ང་དང་ང་འདྲ་བའི་དུས་རབས་ཉི་ཤུ་པའི་ལོ་རབས་དགུ་བཅུའི་ནང་དུ་སྐྱེས་པའི་གཞོན་ནུ་ཚོས་བོད་རྙིང་པའི་སྐབས་ཀྱི་ལོ་རྒྱུས་ལ་ངོས་འཛིན་དང་རྒྱུས་ལོན་བྱེད་ཐབས་ནི། དཔེ་དེབ་ཐོག་གི་སློབ་ཁྲིད་དང་། བརྙན་འཕྲིན་ནང་གི་གསལ་འགྲེལ། རྒན་རབས་ཚོའི་ངག་རྒྱུན་ལས་གྲགས་པའི་གཏམ་རྒྱུད་སོགས་ཡིན་པ་སྨོས་མི་དགོས། འོན་ཀྱང་དུས་རབས་གསར་པའི་ནང་འཚར་ལོངས་བྱུང་བའི་རང་ཉིད་ལ་ཆ་མཚོན་ན་བོད་རྙིང་པའི་མུན་ནག་གི་འཚོ་བར་རྒྱུས་ལོན་དང་ཤེས་རྟོགས་གཏིང་ཟབ་བྱུང་བའི་དུས་ནི་ང་རང་དམའ་འབྲིང་ལོ་རིམ་གཉིས་པར་བསྐྱོད་པའི་ལོ་དེའི་ཟླ་3ཚེས་28ཉིན་ཡིན།

ཉིན་དེར་སློབ་གྲྭའི་བཀོད་སྒྲིག་བཞིན་དམའ་འབྲིང་ལོ་རིམ་དང་པོ་དང་གཉིས་པའི་སློབ་མ་རྣམས་རྒྱལ་རྩེ་རྫོང་དང་བར་ཐག་སྤྱི་ལེ་4ལྷག་ཙམ་ཡོད་པའི་ཕ་ལྷ་གཞིས་ཀར་ལྟ་སྐོར་དུ་བསྐྱོད་པ་ཡིན། གཞིས་ཀ་དེར་ཕྱི་ཚུལ་ནས་བལྟས་ཚེ་བོད་ཀྱི་ཁང་པའི་བཟོ་སྐྲུན་གཞན་དང་འདྲ་བས་ཡིད་དབང་འཕྲོག་པའི་ཁྱད་ཆོས་མི་མངོན། ང་ཚོ་སྒྲོག་འགྲེལ་པ་དང་མཉམ་དུ་གཞིས་ཀའི་ཐོག་བརྩེགས་དང་པོ་དང་གཉིས་པར་བསྐྱོད་ནས། སྒྲོག་འགྲེལ་པའི་འགྲེལ་བཤད་ཉན་པ་དང་ཆབས་ཅིག་ཕ་ལྷ་དབང་ཕྱུག་གིས་གཙོས་པའི་སྐུ་དྲག་ཚོའི་ལ་བརྙན་དང་། སྔོན་ཆད་སྐུ་དྲག་ཚོས་བེད་སྤྱོད་བྱེད་མྱོང་བའི་གྱོན་གོས་དང་རྒྱན་ཆའི་རིགས། དེ་བཞིན་ཁྲིམས་གཅོད་ཡོ་ཆས་རིགས་བཅས་ལ་བལྟ་སྐབས་བོད་རྙིང་པའི་སྐུ་དྲག་ཚོའི་རྒྱུ་ནོར་དང་དབང་གྲགས་གཅིག་ཏུ་བསྡུས་པ་མངོན་བཞིན་མཆིས། དེ་རྗེས་སྒྲོག་འགྲེལ་པ་དང་མཉམ་དུ་གཞིས་ཀ་ནས་ཕྱིར་དོན་ཏེ་ཉེ་འགྲམ་དུ་ཡོད་པའི་བྲན་གཡོག་སྒོ་རྭའི་ནང་བསྐྱོད། སྒོ་རྭ་དེའི་ནང་ཁྱོན་བསྡོམས་ཁང་མིག་13ཡོད་ཅིང་། ཁང་པ་འདི་དག་ནི་ཐོག་དཔངས་དམའ་ཞིང་རྒྱ་ཁྱོན་ཆུང་བ་ཤ་སྟག་རེད། ང་རང་སློབ་གྲོགས་དང་མཉམ་དུ་ཁང་མིག་འདི་དག་ནང་བསྐྱོད་སྐབས་ཆ་རྐྱེན་ཧ་ཅང་སྐྱོ་བས་བལྟས་པ་ཙམ་གྱིས་སྐྱོ་སྣང་སྐྱེས་འོས་པ་ཞིག་ལས་མ་འདས།

