ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། སྤྱི་ཁྱབ་ཧྲུའུ་ཅིས་མཛུབ་སྟོན་གནང་བའི་མདུན་སྐྱོད་ཀྱི་ཁ་ཕྱོགས་འདེད་ནས་སྲིད་ཇུས་བཟང་པོའི་འོག་དྲིན་ཚོར་འབད་འབུངས་བྱེད་པའི་ས་མཐོའི་བུ་ཕྲུག་གིས་འཕེལ་རྒྱས་ཀྱི་དུས་མཚམས་གསར་པར་གཞི་ཚུགས་པ་དང་། འཕེལ་རྒྱས་ཀྱི་འདུ་ཤེས་གསར་པ་ཆ་ཚང་བ་དང་འཕྱུགས་པ་མེད་པ་ཕྱོགས་ཡོངས་བཅས་ཀྱི་སྒོ་ནས་ལག་བསྟར་བྱེད་པ། འཕེལ་རྒྱས་ཀྱི་བཀོད་པ་གསར་པར་མཉམ་འདྲེས་བྱ་རྒྱུར་ཞབས་འདེགས་ཞུ་བ་བཅས་བྱས་ཏེ་ས་མཐོའི་དཔལ་འབྱོར་སྤུས་ཚད་མཐོ་བའི་འཕེལ་རྒྱས་ཀྱི་སྔོན་བསྟར་ཁུལ་འཛུགས་གཏོད་ཧུར་ཐག་བྱེད་པའི་རྒྱང་ལམ་ཁྲོད་བཀྲག་མདངས་འཚེར་བའི་ལེའུ་བརྩམས་ཡོད།

ལོ་བཅུ་འདིའི་རིང་ལྗང་མདོག་ནི་སྤུས་ཚད་མཐོ་བའི་འཕེལ་རྒྱས་ཀྱི་གསོན་ཉམས་དོད་པོའི་རང་མདངས་ཤིག་རེད།

ལོ་བཅུའི་རིང་རང་ལྗོངས་ཀྱིས་ལྗང་མདོག་འཕེལ་རྒྱས་ཀྱི་རང་མདངས་ཟམ་མི་ཆད་པར་སྐྱོང་སྤེལ་བྱེད་པ་དང་། “བརྟན་པོ་དྲུག”དང“འགན་སྲུང་དྲུག”ལ་ཞབས་འདེགས་ཧུར་ཐག་ཞུ་བ། མཐོ་གསར་གྲངས་འཛིན་དང་། སྐྱེ་ཁམས་ཞིང་འབྲོག ཁྱད་ལྡན་ཡུལ་སྐོར་བཅས་ལྗང་མདོག་ཐོན་ལས་འཕེལ་རྒྱས་ལ་རྒྱབ་སྐྱོར་ཤུགས་ཆེན་བྱེད་པ་བཅས་བརྒྱུད་སྐྱེ་ཁམས་ཁོར་ཡུག་བཟང་པོ་དེ་ལྗོངས་ཡོངས་ཀྱི་དཔལ་འབྱོར་འཕར་བའི་སྒུལ་ཤུགས་དང་མི་སེར་འབབ་འཕར་ཕྱུག་འགྱུར་ཡོང་བའི་མཆོག་ནོར་ལ་གྱུར་ཡོད།

