ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་སྐྱོང་ལྗོངས་ཏང་ཨུད་དང་སྲིད་གཞུང་གིས་བོད་ཀྱི་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཛུབ་སྟོན་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་ནན་ཏན་བྱས་ཏེ་སྤྱི་ཡོངས་ཀྱི་རྒྱལ་ཁབ་བདེ་འཇགས་ལྟ་བ་བརྟན་པོ་འཛུགས་པ་དང་། བརྟན་ལྷིང་སྲུང་སྐྱོང་ཆབ་སྲིད་ཀྱི་ལས་འགན་གཙོ་བོར་འཛིན་རྒྱུ་མཐའ་འཁྱོངས། ཉེན་བརྡ་རྒྱུན་སྒྲོག་དང་རྟག་ཏུ་དོགས་ཟོན་བྱ་རྒྱུ་མཐའ་འཁྱོངས། ཕུགས་འཕེར་གྱི་ཇུས་གཞི་འདིང་བ་དང་རྩ་བ་བརྟན་ཚུགས་ཀྱི་བྱ་ཐབས་སྤྱོད་པ་བཅས་བྱས་ནས་སྤྱི་ཚོགས་བཅོས་སྐྱོང་གི་ཆུ་ཚད་ཟམ་མི་ཆད་པར་མཐོ་རུ་གཏོང་བ་དང་། ཚན་རིག་ཅན་གྱི་ལམ་སྲོལ་དང་རྒྱུན་རྣམ་ཅན་དང་ཁྲིམས་སྐྱོང་ཅན་གྱི་འདུ་ཤེས་ལ་བརྟེན་ནས་བརྟན་ལྷིང་སྲུང་སྐྱོང་གི་ལས་དོན་དུས་རྒྱུན་དུ་སྒྲུབ་པ་དང་གཞི་རིམ་དུ་སྒྲུབ་པ། སྤྱི་ཚོགས་བརྟན་ལྷིང་དང་མི་དམངས་ཀྱི་བདེ་འཇགས་སྲུང་སྐྱོང་ནུས་ལྡན་བཅས་བྱས་པས། མང་ཚོགས་བློ་ཡིད་ཚིམ་ཚད་99%ཡན་རྒྱུན་འཁྱོངས་ཐུབ་ཡོད།

