ལོ་བཅུའི་རིང་འབད་འབུངས་ཡར་བརྩོན་བྱས་ནས་གཡུར་ཟའི་འབྲས་བུ་སྨིན། ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། རང་ལྗོངས་ཀྱིས་དམངས་འཚོ་རྩ་བར་འཛིན་རྒྱུ་དང་ཤེས་ལྡན་མི་སྣ་སྔོན་ལ་འཇོག་རྒྱུ་མཐའ་འཁྱོངས་ཀྱིས་འཕེལ་རྒྱས་ལ་སྐུལ་འདེད་གཏོང་རྒྱུ་དང་དམངས་འཚོར་ཕན་པ་འདོགས་རྒྱུ་ཟུང་འབྲེལ་བྱས་པས་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་བྱ་གཞག་ལ་ཕན་འབྲས་གསར་པ་ཐོན་པ་དང་། མཆོང་སྐྱོད་གསར་པ་བྱུང་བ། སྐས་རིམ་གསར་པ་ཞིག་ཏུ་སླེབས་ནས་མང་ཚོགས་ལ་བློ་ཡིད་ཚིམ་པའི་ཆབ་སྲིད་ཀྱི་རྒྱུགས་ལན་དང་དམངས་འཚོའི་རྒྱུགས་ལན་ཞིག་ཕུལ་ཡོད།

ཁྱོན་ཡོངས་ལ་ཁྱབ་པའི་ཐ་ཚད་འབུར་དུ་ཐོན་པ་བྱས་ནས་སྤྱི་ཚོཌ་འགན་སྲུང་དྲ་རྒྱ་དམ་དུ་ཏན་ཏིག་བཏང་བ།

འཐུས་སྒོ་ཚང་བའི་སྤྱི་ཚོགས་འགན་སྲུང་མ་ལག་ནི་དམངས་འཚོའི་རྨང་གཞི་ཡིན། ལོ་བཅུའི་རིང་རང་ལྗོངས་ཀྱིས་ཁྱོན་ཡོངས་ལ་ཁྱབ་པ་དང་། གཞི་རྩ་འགན་ལེན། རིམ་པ་མང་བ། རྒྱུན་མཐུད་ཆོག་པ་བཅས་ཀྱི་བྱེད་ཕྱོགས་མཐའ་འཁྱོངས་བྱས་ཏེ་དྲང་གཞག་རང་བཞིན་ལ་ཤུགས་སྣོན་དང་། འཁོར་རྒྱུག་རང་བཞིན་དང་འཚམ་ཐབས། རྒྱུན་མཐུད་ཆོག་པའི་རང་བཞིན་འགན་ལེན་བཅས་ཀྱི་ཐོག་ནས་སྲིད་ཇུས་ཀྱི་མ་ལག་རིམ་བཞིན་འཐུས་སྒོ་ཚང་དུ་འགྲོ་བ་དང་། ཁྱབ་རྒྱ་ཆེ་རུ་འགྲོ་བ། ཐོབ་ཐང་གི་ཆུ་ཚད་མཐོ་རུ་འགྲོ་བ། གྲོང་ཁྱེར་དང་གྲོང་གསེབ་ལ་སྤྱི་འདོམས་ཐུབ་པ་བཅས་ཀྱི་སྤྱི་ཚོགས་འགན་སྲུང་མ་ལག་གཅིག་གཞི་རྩའི་ཆ་ནས་བསྐྲུན་ཡོད།

