གློག་དྲ་འཛུགས་སྐྲུན་ལ་མ་དངུལ་སྒོར་དུང་ཕྱུར་700ཙམ་བཏང་བ་དང་གློག་དྲ་གཙོ་བོ་ལྗོངས་ཡོངས་ཀྱི་རྫོང་དང་ཆུས་74ལ་ཁྱབ་པ།

ཚེས་4ཉིན། གསར་འགོད་པར་རང་སྐྱོང་ལྗོངས་མི་དམངས་སྲིད་གཞུང་གསར་འགྱུར་གཞུང་ལས་ཁང་གིས་འཚོགས་པའི་ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན་གྱི་བོད་ཀྱི་གློག་ཤུགས་འཕེལ་རྒྱས་དང་གྲུབ་འབྲས་སྐོར་གྱི་གསར་འགྱུར་ཡོངས་བསྒྲགས་ཚོགས་འདུའི་ཐོག་ནས་ཤེས་རྟོགས་བྱུང་བར། ལོ་བཅུའི་རིང་། རང་ལྗོངས་ཀྱི་གློག་དྲ་འཛུགས་སྐྲུན་ལ་རིམ་རྩིས་བྱས་ན་མ་དངུལ་སྒོར་དུང་ཕྱུར་700ཙམ་བཏང་སྟེ་མཚོ་བོད་དང་། ཁྲོན་བོད། བོད་དབུས། མངའ་རིས་བཅས“གློག་ཤུགས་མཁའ་ལམ”བཞི་དང་དེ་བཞིན་གྲོང་གསེབ་ཀྱི་གློག་དྲ་དང་གྲོང་ཁྱེར་གྱི་གློག་དྲའི་ལས་གྲྭ་རབ་དང་རིམ་པ་བསྐྲུན་པ་དང་། གློག་དྲ་གཙོ་བོས་གློག་མཁོ་འདོན་བྱེད་ཁྱོན་2012ལོར་རྫོང(ཆུས)40ནས་2021ལོར་ལྗོངས་ཡོངས་ཀྱི་རྫོང་དང་ཆུས་74ཚང་མ་བར་ཆེ་རུ་ཕྱིན་པ། གློག་མཁོ་འདོན་གྱི་མི་འབོར་ཁྲི་175ནས་ཁྲི་345བར་མང་དུ་ཕྱིན་པ། གློག་རྒྱུན་འཇགས་གཏོང་ཚད་99.48%ཟིན་ནས་བོད་འདི་ཉིད་གཅིག་གྱུར་གྱི་གློག་དྲའི་དུས་རབས་སུ་སླེབས་ཡོད།

ཤེས་རྟོགས་བྱུང་བར་གཞིགས་ན། 2021ལོར་ལྗོངས་ཡོངས་ཀྱི་ཆན་ཕུའུ་110ཡན་དང་དེ་ཡན་གྱི་གློག་དྲའི་གློག་སྒྱུར་ཤོང་ཚད་ཆན་ཧྥུའུ་ཨན་ཁྲི་1948དང་སྐུད་ལམ་རིང་ཚད་སྤྱི་ལེ་ཁྲི་2ཟིན་པ་དེ་2012ལོ་དང་བསྡུར་ན་ལྡབ་4.6དང་ལྡབ་5.5སོ་སོ་འཕར་ཡོད། “གློག་ཤུགས་མཁའ་ལམ”གྱི་ཐད་ཀའི་སྐུལ་ཁྲིད་འོག་བོད་ཀྱི་གློག་དྲའི་གློག་སྤྱོད་ཐེག་ཚད་ལོ་རེ་བཞིན་ལོ་རྒྱུས་ཀྱི་ཟིན་ཐོ་གསར་པ་བཏོད་ཅིང་། ལོ་རེར་ཆ་སྙོམས་15.52%འཕར་བ་དང་། མཐོ་ཤོས་ལ་ཆན་ཝ་ཁྲི་191ཟིན་པ། སྤྱི་ཚོགས་ཡོངས་ཀྱི་གློག་སྤྱོད་ཚད་ལོ་མང་བསྟུད་མར་གྲངས་གནས་གཉིས་ཀྱི་ཐོག་ནས་འཕར་ཡོད། གློག་ཤུགས་ཀྱི་ནང་མཁོ་བསྐངས་པའི་རྨང་གཞིའི་ཐོག་བོད་ཀྱི་གློག་དྲས་ཆུ་བོ་རྒྱས་པའི་དུས་ཀྱི་བོད་གློག་ཕྱིར་གཏོང་གི་ལམ་བུ་རིམ་བཞིན་ཤར་གཏོང་ཐུབ་པར་བྱས་ཤིང་། 2015ལོར་བོད་གློག་ཕྱིར་གཏོང་ཐེངས་དང་པོ་བྱས་པ་ནས་2021ལོའི་ལོ་མཇུག་བར་དུ་རིམ་རྩིས་བྱས་ན། རང་ལྗོངས་ཀྱིས་རིམ་རྩིས་བྱས་ན་དྭངས་གཙང་གློག་ཤུགས་ཆུ་ཚོད་ཆན་ཝ་དུང་ཕྱུར་91ལྷག་ཙམ་ཕྱིར་གཏོང་བྱས་ཟིན་པ་དེ་ལས་ཐོན་ཁུངས་ཀྱི་ལེགས་ཆ་དེ་དཔལ་འབྱོར་གྱི་ལེགས་ཆར་སྒྱུར་བར་སྐུལ་འདེད་གཏོང་རྒྱུ་དང་རྒྱལ་ཁབ་ཀྱི་དྭངས་གཙང་ནུས་རྒྱུ་རྒྱུན་མཐུད་རྟེན་གཞི་འཛུགས་སྐྲུན་བྱེད་མགྱོགས་སུ་གཏོང་རྒྱུར་རྨང་གཞི་བརྟན་པོ་བཏིང་ཡོད།