“གཉིས་ལྡན་དུད་སྦྲེལ”གྱི་ཞབས་འདེཌ་དོ་དམ་གྱི་ཆུ་ཚད་མཐོ་རུ་བཏང་བ།

2013ལོའི་ཟླ་5ཚེས་20ཉིན། རང་ལྗོངས་ཀྱིས་དྲ་མིག་ཅན་གྱི་དོ་དམ་བྱེད་སྟངས་གསར་གཏོད་བྱས་ནས“གཉིས་ལྡན་དུད་སྦྲེལ”གྱི་ཞབས་འདེགས་དོ་དམ་གྱི་ལས་དོན་ཕྱོགས་ཡོངས་ནས་སྤེལ་འགོ་ཚུགས་པ་རེད། “གཉིས་ལྡན་དུད་སྦྲེལ”ཞེས་པ་དེ“དུད་སྦྲེལ་དུས་བདེ་དང་དུད་སྦྲེལ་འབབ་འཕར”ལ་ཟེར་ཞིང་། དེ་ནི་རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཏང་གི་ཚོགས་ཆེན་བཅོ་བརྒྱད་པའི་དགོངས་དོན་ལག་བསྟར་གཏིང་ཟབ་བྱས་ཏེ། སྤྱི་ཚོགས་ཀྱི་ཞབས་འདེགས་དོ་དམ་དང་མང་ཚོགས་ཀྱི་ལས་དོན་ཟུང་འབྲེལ་དམ་ཟབ་བྱེད་པ་དང་འཕེལ་རྒྱས་བརྟན་ལྷིང་གི་ལས་འགན་གཞི་རིམ་དུ་དོན་འཁྱོལ་དང་དུད་ཚང་ཁྲི་སྟོང་མང་པོར་དོན་འཁྱོལ་བྱེད་པའི་འཚོལ་ཞིབ་ཧུར་ཐག་བྱས་པ་ཞིག་རེད། དུད་སྦྲེལ་དུས་བདེ་ཡོང་བ་བྱེད་དགོས་ལ་དུད་སྦྲེལ་འབབ་འཕར་ཡང་དེ་བས་ཡོང་བ་བྱེད་དགོས་ཤིང་། 2020ལོར་ནག་ཆུ་གྲོང་ཁྱེར་ཤན་རྩ་རྫོང་ལ་སྨད་པ་ཤང་དབྱར་ས་གྲོང་ཚོའི་དུད་སྦྲེལ་སྤྱི་མི་བཟོད་པ་ཡིས་འགན་འཁྲི་དང་ལས་འགན་ཏན་ཏིག་བསྒྲུབས་ནས་གྲོང་གསེབ་དར་རྒྱས་ཀྱི་འཐབ་ཇུས་དང་མཉམ་འདྲེས་ཡོང་བར་རང་འགུལ་ངང་ཞབས་འདེགས་ཞུས་ཏེ། “གཉིས་ལྡན་དུད་སྦྲེལ”གྱི་རྣམ་པ་གསར་པ་དང་ཐབས་ལམ་གསར་པ་འཚོལ་ཞིབ་ཧུར་ཐག་བྱས་ཡོད། དུད་སྦྲེལ་ཚན་པས་མཉམ་སྡེབ་ཀྱི་མིང་ཐོག་ནས་དངུལ་བུན་སྒོར་ཁྲི་25གཡར་ནས་ཚོང་ཁང་གཉེར་བ་དང་ས་བླུག་འཕྲུལ་འཁོར་ཉོས་པ་དང་། ཐག་ཉེ་ས་དང་སྟབས་བདེ་སའི་རྩ་དོན་ལྟར་མང་ཚོགས་20ལྷག་ཙམ་གྱི་ལས་ཞུགས་གནད་དོན་ཐག་གཅོད་བྱས་པ། ཕྱུག་འགྱུར་རྣམ་གྲངས་ལས་ཡོང་འབབ་ཁེ་གཙང་སྒོར་ཁྲི་14ལྷག་ཙམ་བྱུང་བ། དུད་སྦྲེལ་ཚན་པའི་ནང་གི་མང་ཚོགས་52ཚང་མར་ཕན་པ་ཐོབ་པ་བཅས་བྱུང་བས་མང་ཚོགས་ཀྱི་གདེང་འཇོག་བཟང་པོ་མགྲིན་གཅིག་ཏུ་ཐོབ་ཡོད།

དམངས་ཕན་ཉེན་རྟོག་ཞབས་ཞུའི་ས་ཚིགས་བཙུགས་ནས་བདེ་འཇགས་བསྲུངས་པ།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ལྗོངས་ཡོངས་ཀྱི་དམངས་ཕན་ཉེན་རྟོག་ཞབས་ཞུའི་ས་ཚིགས་600ལྷག་ཙམ་ནམ་ཡང་མི་ནུབ་པའི“བདེ་སྲུང་གློག་བཞུ”600ལྷག་ཙམ་དང་འདྲ་བར་ལྗོངས་ཡོངས་ཀྱི་མི་རིགས་ཁག་གི་མང་ཚོགས་ཀྱི་བདེ་འཇགས་སྲུང་སྐྱོང་བྱེད་བཞིན་ཡོད།

