2019ལོའི་ཟླ་7པར། ཁྲུང་ཆིང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པའི་རུ་མི་ཡོངས་ཀྱིས་ཁྲུང་ཆིང་མི་དམངས་ཀྱི་མངགས་བཅོལ་ཟབ་མོ་ཕྲག་ཐོག་ཏུ་འཁུར་ནས། ཁྲུང་ཆིང་གྲོང་ཁྱེར་གྱི་རེས་སྐོར་གསར་པའི་བོད་སྐྱོར་ལས་དོན་སྒྲུབ་འགོ་བརྩམས་པ་རེད།

ལོ་གསུམ་རིང་། ཁྲུང་ཆིང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པས“ཟོལ་མེད་ཀྱིས་བོད་སྐྱོར་དང་། གནད་སྨིན་བོད་སྐྱོར། ཚན་རིག་དང་མཐུན་པའི་བོད་སྐྱོར”བཅས་ཀྱི་འདུ་ཤེས་གཞིར་བཟུང་། དམངས་འཚོ་ལེགས་གཏོང་དང་མི་སེམས་གཅིག་སྒྲིལ་བྱེད་རྒྱུ་དེ་བོད་སྐྱོར་ལས་དོན་གྱི་འགོ་འཛུགས་ས་དང་དོན་ལ་བབས་སར་བརྩི་བ་དང་། ས་གནས་དེ་གའི་མང་ཚོགས་ལ་འཕྲལ་དུ་ཐག་གཅོད་བྱེད་དགོས་པའི་གླེང་མང་བ་དང་དཀའ་གནད་ཀྱི་གནད་དོན་ལ་དམིགས་ཏེ། ཡངས་ཤིང་མཛེས་སྡུག་ལྡན་པའི་ས་གཞི་ཆེ་མོ་དེའི་ཐོག་གསར་འབྱེད་གསར་གཏོད་དང་། དམ་པ་དོན་གཉེར། བྱས་རྗེས་ཧུར་ཐག་འཇོག་པ་བཅས་བྱས་ནས། ཆབ་མདོའི་ཡུན་རིང་བདེ་འཁོད་དང་སྤུས་ཚད་མཐོ་བའི་འཕེལ་རྒྱས་ཆེད་འབུལ་འོས་པའི་ལེགས་སྐྱེས་ཕུལ་ཡོད་ལ“ཁྲུང་ཆིང་གི་རྗེས་ཤུལ”ཡང་ཆབ་མདོའི་ས་ཕྱོགས་གང་སར་བཞག་ཡོད་པ་རེད།

བོད་སྐྱོར་གྱི“རྒྱུག་མཐུད་དབྱུག་པ”རྒྱུན་འཛིན་ཡག་པོ་བྱས་པ།

ཁྲུང་ཆིང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པ་ཆབ་མདོ་གྲོང་ཁྱེར་དུ་འབྱོར་རྗེས། བོད་སྐྱོད་པ་རྒན་གྲས་ཀྱི་སྙིང་སྟོབས་དང“ལམ་གཉིས”ཀྱི་སྙིང་སྟོབས་རྒྱུན་འཛིན་དང་དར་སྤེལ་བཏང་ནས“ཆབ་སྲིད་ཀྱི་ཚུགས་གནས་མཐོ་བ་དང་། བསམ་བློའི་གོ་རྟོགས་མཐོ་བ། ལས་ཀའི་ཆུ་ཚད་མཐོ་བ། སྤྱོད་ཚུལ་གྱི་ཚད་གཞི་མཐོ་བ། སྒྲིག་ཁྲིམས་ཀྱི་ཚད་གཞི་མཐོ་བ”བཅས“མཐོ་བ་ལྔའི”དམིགས་ཚད་དོན་འཁྱོལ་བྱས་ཏེ་བོད་སྐྱོར་གྱི་འགྱུར་མེད་དཔུང་སྡེ་ཞིག་ནུས་ཤུགས་ཡོད་རྒུས་བཏོད་ཡོད་པ་རེད།

