ཉེ་ཆར། རང་སྐྱོང་ལྗོངས་མི་དམངས་སྲིད་གཞུང་གཞུང་དོན་ཐིང་གིས《ལྷ་སའི་ལྷོ་རི་དང་བྱང་རི་སྔོ་ལྗང་ཅན་དུ་སྒྱུར་བའི་ནང་ཞུགས་རྒྱུར་ལྕག་སྐུལ་དང་རྒྱབ་སྐྱོར་བྱ་རྒྱུའི་སྐོར་གྱི་སྲིད་ཇུས་བྱེད་ཐབས》བཀྲམ་པ་མ་ཟད། བརྡ་ཐོ་བཏང་སྟེ་ས་ཁུལ་དང་སྡེ་ཚན་ཁག་གིས་ལག་བསྟར་ནན་ཏན་བྱེད་དགོས་པའི་བླང་བྱ་ཡང་བཏོན་པ་རེད།

《བྱེད་ཐབས》ནང་བསྟན་དོན། ལྷ་སའི་ལྷོ་རི་དང་བྱང་རིའི་རྒྱལ་ཁབ་ས་ཆ་སྔོ་འགྱུར་གྱི་གོམ་སྟབས་མགྱོགས་སུ་གཏོང་བ་དང་སྤྱི་ཚོགས་ཀྱི་མ་རྩ་སྔོ་འགྱུར་ལས་གྲྭ་འཛུགས་སྐྲུན་ནང་གཏོང་བའི་ཧུར་སེམས་ཆེ་རུ་གཏོང་ཆེད། 《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་ནགས་ཚལ་བཅའ་ཁྲིམས》དང་།《ཚན་རིག་དང་མཐུན་པའི་སྔོ་འགྱུར་བྱ་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གི་མཛུབ་ཁྲིད་བསམ་འཆར》(རྒྱལ་གཞུང་སྤེལ〔2021〕ཡིག་ཨང་19པ)《སྤྱི་ཚོགས་ཀྱི་མ་རྩ་སྐྱེ་ཁམས་སྲུང་སྐྱོང་དང་ཉམས་གསོའི་ནང་གཏོང་རྒྱུར་ལྕག་སྐུལ་དང་རྒྱབ་སྐྱོར་བྱ་རྒྱུའི་སྐོར་གྱི་རྒྱལ་སྲིད་སྤྱི་ཁྱབ་ཁང་གཞུང་དོན་ཐིང་གི་བསམ་འཆར》(རྒྱལ་གཞུང་སྤེལ〔2021〕ཡིག་ཨང་40པ)《བོད་རང་སྐྱོང་ལྗོངས་ཀྱི་རྒྱལ་ཁབ་སྐྱེ་ཁམས་ཤེས་དཔལ་གྱི་མཐོ་ས་བསྐྲུན་པའི་སྲོལ་ཡིག》སོགས་བཅའ་ཁྲིམས་ཁྲིམས་སྲོལ་དང་སྲིད་ཇུས་ཀྱི་གཏན་འབེབས་གཞིར་བཟུང་། དོན་དངོས་དང་ཟུང་འབྲེལ་བྱས་ཏེ་སྲིད་ཇུས་དང་བྱེད་ཐབས་འདི་གཏན་ལ་ཕབ་པ་ཡིན། 《བྱེད་ཐབས》འདིར་ཁྱོན་དོན་ཚན་སུམ་ཅུ་ཡོད། 

《བྱེད་ཐབས》ནང་བསྟན་དོན། ཁེར་རྐྱང་ངམ་ཡང་ན་མཉམ་འབྲེལ་སྒྲིག་གཞིའི་རྣམ་པའི་ཐོག་ནས་ལྷ་སའི་ལྷོ་རི་དང་བྱང་རི་སྔོ་ལྗང་ཅན་དུ་སྒྱུར་རྒྱུ་འགན་གཙང་ལེན་མཁན་ཁེ་ལས་དང་། སྤྱི་ཚོགས་ཚོགས་པ། མི་སྒེར་སོགས་ལ་ས་ཞིང་འགན་གཙང་གཉེར་སྐྱོང་དང་། མ་དངུལ་ཁ་གསབ། དངུལ་རྩའི་རོགས་སྐྱོར། ཐཱན་བསྡུས་ཉོ་ཚོང་། ནགས་ཚལ་འགན་བཅོལ། ནགས་ཚལ་བདག་སྐྱོང་སོགས་ཀྱི་ཐད་གཟིགས་སྐྱོང་སྲིད་ཇུས་དང་རོགས་སྐྱོར་བྱེད་ཐབས་བཏོན་ཡོད། 

