གསར་འགོད་པར་གཞིས་རྩེ་གྲོང་ཨུད་ཤེས་ལྡན་མི་སྣའི་གཞུང་ལས་ཁང་ནས་ཤེས་རྟོགས་བྱུང་བར། ཉེ་དུས་ཀྲུང་དབྱང་གི་པུའུ་ཨུད་དགུ་ཡིས་གྲོང་གསེབ་དར་རྒྱས་དང་། ཐོན་ལས་འཕེལ་རྒྱས། དམངས་འཚོ་འགན་ལེན་སོགས་ཁྱབ་ཁོངས་ལ་དམ་པོར་དམིགས་ཏེ“ཕྱིར་སྐྱོད་པ”དང“ནང་དུ་གདན་འདྲེན་པ”སོགས་ཀྱི་བྱ་ཐབས་སྤྱད་ནས་གཞིས་རྩེའི་མཐའ་མཚམས་རྫོང་ལ་ས་གནས་དེ་གའི་ཤེས་ལྡན་མི་སྣའི་དཔུང་ཁག་གསོ་སྐྱོང་བྱེད་རོགས་བྱས་ཏེ་མཐའ་མཚམས་བརྟན་ལྷིང་དང་འཕེལ་རྒྱས་ཆེད་སྟོབས་ཤུགས་ལེགས་སྐྱེས་ཕུལ་ཡོད་པ་རེད།

འགྲིམ་འགྲུལ་པུས་མང་ཚོགས་ཀྱི་འཚོ་བའི་དགོས་མཁོར་དམིགས་ཏེ། དྲ་ཐོག་གསོ་སྦྱོང་བྱེད་ཐབས་སྤྱད་ནས “ཡག་པོ་བཞིའི་གྲོང་གསེབ་གཞུང་ལམ”སྤུས་ཚད་མཐོ་བའི་འཕེལ་རྒྱས་དང་། གྲོང་གསེབ་གཞུང་ལམ་འཆར་འགོད་འཛུགས་སྐྲུན། གྲོང་གསེབ་གཞུང་ལམ་བདག་སྐྱོང་དོ་དམ། འགྲིམ་འགྲུལ་ཕྱོགས་བསྡུས་ཁྲིམས་འཛིན་སོགས་ཀྱི་ནང་དོན་ལ་གཞིགས་ནས། དིང་རི་རྫོང་གི་གཞི་རིམ་ལས་བྱེད་པ་དང་ཆེད་ལས་ལག་རྩལ་མི་སྣ་400ལ་དྲ་ཐོག་ནས་སློབ་ཁྲིད་བྱས་པས་ལས་བྱེད་པ་དང་ལག་རྩལ་མི་སྣའི་ཆེད་ལས་ཆུ་ཚད་མཐོ་རུ་ཕྱིན་ཡོད། སློབ་གསོ་པུས་ས་སྐྱ་རྫོང་དང་མཐུན་སྦྱོར་བྱས་ཏེ་སློབ་སྤྱི་1མངགས་ནས་རྒྱལ་ཁབ་སློབ་གསོ་སྲིད་འཛིན་སློབ་གྲྭར་རྒྱལ་ཡོངས་ཀྱི་སློབ་གྲྭ་འབྲིང་ཆུང་གི་སློབ་སྤྱིའི་གསོ་སྦྱོང་འཛིན་གྲྭར་ཞུགས་པ་དང་སློབ་སྤྱི་3དང་དགེ་རྒན་3མཐུན་སྦྱོར་གྱིས་རྒྱལ་ཁབ་སློབ་གསོ་སྲིད་འཛིན་སློབ་གྲྭར་བསྐྱོད་དེ“གྲངས་འཛིན་ཅན་དང་གྲོང་གསེབ་བཅོས་སྐྱོང་གསར་སྒྱུར་གྱི་སྣེ་ཁྲིད་ཤེས་ལྡན་མི་སྣའི་ལས་ཐོག་རྗེས་སྙེགས”ཞིབ་སྦྱོང་ལ་ཞུགས་ནས་ས་སྐྱ་རྫོང་གི་དགེ་རྒན་གྱི་ཆུ་ཚད་མཐོ་རུ་གཏོང་རྒྱུར་ཁྱབ་འགྱེད་སྣེ་ཁྲིད་ཀྱི་ནུས་པ་ཐོན་ཡོད། ཚོང་དོན་པུས་སྐྱིད་གྲོང་རྫོང་ལ་གསོ་སྦྱོང་གྲོན་དངུལ་སྒོར་ཁྲི་30ཐག་གཅོད་ཧུར་ཐག་བྱས་པ་དང་རྫོང་དང་ཤང་རིམ་པའི་ལས་བྱེད་པ་39ལྗོངས་ཕྱིར་གསོ་སྦྱོང་ལ་འགྲོ་བར་མཐུན་སྦྱོར་དང་སྒྲིག་འཛུགས་བྱས་ཏེ་སློབ་ཁྲིད་ཀྱི་རྣམ་པ་དང་། བགྲོ་གླེང་གི་རྣམ་པ། དཔེ་མཚོན་གྱི་རྣམ་པ་སོགས་ཀྱི་སློབ་ཁྲིད་བྱེད་སྟངས་སྤྱད་པས་གསོ་སྦྱོང་ནང་ཞུགས་མཁན་སློབ་གཉེར་བའི་མཐོང་རྒྱ་ཆེ་རུ་དང་འཇོན་ཐང་ཆེ་རུ་ཕྱིན་ཡོད་པ་རེད།