རྒྱ་ཆེའི་མི་དམངས་མང་ཚོགས་ལ་སྔར་བས་བློས་འགེལ་ཆོག་པ་དང་དེ་བས་ལེགས་པའི་སྒོ་ནས་འགན་སྲུང་བྱ་ཆེད། རང་ལྗོངས་ཀྱིས་དམངས་ཡོངས་འགན་བཅོལ་ནང་ཞུགས་པའི་འཆར་གཞི་གནད་འཁེལ་ངང་ལག་བསྟར་དང་། སྤྱི་ཚོགས་འགན་བཅོལ་འབྲེལ་བ་ཐོ་འགོད་དང་སྤོ་སྒྱུར་རྒྱུན་མཐུད་བྱེད་ཐབས་འཐུས་སྒོ་ཚང་དུ་གཏོང་བ། སྤྱི་ཚོགས་འགན་བཅོལ་གྱི་ཀུན་གསལ་ཡོངས་ཁྱབ་འདུ་འགོད་ལག་བསྟར་ཤུགས་ཆེན་བྱེད་པ། སྤྱི་ཚོགས་འགན་བཅོལ་དགོན་སྡེར་ཁྱབ་པའི་འདུ་འགོད་དང་། སྤྱི་ཚོགས་འགན་བཅོལ་གྱི་སྤུས་ཚད་མཐོར་གཏོང་འདུ་འགོད། སྤྱི་ཚོགས་འགན་བཅོལ་གྱིས་དབུལ་སྒྲོལ་ལ་སྐུལ་མ་གཏོང་བའི་འདུ་འགོད། སྤྱི་ཚོགས་འགན་བཅོལ་མཐའ་མཚམས་སུ་ཁྱབ་གདལ་གཏོང་བའི་འདུ་འགོད་བཅས་ལག་བསྟར་ཤུགས་ཆེན་བྱས་ཏེ་སྤྱི་ཚོགས་འགན་བཅོལ་གྱི་ཁྱབ་ཁོངས་རྒྱ་ཆེར་གཏོང་རྒྱུའི་ལས་དོན་ཁྲོད་དགོན་སྡེའི་སྒྲིག་ཚུད་གྲྭ་བཙུན་དང་། ཡིག་ཚགས་དང་གཱ་བཟོས་པའི་མང་ཚོགས་དབུལ་པོ། དབུལ་སྒྲོལ་མི་འབོར་དང་མཐའ་མཚམས་ས་ཁུལ་གྱི་ཞིང་འབྲོག་མང་ཚོགས་བཅས་གལ་ཆེའི་ནང་གི་འགངས་ཆེར་བརྩིས་པས་འགན་བཅོལ་ནང་ཞུགས་ཚད་95%ཡན་རྒྱུན་འཁྱོངས་ཐུབ་ཡོད།

གཞན་ཡང་། “དྲ་གཅིག་ཀུན་སྒྲུབ”ཀྱི་སྤྱི་ཚོགས་འགན་བཅོལ་གཉེར་སྒྲུབ་ཞབས་ཞུའི་ནུས་པ་ཁྱོན་ཡོངས་ནས་ཆེ་རུ་སོང་ཡོད། རྒན་གསོ་དང་། ལས་རྨས། ལས་ཤོར་བཅས་ཀྱི་འགན་བཅོལ་རྒྱལ་ཡོངས་ཀྱི་སྔོན་དུ་ཞིང་ཆེན་རིམ་པའི་སྤྱི་འདོམས་མངོན་འགྱུར་བྱུང་བ་དང་། སྤྱི་ཚོགས་འགན་བཅོལ་གཱ་སྤྱོད་མི་འདོད་པ་ནས་ཡོངས་ཁྱབ་ངང་སྤྱོད་པའི་བར་ཚད་བརྒལ་བྱུང་བ། མི་སྤྱིའི་ལས་སྒོ་དེ་ཡུལ་དེ་རང་དུ་སྒྲུབ་དགོས་པ་ནས་ཞིང་ཆེན་སྒྲོལ་ནས་སྒྲུབ་ཆོག་པའི་བར་ཚད་བརྒལ་བྱུང་བ། བོད་འདི་ཉིད་རྒྱལ་ཡོངས་ནས་སྤྱི་ཚོགས་འགན་བཅོལ་གཱ་ཐོན་གསུམ་པ་ཁྱོན་ཡོངས་ནས་འགྲེམས་སྤེལ་བྱེད་མཁན་ཞིང་ཆེན་དང་པོར་གྱུར་ནས་གཱ་སྤྱོད་མཁན་ཁྲི་332.53ཟིན་པ་དང་མི་སྤྱི་པུས་གཏན་འཁེལ་བྱས་པའི་ཞིང་ཆེན་སྒྲོལ་ནས་ཀུན་སྒྲུབ་ཆོག་པའི་ཚོད་ལྟའི་ཞིང་ཆེན་8ཀྱི་གྲས་སུ་གྱུར་པ། ཁེ་ལས་ཀྱི་ལས་བཟོའི་གཞི་རྩའི་རྒན་གསོ་འགན་བཅོལ་གྱི་འབྲེལ་བ་གཞན་སྒྱུར་སོགས་ཀྱི་བྱ་བ་ཞིང་ཆེན་སྒྲོལ་ནས་ཀུན་སྒྲུབ་ཐུབ་པ་དང་བརྒྱུད་རིམ་ཧྲིལ་པོར་དྲ་སྒྲུབ་ཐུབ་ནས“ཞབས་ཞུ་ཡོངས་དྲ་སྒྲུབ་དང་ལས་སྒོ་ཡོངས་གཱ་སྤྱོད་”དངོས་སུ་མངོན་འགྱུར་ཐུབ་ཡོད།

