མི་རིགས་མཐུན་སྒྲིལ་ལ་མུ་མཐུད་ཤུགས་སྣོན་རྒྱག་པ་དང་མི་རིགས་ཁག་གི་མང་ཚོགས་ལ་ཡང་དག་པའི་རྒྱལ་ཁབ་ཀྱི་ལྟ་བ་དང་། ལོ་རྒྱུས་ཀྱི་ལྟ་བ། མི་རིགས་ཀྱི་ལྟ་བ། རིག་གནས་ཀྱི་ལྟ་བ་བཅས་འཛུགས་རྒྱུར་ཁྲིད་སྟོན་བྱས་ནས་མི་རིགས་ཁག་དབར་འགྲོ་འོང་དང་། སྤེལ་རེས། མཉམ་འདྲེས་བཅས་ཀྱི་ལོ་རྒྱུས་དེ་བས་སྔོག་འདོན་དང་མངོན་ཆེད། ཟླ་2ཚེས་16ཉིན་གྱི་སྔ་དྲོ། ལྷ་ས་གྲོང་ཁྱེར་གཙང་རལ་སྤྱི་པའི་བང་སོའི་དྲན་གསོ་ཁང་གི་སྒོ་རིན་མེད་ངང་རྒྱ་ཆེའི་གྲོང་མི་དང་ཡུལ་སྐོར་བར་དངོས་སུ་ཕྱེ་བ་རེད།

གཙང་རལ་སྤྱི་པའི་བང་སོའི་དྲན་གསོ་ཁང་ལྷ་ས་གྲོང་ཁྱེར་ཁྲེང་ཀོན་ཆུས་གཙང་རལ་གྲོང་ཚོའི་རྒྱ་རིགས་ཀྱི་སྤྱི་པའི་བང་སོའི་ཁུལ་དུ་གནས་ཤིང་། གཞི་ཁྱོན་ལ་སྨི་ངོས་གྲུ་100ཡོད། ད་ཡོད་ཀྱི་ལོ་རྒྱུས་ཚད་ལྡན་ཡིག་ཆ་དང་ལོ་རྒྱུས་རིག་དངོས(རྡོ་བརྐོས)ཤུལ་བཞག་གལ་ཆེན་ལ་གཞིགས་ནས་དྲན་གསོ་ཁང་དེར་སྔོན་བྱོན་པ་ཕྱིར་དྲན་དང་། སྔ་རབས་པའི་དྲིན་དྲན་པ། བསམ་ཚུལ་ཉན་པ་བཅས་བརྗོད་དོན་གཙོ་བོ་མི་འདྲ་བའི་འགྲེམས་ཁང་གསུམ་དབྱེ་ཡོད་པས་གཅིག་སྡུད་སྲུང་སྐྱོང་དང་། དཔང་རྟགས། སློབ་གསོ་དང་རྒྱུན་འཛིན་བཅས་ཀྱི་ནུས་པ་ལྡན་པའི་རྒྱལ་གཅེས་རིང་ལུགས་ཀྱི་སློབ་གསོའི་རྟེན་གཞི་ཞིག་རེད།

འབྲེལ་ཡོད་ལས་དོན་མི་སྣས་ངོ་སྤྲོད་བྱས་པར་གཞིགས་ན། མིག་སྔར་གཙང་རལ་སྤྱི་པའི་བང་སོའི་དྲན་གསོ་ཁང་གིས་སྔོན་མངགས་ལམ་ལུགས་ལ་བརྟེན་ནས་ལྟ་སྐོར་བྱེད་པའི་ཐབས་ཤེས་སྤྱད་དེ་ཉིན་རེར་མི་200ལྷག་ཙམ་ལ་སྣེ་ལེན་ཞུ་གྱི་ཡོད་པ་དང་ཐེངས་རེར་མི་50ལས་སྣེ་ལེན་ཞུ་གྱི་མེད། ལྟ་སྐོར་བའམ་ཡང་ན་ཚན་པས་སྔོན་ནས་ཁ་པར་ཨང་གྲངས་0891-6403238བརྒྱབ་ནས་སྔོན་མངགས་བྱེད་དགོས།