འདས་ཟིན་པའི་ལོ་གསུམ་ནང་། ཁྲུང་ཆིང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པའི་མི་5ལ་སྔ་རྗེས་སུ་བྱས་རྗེས་རིམ་པ་གསུམ་པ་དང་མི་3ལ་རང་སྐྱོང་ལྗོངས་ཀྱི་གཟེངས་བསྟོད་ཐོབ་པ་རེད། ཁྲུང་ཆིང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པར“བོད་རང་སྐྱོང་ལྗོངས་ཀྱི་དབུལ་སྒྲོལ་འགག་སྒྲོལ་གྱི་སྔོན་ཐོན་མཉམ་སྡེབ”ཀྱི་མཚན་སྙན་ཐོབ་པ་དང་། ཁྲུང་ཆིང་གི“ཚོགས་སྒྲིག་རྣམ་པའི”སློབ་གསོའི་ཤེས་ལྡན་མི་སྣའི་བོད་སྐྱོར་ལས་དོན་རུ་ཁག་ལ“ཆབ་མདོ་གྲོང་ཁྱེར་གྱི་མི་རིགས་མཐུན་སྒྲིལ་ཡར་ཐོན་དཔེ་བཟང་མཉམ་སྡེབ”ཀྱི་མཚན་སྙན་ཐོབ་པ་རེད།

མང་ཚོགས་ཀྱི་སེམས་ལ་ཟུག་པའི་བྱ་བ་དངོས་སྒྲུབ་པ།

ཁྲུང་ཆིང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པས་ཐེམ་ཁུངས་ཆབ་མདོ་ནས་ཡིན་པའི་མཐོ་སློབ་སློབ་ཐོན་སློབ་མའི་ལས་ཞུགས་དེ་ལས་ཞུགས་བོད་སྐྱོར་ལ་སྐུལ་འདེད་གཏོང་བ་དང་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ལ་སྐུལ་འདེད་གཏོང་བའི་བྱ་ཐབས་གལ་ཆེན་ཞིག་ཏུ་བརྩི་རྒྱུ་མཐའ་འཁྱོངས་བྱེད་པ་དང་། “གཞུང་གི་ལས་གནས་+ཚོགས་སྒྲིག་རྣམ་པའི་ལས་གནས”མཉམ་དུ་གཏོང་རྒྱུ་མཐའ་འཁྱོངས་ཀྱིས་བྱ་གཞག་ཚན་པའི་གཞུང་བསྡུའི་ལས་གནས་ཁྱོན་བསྡོམས་140དང་ཁེ་ལས་ཀྱི་ལས་ཞུགས་ལས་གནས་ཁྱོན་བསྡོམས་5000ལྷག་ཙམ་མཁོ་འདོན་བྱས་ཡོད། ཁྲུང་ཆིང་དུ་ཐེམ་ཁུངས་ཆབ་མདོ་ནས་ཡིན་པའི་སློབ་གྲྭ་ཆེ་མོ་བའི་ལས་ཞུགས་འབྲེལ་གཏུག་ས་ཚིགས་བཙུགས་ནས། ཐེམ་ཁུངས་ཆབ་མདོ་ནས་ཡིན་པའི་སློབ་གྲྭ་ཆེ་མོ་བ་126ཁྲུང་ཆིང་དུ་ལས་ཞུགས་ཐུབ་པར་རོགས་རམ་བྱས་པ་རེད།

