“ཤེས་ལྡན་པ་གསོ་སྐྱོང་བྱ་རྒྱུ་ནི་རོགས་སྐྱོར་གལ་ཆེ་ཤོས་ཤིག་ཡིན་སྟབས། ཆབ་མདོར་བྱང་ཚད་མཐོ་ཞིང་ནམ་ཡང་གནས་པའི་སྨན་བཅོས་ཤེས་ལྡན་པའི་དཔུང་ཁག་ཅིག་འཇོག་རྒྱུ་ནི་ང་ཚོའི་དམིགས་ཡུལ་ཡིན”2019ལོར་ཁྲུང་ཆིང་གྲོང་ཁྱེར་གྱི་སྨན་བཅོས་ཤེས་ལྡན་པའི་ཚོགས་སྒྲིག་རྣམ་པའི་བོད་སྐྱོར་ལས་དོན་རུ་ཁག་གི་རུ་དཔོན་ཅང་དབྱིང་ཅིའུ་ཆབ་མདོར་སླེབས་མ་ཐག་རུ་མི་སྒྲིག་འཛུགས་བྱས་ཏེ་ལག་རྩལ་གསར་པ་བོད་ཤར་རྒྱུད་ཀྱི་ས་གཞི་ཆེན་མོར་སྤེལ་ཏེ་ཆབ་མདོར་རང་སའི་སྨན་བཅོས་ཤེས་ལྡན་པའི་དཔུང་ཁག་ཅིག་གསོ་སྐྱོང་བྱེད་པར་གཞོལ་ཡོད།

ལོ་གསུམ་རིང་། ཁྲུང་ཆིང་གྲོང་ཁྱེར་གྱི་སྨན་བཅོས་ཤེས་ལྡན་པའི་ཚོགས་སྒྲིག་རྣམ་པའི་བོད་སྐྱོར་ལས་དོན་རུ་ཁག་ཁག་བཞི་པ་དང་ལྔ་པའི་ལས་དོན་པ་46ཚང་མས་རང་ཉིད་ཀྱི་སེམས་ནུས་ཡོད་རྒུ་བཏོན་ནས་སྨན་བཅོས་བོད་སྐྱོར་ལས་དོན་ནང་ཞུགས་པས་གཡུར་དུ་ཟ་བའི་གྲུབ་འབྲས་ཐོབ་ཡོད།

ཅང་དབྱིང་ཅིའུ་ཡི་སྣེ་ཁྲིད་འོག་ཆབ་མདོ་གྲོང་ཁྱེར་མི་དམངས་སྨན་ཁང་གིས་གསར་གཏོད་ལྡན་པའི་སྒོ་ནས་དགེ་རྒན་གྱིས་དགེ་ཕྲུག་ཁྲིད་པའི“1+2+2”ཀྱི་བྱེད་སྟངས་སྤྱད་པ་སྟེ། རིགས་གཅིག་མཁས་ཅན་གྱི་རུ་མི་གཅིག་གིས་རྐང་འཛིན་དགེ་ཕྲུག་གཉིས་ཁྲིད་དགོས་པའི་ཁར། ལས་གནས་སུ་ཞུགས་མ་ཐག་པའི་དགེ་ཕྲུག་གཉིས་ཁྲིད་དགོས་པ་དང་། རྐང་འཛིན་དགེ་ཕྲུག་དང་ལས་གནས་སུ་ཞུགས་མ་ཐག་པའི་དགེ་ཕྲུག་ལ་སློབ་ཁྲིད་ཐད་བྱེད་ཐབས་གཉིས་སྤྱད་པ་སྟེ། རྐང་འཛིན་དགེ་ཕྲུག་ལ་གཙོ་བོ་དམར་ཁྲིད་བྱས་ནས་ཁོང་ཚོའི་ནད་ཐོག་སྨན་བཅོས་ཀྱི་ལག་རྩལ་མཐོ་རུ་གཏོང་བ་དང་། ལས་གནས་སུ་ཞུགས་མ་ཐག་པའི་དགེ་ཕྲུག་ལ་རྨང་གཞིའི་རིགས་པའི་གཞུང་ལུགས་དང་ཆེད་ལས་རྩལ་ནུས་མཉམ་དུ་དམ་འཛིན་བྱས་ནས་ཁོང་ཚོར་རྒྱལ་ཁབ་རིམ་པའི་ལས་རིགས་ཚད་གཞིར་མཁོ་བའི་འོས་ཐོབ་ལག་ཁྱེར་སྣ་ཚོགས་རག་རྒྱུར་རོགས་རམ་བྱེད་པ་དེ་ཡིན།