ཐོས་པ་བརྒྱ་ལས་མཐོང་བ་གཅིག་དགའ་ཞེས་པ་ལྟར་ཕ་ལྷ་གཞིས་ཀ་ནི་བོད་རྙིང་པའི་སྐབས་མངའ་བདག་ཆེན་པོ་གསུམ་གྱི་སྐུ་དྲག་གཞིས་ཀའི་ཡ་གྱལ་ཞིག་ཡིན་པས། གཞིས་ཀའི་ནང་མུན་ནག་དང་རྗེས་ལུས་ཀྱི་བཀས་བཀོད་རྒྱུན་འཛིན་ཞིང་བྲན་ལམ་ལུགས་ཀྱི་འཚོ་བ་དངོས་དངོས་རྗེན་རྗེན་ང་ཚོའི་མིག་ལམ་དུ་མཐོང་ཐུབ། བོད་རྙིང་པའི་སྐུ་དྲག་དང་བྲན་གཡོག་གི་འཚོ་བའི་བར་གནམ་སའི་ཁྱད་པར་ཡོད་པ་རྟོགས་པས་རེ་ཞིག་ཧ་ལས་པར་གྱུར། སྐབས་དེར་ང་རང་ཧ་ལས་པ་དང་བསྟུན་དགའ་འོས་པ་ནི་གཅིག་ནས་ཀྲུང་དབྱང་སྲིད་གཞུང་གིས་བོད་ཞི་བའི་བཅིངས་འགྲོལ་བཏང་བ་དང་། བོད་རང་སྐྱོང་ལྗོངས་གྲ་སྒྲིག་ཨུ་ཡོན་ལྷན་ཁངབཙུགས་པ། ཆོས་སྲིད་ཟུང་འབྲེལ་གྱི་བཀས་བཀོད་རྒྱུན་འཛིན་ཞིང་བྲན་ལམ་ལུགས་རྩ་མེད་བཏང་བ་དང་། གཉིས་ནས་དམངས་གཙོའི་བཅོས་སྒྱུར་དང་སྒྱུར་བཅོས་སྒོ་དབྱེ་བྱས་ཚུན་གྱི་ལོ་འདི་དག་རིང་། བོད་འདི་ཉིད་ཀྲུང་གོ་གུང་ཁྲན་ཏང་གི་འགོ་ཁྲིད་འོག་ཕྱོགས་གང་ཅིའི་ཐད་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བ་དང་བོད་ཀྱི་མི་རིགས་ཁག་གི་མི་དམངས་རྣམས་བདེ་སྐྱིད་ལྡན་པའི་འཚོ་བ་སྐྱེལ་རྒྱུ་བྱུང་སྟེ། ང་དང་ང་འདྲ་བའི་སློབ་མ་དག་ཤེས་རིག་གི་སྐྱེད་ཚལ་ནང་གཤོག་རྩལ་ངོམས་པའི་གོ་སྐབས་བྱུང་བ་ལགས།

མདོར་ན་ཕ་ལྷ་གཞིས་ཀ་ལས་ང་ཚོར་བཀས་བཀོད་རྒྱུན་འཛིན་ཞིང་བྲན་ལམ་ལུགས་ཀྱི་མུན་ནག་གི་སྤྱི་ཚོགས་རྣམ་པ་མཐོང་ཐུབ། ད་ཆ་རང་ཉིད་ཀྲུང་གོ་གུང་ཁྲན་ཏང་གི་ཡང་དག་པའི་འགོ་ཁྲིད་འོག་དུས་རབས་གསར་པའི་བོད་ཀྱི་རྒྱུན་འཛིན་པ་ཞིག་གི་ངོས་ནས་ལོ་རྒྱུས་བློ་ལ་བརྟན་པོར་ངེས་ནས་རྒྱང་སྐྱོད་ཀྱི་ལམ་བུ་གསར་པའི་ཐོག་འབད་འབུངས་ཡར་བརྩོན་གྱིས་ད་ལྟའི་བདེ་སྐྱིད་ཀྱི་འཚོ་བར་གཅེས་སྤྲས་བྱས་ནས་བོད་ཀྱི་ལེའུ་གསར་པ་བརྩམ་རྒྱུ་ནི་ཧ་ཅང་གལ་ཆེ་བ་ཞིག་རེད་ལགས། (བོད་རང་སྐྱོང་ལྗོངས་དྲ་འཕྲིན་གཞུང་ལས་ཁང་། ལྷག་ཕན། ཟླ་བ་སྒྲོལ་མ)