ཚེས་26ཉིན། རང་སྐྱོང་ལྗོངས་ཏང་ཨུད་རྩ་འཛུགས་པུའུ་དང་དྲིལ་བསྒྲགས་པུས་གསར་འགྱུར་ཡོངས་བསྒྲགས་ཚོགས་འདུ་འཚོགས་ནས་བོད་སྐྱོར་ལས་བྱེད་ཤེས་ལྡན་མི་སྣ་ཁག་དགུ་པའི་ལས་དོན་སྤེལ་ཚུལ་ངོ་སྤྲོད་བྱས་པ་རེད། ལོ་གསུམ་རིང་ཞིང་ཆེན་དང་གྲོང་ཁྱེར་17དང་། ཀྲུང་དབྱང་དང་རྒྱལ་ཁབ་ལས་ཁུངས་ཀྱི་པུའུ་ཨུད་73དང་དེ་བཞིན་མི་དམངས་ཚོགས་པ། གཞུང་ཁོངས་རྐང་འཛིན་ཁེ་ལས་གལ་ཆེན་28 རྒྱལ་སྲིད་སྤྱི་ཁྱབ་ཁང་གཞུང་རྒྱུ་ཨུ་ལྷན་ལྟ་འདོམས་ཁེ་ལས་17བཅས་ནས་ཡོང་བའི་བོད་སྐྱོར་ལས་བྱེད་ཤེས་ལྡན་མི་སྣ་2113གྱིས་མཐའ་མཚམས་སུ་གཞི་ཚུགས་ནས་ས་མཐོར་བྱས་རྗེས་བཞག་པ་དང་། དངོས་སྒྲུབ་ཀྱི་ཐོག་ནས་འགན་འཁྲི་འཁུར་སེམས་མངོན་ཏེ་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏོང་ཆེད་ལེགས་སྐྱེས་ཧུར་ཐག་ཕུལ་ཡོད།

ལོ་གསུམ་རིང་བོད་སྐྱོར་ལས་བྱེད་ཤེས་ལྡན་མི་སྣས་ཏང་ཀྲུང་དབྱང་གི་ཐབས་ཇུས་དང་རང་སྐྱོང་ལྗོངས་ཏང་ཨུད་ཀྱི་བཀོད་སྒྲིག་བློ་བརྟན་འགྱུར་མེད་ངང་དོན་འཁྱོལ་བྱས་ནས་སློབ་སྦྱོང་དང་། བགྲོ་གླེང་། སྤེལ་རེས་སོགས་ཀྱི་བྱེད་སྒོ་ཐེངས་5400ལྷག་ཙམ་སྤེལ་བ་དང་། ཏང་གི་གསར་གཏོད་རིགས་པའི་གཞུང་ལུགས་ལ་བརྟེན་ནས་བོད་སྐྱོར་ལས་དོན་ལ་སྤྱི་འདོམས་བྱས་ཏེ་བོད་སྐྱོར་ལས་དོན་ཚང་མ“ཚང་དགོས་པ་གསུམ་དང་ཕན་འདོགས་པ་གཅིག”གི་བླང་བྱ་དང་འཚམ་པའི་འགན་ལེན་བྱས་པ། ཁོང་ཚོས“དོན་ཆེན་བཞི”དང“འགན་ལེན་བཞི”ལ་དམ་པོར་དམིགས་པ་དང་། “འཛུགས་གཏོད་བཞི”དང“མདུན་གྲལ་དུ་སླེབས་པ་བཞིར”ནུས་ཤུགས་གཅིག་སྒྲིལ་གྱིས་འདུ་ཤེས་དང་། ཉམས་མྱོང་། ལག་རྩལ་སོགས་ཀྱི་ལེགས་ཆ་བཏོན་ནས་འཆར་གཞིའི་ནང་གི་མ་དངུལ་སྒོར་དུང་ཕྱུར་141.44དང་འཆར་གཞིའི་ནང་ཚུད་མེད་པའི་མ་དངུལ་སྒོར་དུང་ཕྱུར་64.87དོན་འཁྱོལ་བྱས་པ། ཚོང་འགུགས་མ་འདྲེན་གྱི་བྱེད་སྒོ་ཐེངས་2093སྤེལ་ནས་ལྗོངས་ཕྱིའི་ཁེ་ལས་1141གདན་ཞུ་བྱས་པ། དོན་དངོས་ཐོག་དམིགས་སར་འབྱོར་བའི་མ་དངུལ་སྒོར་དུང་ཕྱུར་414.14ཟིན་ནས་བོད་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ལ་བཀྲག་མདངས་འཚེར་ས་མང་པོ་ཞིག་བསྣན་ཡོད།

ལོ་གསུམ་རིང་བོད་སྐྱོར་ལས་བྱེད་ཤེས་ལྡན་མི་སྣས་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བའི་ཁྲོད་འབྲེལ་ཟམ་དང་སྦྲེལ་ཐག་ཡག་པོ་བྱས་ནས་བརྩེ་སེམས་ཟབ་མོ་རོགས་སྐྱོར་དང་དྲོ་སྐྱིད་སྦྱིན་ཡོད། རོགས་སྐྱོར་བྱ་ཡུལ་ཕྱོགས་གཉིས་དབར་ཆ་སྒྲིག་རོགས་སྐྱོར་བྱས་པའི་མི་1200ལྷག་ཙམ་ཟིན་པ་དང་། མི་ཁྲི་1.35རོགས་སྐྱོར་བྱེད་མཁན་ཚན་པར་མངགས་གཏོང་བྱས་ནས་སྤེལ་རེས་ཐེངས་1300ལྷག་ཙམ་བྱས་པ། ལྗོངས་ཕྱིའི་སྤྱི་ཚོགས་ལས་རིགས་ཁག་སྐུལ་སློང་བྱས་ནས་བོད་ལ་མ་དངུལ་དང་དངོས་ཟོག་ཞལ་འདེབས་བརྒྱབ་པ་སྒོར་དུང་ཕྱུར་4ལྷག་ཙམ་ཟིན་པ་དེས་དྭ་ཕྲུག་དང་སློབ་མ་དབུལ་པོ་སོགས་ཁྲི་1.8ལྷག་ཙམ་ལ་རོགས་རམ་བྱས་པ་དང་། གྲུམ་བུ་ཚིགས་ཆེན་ནད་དང་། ལྷན་སྐྱེས་སྙིང་ནད། ཁ་ཤོ་རྐན་ཤོ་སོགས་ཀྱི་ནད་པ་7000ཙམ་ལ་སྨན་རིན་མི་དགོས་པར་སྨན་བཅོས་བྱས་པ། ཏང་ལ་དགའ་ཞེན་དང་། རྒྱལ་ཁབ་ལ་དགའ་ཞེན། སྤྱི་ཚོགས་རིང་ལུགས་ལ་དགའ་ཞེན་བཅས་ཀྱི་དྲིལ་བསྒྲགས་ཐེངས་2900ལྷག་ཙམ་བྱས་པ། མང་ཚོགས་དུད་ཚང་3215ལ་ཆ་སྒྲིག་རོགས་སྐྱོར་བྱས་ཏེ་མང་ཚོགས་ལ་བྱ་བ་དངོས་དང་བྱ་བཟང་ཁག་4200ལྷག་ཙམ་བསྒྲུབས་པ། ལྗོངས་ཕྱིའི་ལས་བྱེད་ཤེས་ལྡན་མི་སྣ་6000ལྷག་ཙམ་བོད་དུ་ཡོང་ནས་དུས་ཐུང་ཞབས་འདེགས་ཞུ་བར་མཐུན་སྦྱོར་ཧུར་ཐག་བྱས་ནས་རིགས་གཅིག་མཁས་ཅན་4100ལྷག་ཙམ་གྱིས་བོད་དུ་སློབ་ཁྲིད་བྱེད་པར་སྐུལ་འདེད་བཏང་བ། ལས་སྒོ་གསར་པ་དང་ལག་རྩལ་གསར་པ་2600ལྷག་ཙམ་ནང་འདྲེན་དང་ཁྱབ་གདལ་བཏང་བ། བོད་ཀྱི་ལས་བྱེད་ཤེས་ལྡན་མི་སྣ་ཁྲི་2ལྷག་ཙམ་སྒྲིག་འཛུགས་བྱས་ནས་ལྗོངས་ཕྱིར་ལྟ་སྐོར་དང་སློབ་སྦྱོང་བྱེད་པར་བཏང་བ། གསོ་སྦྱོང་འཛིན་གྲྭ་ཐེངས་5700ལྷག་ཙམ་གཉེར་ནས་ས་གནས་དེ་གའི་ལས་བྱེད་པ་མི་ཐེངས་ཁྲི་10ལྷག་ཙམ་ལ་གསོ་སྦྱོང་བྱས་པ་བཅས་རེད།