ལས་ཞུགས་བརྟན་པོ་དང་འགན་ལེན་འབུར་དུ་ཐོན་པ་བྱས་ནས་དམངས་འཚོ་ལེགས་གཏོང་གི་རྩ་བ་བརྟན་དུ་ཏན་ཏིག་བཏང་བ།

ལས་ཞུགས་ནི་དམངས་འཚོའི་རྩ་བ་ཡིན། ལོ་བཅུའི་རིང་རང་ལྗོངས་ཀྱིས་ལས་ཞུགས་ཨང་དང་པོར་འཇོག་པའི་རྩ་དོན་ཐོག་མཐའ་བར་གསུམ་དུ་མཐའ་འཁྱོངས་བྱས་ནས“བརྟན་པོ་དྲུག”དང“འགན་ལེན་དྲུག”གི་བླང་བྱ་ལག་བསྟར་དོན་འཁྱོལ་ནན་ཏན་བྱས་ཏེ་ལས་ཞུགས་བརྟན་པོ་དང་འགན་ལེན་བྱ་རྒྱུ་དེ་ཆབ་སྲིད་ཀྱི་ལས་འགན་ཨང་དང་པོར་བརྩི་རྒྱུ་མཐའ་འཁྱོངས་བྱས་ཁར། དམངས་འཚོ་ལེགས་སུ་གཏོང་བ་དང་། མི་སེམས་གཅིག་ཏུ་སྒྲིལ་བ། བརྟན་ལྷིང་སྲུང་སྐྱོང་བྱེད་པ། ཞི་མཐུན་ལ་སྐུལ་འདེད་གཏོང་བ་འཐབ་ཇུས་བཅས་ཀྱི་མཐོ་ཚད་ཐོག་བཞག་ནས་དམངས་འཚོའི་མཐའ་ཚད་ཡིན་པའི་ལས་ཞུགས་བརྟན་དུ་བཏང་ཡོད།

2012ལོ་ནས་བཟུང་ལྗོངས་ཡོངས་ཀྱི་གྲོང་ཁྱེར་དང་གྲོང་རྡལ་དུ་ལས་ཞུགས་ཐུབ་མཁན་གསར་པ་ཁྱོན་བསྡོམས་མི་ཁྲི་46.63མང་དུ་ཕྱིན་པ་དང་། བརྟག་དཔྱད་བྱས་པའི་ལས་ཀ་ཤོར་ཚད་5%ནང་ཚུན་དུ་ཚོད་འཛིན་ཐུབ་ནས་ལོ་བཅུའི་ནང་རྒྱལ་ཡོངས་ཀྱི་དམའ་ཤོས་རྒྱུན་འཁྱོངས་ཐུབ་ཡོད། ཞིང་འབྲོག་པ་ཁྲི་502ལྷག་ཙམ་ལས་ཞུགས་གཞན་སྒྱུར་བྱས་ནས་ངལ་ནུས་ཡོང་འབབ་ཁྱོན་བསྡོམས་སྒོར་དུང་ཕྱུར་285ཟིན་པས་ལས་ཞུགས་ཀྱི་དུས་བབ་མུ་མཐུད་བརྟན་པོ་བྱུང་ཡོད།