ཆབ་མདོ་གྲོང་ཁྱེར་མི་དམངས་སྨན་ཁང་གི་སྨན་དོན་པའི་དོན་དངོས་དང་ཟུང་འབྲེལ་བྱས་ཏེ། ཁྲུང་ཆིང་གྲོང་ཁྱེར་སྨན་བཅོས་ཤེས་ལྡན་པའི་ཚོགས་སྒྲིག་རྣམ་པའི་བོད་སྐྱོར་ལས་དོན་རུ་ཁག་གིས་རྐང་འཛིན་པ་དང་གསར་དུ་སླེབས་པའི་སྨན་པ་དཀའ་བཅུ་པ་མི་ཐེངས་168ལ་ཆ་སྒྲིག་རོགས་སྐྱོར་བྱས་པ་མ་ཟད། སྨན་པ་དཀའ་བཅུ་པའི་ཤེས་ལྡན་པ་84མང་དུ་བཏང་བ་དང་། ལོ་གཉིས་བསྟུད་མར་སྨན་པ་དཀའ་བཅུ་པར་རྒྱུགས་འཕྲོད་ཚད་རང་སྐྱོང་ལྗོངས་ཀྱི་ཆ་སྙོམས་ཆུ་ཚད་ལས་བརྒྱ་ཆའི་གྲངས་7གྱིས་མཐོ་བར་སླེབས་པ། ཁྲུང་ཆིང་སོགས་ཀྱི་ས་ཆར་ཟབ་སྦྱོང་དུ་བཏང་བའི་སྨན་དོན་པ་མི་ཐེངས152ཟིན་པ་བཅས་རེད།

ལོ་གསུམ་རིང་། བོད་སྐྱོར་ལས་དོན་རུ་ཁག་གིས་ཤེས་ལྡན་པ་དང་ལག་རྩལ་གྱི་ལེགས་ཆ་གང་ལེགས་སྤྱད་དེ“ནད་གཞི་ལྕི་པོ་གྲོང་ཁྱེར་དུ་སྨན་བཅོས་ཐུབ་རྒྱུ”དམིགས་ཚད་དུ་བྱས་ནས་དཀའ་གནད་དང་དོགས་པ་ཡོད་པའི་ནད་གཞི་བརྟག་བཅོས་བྱེད་པར་ལས་སྟེགས་ཀྱི་འདེགས་སྐྱོར་བརྟན་པོ་ཞིག་མཁོ་འདོན་བྱས་ཤིང་། རང་སྐྱོང་ལྗོངས་ཀྱི་ཆུ་ཚད་དང་ཚད་གཞི་མཐོ་ཤོས་ཀྱི་ཐོག་ནས་ནད་གཞི་ལྕི་བར་ICUབརྟག་དཔྱད་དང་། སྦྲིད་སྨན་གཤགས་བཅོས་ཁང་། བརྟག་དཔྱད་ཁག རྒྱང་བསྟེན་བརྟག་དཔྱད། ཁོག་ཤེལ། འགྱེད་འཕྲོའི་བརྙན་པར། DSAསྨན་བཅོས་སོགས་སྤྱི་པའི་ནད་དཔྱད་ལས་སྟེགས་ཤིག་བཏོད་ཡོད། མིག་སྔའི་བར། ཆབ་མདོ་གྲོང་ཁྱེར་མི་དམངས་སྨན་ཁང་ལ་གཞོགས་འདེགས་བྱས་ནས་འབྲེལ་ཡོད་ལག་རྩལ་གསར་པ་དང་རྣམ་གྲངས་གསར་པ་126སྤེལ་ཡོད།

