2019ལོའི་ཟླ་7ཚེས་15ཉིན་ཧྥུའུ་ཅན་ཞིང་ཆེན་གྱི་བོད་སྐྱོར་ལས་བྱེད་ཤེས་ལྡན་མི་སྣ་ཁག་དགུ་པས་ཕ་ཡུལ་གྱི་གཉེན་ཉེ་དང་ཁ་བྲལ་ནས་བོད་སྐྱོར་གྱི་ལམ་བུར་བསྐྱོད་ཡོད།

ཐོན་ལས་དམངས་འཚོའི་བོད་སྐྱོར་ལ་སླར་ཡང་གྲུབ་འབྲས་བཟང་པོ་ཐོབ་པ།

ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་དགུ་པར་ལོ་གསུམ་རིང་ཐོན་ལས་བོད་སྐྱོར་ལ་གྲུབ་འབྲས་གཡུར་དུ་ཟ་བ་ཐོབ་པ་སྟེ། ཧྥུའུ་ཅན་ཙེ་ཅིན་གཏེར་ལས་དང་བོད་ལྗོངས་ཅུས་ལུང་ཟངས་ལས་དབར་མ་དངུལ་སྒོར་དུང་ཕྱུར་38.83ཟིན་པའི་རྐང་དབང་ནང་བཤུག་གྲོས་མཐུན་གྲུབ་འབྲས་ཐོབ་པའི་ངང་འཇོག་རྒྱུར་སྐུལ་འདེད་གཏོང་རོགས་བྱས་པ་དེ་རྒྱལ་ཡོངས་ཀྱི་གཞི་ཁྱོན་ཆེ་ཤོས་ཀྱི་བོད་སྐྱོར་མ་འཇོག་གི་རྣམ་གྲངས་རྐྱང་པ་ཞིག་ཏུ་གྱུར་པ་དང་། མ་དངུལ་སྒོར་དུང་ཕྱུར་12.8བཏང་ནས་དཔའ་ཤོད་ཀྱི་དུང་དཀར་ཨར་འདམ་དང་མཛོ་སྒང་གི་རྒུན་ཆང་རྟེན་གཞི་སོགས་གཙོ་གནད་རྣམ་གྲངས་འཛུགས་སྐྲུན་ལ་སྐུལ་འདེད་བཏང་བ། དཔའ་ཤོད་ཐོན་ལས་གླིང་དང་། དཔའ་ཤོད་བོད་ཕག་དེང་རབས་ཅན་གྱི་གསོ་ཚགས་རྟེན་གཞི། མཛོ་སྒང་ཧུང་ཏ་ཐོན་ལས་གླིང་། ལྷོ་རོང་ཆོན་ལྷོ་དབུལ་སྐྱོར་ཐོན་ལས་གླིང་། དཔལ་འབར་གླ་བ་གསོ་ཚགས་རྟེན་གཞི་སོགས་ཧུར་ཐག་བཏོད་ཡོད་པ་རེད།