རང་ལྗོངས་སུ་རང་སྐྱོང་ལྗོངས་དང་། གྲོང་ཁྱེར་དང་ས་ཁུལ། རྫོང་དང་ཆུས་བཅས་རིམ་པ་གསུམ་གྱི་མཐོ་སློབ་སློབ་ཐོན་སློབ་མའི་ལས་ཞུགས་ལས་གཏོད་ལས་དོན་འགོ་ཁྲིད་ཚོགས་ཆུང་དང་ཞིང་འབྲོག་པ་ལས་ཞུགས་གཞན་སྒྱུར་ལས་དོན་གྱི་ཆེད་དོན་སྐུལ་སྤེལ་ཚོགས་ཆུང་བཙུགས་ནས་ལས་ཞུགས་ཀྱི“འགོ་གཙོ་དང་པོའི”འདུ་འགོད་ལ་མུ་མཐུད་ཤུགས་སྣོན་བརྒྱབ་པ་དང་། 《མིག་སྔ་དང་སླད་ཕྱིན་དུས་སྐབས་ཤིག་རིང་གི་ལས་ཞུགས་ལས་གཏོད་ལས་དོན་ལ་ཤུགས་སྣོན་ཏན་ཏིག་རྒྱག་རྒྱུའི་སྐོར་གྱི་ལག་བསྟར་བསམ་འཆར》དང《ལས་ཞུགས་ཁ་གསབ་མ་དངུལ་དོ་དམ་བྱ་ཐབས》སོགས་སྲིད་ཇུས་ཡིག་ཆ་40ལྷག་ཙམ་སྔ་རྗེས་སུ་བཏོན་ནས་ཀྲུང་དབྱང་གི་ལས་ཞུགས་ཁ་གསབ་མ་དངུལ་གྱི་རྒྱབ་སྐྱོར་བརྩོན་ལེན་གང་ཐུབ་བྱས་པས་ལོའི་དངུལ་གྲངས་དེ་སྔའི་སྒོར་དུང་ཕྱུར་2ནས་ད་ལྟའི་སྒོར་དུང་ཕྱུར་12ཡན་མང་དུ་ཕྱིན་ཡོད།

ཞིང་འབྲོག་མང་ཚོགས་སོགས་གཙོ་གནད་ཚོགས་སྤྱིའི་ལས་ཞུགས་ལས་དོན་ལ་དམིགས་ཏེ་རང་ལྗོངས་ཀྱིས་རྣམ་གྲངས་ལ་བརྟེན་ནས་ལས་མི་བསྡུ་བ་དང་། ཐོན་ལས་ལ་བརྟེན་ནས་ལས་ཞུགས་ལ་སྐུལ་ཁྲིད། རྟེན་གཞིར་བརྟེན་ནས་ལས་ཞུགས་བརྟན་པོ། གསོ་སྦྱོང་ལ་བརྟེན་ནས་ལས་ཞུགས་སྐུལ་འདེད། ངལ་ནུས་ལ་བརྟེན་ནས་ལས་མི་ཕྱིར་གཏོང་། གསར་གཏོད་ལ་བརྟེན་ནས་ལས་ཞུགས་མང་གཏོང་བཅས་ཀྱི་ལས་ཞུགས་མ་ལག་བཏོད་ནས་ཞིང་འབྲོག་པ“འབྲོག་ར་ནས་ཁྲོམ་རར་འགྲོ་བ་དང་ས་ཞིང་ནས་ལས་ཡུལ་ལ་འགྲོ་བར”སྣེ་ཁྲིད་བྱས་ཡོད། ཞིང་འབྲོག་པ་ལས་ཞུགས་གཞན་སྒྱུར་གྱི་མི་གྲངས་2012ལོའི་ཁྲི་45ནས་2021ལོའི་ཁྲི་69.3བར་འཕར་ནས་འཕར་ཚད་54%ཟིན་པ་དང་། ངལ་ནུས་ཡོང་འབབ་2012ལོའི་སྒོར་དུང་ཕྱུར་18.5ནས་2021ལོའི་སྒོར་དུང་ཕྱུར་58.1བར་འཕར་ནས་འཕར་ཚད་ལྡབ་2.14ཟིན་པས། དེ་གཉིས་ཀ་ལོ་བཅུ་བསྟུད་མར་འཕར་ཡོད།