ཁྱིམ་ཚང་ཀུན་གྱིས་ལྕི་བ་འབུད་པ་ནས་གནོད་མེད་གློག་ས་མཐོ་ནས་གཏོང་བའི་བར་རང་ལྗོངས་ཀྱི་ནུས་རྒྱུ་གཙང་མའི་ཐོན་ཁུངས་ཀྱི་ལེགས་ཆ་ཟམ་མི་ཆད་པར་དཔལ་འབྱོར་གྱི་ལེགས་ཆར་གྱུར་བ་མ་ཟད། ད་དུང་རྒྱལ་ཁབ་ཀྱིས་ཐཱན་ཚད་མཐོ་ཤོས་དང་ཐཱན་ཚད་སྙོམ་སྦྱོར་གྱི་དམིགས་ཚད་མངོན་འགྱུར་བྱ་རྒྱུར་སྟོབས་ཤུགས་ལེགས་སྐྱེས་སུ་ཕུལ་ཡོད། 2021ལོར་རྒྱལ་ཁབ་ཁྲོན་བོད་ལྕགས་ལམ་ལག་རྩལ་གསར་གཏོད་ལྟེ་གནས་དང་བོད་ལྗོངས་ནུས་རྒྱུ་གཙང་མ་གསར་གཏོད་འཕེལ་རྒྱས་ལྟེ་གནས་སྒོ་བྱང་བཀལ་ནས་བཙུགས་པ་རེད། མིག་སྔར། བོད་ཀྱི་ནུས་རྒྱུ་གཙང་མའི་གློག་གཏོང་འཕྲུལ་འཁོར་ནས་གློག་གཏོང་ཚད91%ཟིན་པ་དང་2021ལོའི་ལོ་མཇུག་བར་བོད་ལྗོངས་གློག་དྲས་ནུས་རྒྱུ་གཙང་མའི་གློག་ཕྱིར་གཏོང་བྱེད་ཚད་ཆུ་ཚོད་ཆན་ཝ་དུང་ཕྱུར་91ལྷག་ཙམ་ཟིན་ཡོད། དེ་དང་ཆབས་ཅིག “ཤར་གྲངས་ནུབ་རྩིས”ཀྱི་རྒྱལ་ཁབ་འཐབ་ཇུས་ཀྱི་རྒྱབ་ལྗོངས་ཆེན་པོའི་འོག་ཉེ་བའི་ལོ་ཤས་རིང་གྲངས་འཛིན་ཁེ་ལས་བརྒྱ་ཕྲག་ས་མཐོར་བཙུགས་ཏེ་བོད་ཀྱི་གྲངས་འཛིན་དཔལ་འབྱོར་མགྱོགས་མྱུར་འཕོ་འགྱུར་འགྲོ་བཞིན་ཡོད།

དུས་ཚིགས་ཀྱི་བཀག་རྒྱ་རིམ་གྱིས་བསལ་ནས“དུས་ཚིགས་བཞི་ཀ་དང་། དུས་ཚིགས་ཧྲིལ་པོ། ས་ཁོངས་ཡོངས”བཅས་བར་རང་ལྗོངས་འཛམ་གླིང་ཡུལ་སྐོར་དམིགས་སའི་ཁུལ་གྱི་དམིགས་ཚད་ཕྱོགས་སུ་བརྟན་པོའི་ངང་སྐྱོད་བཞིན་ཡོད། གྲངས་གཞི་ལས་མངོན་དོན། 2021ལོར་ལྗོངས་ཡོངས་སུ་ཡུལ་སྐོར་མི་ཐེངས་ཁྲི་4150དང་ཡོང་འབབ་སྒོར་དུང་ཕྱུར་441སོ་སོར་ཟིན་པ་དང་། “ལོ་ལྔ་ཚན་བཅུ་གསུམ་པའི”རིང་ཁོ་ནར་ཞིང་འབྲོག་པ་མི་ཐེངས་ཁྲི་8.6གྲོང་གསེབ་ཡུལ་སྐོར་དུ་ལས་ཞུགས་ཐུབ་པ་དང་ཡིག་ཚགས་དང་གཱ་བཟོས་པའི་མི་འབོར་དབུལ་པོ་ཁྲི་7.5ལ་སྐུལ་ཁྲིད་ཐུབ་སྟེ་ཡུལ་སྐོར་གྱི་དམངས་ཕྱུག་རིན་ཐང་དང་སྐྱེ་ཁམས་སྲུང་སྐྱོང་རིན་ཐང་གཅིག་གྱུར་དམ་ཚགས་བྱུང་ཡོད།

“རིན་ཐང”ཙམ་མ་ཟད“གཟུགས་བརྙན”ལ་དེ་བས་མཐོང་ཆེན་བྱེད་པའི་ལྗོངས་ཡོངས་ཀྱི་མི་དམངས་ལ་ཕྱི་ནང་གཉིས་ཀ་ནས་ཕན་འབྲས་བཟང་པོ་ཐོན་ཏེ། ཐོན་ལས་དར་ཞིང་རྒྱས་པ་དང་མང་ཚོགས་འབྱོར་ཕྱུག་བྱུང་བ་དང་སྦྲགས། དགུང་སྔོན་དང་། ཆུ་དྭངས། ས་གཙང་བཅས་ཀྱི་རྣམ་པ་བཟང་པོ་རྒྱུན་མཐུད་སྲ་བརྟན་དུ་ཕྱིན་ནས་སྦགས་བཙོག་འགོག་བཅོས་དང་འགག་སྒྲོལ་གཉིས་ཀ་རྒྱལ་ཡོངས་ཀྱི“ཕུལ་བྱུང”རྒྱུན་འཁྱོངས་ཐུབ་ཡོད།