སྔར་ནས་ད་བར་ཁྲུང་ཆིང་གི་བོད་སྐྱོར་ལས་བྱེད་པས“ལས་ཞུགས་སྔོན་འཇོག་དང་། སློབ་གསོ་སྔོན་སྤེལ། སྨན་བཅོས་དམངས་ཕན། མཁོ་སྤྲོད་འགན་ལེན་དང་རིན་གནོན། ཁོར་ཡུག་ལེགས་གཏོང”བཅས་དམངས་འཚོའི་འདུ་འགོད་ཆེ་གྲས་ལྔར་དམིགས་ཏེ་ཆབ་མདོའི་མི་སེར་གྱི་བདེ་རྩ་ནུས་ཤུགས་ཡོད་རྒུས་ཆེ་རུ་བཏང་ཡོད། སློབ་མ་དབུལ་པོ་200ལ“ཁྲུང་ཆིང་གིས་ཆབ་མདོར་རོགས་སྐྱོར་བྱེད་པའི་སྨན་བཅོས་སློབ་གསོའི་ཐེབས་རྩའི”རོགས་སྐྱོར་བྱས་པ་དང་། རིམ་རྩིས་བྱས་ན་ནད་ཐོག་སྨན་བཅོས་ཀྱི་ལག་རྩལ་གསར་པ་ཁག་417ལག་ལེན་བསྟར་ནས་གཤག་བཅོས་མང་པོ་ཞིག་བོད་དང་བོད་ཤར་ས་ཁུལ་དུ་བྱེད་ཐེངས་དང་པོ་ཡིན་པ་རེད། “ཐོག་མའི་ཐོན་ཡུལ་དང་། ཁྲུང་ཆིང་གི་ལས་སྟེགས། མཁོ་སྤྲོད་འཁོར་འབྲེལ་གྱི་ཁེ་ལས། དམངས་ཕན་ཚོང་ཁང”བཅས་ཟུང་འབྲེལ་གྱི་རྣམ་པ་སྤྱད་དེ་མཁོ་སྤྲོད་འགན་ལེན་དང་རིན་གནོན་མ་ལག་བཙུགས་པ་དང་འབྲེལ་ཕན་འབྲས་ཀྱང་རགས་ཙམ་ཐོན་ཡོད། རི་བོ་ཆེ་རྫོང་བཀྲ་ཤིས་སྒང་གྲོང་ཚོར“2020ལོའི་ཀྲུང་གོའི་གྲོང་གསེབ་མཛེས་ཤོས་བཅུའི”མཚན་སྙན་ཐོབ་པར་རོགས་རམ་བྱས་པ་རེད།

དེ་དང་ཆབས་ཅིག“རང་བརྟེན”གྱི་ནུས་པ་སྔར་བས་ཆེ་རུ་བཏང་ནས་མང་ཚོགས་ཀྱི་ནང་གནས་སྒུལ་ཤུགས་རྒྱུན་མཐུད་འཕེལ་ཆེད། ཁྲུང་ཆིང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པས་དོན་དངོས་དང་ཟུང་འབྲེལ་བྱས་ཏེ། ས་གནས་དེ་གར་རི་བོ་ཆེའི་འབྲི་གཡག་དང་བོད་ཕག་སོགས་ཁྱད་ལྡན་ཞིང་འབྲོག་ཐོན་ལས་འཕེལ་རྒྱས་དང་སྟོབས་ཆེར་གཏོང་རོགས་བྱས་པ་དང་། སྦྲང་རྩིའི་ཐོན་ལས་དང་ཨ་བི་ཁའི་ཐོན་ལས་སྐྱེད་སྲིང་ཧུར་ཐག་བྱས་པ། སྨར་ཁམས་ཀྱི་ལོ་ངོ་སྟོང་གི་ཚྭ་ཞིང་གི་5Aརིམ་པའི་མཛེས་ལྗོངས་ཁུལ་སྐྲུན་པར་རམ་འདེགས་བཅས་བྱས་ཡོད།