2017ལོའི་གོང་རང་ལྗོངས་ཀྱི་མཐོ་སློབ་སློབ་ཐོན་སློབ་མ་གཙོ་བོ་སྲིད་གཞུང་གིས་གཙོ་ཁྲིད་བྱེད་པའི་གཞུང་སྒྲིག་ལས་གནས་ལ་བརྟེན་ནས་ལས་ཞུགས་བྱེད་ཀྱི་ཡོད། 80%ཡན་གྱི་མཐོ་སློབ་སློབ་ཐོན་སློབ་མ་ཡོངས་བསྒྲགས་རྒྱུགས་ལེན་བསྡུ་སྤྱོད་བརྒྱུད་ནས་གཞི་རིམ་གྱི་འཐབ་ཕྱོགས་དང་པོར་བཀོད་སྒྲིག་བྱེད་ཀྱི་ཡོད། 2017ལོའི་རྗེས་སུ་ཕྱོགས་སྒྱུར་གྱི་གནོན་ཤུགས་ལ་ཁ་གཏད་ཧུར་ཐག་བཅག་ནས་ཁྲོམ་ར་ཅན་གྱི་ལས་ཞུགས་ལ་སྐུལ་འདེད་ཤུགས་ཆེན་བཏང་སྟེ་མཐོ་སློབ་སློབ་ཐོན་སློབ་མ་ཁེ་ལས་སུ་ལས་ཞུགས་དང་། གཞི་རིམ་དུ་ལས་ཞུགས། ལྗོངས་ཕྱིར་ལས་ཞུགས། རང་བརྟེན་ལས་གཏོད་དང་སྟབས་བསྟུན་ལས་ཞུགས་སོགས་ཕྱོགས་མང་གཞི་གཅིག་ཅན་གྱི་ལས་ཞུགས་རྣམ་པ་གསར་པ་བཏོད་ཡོད། ལོ་5ཡི་རིང་ལྗོངས་ཡོངས་ཀྱི་ལོ་འདི་གའི་མཐོ་སློབ་སློབ་ཐོན་སློབ་མ་ལས་ཞུགས་ཐུབ་ཚད་95%ཙམ་དང་། ཁྲོམ་རར་ལས་ཞུགས་ཐུབ་ཚད་70%ཡན། ལྗོངས་ཕྱིར་ལས་ཞུགས་ཐུབ་ཚད་8%བཅས་རྒྱུན་འཁྱོངས་བྱས་ཏེ་མཐོ་སློབ་སློབ་ཐོན་སློབ་མ་ཁྲོམ་ར་ཅན་གྱི་ལས་ཞུགས་བརྟན་ཐོག་ལེགས་འཕེལ་ཡོང་བ་བྱས་ཡོད།

