེ་གར་སྤོས་པ་ཡིན། ཁོང་ཚོས(ཀྲུང་གོ་གློག་ཤུགས་འཛུགས་སྐྲུན་ཚོགས་པ་ཚད་ཡོད་ཀུང་སི)ང་ཚོར་ཁང་པ་ཡག་པོ་ཞིག་བསྐྲུན་པ་དང་གཞུང་ལམ་རྒྱས་སྐྲུན་བྱས་པས། ད་ཆ་གྲོང་མི་ཚོ་འགྲོ་སྐྱོད་ཧ་ཅང་སྟབས་བདེ་རུ་ཕྱིན་ཡོད”ཅེས་ཧྥེང་ཧྲ་ལི་ཞིང་ཆེན་ཀྲ་ལུན་གྲོང་ཚོའི་ལོ་49ལ་སླེབས་པའི་གྲོང་དཔོན་ཀྲུང་སེན་ཧོ་ཡིས་གསར་འགོད་པར་དེ་ལྟར་བརྗོད།

“ནན་ཨོ་གཙང་པོའི་འབབ་རྒྱུད་ཀྱིས་ལུགས་མཐུན་གྱི་ཇུས་གཞི་སྤྱད་དེ། ཡུལ་དེ་གའི་ཡུལ་མི་གནས་སྤོ་ཉུང་དུ་གཏོང་གང་ཐུབ་བྱས་པ་དང་། རྨོ་ཞིང་དང་ནགས་ས་ཆུས་བསྣུབས་རྒྱུ་ཉུང་དུ་གཏོང་གང་ཐུབ་བྱས་པ། སྐྱེ་ཁམས་ཁོར་ཡུག་ལ་ཤུགས་རྐྱེན་ཐེབས་ཚད་ཆུང་དུ་གཏོང་གང་ཐུབ་བྱས་ཡོད”ཅེས་གློག་ཁང་གཉེར་སྐྱོང་གི་འགན་འཁུར་བ་ཀྲུང་གོ་གློག་ཤུགས་འཛུགས་སྐྲུན་ཚོགས་པ་ཚད་ཡོད་ཀུང་སི་ལོ་སིའི་ནན་ཨོ་གཙང་པོའི་འབབ་རྒྱུད་གློག་གཏོང་ཚད་ཡོད་ཀུང་སིའི་སྤྱི་ཁྱབ་ཅིང་ལི་སུང་ཧུའེ་ཧུང་གིས་ངོ་སྤྲོད་བྱས་པ་རེད།

“ང་ཚོས་གསར་སྤེལ་བྱས་པའི་རྣམ་གྲངས་ལ་འགན་འཁྲི་སྔོན་ལ་འཁུར་ནས་ས་གནས་དེ་གའི་མི་སེར་བདེ་སྡོད་ལས་བརྩོན་ཐུབ་པར་བྱ་རྒྱུ་ནི་ང་ཚོའི་མཐར་ཐུག་གི་དམིགས་ཚད་ཡིན། ནན་ཨོ་གཙང་པོའི་ཆུ་ཤུགས་གློག་ཁང་རྣམ་གྲངས་གསར་སྤེལ་འཛུགས་སྐྲུན་བྱེད་རིང་ང་ཚོས་ས་གནས་དེ་གར་གནས་སྤོས་ཡུལ་མིའི་གྲོང་ཚོ་གསར་པ་30བསྐྲུན་པ་དང་། ཟམ་པ་20ལྷག་ཙམ་བརྒྱབ་པ། གཞུང་ལམ་སྤྱི་ལེ་500ལྷག་ཙམ་བཟོས་པ་བཅས་བྱས་ནས། ས་གནས་དེ་གའི་གྲོང་མིའི་ཐོན་སྐྱེད་དང་འཚོ་བའི་ཆུ་ཚད་མཐོ་རུ་ཤུགས་ཆེན་བཏང་བ་དང་། རྣམ་གྲངས་དེའི་མཐའ་འཁོར་གྱི་གྲོང་མིས་གནམ་ཆུ་ཁོ་ན་སྒུག་མི་དགོས་པ་མ་ཟད། སོ་ཕག་གི་མཉམ་བསྲེས་གྲུབ་ཆའི་སྡོད་ཁང་ནང་སྡོད་རྒྱུ་བྱུང་ཡོད”ཅེས་སུང་ཧུའེ་ཧུང་གིས་བརྗོད།