ལྷ་སའི་ལྷོ་རི་དང་བྱང་རི་སྔོ་ལྗང་ཅན་དུ་སྒྱུར་བའི་ལས་གྲྭའི་ས་ཁོངས་དེ་སྔོ་འགྱུར་འཛུགས་སྐྲུན་ས་ཆ་དང་དེ་བཞིན་ནགས་ཚལ་ཡུལ་སྐོར་དང་། ནགས་ཚལ་ལུས་གསོ། ལུས་རྩལ། དཔལ་འབྱོར་འབྲས་ཤིང་གླིང་། ནགས་ཁྲོད་དཔལ་འབྱོར། གཉེར་སྐྱོང་ཞབས་ཞུའི་སྒྲིག་བཀོད་སོགས་གཉེར་སྐྱོང་རང་བཞིན་གྱི་ས་ཆ་དང་འབྲེལ་བ་ཡོད་པས་ཁོངས་གཏོགས་ས་ཆའི་རྩ་དོན་ལྟར་ས་གནས་དེ་གའི་མི་དམངས་སྲིད་གཞུང་གིས་དོན་འཁྱོལ་བྱ་རྒྱུའི་འགན་འཁུར་དགོས། 

《བྱེད་ཐབས》ནང་ནན་བཤད་བྱས་དོན། ཁེ་ལས་དང་། སྤྱི་ཚོགས་ཚོགས་པ། མི་སྒེར་སོགས་ཀྱིས་ས་རྒོད་འགན་གཙང་བླངས་ནས་ནགས་གསོ་བྱེད་སྐབས་འགན་གཙང་དུས་ཡུན་རིང་ཤོས་ལོ་70དང་ཐུང་ཤོས་ལོ་30ཡིན་པ་རེད། ས་ཞིང་གི་བདག་དབང་ལ་འགྱུར་བ་མེད་པའི་སྔོན་འགྲོའི་ཆ་རྐྱེན་འོག་ས་གླ་སྤྲོད་མི་དགོས། 

《བྱེད་ཐབས》ནང་བསྟན་དོན། རྩ་དོན་ཐོག་ཁེ་ལས་དང་སྤྱི་ཚོགས་ཚོགས་པས་ས་རྒོད་འགན་གཙང་བླངས་ནས་ནགས་བཟོ་མུའུ་2000ཡན་དང་། མཉམ་ལས་ཁང་གིས་ས་རྒོད་འགན་གཙང་བླངས་ནས་ནགས་བཟོ་མུའུ་500ཡན། མི་སྒེར་གྱིས་ས་རྒོད་འགན་གཙང་བླངས་ནས་ནགས་བཟོ་མུའུ་100ཡན་བཅས་བྱས་རིགས་ལ་ནགས་ལས་དང་རྩྭ་ཐང་གཙོ་འགན་སྡེ་ཚན་གྱིས《བོད་རང་སྐྱོང་ལྗོངས་ཀྱི་ནགས་བཟོའི་ལས་གྲྭར་ཞིབ་བཤེར་རྩིས་ལེན་དང་དོ་དམ་བྱེད་ཐབས》ཀྱི་གཏན་འབེབས་གཞིར་བཟུང་ཞིབ་བཤེར་རྩིས་ལེན་བྱས་ནས་ཚད་གཞི་ལོན་རྗེས་ནགས་བཟོ་འགན་གཙང་ལེན་མཁན་ཕྱོགས་ཀྱིས་འབྲེལ་ཡོད་ཁ་གསབ་སོགས་ཀྱི་སྲིད་ཇུས་ལོངས་སྤྱོད་བྱེད་ཆོག 