དབུལ་སྒྲོལ་འགག་སྒྲོལ་ཐད་ཧྥུའུ་ཅན་ཞིང་ཆེན་གྱིས་རིམ་རྩིས་བྱས་ན་ཆབ་མདོར་བོད་སྐྱོར་མ་དངུལ་སྒོར་དུང་ཕྱུར་14.77དོན་འཁྱོལ་བྱས་པ་དང་། དམངས་འཚོ་ལེགས་གཏོང་དང་དེ་བཞིན་དབུལ་སྒྲོལ་འགག་སྒྲོལ་གྱི་རྣམ་གྲངས་313རོགས་སྐྱོར་ལག་བསྟར་བྱས་པ། གྲོང་ཁྱེར་མ་བུ་བདེ་སྲུང་ཁང་སོགས་མཚོན་བྱེད་རང་བཞིན་གྱི་རྣམ་གྲངས་ཁག་གཅིག་དང་ཧྥུའུ་ཅན་བོད་སྐྱོར་གྱི་ཡུལ་གཞན་དུ་གནས་སྤོས་དབུལ་སྐྱོར་བཀོད་སྒྲིག་དཔེ་སྟོན་ས་ཚིགས་11བསྐྲུན་ནས་མང་ཚོགས་6000ལྷག་ཙམ་གནས་སྤོས་བྱས་པ་དང་གནས་སྡོད་བྱེད་ཚད་100%ཟིན་ནས་གྲོང་ཁྱེར་དང་གྲོང་གསེབ་ཀྱི་རྣམ་པ་དང་མང་ཚོགས་ཀྱི་འཚོ་བ་ཇེ་ལེགས་སུ་ཕྱིན་པ། སྔ་རྗེས་སུ་ཧྥུའུ་ཅན་ཞིང་ཆེན་གྱི་གྲོང་ཁྱེར་6ཏུ་བོད་སྐྱོར་ཐོན་རྫས་ཕྱིར་ཚོང་ས་ཚིགས་15བཙུགས་པ་དང་། ཆབ་མདོའི་ཞིང་ལས་ཁྱད་ལྡན་ཐོན་རྫས་ཧྥུའུ་ཅན་མཁོ་ཚོང་ཁང་དང་། ཞ་མོན་ཚོང་ཁང་ཆེ་མོ་སོགས་ལས་སྟེགས་སུ་འཚོང་རྒྱུའི་མཐུན་སྦྱོར་བྱས་ནས། བོད་ཕག་གི་ཤ་དང་། རྒུན་ཆང་། བེ་ཤ་སྐམ་ལྷེབ། ནས་ཀྱི་ཐོན་རྫས། གངས་རིའི་གཏེར་ཆུ་སོགས་ཞིང་ལས་ཐོན་རྫས་ལྗོངས་ཕྱིར་བྲིན་ཚོང་བྱེད་པའི་གཞི་ཁྱོན་ཆེ་རུ་བཏང་ནས་དབུལ་སྒྲོལ་མང་ཚོགས་ཀྱི་ཡོང་འབབ་བརྟན་པོ་འཕར་རྒྱུར་སྐུལ་འདེད་ནུས་ལྡན་བཏང་ཡོད་པ་རེད།

འགྲོ་འོང་མཉམ་འདྲེས་ལ་རྣམ་པ་གསར་པ་མངོན་པ།

2019ལོའི་ཟླ་7པ་ནས་བཟུང་། ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་དགུ་པས་ཧྥུ་ཅན་ཞིང་ཨུད་དྲིལ་བསྒྲགས་པུའུ་དང་། ཞིང་ཆེན་རིག་གནས་དང་ཡུལ་སྐོར་ཐིང་། ཞིང་ཆེན་སྒྱུ་རྩལ་ཁང་། ཆབ་མདོ་གྲོང་ཁྱེར་རིག་གནས་ཅུས་བཅས་དང་མཉམ་དུ“ཐང་གའི་ཚོན་རྩིའི་རི་མོའི་རིག་གནས་ཐོན་ལས”ཚོགས་ཆུང་བཙུགས་ཏེ། ཧྥུའུ་ཅན་གྱི“སྒྱུ་རྩལ་དབུལ་སྐྱོར”བྱེད་སྟངས་ལ་བརྟེན་ནས“ཐང་གའི་ཚོན་རྩིའི་རི་མོ”དང་གནད་སྨིན་དབུལ་སྐྱོར་ཟུང་འབྲེལ་དམ་ཟབ་བྱས་ཏེ། སྒྱུ་རྩལ་དབུལ་སྐྱོར་གྱི་ལམ་བུར་བསྐྱོད་པ་དང་། ཧྥུའུ་ཅན་ཞིང་ཆེན་གྱི་རིག་གནས་ཐོན་ལས་འཕེལ་རྒྱས་ཀྱི་ཆེད་སྤྱོད་མ་དངུལ་སྒོར་ཁྲི་150ལྷག་ཙམ་བརྩོན་ལེན་བྱས་ནས་ཆབ་མདོར་ས་གནས་དེ་གའི་ཐང་ག་བཞེངས་མཁན་160ལྷག་ཙམ་གསོ་སྐྱོང་བྱས་ཡོད།