ལྗང་མདོག་འཕེལ་རྒྱས་ཀྱིས་ས་མཐོ་ཡངས་པོ་སྔར་བས་མཛེས་པར་བརྒྱན།

ལོ་བཅུ་པོ་འདིའི་རིང་གསོན་ཤུགས་ནི་སྤུས་ཚད་མཐོ་བའི་འཕེལ་རྒྱས་ཀྱི་རང་མདངས་ངོ་མ་རེད།

ལོ་བཅུར་རྒྱང་ལྟ་བྱེད་སྐབས་རྣམ་གྲངས་ཆེན་པོ་རེ་རེ་ལས་ཡིད་འོང་གི་མཛེས་རིས་ཤིག་རིམ་གྱིས་གྲུབ་བཞིན་ཡོད་པ་དང་། རྣམ་གྲངས་འཛུགས་སྐྲུན་གྱི་ཚ་རླབས་སྔར་བས་འཕྱུར་བཞིན་ཡོད།

ཁྲོན་བོད་ལྕགས་ལམ་གྱི་ལམ་ཐིག་ཧྲིལ་པོའི་ལས་འགོ་ཚུགས་པ་དང་། ལྷ་ཉིང་ལྕགས་ལམ་དུམ་བུར་མེ་འཁོར་ཤར་གཏོང་ཐུབ་པ། ལྷ་ས་ནས་ལྷོ་ཁ་དང་། ཉིང་ཁྲི། ནག་ཆུ་བཅས་བར་གྱི་རིམ་མཐོའི་གཞུང་ལམ་བསྐྲུན་ནས་རླངས་འཁོར་ཤར་གཏོང་ཐུབ་པ། ལྷ་གཞིས་རིམ་མཐོའི་གཞུང་ལམ་གྱི་ལྷ་སའི་ལམ་དུམ་དང་གཞིས་རྩེའི་ལམ་དུམ་དུ་སྔ་རྗེས་སུ་རླངས་འཁོར་ཤར་གཏོང་ཐུབ་ནས་ཚོད་ལྟའི་གཉེར་སྐྱོང་བྱེད་བཞིན་ཡོད་པ། ཕད་གྲོང་རྡལ་ནས་མེ་ཏོག་རྫོང་བར་གྱི་གཞུང་ལམ་གྱི་ལམ་ཐིག་ཧྲིལ་པོར་རླངས་འཁོར་ཤར་གཏོང་ཐུབ་པ། ཡན་ལག་ལམ་ཐིག་གི་གནམ་ཐང་3གང་མགྱོགས་སྐྲུན་བཞིན་ཡོད་པ། མཐའ་མཚམས་འབྱོར་འབྲིང་གྲོང་ཚོ་624ཚང་མ་བསྐྲུན་ཟིན་པ། ཤངས་ཆུ་སོགས་ཆུ་བེད་ལྟེ་བའི་གཙོ་གནད་ལས་གྲྭ་སྔ་རྗེས་སུ་ལས་འགོ་བཙུགས་ནས་འཛུགས་སྐྲུན་བྱེད་བཞིན་ཡོད་པ། མངའ་རིས་དང་བོད་དབུས་གློག་དྲའི་ལས་གྲྭ་དངོས་སུ་གཉེར་སྐྱོང་བྱེད་འགོ་ཚུགས་ནས་གློག་དྲ་གཙོ་བོ་ལྗོངས་ཡོངས་སུ་ཁྱབ་པ་ལ་སོགས་རེད།

