གསར་འགོད་པར་ཉེ་ཆར་འབྲེལ་ཡོད་སྡེ་ཚན་ནས་ཤེས་རྟོགས་བྱུང་བར། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་ཆེར་བཏང་ནས་གྲོང་གསེབ་དར་རྒྱས་ཀྱི་བྱ་གཞག་འཕེལ་རྒྱས་འགྲོ་བར་སྐུལ་འདེད་གཏོང་ཆེད། ནག་ཆུ་གྲོང་ཁྱེར་གསེར་རྙེད་ཆུས་མགོ་འཁོར་གྲོང་ཚོར་བཅའ་སྡོད་ལྗོངས་ཏང་ཨུད་སྒྱུར་བཅོས་གཞུང་དོན་ཁང་དང་བོད་ལྗོངས་འཛིན་ལོར་ལྟ་འདོམས་ཅུས་ཀྱི་ལས་དོན་རུ་ཁག་གིས་གྲོང་ཚོའི“ཨུ་ལྷན་གཉིས”ཀྱི་ཚན་ཁག་དང་གྲོང་མི་ཡོངས་ཀྱི་རེ་ཞུར་ལན་ཧུར་ཐག་བསློགས་ནས་གྲོང་ཚོའི“ཨུ་ལྷན་གཉིས”ཀྱི་ཚན་ཁག་ཁོངས་མི་དང་ས་གནས་ས་ཐོག་ཏུ་བརྟག་དཔྱད་ཞིབ་འཇུག་དང་རིགས་པས་ཁུངས་སྐྱེལ་ཐེངས་མང་བྱེད་པར་བསྐྱོད་དེ། འབྲེལ་ཡོད་ཀུང་སི་དང་མཐུན་སྦྱོར་གྱིས་བོད་ལྗོངས་འཕེལ་རྒྱས་རོགས་སྐྱོར་ཐེབས་རྩ་ལྷན་ཚོགས་བརྒྱུད་མགོ་འཁོར་གྲོང་ཚོར་སྒོར་ཁྲི་50ཞལ་འདེབས་བརྒྱབ་པ་དེ་དག་མགོ་འཁོར་གྲོང་ཚོའི“བདེ་སྐྱིད་འབྲོག་ཁྱིམ་སྤྲོ་སྐྱིད་ཁང”གི་རྣམ་གྲངས་འཛུགས་པར་སྤྱད་པ་དང་། མིག་སྔར་རྣམ་གྲངས་དེ་གཉེར་སྐྱོང་བྱེད་འགོ་ཚུགས་པ་རེད།
ཤེས་རྟོགས་བྱུང་བར་གཞིགས་ན།“བདེ་སྐྱིད་འབྲོག་ཁྱིམ་སྤྲོ་སྐྱིད་ཁང”གི་རྣམ་གྲངས་དེས་ས་མཐོའི་ཁྱད་ལྡན་ཡུལ་སྐོར་ཐོན་ཁུངས་དང་འགྲིམ་འགྲུལ་གྱི་ལེགས་ཆར་བརྟེན་ནས། ཡུལ་སྐོར་བ་དང་ས་གནས་དེ་གའི་གྲོང་མིར་བོད་ཀྱི་བཟའ་བཏུང་དང་འབྲོག་ཁུལ་གྱི་གླུ་གར་སོགས་སྲོལ་རྒྱུན་གྱི་འབྲོག་ཁྱིམ་རིག་གནས་འཚོ་བ་ཉམས་ལེན་ཞབས་ཞུ་དང་སོས་དལ་སྤྲོ་གསེང་ཞབས་ཞུ་མཁོ་འདོན་བྱེད་རྒྱུ་དང་འབྲེལ། འབྲི་གཡག་དང་རྟ་བཞོན་པ་དང་གངས་རི་དང་དྲན་རྟེན་པར་རྒྱག་པ་སོགས་ཀྱི་ས་མཐོའི་ཁྱད་ལྡན་ཡུལ་སྐོར་ཞབས་ཞུ་རིམ་བཞིན་ཕུན་སུམ་ཚོགས་སུ་གཏོང་བ་དང་ད་དུང་རྒྱ་ཆེའི་ཡུལ་སྐོར་བར་ཚགས་ཤ་སྐམ་པོ་དང་། མར། འབྲིའི་འོ་མ། ཞོ་སོགས་ཀྱི་ས་གནས་དེ་གའི་ཁྱད་ལྡན་འབྲོག་ལས་ཐོན་རྫས་ཀྱང་འཚོང་རྒྱུ་ཡིན་པ་རེད།
ཟླ་བ་གསུམ་ལྷག་ཙམ་ཐུན་མོང་ཐོག་འབད་བརྩོན་བྱས་པ་བརྒྱུད། “བདེ་སྐྱིད་འབྲོག་ཁྱིམ་སྤྲོ་སྐྱིད་ཁང”གི་རྣམ་གྲངས་ལ་ཞིབ་བཤེར་རྩིས་ལེན་ཐུབ་ནས་གྲོང་ཚོའི“ཨུ་ལྷན་གཉིས”ཀྱི་ཚན་ཁག་ལ་དོ་དམ་དང་གཉེར་སྐྱོང་བྱེད་པར་རྩིས་སྤྲད་པ་རེད། མགོ་འཁོར་གྲོང་ཚོ་ཨུ་ལྷན་གྱི་ཀྲུའུ་རེན་བདེ་ཆོས་གཡང་སྐྱིད་ཀྱིས“མགོ་འཁོར་གྲོང་ཚོས‘བདེ་སྐྱིད་འབྲོག་ཁྱིམ་སྤྲོ་སྐྱིད་ཁང’གི་རྣམ་གྲངས་ལ་དོ་དམ་དང་བེད་སྤྱོད་ཡག་པོ་བྱས་ནས། མགོ་འཁོར་གྲོང་ཚོའི་མཉམ་སྡེབ་དཔལ་འབྱོར་སྔར་བས་སྟོབས་ཆེར་བཏང་སྟེ་གྲོང་མིར་འཕེལ་རྒྱས་ཀྱི་ཕན་པ་ལོངས་སུ་སྤྱོད་ཐུབ་པར་བྱེད་པ་དང་། དབུལ་སྒྲོལ་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་ཆེར་གཏོང་བ། གྲོང་གསེབ་དར་རྒྱས་ཀྱི་བྱ་གཞག་སྤུས་ཚད་མཐོ་པོས་འཕེལ་རྒྱས་འགྲོ་བར་སྐུལ་འདེད་གཏོང་བ་བཅས་བྱ་རྒྱུ་ཡིན”ཞེས་བཤད།