ལོ་མང་རིང་། ཧྥུའུ་ཅན་ཞིང་ཆེན་གྱིས་ཐོག་མཐའ་བར་གསུམ་དུ་མེས་རྒྱལ་གཅིག་གྱུར་ལ་སྲུང་སྐྱོང་དང་མི་རིགས་མཐུན་སྒྲིལ་ལ་ཤུགས་སྣོན་རྒྱག་རྒྱུ་དེ་བོད་སྐྱོར་ལས་དོན་གྱི་དམིགས་ས་དང་ཤུགས་རྒྱག་སར་བརྩིས་ནས་ཆབ་མདོར་རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་སྟོན་གྲོང་ཁྱེར་གཏོད་རྒྱུར་རོགས་རམ་ཤུགས་ཆེན་བྱས་ཤིང་། རིམ་རྩིས་བྱས་ན་ཆ་སྒྲིག་རོགས་སྐྱོར་གྲོས་མཐུན་ཁག་130ལྷག་ཙམ་བཞག་པ་དང་། ཆབ་མདོའི་ལས་བྱེད་ཤེས་ལྡན་མི་སྣ་3000ལྷག་ཙམ་ཧྥུའུ་ཅན་དུ་གནས་སྦྱར་གསོ་སྦྱོང་བྱེད་པར་མངགས་པ། ཧྥུའུ་ཅན་གྱི་རིགས་ཁག་གི་རིགས་གཅིག་མཁས་ཅན་300ལྷག་ཙམ་ཆབ་མདོར་སློབ་ཁྲིད་བྱེད་པར་གདན་དྲངས་པ་དང་། ཆབ་མདོ་གྲོང་ཁྱེར་གྱི་འབྲེལ་ཡོད་སྡེ་ཚན་དང་མཉམ་དུ་ཕུའུ་ཁྲང་ས་གནས་གཉིས་ཀྱི་གཞོན་ནུ་ལོ་ཆུང་170ལྷག་ཙམ་སྒྲིག་འཛུགས་བྱས་ཏེ་ལུང་ཡན་རྟེན་གཞི་རྙིང་པ་དང་། ཧྥུའུ་ཀྲོའུ་ཁུལ་གསར། ཞ་མོན་དམིགས་བསལ་ཁུལ་སོགས་སུ་བསྐྱོད་དེ་སྤེལ་རེས་བྱེད་སྒོ་སྤེལ་བ་དང་ཧྥུའུ་ཅན་དུ་ཐེམ་ཁུངས་བོད་ནས་ཡིན་པའི་སློབ་གྲྭ་ཆེ་མོ་བའི་ལས་ཞུགས་འབྲེལ་གཏུག་ཞབས་ཞུའི་ས་ཚིགས་དང་དེ་བཞིན་དངོས་སྦྱོང་རྟེན་གཞི་11བཙུགས་པ་རེད།