དེ་སྔོན་གངས་ལྗོངས་ས་མཐོ་རི་མཐོ་གཡང་གཟར་དང་རྨང་གཞི་ཡང་ཧ་ཅང་ཞན་པོ་ཡོད་མོད། འོན་ཀྱང་ད་ཆ་གཞུང་ལམ་དང་། ལྕགས་ལམ། མཁའ་འགྲུལ་བཅས་ཕྱོགས་བཞི་མཚམས་བརྒྱད་ལ་ཤར་གཏོང་ཐུབ་པ་དང་། གློག་དྲ་དང་། ཆུ་དྲ། དྲ་སྦྲེལ་བཅས་གྲོང་ཚོ་དང་དུད་ཚང་དུ་ཁྲིད་ཡོད་པ། རྨང་གཞིའི་སྒྲིག་བཀོད་འཛུགས་སྐྲུན་ཉིན་རེ་བཞིན་འཐུས་སྒོ་ཚང་དུ་འགྲོ་བ་བཅས་ལས་ཞིང་འབྲོག་པའི་འཚོ་བ་དང་ཐོན་སྐྱེད་བྱེད་སྟངས་ལ་འགྱུར་ལྡོག་ཕྱིན་པ་མ་ཟད། དཔལ་འབྱོར་དང་སྤྱི་ཚོགས་འཕེལ་རྒྱས་ལའང་སྒུལ་ཤུགས་ཆེན་པོ་བསྣན་ཡོད།

རང་སྐྱོང་ལྗོངས་ཀྱི་ཏང་གི་འཐུས་མི་ཚོགས་ཆེན་ཐེངས་བཅུ་པའི་ཐོག་བྱེད་པོའི་ནུས་པ་མངོན་གསལ་དོད་པ་དང་། ལེགས་ཆ་གསབ་རེས། སྤུས་ཚད་མཐོ་བའི་འཕེལ་རྒྱས་བཅས་ཀྱི“ལྟེ་གཅིག་དང་། འཁོར་གཅིག རྒྱུད་གཉིས། ཁུལ་གསུམ”གྱི་ས་ཁོངས་འཕེལ་རྒྱས་ཀྱི་རྣམ་པ་གསར་པ་ཧུར་ཐག་གཏོད་རྒྱུ་ཡིན་ཞེས་ཁ་གསལ་བཏོན་ཡོད།

མ་འོངས་པར་རྒྱང་ལྟ་བྱས་ན། བཀོད་པ་གསར་པའི་འོག་ཏུ་བོད་ལ་གསོན་ཤུགས་རབ་ཏུ་རྒྱས་ངེས་རེད།

ལོ་བཅུ་པོ་འདིའི་རིང་དམངས་ཆེད་ནི་སྤུས་ཚད་མཐོ་བའི་འཕེལ་རྒྱས་ཀྱི་རང་མདངས་ངོ་མ་རེད།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་ལྗོངས་ཀྱི་དཔལ་འབྱོར་རྒྱ་སྟོབས་ཆེ་རུ་ཕྱིན་ནས་མི་རིགས་ཁག་གི་མང་ཚོགས་ཀྱི་དམངས་འཚོའི་བདེ་རྩ་ཆེ་རུ་ཕྱིན་ཡོད།

——སློབ་གསོའི་བྱ་གཞག་ཕྱོགས་ཡོངས་ནས་འཕེལ་རྒྱས་ཕྱིན་ཏེ་རྫོང་ཁོངས་ཀྱི་འོས་འགན་སློབ་གསོའི་དོ་སྙོམས་འཕེལ་རྒྱས་གཞི་རྩའི་ཆ་ནས་མངོན་འགྱུར་བྱུང་བ་དང་སློབ་མཚམས་འཇོག་པའི་གནད་དོན་ལོ་རྒྱུས་རང་བཞིན་གྱིས་ཐག་གཅོད་བྱུང་བ་དང་།