བདེ་འཇགས་ལས་དོན་གྱི་དོན་དངོས་དང་ཟུང་འབྲེལ་བྱས་ཏེ་རང་ལྗོངས་ཀྱིས་དྲ་མིག་ཅན་གྱི་བཀོད་སྒྲིག་བླང་བྱ་ལྟར་དམངས་ཕན་ཉེན་རྟོག་ཞབས་ཞུའི་ས་ཚིགས་བཙུགས་པ་དེ་ནི་སྤྱི་ཚོགས་བཅོས་སྐྱོང་བྱེད་སྟངས་གསར་གཏོད་བྱས་པའི་བྱ་ཐབས་གསར་པ་ཞིག་རེད། ལོ་བཅུའི་རིང་སྤྱི་ཚོགས་བརྟན་ལྷིང་སྲུང་སྐྱོང་དང་། མི་དམངས་ཀྱི་བདེ་འཇགས་འགན་ལེན། མང་ཚོགས་ལ་སེམས་རྩ་འཁོལ་པོས་ཞབས་འདེགས་ཞུ་བ་བཅས་གཞི་གཅིག་ཏུ་འདུས་པའི་ལྟ་སྲུང་དྲ་བ་ཕྱོགས་ཡོངས་ནས་བཀྲམ་སྟེ་ཉེན་རྟོག་ཞབས་ཞུའི་ས་ཚིགས་རེ་རེས་ཉེན་དོན་སྒྲུབ་གཉེར་ཁྱབ་ཁོངས་རེ་གྲུབ་ནས་ཆུ་ཚོད་24རིང་རྒྱུན་ཆད་མེད་པར་སྐོར་གཡེང་བྱེད་ཀྱི་ཡོད། ཉེན་དོན་ས་ཚིགས་ཁག་གིས་འཁོར་གཏོང་སྐོར་གཡེང་དང་གོམ་བགྲོད་སྐོར་གཡེང་ཟུང་འབྲེལ་གྱི་སྐོར་གཡེང་བྱ་ཐབས་སྤྱོད་པ་དང“ཉིན་མོ་ཉེན་རྟོག་པ་མཐོང་རྒྱུ་ཡོད་པ་དང་དགོང་མོར་ཉེན་དོན་གློག་སྒྲོན་མཐོང་རྒྱུ་ཡོད་པ”མཐའ་འཁྱོངས་བྱས་ནས་སྟོང་ཆ་མི་ལུས་པ་དང་འགྲིབ་ཆ་མི་འཇོག་པའི་འགན་ལེན་བྱས་པ་དང་། ཁྲོམ་གཞུང་དུ་ཉེན་རྟོག་པ་མཐོང་ཚད་མང་དུ་ཏན་ཏིག་བཏང་བ། མང་ཚོགས་ཀྱི་བདེ་འཇགས་འགན་ལེན་བྱ་ཆེད་སྲ་ཞིང་བརྟན་པའི་སྲུང་ཡོལ་བསྐྲུན་ཡོད།

དམངས་ཕན་ཉེན་རྟོག་ཞབས་ཞུའི་ས་ཚིགས་སྤྱོད་འགོ་ཚུགས་པ་ནས་ད་བར་རང་ལྗོངས་ཀྱི་བདེ་འཇགས་གནས་ཚུལ་མུ་མཐུད་ལེགས་སུ་ཕྱིན་ནས་མི་དམངས་མང་ཚོགས་ཀྱི་ཐོབ་སྣང་དང་། སྐྱིད་སྣང་། བདེ་འཇགས་ཚོར་སྣང་བཅས་ཟམ་མི་ཆད་པར་ཆེ་རུ་ཕྱིན་ཡོད།

