འདི་ནི་ཟླ་2ཚེས་25ཉིན། ལྷ་ས་གྲོང་ཁྱེར་རིག་གནས་གསར་གཏོད་གླིང་གི་སེམས་མཐུན་སྡེ་ཁུལ་གྲོང་མི་ཨུ་ལྷན་དུ་2021ལོའི་ལོ་འཁོར་གྱི་མཉམ་སྡེབ་དཔལ་འབྱོར་གྱི་བགོ་འགྲེམས་ཚོགས་ཆེན་འཚོགས་པ།
འདི་ནི་བོད་ཀྱི་ལོ་གསར་འཆར་ཉེའི་མཚམས་སུ་ལྷ་སའི་གྲོང་མིས་བར་སྐོར་ཚོང་གྲོང་ནས་ལོ་གསར་གྱི་མཁོ་ཆས་ཉོ་བ།
ལྷ་ས་གྲོང་ཁྱེར་སྟོད་ལུང་བདེ་ཆེན་ཆུས་མཐོང་དགའ་སྡེ་ཁུལ་དུ་ལོ་གཅིག་དུས་གཅིག་གི་སྡེ་ཁུལ་གྱི་མཉམ་སྡེབ་དཔལ་འབྱོར་གྱི་ཡོང་འབབ་བགོ་འགྲེམས་ཚོགས་ཆེན་འཚོགས་ཤིང་། གྲོང་མི་རྣམས་སྔ་པོ་ནས་གྲོང་ལྷན་གྱི་སྒོ་རའི་ནང་འཛོམས་ཏེ་ངོ་གདོང་ནས་དགའ་སྤྲོའི་འཛུམ་མདངས་འཕྱུར་བཞིན་མཆིས།
“འདི་ལོ་སྡེ་ཁུལ་གྱི་མཉམ་སྡེབ་དཔལ་འབྱོར་ཡོང་འབབ་མང་དུ་སོང་བར་བརྟེན་མི་རེར་སྒོར་ཉིས་སྟོང་ནས་བཞི་སྟོང་བར་བགོས་ཡོད། ཁོངས་གཏོཌ་ཁེ་ལས་ཀྱིས་དུད་ཚང་རེའི་མང་ཚོཌ་ལ་མར་རྒྱ་མ་30སྤྲད་པ་དང་ཡོང་འབབ་དམའ་བའི་ཁྱིམ་ཚང་གི་མི་རེར་སྒོར་ཆིག་སྟོང་ནས་སུམ་སྟོང་བར་གྱི་ལོ་གསར་གྱི་འཚམས་འདྲིའི་དངུལ་སྤྲད་ཡོད”
བགོ་འགྲེམས་ཚོགས་ཆེན་འགོ་ཚུགས་སྐབས་དགའ་འབོད་དང་ཐལ་མོའི་རྡེབ་སྒྲ་ཡུན་རིང་གྲགས།
མཐོང་དགའ་སྡེ་ཁུལ་དུ་ཐེམ་ཐོ་ཡོད་པའི་གྲོང་མི་ཆིག་སྟོང་ལས་བརྒལ་བ་དང་། མི་གྲངས་ལ་གཞིགས་ནས་བགོ་འགྲེམས་རྒྱག་ཐབས་ལག་བསྟར་བྱས་ནས་ལོ་བཅུ་ཙམ་འགྲོ་ཡི་ཡོད། ལོ་ལྟར་ཡོང་འབབ་མང་དུ་སོང་བ་དང་མཉམ་སྡེབ་དཔལ་འབྱོར་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་པར་བརྟེན་གྲོང་མི་རྣམས་ཀྱི་འཚོ་བ་བདེ་སྐྱིད་ལྡན་པ་ཞིག་ཡོད།
གྲོང་མི་ཡེ་ཤེས་ཆོས་སྒྲོན་གྱི་ཕ་དང་བཟའ་ཟླ་འདི་ལོ་སྡེ་ཁུལ་གྱི་སྐྱེལ་འདྲེན་རླངས་འཁོར་རུ་ཁག་ནང་ཞུགས་པར་ལོ་གཅིག་ལ་ཡོང་འབབ་སྒོར་ཁྲི་40ལྷག་ཙམ་རག་ཡོད། ད་ཐེངས་ཁོང་ཚོར་བགོ་འགྲེམས་སྒོར་26000རག་པས་ཡེ་ཤེས་ཆོས་སྒྲོན་ཧ་ཅང་དགའ་པོ་བྱུང་ཡོད། “ཡོང་འབབ་མང་པོ་ལེན་རྒྱུ་ཡོད་པས་ཚང་མ་ཕྱུག་པོ་ཆགས་རྒྱུ་ལོས་རེད”ཅེས་ཡེ་ཤེས་ཆོས་སྒྲོན་གྱིས་ཡིད་ཆེས་ཀྱིས་ཁེངས་བཞིན་བརྗོད།
སྡེ་ཁུལ་ཏང་སྤྱི་ཁྱབ་ཀྲི་པུའི་འགན་འཁུར་བ་ཨ་ནུའུ་ནི་སྡེ་ཁུལ་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བའི་དཔང་པོ་བ་ཞིག་དང་། དེའི་ནང་ཞུགས་མཁན། སྐུལ་འདེད་གཏོང་མཁན་བཅས་རེད། “ཏང་གི་སྲིད་ཇུས་བཟང་པོས་ང་ཚོར་འོད་སྟོང་འཕྲོ་བའི་མཛུབ་སྟོན་གནང་བྱུང”ཞེས་ཨ་ནུའུ་ཡིས་སྤོབས་སེམས་དང་བཅས་བརྗོད།
ད་ཆ་མཐོང་དགའ་སྡེ་ཁུལ་གྱི་གྲོང་ཚོའི་མཉམ་སྡེབ་དཔལ་འབྱོར་གྱི་གཞི་ཁྱོན་ཉིན་བཞིན་སྟོབས་ཆེར་འགྲོ་བ་དང་ཁེ་ལས་ཀྱི་ཕན་འབྲས་ཀྱང་ཆེ་རུ་འགྲོ་བཞིན་ཡོད། 2021ལོར་མང་ཚོགས་ཀྱི་ལོ་རེའི་མི་རེའི་ཆ་སྙོམས་ཡོང་འབབ་སྒོར་38000ཟིན་ནས་སྟོད་ལུང་བདེ་ཆེན་ཆུས་ཀྱི་མདུན་གྲལ་དུ་སླེབས་ཡོད། “གྲོང་གསེབ་དར་རྒྱས་ཀྱི་ཤར་རླུང་འོག་འབྱུང་འགྱུར་གྱི་ཕྱུག་འགྱུར་ལམ་བུ་དེ་བས་ཇེ་ཡངས་སུ་འགྲོ་ངེས་རེད”ཅེས་ཨ་ནུའུ་ཡིས་བློ་རྩ་བརྟན་པོས་བརྗོད།