ས་རྒོད་འགན་གཙང་ལེན་རིང་ནགས་བཟོ་དང་ཆུ་འདྲེན་ལ་གློག་སྤྱོད་སྐབས་ཞིང་ལས་ཐོན་སྐྱེད་ཀྱི་གློག་རིན་གཞིར་བཟུང་ཆུ་ཚོད་ཆན་ཝ་རེར་སྒོར་ཟུར་2དང་། ནགས་བཟོ་དང་ཆུ་འདྲེན་ལ་གློག་སྤྱོད་པར་ཆུ་ཚོད་ཆན་ཝ་རེར་ཁ་གསབ་སྒོར་ཟུར་1སྤྲོད་རྒྱུ། འབྲེལ་ཡོད་ཁ་གསབ་མ་དངུལ་ནི་ལས་གྲྭ་འདིའི་འཛུགས་སྐྲུན་འགྲོ་གྲོན་ནས་ཐག་གཅོད་བྱེད་རྒྱུ་རེད། ནགས་བཟོའི་ས་ཆའི་གཉེར་སྐྱོང་རང་བཞིན་གྱི་རྣམ་གྲངས་25%ལ་གློག་རིན་གྱི་ཁ་གསབ་སྲིད་ཇུས་ལོངས་སྤྱོད་བྱེད་རྒྱུ་མེད། 

《བྱེད་ཐབས》ནང་ནན་བཤད་བྱས་དོན། སྤྱི་ཚོགས་ཀྱིས་མ་དངུལ་ཞལ་འདེབས་ཕུལ་ནས་ནགས་བཟོ་སྔོ་འགྱུར་བྱེད་པར་ལྕག་སྐུལ་དང་རྒྱབ་སྐྱོར་བྱས་ཐོག་སྤྱི་ཚོགས་ཀྱིས་ཞལ་འདེབས་ཕུལ་བའི་མ་དངུལ་དེ་དག་སྤྱི་འདོམས་བྱས་ནས་ལས་གྲྭ་འདིའི་འཛུགས་སྐྲུན་ལ་སྤྱོད་རྒྱུ། ཞལ་འདེབས་དངུལ་གྲངས་སྒོར་ཁྲི1(ཚུད་པ)ནས་ཁྲི10(ཚུད་པ)བར་གྱི་མི་སྒེར་དང་། ཞལ་འདེབས་དངུལ་གྲངས་སྒོར་ཁྲི10(ཚུད་པ)ནས་ཁྲི100(ཚུད་པ)བར་གྱི་ཁེ་ལས་ལ་གཟི་བརྗིད་མཚན་སྙན་ལག་འཁྱེར་སྤྲོད་རྒྱུ། ཞལ་འདེབས་དངུལ་གྲངས་སྒོར་ཁྲི་10(མ་ཚུད་པ)ཡན་གྱི་མི་སྒེར་དང་སྒོར་ཁྲི་100(མ་ཚུད་པ)ཡན་གྱི་ཁེ་ལས་ལ་ཞལ་འདེབས་ཕུལ་ནས་ནགས་བཟོ་བྱས་པའི་ས་ཆར་གཟི་བརྗིད་བྱང་བུ་བཙུགས་ཏེ་ནགས་བཟོ་སྔོ་འགྱུར་གྱི་མིང་འགོད་དབང་ཆ་སྤྲོད་རྒྱུ།

སྲིད་ཇུས་དང་བྱེད་ཐབས་འདི་པར་འགྲེམ་བྱས་ཉིན་ནས་བཟུང་ལག་ལེན་བསྟར་རྒྱུ།

(ཞིབ་ཕྲའི་ནང་དོན་ཚེས་31ཉིན་གྱི་བོད་ལྗོངས་ཉིན་རེའི་ཚགས་པར་དང་ཀྲུང་གོའི་བོད་ལྗོངས་གསར་འགྱུར་དྲ་ཚུགས། བོད་ལྗོངས་ཉིན་རེའི་ཚགས་པར་གྱི་དུད་སྣེ་བཅས་ལ་གཟིགས་རོགས)