དེ་དང་ཆབས་ཅིག་མཐོ་སློབ་སློབ་ཐོན་སློབ་མའི་གསར་གཏོད་ལས་གཏོད་ཀྱི་ཁྱད་ཆོས་དང་ལེགས་ཆར་དམ་པོར་དམིགས་ནས“8848ལས་གཏོད་གླིང”དང་། ལྷ་ས་གྲོང་ཁྱེར་གྱི་སྣེ་གསུམ་པའི་ཀུན་གཏོད་བྱ་ཡུལ། ཆབ་མདོའི་ཁམས་པའི་མུ་ཏིག་ཀུན་གཏོད་བྱ་ཡུལ་སོགས་རང་སྐྱོང་ལྗོངས་རིམ་པའི་ལས་གཏོད་སྐྱོང་སྤེལ་རྟེན་གཞི་10ལྷག་ཙམ་བསྐྲུན་རྒྱུར་སྐུལ་འདེད་བཏང་ཡོད། “ཚོང་ཁང་བརྒྱ་སྐྲུན་དང་སློབ་མ་སྟོང་སྐྱོར”གྱི་ཆེད་དོན་བྱ་སྤྱོད་དང “ལས་གཏོད་གསོ་སྦྱོང་དང་རྟེན་གཞིའི་ལྟ་སྦྱོང་ཟུང་འབྲེལ”གྱི“1+X”ཡི་གསོ་སྦྱོང་ཁྱབ་སྤེལ་བཏང་སྟེ་མི་ཁྲི་3.17ལ་ལས་གཏོད་གསོ་སྦྱོང་བྱས་པ་དང་། མི་7944བདེ་བླག་ངང་ལས་གཏོད་ཐུབ་པ། ལས་གཏོད་ལ་བརྟེན་ནས་མི་ཁྲི་1.69ལ་ལས་ཞུགས་སྐུལ་ཁྲིད་ཐུབ་ཡོད། བསྡོམས་རྩིས་བྱས་པར་གཞིགས་ན། ལོའི་གསོ་སྦྱོང་ལས་གཏོད་སློབ་མ་2012ལོའི་མི་300ནས་2021ལོའི་མི་5300ལྷག་ཙམ་བར་མང་དུ་ཕྱིན་པ་དང་། ལས་གཏོད་ལས་དོན་དེ་ཁེར་རྐྱང་གི་ལས་གཏོད་གསོ་སྦྱོང་ནས་ལས་གཏོད་རྗེས་མཐུད་ཞབས་ཞུ་དང་ལས་གཏོད་གཞི་རྟེན་འདེགས་སྐྱོར་སོགས་ཕྱོགས་བསྡུས་ཅན་དང་ཀུན་ཁྱབ་རྣམ་པའི་འགོ་ནས་མཇུག་བར་གྱི་ཞབས་ཞུའི་ཕྱོགས་སུ་འཕེལ་རྒྱས་ཕྱིན་ཡོད།

ལམ་སྲོལ་སྟོབས་ལྡན་དང་ཞི་མཐུན་སྐུལ་འདེད་འབུར་དུ་ཐོན་པ་བྱས་ཏེ་སྤྱི་ཚོགས་བརྟན་ལྷིང་གི་རྨང་གཞི་བརྟན་དུ་ཏན་ཏིག་བཏང་བ།

ཞི་མཐུན་གྱི་ངལ་རྩོལ་འབྲེལ་བ་འཛུགས་རྒྱུ་ནི་སྤྱི་ཚོགས་རིང་ལུགས་ཀྱི་ཞི་མཐུན་སྤྱི་ཚོགས་འཛུགས་སྐྲུན་བྱེད་པའི་རྨང་གཞི་གལ་ཆེན་ཞིག་ཡིན་ཞིང་། ལོ་བཅུའི་རིང་། རང་ལྗོངས་ཀྱིས་ལས་བཟོ་དང་ཁེ་ལས་ཀྱི་བདེ་རྩར་ཐུག་པའི་ཁེ་ཕན་འགན་སྲུང་བྱེད་རྒྱུ་ནས་འགོ་བཙུགས་ཏེ་གླ་ཆ་འགྱངས་ཆད་ཀྱི་གནད་དོན་རྩ་བཅོས་བྱེད་ཤུགས་ཟམ་མི་ཆད་པར་ཆེ་རུ་བཏང་བ་དང་། འགལ་བ་དང་རྩོད་གཞི་གྲལ་བཤེར་དང་འདུམ་འགྲིག་གཏིང་ཟབ་བྱས་ནས་ངལ་རྩོལ་འབྲེལ་བ་ཞི་མཐུན་བརྟན་ལྷིང་ཡོང་བའི་འགན་ལེན་བྱས་ཡོད། རང་སྐྱོང་ལྗོངས་ངལ་རྩོལ་ལྟ་ཞིབ་ཅུས“རྒྱལ་ཡོངས་ཀྱི་ཞིང་པ་ལས་མིར་གླ་ཆ་འགྱངས་ཆད་ཀྱི་གནད་དོན་རྩ་བཅོས་ལས་དོན་གྱི་སྔོན་ཐོན་མཉམ་སྡེབ”དང་སྐབས་དགུ་པའི་རྒྱལ་ཡོངས་ཀྱི“མི་དམངས་བློ་ཡིད་ཚིམ་པའི་གཞུང་ལས་པའི་མཉམ་སྡེབ”ལ་བདམས་པ་རེད།