ཉེན་ཚབས་ཆེ་བའི་ནད་གཞི་སྨན་བཅོས་ཀྱི“ལྟེ་གནས”ཆེན་པོ་ལྔ་འཛུགས་སྐྲུན་དང་འཕེལ་རྒྱས་གཏོང་རྒྱུའི་སྐོར་གྱི་རྒྱལ་ཁབ་འཕྲོད་བསྟེན་བདེ་ཐང་ཨུ་ཡོན་ལྷན་ཁང་གི་བླང་བྱ་དོན་འཁྱོལ་བྱེད་ཆེད། བོད་སྐྱོར་ལས་དོན་རུ་ཁག་གིས་ཕྱོགས་མང་པོ་ནས་མཐུན་སྦྱོར་བྱས་ནས་ཆབ་མདོ་གྲོང་ཁྱེར་མི་དམངས་སྨན་ཁང་ལ་ལས་སྟེགས་ཀྱི་འདེགས་སྐྱོར་དང་ལག་རྩལ་འགན་ལེན་བྱས་པ་མ་ཟད། སྨན་ཁང་གི་བྱིས་པའི་ཚན་ཁག་ལ་རྒྱལ་ཁབ་འཕྲོད་བསྟེན་བདེ་ཐང་ཨུ་ལྷན་བོད་ལྗོངས་ས་ཁོངས་ཀྱི་ནད་ཐོག་སྨན་བཅོས་ཀྱི་གཙོ་གནད་ཆེད་ལས་ཚན་ཁག་ཁྲོད་བྱིས་པའི་ཚན་ཁག་གི་ནད་ཐོག་སྨན་བཅོས་ཀྱི་གཙོ་གནད་ཆེད་སྦྱོང་ཚན་ཁག་འཛུགས་སྐྱོང་ཚན་པ་འབའ་ཞིག་ཏུ་ཆོག་མཆན་ཐོབ་པ་དེ་ཐོག་ནས་ཆབ་མདོ་གྲོང་ཁྱེར་མི་དམངས་སྨན་ཁང་ལ་རང་སྐྱོང་ལྗོངས་རིམ་པའི་ནད་ཐོག་སྨན་བཅོས་ཀྱི་གཙོ་གནད་ཆེད་ལས་ཚན་ཁག་འཛུགས་སྐྱོང་གི་སྟོང་ཆ་བསྐངས་པ་མཚོན་ཡོད།

བྱས་རྗེས་ཐོབ་པར་ངས་མི་རྩོད། བྱས་རྗེས་འཇོག་པར་ང་ཡིས་འབད། ལོ་གསུམ་རིང་། ཁྲུང་ཆིང་གྲོང་ཁྱེར་སྨན་བཅོས་ཤེས་ལྡན་པའི་ཚོགས་སྒྲིག་རྣམ་པའི་བོད་སྐོར་ལས་དོན་རུ་ཁག་གིས་ཐོག་མའི་བསམ་འདུན་དང་འགན་འཁྲི་ཟམ་མི་ཆད་པར་ལག་ལེན་བསྟར་ཏེ་ཆབ་མདོའི་སྨན་བཅོས་ལག་རྩལ་ལེགས་སུ་གཏོང་ཆེད་སེམས་ནུས་ཡོད་རྒུ་བཏོན་པས། ཆབ་མདོའི་སྨན་བཅོས་ཀྱི་ཆུ་ཚད་དང་སྨན་བཅོས་ཀྱི་ཆ་རྐྱེན་ཧ་ཅང་ལེགས་སུ་ཕྱིན་ནས་ས་གནས་དེ་གའི་མི་སེར་ཚོའི་བསྔགས་བརྗོད་ཆེན་པོ་ཐོབ་ཡོད།