མི་རིགས་མཐུན་སྒྲིལ་གྱི་སྦྲེལ་ཟམ་བརྟན་པོ་བཙུགས་པ།

ཁྲུང་ཆིན་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པས་རང་འཁྲིའི་ལས་གནས་ལ་གཞིས་ཚུགས་པ་དང་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་བརྟན་པོར་འཛུགས་རྒྱུར་དམིགས་ནས། “བསམ་སྦྱོར་གཅིག་མཐུན་གྱིས་ཁྲུང་ཆིན་ལ་དགའ། བོད་སྐྱོར་བྱེད་པར་ང་ཚོས་མཉམ་དུ་འབད”ཅེས་པའི་སྤྱི་ཕན་བྱེད་སྒོ་ཧུར་ཐག་སྤེལ་བ་དེ་སྤྱི་ཚོགས་ཀྱི་བོད་སྐྱོར་ཐབས་ལམ་རྒྱ་ཆེར་གཏོང་བ་དང་སྤྱི་ཚོགས་ཀྱི་སྟོབས་ཤུགས་དེའི་ནང་ཞུགས་རྒྱུའི་ཡིད་དབང་འགུགས་པའི་དམ་འཛིན་བྱ་གཞི་ནུས་ལྡན་ཞིག་ལ་བརྩིས་ནས། ཡོངས་བསྒྲགས་དང་ཁ་གསལ་གྱི་རྩ་དོན་མཐའ་འཁྱོངས་ཀྱིས་ཉམས་ཞན་མི་ཚོགས་དང་སློབ་གྲྭ་འབྲིང་ཆུང་གི་སློབ་མར་ཕན་པ་ཐོབ་ཡུལ་དང་། སློབ་གྲྭ་འབྲིང་ཆུང་གི་སློབ་གསེང་ཀློག་དེབ་དང་སློབ་གསོ་སློབ་ཁྲིད་ཀྱི་སྒྲིག་ཆས་སོགས་སྤྱི་ཕན་ཞལ་འདེབས་འབུལ་བའི་ནང་དོན་དུ་བྱས་ཏེ་སྤྱི་ཚོགས་ཀྱི་ཞལ་འདེབས་བསྡུ་སྒྲིལ་དང་ཚད་ལྡན་དུ་བཏང་ཡོད།

ཁྲུང་ཆིང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པས་ད་དུང་འགྲོ་འོང་དང་། གྲོགས་པོ་སྒྲིག་པ། སྙིང་གཏམ་ཤོད་པ་བཅས་ཀྱི་བྱེད་སྒོ་ཧུར་ཐག་སྤེལ་ནས་ས་གནས་དེ་གའི་དུད་ཚང་187གྱི་མང་ཚོགས་དང་གཉེན་འཚོལ་དང་དྭ་ཕྲུག་293དང་ཆ་སྒྲིག་བྱས་པ་རེད།

དུས་ཆེན་དང་ངལ་གསོའི་དུས་ཚོད་འཆར་རིམ་བཞིན་ཆབ་མདོ་གྲོང་ཁྱེར་བྱིས་པའི་ཕན་བདེ་ཁང་གཉིས་པའི་ཕྲུ་གུ་ཚོས་བོད་སྐྱོར་གྱི“གཅེས་སེམས་པཱ་ལགས”དང“གཅེས་སེམས་ཨ་མ་ལགས”ཡོང་རྒྱུའི་རེ་སྒུག་བྱེད་ཀྱི་ཡོད། བོད་སྐྱོར་གྱི་རུ་སྣེ་ཁྲིད་མཁན་ལེའོ་ཁྲོན་ཅིན་གྱིས་གོང་དཔེ་འོག་སྟོན་གྱིས“ཏང་གི་བཀའ་དྲིན་ཚོར་བ·ཁྱིམ་ཚང་གཅིག་ལྟར་བརྩེ་བའི”མཉམ་སྐྲུན་བྱེད་སྒོ་སྤེལ་ནས་དུས་ཆེན་དང་གུང་གསེང་འཆར་རིམ་བཞིན་ངེས་པར་དུ་འཚམས་འདྲི་དང་། ངེས་པར་དུ་འདྲི་རྩད། ངེས་པར་དུ་འབྲེལ་གཏུག་བཅས་མཐའ་འཁྱོངས་བྱས་ཡོད།