གླ་ཆ་འགྱངས་ཆད་ཀྱི་གནད་དོན་རྩ་བཅོས་བྱེད་པའི་ཕུགས་ཕན་ལམ་སྲོལ་ཟམ་མི་ཆད་པར་འཐུས་ཚང་དུ་གཏོང་ཆེད། རང་ལྗོངས་ཀྱིས་ཞིང་པ་ལས་མིའི་མིང་དངོས་འགོད་པའི་ལམ་ལུགས་དོ་དམ་དང་། གླ་ཆ་འགན་སྲུང་དངུལ། ཞིང་པ་ལས་མིའི་གླ་ཆའི་ཆེད་སྤྱོད་རྩིས་ཁྲ་སོགས་ཀྱི་གླ་ཆ་འགྱངས་ཆད་གནད་དོན་སྔོན་འགོག་གི་འགན་སྲུང་བྱ་ཐབས་ཕྱོགས་ཡོངས་ནས་གཏིང་ཟབ་ཏུ་བཏང་བ་དང་། གསར་གཏོད་རང་བཞིན་གྱི་སྒོ་ནས་ལས་གྲྭ་འཛུགས་སྐྲུན་རྣམ་གྲངས་ཀྱི་འོས་ཐོབ་དམིགས་འཛིན་བྱ་ཐབས་བཏོན་ནས་རྩིས་ཐོ་ཁག་བགོས་དོ་དམ་དོན་ཐོག་ཏུ་འཁྱོལ་མེད་པ་སོགས་ཀྱི་ཁྲིམས་འགལ་བྱེད་སྤྱོད་ལ་ཟིལ་ཤུགས་སྤྲད་པ། “ཞུ་གཏུག་གནད་དོན་ཆུང་ཙག་ཡིན་རུང་དྲ་བ་ཡོངས་ཀྱིས་མཉམ་བཅོས”་དང“ཁྲིམས་འགལ་བྱེད་སྤྱོད་གང་ཞིག་ཡིན་རུང་ས་ཕྱོགས་གང་ས་ནས་ཚོད་འཛིན་ཕོག་པའི”དང་ལེན་ཐག་གཅོད་དང་མཉམ་འབྲེལ་ཆད་གཅོད་ཀྱི་ལམ་སྲོལ་བཙུགས་པ། “གླ་ཆ་ཆད་མི་ཕོད་པ་དང་། ཆད་མི་རུང་བ། ཆད་མི་འདོད་པ”བཅས་ཀྱི་བཅོས་སྐྱོང་རྣམ་པ་མུ་མཐུད་བརྟན་དུ་བཏང་ཡོད། མིག་སྔའི་བར་ལྗོངས་ཡོངས་ཀྱི་ངལ་རྩོལ་འགན་སྲུང་ལྟ་ཞིབ་ལས་ཁུངས་ཀྱིས་རིམ་རྩིས་བྱས་ན་ཐེར་འདོན་ཞུ་གཏུག་གྱོད་གཞི་ཁྲི་1.09བདག་སྤྲོད་བྱས་པ་དེ་མི་ཁྲི་10.76དང་འབྲེལ་བ་ཡོད་པ་དང་གླ་ཆ་སོགས་ཐོབ་ཆ་སྒོར་དུང་ཕྱུར་15.15འདེད་ལེན་ཐུབ་ཡོད།

དེ་དང་ཆབས་ཅིག་ངལ་རྩོལ་འབྲེལ་བ“ཞི་མཐུན་མཉམ་གནས”ཀྱི་ནུས་པ་མཐོར་གཏོང་གི་ལོ་གསུམ་བྱ་སྤྱོད་སྤེལ་བ་དང་། དཔེ་སྟོན་ཁེ་ལས་71སྐྱེད་སྲིང་བྱས་པ། ངལ་རྩོལ་འབྲེལ་བའི་མཐུན་སྦྱོར་ལམ་སྲོལ་སྔར་བས་འཐུས་ཚང་དུ་བཏང་བ། ཁེ་ལས་ཀྱི་དམངས་གཙོའི་དོ་དམ་ལམ་ལུགས་འཐུས་ཚང་དུ་བཏང་བ། ཁེ་ལས་ཀྱི་གླ་ཆ་མཉམ་སྡེབ་ཐོག་གྲོས་མོལ་བྱེད་པའི་ཁྱབ་ཁོངས་བརྟན་པོའི་ངང་རྒྱ་ཆེ་རུ་བཏང་བ་བཅས་བྱས་ཡོད།