སློབ་གསོ་དང་སྨན་བཅོས་བོད་སྐྱོར་སྐས་རིམ་གསར་པར་སླེབས་པ།

ཧྥུའུ་ཅན་ཞིང་ཆེན་གྱི་བོད་སྐྱོར་ལས་དོན་རུ་ཁག་ཁག་དགུ་པས་ས་གནས་དེ་གའི་ལས་བྱེད་ཤེས་ལྡན་མི་སྣ་སྐུལ་སློང་བྱས་ནས་གཞི་རིམ་སྨན་ཁང་སླར་གསོ་བྱེད་པའམ་ཡང་ན་སྨན་བཅོས་ཚན་ཁག་མང་པོ་འཛུགས་རོགས་བྱས་ཏེ་ལྗོངས་ཡོངས་ཀྱི་བུད་མེད་དང་བྱིས་པའི་བདེ་ཐང་གི“འབྲས་སྐྲན་གཉིས”དབྱེ་བཤེར་ནད་དཔྱད་ལྟེ་གནས་ཐོག་མ་དེ་བཙུགས་པ་དང་། པེ་ཅིང་སློབ་ཆེན་རུས་ཚིགས་ནད་གཞིའི་ཞིབ་འཇུག་སུའོ་དང་མཐུན་སྦྱོར་གྱིས་ཆབ་མདོར་རུས་ཚིགས་ནད་གཞིའི་སྨན་བཅོས་ལྟེ་གནས་བཙུགས་ཡོད། ཀྲུང་གོ་བུད་མེད་ཐེབས་རྩ་ལྷན་ཚོགས་དང་ཧྥུའུ་ཅན་ཧོ་རེན་ཐེབས་རྩ་ལྷན་ཚོགས་སོགས་ཚོགས་པ་དང་མཉམ་འབྲེལ་བྱས་ནས་གྲུམ་བུ་ཚིགས་ཆེན་གྱི་ནད་དང་དེ་བཞིན་བྱིས་པའི་ལྷན་སྐྱེས་སྙིང་ནད་དང་། ཡ་མ་གཟུགས། མཆུ་ཤོ་ཀན་ཤོ། མཇིང་རུས་འཁྱོག་པ་སོགས་ཁྱིམ་ཚང་དབུལ་པོའི་ནད་པར་སྨན་རིན་མི་དགོས་པར་སྨན་བཅོས་བྱས་པ་དང་རྒྱལ་ཡོངས་ཀྱི་གྲུམ་བུ་ཚིགས་ཆེན་གྱི་ནད་5Gཡི་རྒྱང་ཁྲིད་གཤགས་བཅོས་ཐོག་མ་བདེ་བླག་བྱས་པ། རྒྱལ་ཁབ་རིམ་པའི་ཆུ་ཚད་མཐོ་བའི་སྨན་བཅོས་རིགས་གཅིག་མཁས་ཅན་མི་ཐེངས་30ལྷག་ཙམ་ནང་འདྲེན་བྱས་ནས་ཆབ་མདོར“དགེ་རྒན་གྱིས་དགེ་ཕྲུག་ཁྲིད་པའི”རོགས་སྐྱོར་བྱེད་སྒོ་སྤེལ་བ་དང་། ས་གནས་དེ་གའི་སྨན་བཅོས་ལག་རྩལ་བ་ལྗོངས་ཕྱིའི་དགེ་རྒན་དང་མཉམ་དུ་སློབ་སྦྱོང་བྱེད་པར་མངགས་ནས་ནམ་ཡང་གནས་ཐུབ་པའི་ས་མཐོའི་སྨན་བཅོས་རུ་ཁག་ནུས་ཤུགས་ཡོད་རྒུས་བཏོད་ཡོད་པ་རེད།

སློབ་གསོའི་ཐད་ཧྥུའུ་ཅན་ཞིང་ཆེན་གྱིས་རོགས་སྐྱོར་བྱ་ཡུལ་གྱི་དངོས་ཡོད་དགོས་མཁོར་གཞི་ཚུགས་ཏེ་སྔ་རྗེས་སུ་ཆབ་མདོར་བོད་སྐྱོར་དགེ་རྒན་110ཁག་ཐེངས་བཞིར་དབྱེ་ནས་མངགས་གཏོང་བྱས་པ་དང་། སློབ་གྲྭ་45ཡིས་ཆབ་མདོའི་སློབ་གྲྭ་འབྲིང་ཆུང་དང་ལས་རིགས་སློབ་གྲྭ་དང་ཆ་སྒྲིག་མཉམ་སྐྲུན་དང་5Gརྒྱང་ཁྲིད་སློབ་ཁྲིད་སོགས་ལ་སྐུལ་འདེད་བཏང་ནས་ཧྥུའུ་ཅན་གྱི་སྤུས་ལེགས་སློབ་ཁྲིད་ཀྱི་ཐོན་ཁུངས་མཉམ་སྤྱོད་བྱས་པ་རེད།

སྒེར་སེམས་མེད་པའི་རོགས་སྐྱོར་དང་བརྩེ་སེམས་ཟབ་མོའི་རོགས་སྐྱོར་ལས་བོད་ཤར་རྒྱུད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ལ“ཧྥུའུ་ཅན་གྱི་དྲོ་སྐྱིད”ཚོར་ཐུབ་ཡོད་ཅིང་། ལག་གདང་སྦྲེལ་ནས་མདུན་སྐྱོད་བྱེད་རིང་ཧྥུའུ་ཅན་དང་ཆབ་མདོ་ས་ཁུལ་གཉིས་ཀྱིས་མཉམ་ལས་ཀྱི་ལེའུ་གསར་པ་ཞིག་བརྩམས་ཡོད།