རྩ་ཁྲིམས་དང་བཅའ་ཁྲིམས་ཀྱི་གཏན་འབེབས་གཞིར་བཟུང་། རྒྱལ་ཡོངས་ཀྱི་རྫོང་དང་ཤང་རིམ་པ་གཉིས་ཀྱི་མི་དམངས་འཐུས་ཚོགས་ཀྱི་སྐབས་བརྗེ་འདེམས་བསྐོའི་ལས་དོན་2021ལོའི་ལོ་སྟོད་ནས་བཟུང་གཅིག་རྗེས་གཉིས་མཐུད་ངང་སྤེལ་འགོ་ཚུགས་ཤིང་། འདི་ལོའི་ཟླ་6པའི་ཟླ་མཇུག་ཏུ་ཕྱོགས་ཡོངས་ནས་ལེགས་གྲུབ་བྱུང་ཡོད། ཞིང་ཆེན་དང་། རང་སྐྱོང་ལྗོངས། ཐད་སྐྱོང་གྲོང་ཁྱེར་བཅས་31ནས་རྫོང་དང་ཤང་རིམ་པ་གཉིས་ཀྱི་མི་དམངས་འཐུས་ཚོགས་ཀྱི་འཐུས་མི་2629447ཐད་ཀར་བདམས་ཐོན་བྱུང་སྟེ། སྐབས་གོང་མ་ལས་འཐུས་མི་151459མང་དུ་སོང་བས་6.11%འཕར་ཡོད། ཐེངས་འདིའི་རྒྱལ་ཡོངས་ཀྱི་རྫོང་དང་ཤང་རིམ་པ་གཉིས་ཀྱི་མི་དམངས་འཐུས་ཚོགས་ཀྱི་སྐབས་བརྗེའི་འདེམས་བསྐོ་ཁྲིམས་ལུགས་དང་། བདེ་འཇགས། བརྟན་བརླིང་། གོ་རིམ་བཅས་དང་ལྡན་པ་དང་། རྒྱ་ཆེའི་འདེམས་དམངས་ཀྱི་སྤྲོ་སེམས་རབ་ཏུ་འཕེལ་བ། འདེམས་བསྐོའི་ཁོར་ཡུག་ལེགས་ལ་གཙང་བ། འདེམས་བསྐོའི་གྲུབ་འབྲས་མི་དམངས་ཀྱི་བློ་ལ་བབས་པ་བཅས་བྱུང་བའི་ཐོག་ནས་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དམངས་གཙོ་ཆབ་སྲིད་ཀྱི་ཁྱད་ཆོས་དང་ལེགས་ཆ་མངོན་ཡོད།

ཏང་གི་སྐབས་བཅུ་དགུ་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་བཞི་པའི་ཐོག“གཞི་རིམ་མི་དམངས་འཐུས་ཚོགས་ཀྱི་འཐུས་མིའི་མི་གྲངས་མང་དུ་འོས་འཚམ་གཏོང་དགོས”ཞེས་བླང་བྱ་བཏོན་པ་དེ་ལག་བསྟར་དོན་འཁྱོལ་བྱས་ཏེ། རྒྱལ་ཡོངས་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་འདེམས་བསྐོའི་བཅའ་ཁྲིམས་ལ་བཟོ་བཅོས་བརྒྱབ་ནས་རྫོང་རིམ་པའི་མི་དམངས་འཐུས་ཚོགས་ཀྱི་འཐུས་མིའི་མི་གྲངས་ཀྱི་གཞི་གྲངས་དེ་120ནས་140བར་མང་དུ་བཏང་བ་དང་། ཤང་དང་གྲོང་རྡལ་གྱི་མི་དམངས་འཐུས་ཚོགས་ཀྱི་འཐུས་མིའི་མི་གྲངས་ཀྱི་གཞི་གྲངས་དེ་40ནས་45བར་མང་དུ་བཏང་ཡོད། བཟོ་བཅོས་བརྒྱབ་རྗེས་ཀྱི་འདེམས་བསྐོའི་བཅའ་ཁྲིམས་གཞིར་བཟུང་། ཞིང་ཆེན་རིམ་པ་དང་རྫོང་རིམ་པའི་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གིས་རྫོང་དང་ཤང་རིམ་པ་གཉིས་ཀྱི་མི་དམངས་འཐུས་ཚོགས་ཀྱི་འཐུས་མིའི་མི་གྲངས་སླར་ཡང་གཏན་འཁེལ་བྱས་ཡོད། ས་གནས་ཁག་གིས་གསར་དུ་ཁ་སྣོན་བརྒྱབ་པའི་འཐུས་མིའི་མི་གྲངས་བགོ་སྐབས་གཞི་རིམ་གྱི་མང་ཚོགས་དང་སྡེ་ཁུལ་གྱི་ལས་དོན་པ་སོགས་ལ་གཟིགས་སྐྱོང་བྱ་རྒྱུར་སྣང་ཆེན་བྱས་ཤིང་། དེའི་ནང་རྫོང་རིམ་པའི་མི་དམངས་འཐུས་ཚོགས་ཀྱི་འཐུས་མིའི་མི་གྲངས་དེ་ཤང་དང་གྲོང་རྡལ་གྱིས་སྒྱུར་འཛུགས་བྱས་པའི་ཁྲོམ་གཞུང་གཙོ་གནད་དུ་བཟུང་ནས་གཟིགས་སྐྱོང་བྱས་ཏེ། ཁྲོམ་གཞུང་སྒྱུར་འཛུགས་བྱས་རྗེས་གཞི་རིམ་མང་ཚོགས་ཆབ་སྲིད་ནང་ཐེ་ཞུགས་བྱེད་ཚད་མི་འདང་བའི་ཤང་དང་གྲོང་རྡལ་གྱི་གནད་དོན་དམིགས་ས་ཡོད་པའི་སྒོ་ནས་ཐག་གཅོད་བྱས་ཡོད།

འདེམས་དམངས་དུང་ཕྱུར་10.64དང་འབྲེལ་བ་ཡོད་པའི་ད་ཐེངས་ཀྱི་རྫོང་དང་ཤང་མི་དམངས་འཐུས་ཚོགས་ཀྱི་སྐབས་བརྗེ་འདེམས་བསྐོ་ནི་བརྒྱུད་རིམ་ཧྲིལ་པོར་མི་དམངས་དམངས་གཙོ་གསོན་ཉམས་དོད་ཤོས་ཀྱིས་ལག་ལེན་བྱས་པ་ཞིག་རེད། རྫོང་རིམ་པའི་མི་དམངས་འཐུས་ཚོགས་ཀྱི་འདེམས་བསྐོར་ཞུགས་མཁན་འདེམས་དམངས་དུང་ཕྱུར་9.21ཟིན་པ་དེས་ཐོ་འགོད་བྱས་པའི་འདེམས་དམངས་ཀྱི་86.49%བཟུང་བ་དང་། ཤང་རིམ་པའི་མི་དམངས་འཐུས་ཚོགས་ཀྱི་འཐུས་མི་འདེམས་བསྐོའི་ནང་ཞུགས་མཁན་འདེམས་དམངས་དུང་ཕྱུར་6.23ཟིན་པ་དེས་ཐོ་འགོད་བྱས་པའི་འདེམས་དམངས་ཀྱི་85.63%བཟུང་བ། རྫོང་དང་ཤང་རིམ་པ་གཉིས་ཀྱི་འདེམས་བསྐོ་ཐེངས་གཅིག་ལ་ལེགས་གྲུབ་བྱུང་བའི་འདེམས་ཁུལ་གྱིས་འདེམས་ཁུལ་བསྡོམས་འབོར་གྱི་99.80%དང་99.97%སོ་སོར་བཟུང་ཡོད།