——བདེ་ཐང་བོད་ལྗོངས་ཕྱོགས་ཡོངས་ནས་འཕེལ་རྒྱས་ཕྱིན་ཏེ། 2021ལོར་བོད་ཀྱི་སྦྲུམ་མ་དང་ཕྲུ་གུ་སྐྱེས་མ་ཐག་པའི་སྐྱེད་མ་དང་ཕྲུ་གུ་དམར་འབྱར་ཤི་ཚད་ཁྲི་45.5/10དང་7.5‰སོ་སོར་ཆག་པ་དང་། རྒྱལ་ཁབ་ཀྱིས་ཞིབ་བཤེར་རྩིས་ལེན་བྱས་པ་བརྒྱུད། ཐུམ་འབུའི་ནད་དང་། གྲུམ་བུ་ཚིགས་ཆེན་ནད། ལྷན་སྐྱེས་སྙིང་ནད། སྐྱ་གྲིབ་སོགས་ཀྱི་ཡུལ་ནད་ལ་ལོ་རྒྱུས་རང་བཞིན་གྱི་སྨན་བཅོས་ཐུབ་པ།

——སྤྱི་པའི་རིག་གནས་ཕྱོགས་ཡོངས་ནས་འཕེལ་རྒྱས་ཕྱིན་ཏེ“རིམ་བཞིར་ལྔ་ཡོད”ཀྱི་སྤྱི་པའི་རིག་གནས་སྒྲིག་བཀོད་འཛུགས་སྐྲུན་ཕྱོགས་ཡོངས་ནས་ལེགས་གྲུབ་ཟིན་པ།

གཞི་གྲངས་ནི་འདེགས་སྐྱོར་ཡག་ཤོས་དེ་ཡིན། 2021ལོར་བོད་ཀྱི་མཐོ་སློབ་སློབ་ཐོན་སློབ་མ་ལས་ཞུགས་ཐུབ་ཚད་99%ཟིན་པ་དང་། ལས་ཞུགས་གཞན་སྒྱུར་ཐུབ་པའི་ཞིང་འབྲོག་པ་ཁྲི་69.3ཟིན་པ། ཁེ་ལས་ཀྱི་ལས་བྲལ་དང་ལས་འཁྱུར་ངལ་གསོ་རྒྱག་མཁན་གྱི་གཞི་རྩའི་རྒན་གསོའི་དངུལ་ཟླ་རེར་མི་རེར་ཆ་སྙོམས་སྒོར་5629ཟིན་པ། འགན་ལེན་རང་བཞིན་གྱི་བདེ་སྡོད་ལས་གྲྭ་བསྐྲུན་ཚད་ཁྲི་1.12ཟིན་པ། བོད་ཞི་བས་བཅིངས་འགྲོལ་བཏང་ནས་ལོ་70འཁོར་བའི་དྲན་རྟེན་དངོས་པོ་ཚང་མར་སྤྲད་ནས་ཏང་ཀྲུང་དབྱང་གི་ཐུགས་ཁུར་ཁྱིམ་ཚང་ཁྲི་སྟོང་མང་པོར་ཁྱབ་པ་སོགས་རེད།

ལོ་བཅུའི་རིང་གི་ལག་ལེན་ལས་ར་འཕྲོད་བྱུང་བར། ལྗོངས་ཡོངས་ཀྱི་གོང་འོག་ཚང་མས་བློ་བརྟན་འགྱུར་མེད་ངང་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་ལེན་མཐའ་གཅིག་ཏུ་བསྟར་ཏེ། “དམིགས་ཚད་དམ་བཟུང་ལྷོད་གཡེང་མེད་པའི”བསམ་བློའི་འཁྱེར་སོར་བརྟེན་པ་དང་བྱས་པའི་རྗེས་དང་འདྲུད་པའི་ཤུལ་ཡོད་པའི་སྒོ་ནས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་དང་ལྗོངས་ཏང་ཨུད་ཀྱི་ལས་དོན་བཀོད་སྒྲིག་རེ་རེ་བཞིན་དོན་ཐོག་ཏུ་འཁྱོལ་བ་དང་། ཏང་དང་མི་དམངས་ཀྱི་མངགས་བཅོལ་གལ་ཆེན་རེ་རེ་བཞིན་བྱ་སྤྱོད་དུ་གྱུར་པ། མཛེས་སྡུག་ལྡན་པའི་འཚོ་བར་བཅངས་པའི་མི་སེར་གྱི་རེ་འདོད་རིམ་བཞིན་དོན་དངོས་སུ་འགྱུར་བ་བཅས་བྱས་ཚེ། ས་མཐོའི་སྤུས་ཚད་མཐོ་བའི་འཕེལ་རྒྱས་ལ་དཔྱིད་དཔལ་བཞད་ངེས་རེད།