སྤྱི་ཚོགས་བཅོས་སྐྱོང་དེང་རབས་ཅན་ལ་སྐུལ་འདེད་བཏང་བ།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་ལྗོངས་ཀྱིས་བོད་ཀྱི་དོན་དངོས་དང་འཚམ་པའི་གྲོང་ཁོངས་ཀྱི་སྤྱི་ཚོགས་བཅོས་སྐྱོང་ཐབས་ལམ་གསར་པ་འཚོལ་ཞིབ་ཟམ་མི་ཆད་པར་བྱས་པ་དང་། གྲོང་ཁོངས་ཀྱི་སྤྱི་ཚོགས་བཅོས་སྐྱོང་ལམ་སྲོལ་གསར་པ་གསར་གཏོད་བྱས་པ། སྤྱི་ཚོགས་བཅོས་སྐྱོང་དེང་རབས་ཅན་དང་། ཁྲིམས་སྐྱོང་ཅན། རིག་ནུས་ཅན། ཆེད་ལས་ཅན་བཅས་ཀྱི་ཆུ་ཚད་མཐོ་རུ་ཏན་ཏིག་བཏང་སྟེ་ལྗོངས་ཡོངས་ཀྱི་སྤྱི་ཚོགས་སྤྱི་ཡོངས་རྒྱུན་མཐུད་ཞི་མཐུན་བརྟན་ལྷིང་ཡོང་བའི་འགན་ལེན་བྱས་ཡོད། སྤྱི་ཚོགས་བཅོས་སྐྱོང་ཁྱབ་ཁོངས་ཀྱི་ལྷུ་ཚིགས་ཉམས་ཞན་ཡིན་པར་དམིགས་ཏེ་བོད་རང་སྐྱོང་ལྗོངས་ཀྱི་གྲོང་ཁོངས་སྤྱི་ཚོགས་བཅོས་སྐྱོང་ཚོགས་ཆུང་གི་ཁོངས་མིའི་ཚན་པ་ཁག་གིས《བོད་རང་སྐྱོང་ལྗོངས་ཀྱི་དུས་རབས་གསར་པའི་ཤེས་དཔལ་ལག་ལེན་དང་བླངས་ཞབས་ཞུའི་ལས་དོན་གྱི་ལག་བསྟར་ཇུས་གཞི》དང་། 《བོད་རང་སྐྱོང་ལྗོངས་ཀྱི་སྡེ་ལས་དོ་དམ་བྱ་ཐབས》 《བོད་རང་སྐྱོང་ལྗོངས་ཀྱི་གྲོང་གསེབ་བཅོས་སྐྱོང་ཁྱབ་ཁོངས་ཀྱི་ཆེད་དོན་བཅོས་སྒྲིག་ལག་བསྟར་ཇུས་གཞི》སོགས་བཟོས་ནས་བཏོན་ཏེ་ལྗོངས་ཡོངས་ཀྱི་གྲོང་ཁོངས་སྤྱི་ཚོགས་བཅོས་སྐྱོང་དེང་རབས་ཅན་གྱི་ཚོད་ལྟའི་ལས་དོན་ལ་སྐུལ་འདེད་བཏང་ཡོད།

གྲོང་ཁོངས་ཀྱི་སྤྱི་ཚོགས་བཅོས་སྐྱོང་ཁྲོད་རང་ལྗོངས་ཀྱི་ཚོད་ལྟའི་གྲོང་ཁྱེར་དང་ས་ཁུལ་ཁག་གིས་དོན་དངོས་དང་ཟུང་འབྲེལ་དམ་ཟབ་བྱས་ནས་དངོས་སྒྲུབ་གོ་ཆོད་དང་། སྤྱོད་གོ་ནུས་ཐོན། བོད་ཀྱི་ཁྱད་ཆོས་ལྡན་པ་བཅས་ཀྱི་སྤྱི་ཚོགས་བཅོས་སྐྱོང་བྱེད་སྟངས་གསར་པ་རབ་དང་རིམ་པ་འཚོལ་ཞིབ་བྱས་ནས་བཏོན་པར་མང་ཚོགས་ཀྱི་དགའ་བསུ་ཐོབ་ཡོད།

ལོ་རྒྱུས་ཀྱི་འགོ་འཛུགས་ས་གསར་པའི་ཐོག་ལངས་ནས་རང་ལྗོངས་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཚོས་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་མཛུབ་སྟོན་གནང་བའི་འགྲོ་ལམ་བསྙེགས་ནས་སེམས་པ་གཅིག་མཐུན་དང་ལག་གདང་སྦྲེལ་ཏེ་གངས་ལྗོངས་ས་མཐོའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཀྱི་ལེའུ་གསར་པ་ཧུར་ཐག་རྩོམ་བཞིན་ཡོད།