གཞན་ཡང་། འདུམ་གཅོད་གྱོད་སྒྲུབ་ཀྱི་ལམ་ལུགས་འཐུས་ཚང་དུ་གཏོང་བ་དང་། ངལ་རྩོལ་མི་དོན་རྩོད་གཞི་འདུམ་གཅོད་ཀྱི་གྱོད་སྒྲུབ་སྒྲིག་སྲོལ་དང་རྩ་འཛུགས་ཀྱི་སྒྲིག་སྲོལ་ལ་བཟོ་བཅོས་བརྒྱབ་ཅིང་། རིམ་གསུམ་ངལ་རྩོལ་མི་དོན་རྩོད་གཞི་འདུམ་གཅོད་ཁང་དངོས་ཚན་ཅན་གྱི་འཛུགས་སྐྲུན་བྱེད་མགྱོགས་སུ་བཏང་ནས་རང་སྐྱོང་ལྗོངས་རིམ་པ་དང་། གྲོང་ཁྱེར་དང་ས་ཁུལ7 རྫོང་དང་ཆུས་67བཅས་སུ་འདུམ་འགྲིག་འདུམ་གཅོད་དོ་དམ་སྒྲིག་གཞི་བཙུགས་ཡོད། བསྡོམས་རྩིས་བྱས་པར་གཞིགས་ན། ལྗོངས་ཡོངས་སུ་ངལ་རྩོལ་རྩོད་གཞིའི་གྱོད་གཞི་ཁྲི་1.2བདག་སྤྲོད་བྱས་པ་དེ་མི་70394དང་འབྲེལ་བ་ཡོད་པ་དང་གྱོད་འབྲེལ་དངུལ་གྲངས་སྒོར་དུང་ཕྱུར་13.9ལྷག་ཙམ་ཟིན་ཡོད། དེའི་ནང་གྱོད་གཞི་ཁག་11697གྱོད་ཐག་བཅད་པ་དང་གྱོད་ཐག་བཅད་ཚད་99%ཟིན་ཡོད།

ལོ་བཅུའི་རིང་འབད་འཐབ་བྱས་ནས་དམངས་འཚོ་ལེགས་གཏོང་གི་ལེའུ་གསར་པ་བརྩམས། ལོ་བཅུའི་རིང་དོན་དངོས་བསྒྲུབས་ནས་བྱ་གཞག་འཕེལ་རྒྱས་ཀྱི་རྒྱང་ལམ་གསར་པ་བཏོད། རང་ལྗོངས་ཀྱིས་བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་མཐའ་འཁོར་དུ་དེ་བས་མཐུན་སྒྲིལ་དམ་ཟབ་བྱས་ནས་དཀའ་ངལ་ལ་མི་སྐྲག་པ་དང་། འབད་འབུངས་གསར་གཏོད། ཞུམ་མེད་མདུན་སྐྱོད་བཅས་བྱས་ཏེ་ལྗོངས་ཡོངས་ཀྱི་མི་ཤུགས་ཐོན་ཁུངས་དང་སྤྱི་ཚོགས་འགན་སྲུང་བྱ་གཞག་སྤུས་ཚད་མཐོ་བའི་འཕེལ་རྒྱས་ལ་ཚད་བརྒལ་གསར་པ་ཡོང་བར་སྐུལ་འདེད་ཧུར་ཐག་གཏོང་རྒྱུ་དང་ཕུལ་བྱུང་གི་གྲུབ་འབྲས་ཐོག་ནས་ཏང་གི་ཚོགས་ཆེན་ཉི་ཤུ་པ་རྒྱལ་ཁའི་ངང་འཚོག་རྒྱུར་བསུ་བ་ཞུ་རྒྱུ་རེད།