ལོ་རེའི་ཟླ་3ཚེ་21ཉིན་ནི་རྒྱལ་སྤྱིའི་གཉིད་ལོག་ཉིན་མོ་ཡིན་པ་དང་། མིའི་མི་ཚེའི་གསུམ་ཆ་གཅིག་ཙམ་གཉིད་ཉལ་བའི་ནང་འདའ་བཞིན་ཡོད། གཉིད་ཉལ་རྒྱུ་ནི་མི་རྣམས་ངལ་གསོ་བའི་ཐབས་ཤེས་ཡག་ཤོས་ཤིག་ཡིན་ལ། ཚན་རིག་དང་མཐུན་པའི་བདེ་སྲུང་གི་ནང་དོན་གཙོ་བོ་ཞིག་ཀྱང་རེད། འོན་ཏེ་གཉིད་མ་ཉལ་གོང་དོན་ཆུང་འགའ་ཞིག་ལ་སྣང་ཆུང་ཤོར་ན་བདེ་ཐང་ལ་གནོད་འཚེ་ཡོད་པས། དེ་རིང་རྒྱལ་སྤྱིའི་གཉིད་ལོག་ཉིན་མོ་དེར་ངེད་རྩོམ་སྒྲིག་པས་དུས་རྒྱུན་མི་རྣམས་ཀྱིས་གཉིད་ཉལ་སྐབས་དོ་སྣང་བྱེད་དགོས་པ་ཁག་གཅིག་ངོ་སྤྲོད་བྱ་རྒྱུ་ཡིན།དོ་སྣང་དགོས་པ་གཤམ་གསལ་ཏེ། 

1、ལག་འདོགས་ཆུ་ཚོད་ཕུད་དགོས།

ལག་འདོགས་ཆུ་ཚོད་བཏགས་ནས་གཉིད་ལ་ཡུར་ན་ཆུ་ཚོད་དེ་རང་གི་བེད་སྤྱོད་བྱེད་པའི་ཡུན་ཚད་ཐུང་དུ་འགྲོ་བ་ཙམ་མ་ཟད། ཆུ་ཚོད་མང་པོ་ཞིག་གི་ནང་རྫས་འགྱེད་འཕྲོ་ཕྲ་མོས་མི་ལུས་ལ་མངོན་མེད་ཀྱི་སྒོ་ནས་གནོད་འཚེ་གཏོང་གི་ཡོད།

2、སོ་ཚབ་ཕུད་དགོས།

སོ་ཚབ་བསྒར་བའི་མིས་མཚན་མོ་གཉིད་ཉལ་སྐབས་སོ་ཚབ་ཕུད་དགོས། ཁ་ནང་དུ་རང་དགར་བཞག་ན་གཉིད་ཁུག་པའི་སྐབས་སུ་སོ་ཚབ་མིད་པར་ཤོར་བའི་ཉེན་ཁ་ཆེན་པོ་ཡོད། 

3、ནུ་ཤུབས་བཀྲོལ་དགོས།

ཕྱི་རྒྱལ་གྱི་ནུ་མའི་ནད་རིགས་ལ་ཞིབ་འཇུག་བྱེད་མཁན་ཚོས་བརྟག་དཔྱད་བྱས་པར་གཞིགས་ན། རྒྱུན་རིང་ནུ་ཤུབས་གྱོན་མཁན་གྱི་བུད་མེད་ཚོར་ནུ་མའི་ནད་གཞི་ཕོག་ཚད་དེ་ནུ་ཤུབས་མི་གྱོན་མཁན་ལས་བལྟོས་བཅས་ཀྱིས་མང་བ་ཡོད་པས། ནུ་ཤུབས་གྱོན་ནས་གཉིད་ཉལ་བའི་གོམས་གཤིས་དེ་རིགས་མི་འཇགས་པའི་དྲན་སྐུལ་བྱས་ཡོད།

4、སྔས་མགོར་ཁ་པར་འཇོག་མི་རུང་།

མི་མང་པོ་ཞིག་ལ་སྔས་མགོར་ཁ་པར་བཞག་ནས་གཉིད་ཉལ་བའི་གོམས་གཤིས་ཡོད་མོད། ཆེད་ལས་མི་སྣས་བརྟག་དཔྱད་བྱས་པར་གཞིགས་ན། དོན་ངོ་མར་ཁང་པའི་ནང་གི་གློག་ཆས་དང་ཁ་པར་སོགས་འཕྲུལ་ཆས་ཀྱི་གློག་ཤུགས་དེ་ཁང་པའི་ནང་དུ་མཁའ་རླུང་བཙོག་པ་བཞིན་དུ་འཁྱིལ་ནས་མི་ལུས་ལ་མངོན་མེད་ཀྱི་སྒོ་ནས་གནོད་འཚེ་བཟོ་བཞིན་ཡོད་པ་ར་སྤྲོད་བྱུང་ཡོད།

5、ངོ་གདོང་གི་བྱུག་རྫས་མ་བཀྲུས་པ་དང་སྐྲ་རློན་པར་ཉལ་རྒྱུ་མེད།

བུད་མེད་ན་ཆུང་ཚོས་ངོ་གདོང་ལ་བྱུགས་པའི་བྱུག་རྫས་མ་བཀྲུས་པར་གཉིད་ཉལ་བ་དེ་ནི་ངོ་གདོང་གི་བ་སྤུའི་བུ་ག་འགག་ནས་འབུར་ཐོར་ཐོན་པའི་རྒྱུ་རྐྱེན་ཡིན་པར་ངོས་འཛིན་བཞིན་ཡོད། དེ་བཞིན་སྐྲ་རློན་པར་གཉིད་ལ་ཡུར་ཚེ་མགོ་ཡུར་འཁོར་བ་དང་ཞེ་མེར་ལངས་པ། ཕྱི་ཉིན་མགོ་བོ་མི་བདེ་བའི་ཚོར་སྣང་བྱུང་བ་བཅས་ཡོང་སྲིད།