ཤིན་ཧྭ་གསར་འགྱུར་ཁང་པེ་ཅིང་ནས་ཟླ་2ཚེས་6ཉིན་གློག་འཕྲིན་འབྱོར་གསལ། ཉེ་ཆར། གསར་འགོད་པར་མི་སྤྱི་པུའུ་ནས་ཤེས་རྟོགས་བྱུང་བར། 2021ལོར་རང་རྒྱལ་གྱིས་ཀུན་ཕན་རང་བཞིན་གྱི་ལས་ཤོར་འགན་བཅོལ་གྱི་ལས་གནས་བརྟན་སྲུང་གི་ཕྱིར་སློག་སྲིད་ཇུས་ཚུད་པའི་ཁུར་པོ་ཡང་གཏོང་དང་། ལས་གནས་བརྟན་སྲུང་། ལས་ཞུགས་རྒྱ་སྐྱེད་བཅས་ཀྱི་སྲིད་ཇུས་8མུ་མཐུད་ལག་ལེན་བསྟར་ནས་ལོ་ཧྲིལ་པོར་ལས་ཞུགས་ཁ་གསབ་མ་དངུལ་སྒོར་དུང་ཕྱུར་སྟོང་ཙམ་བཏང་བར་ཁྱོན་ཁེ་ལས་ཁྲི་406ལ་ལས་ཤོར་འགན་བཅོལ་གྱི་ལས་གནས་བརྟན་སྲུང་གི་ཕྱིར་སློག་དངུལ་སྒོར་དུང་ཕྱུར་230སྤྲད་པ་རེད།
ལས་ཤོར་འགན་བཅོལ་གྱི་ལས་གནས་བརྟན་སྲུང་གི་ཕྱིར་སློག་དངུལ་ནི་ཁེ་ལས་ཀྱི་ཁུར་པོ་ཡང་དུ་བཏང་ནས་ལས་བཟོར་ཕན་པ་ཐོབ་པའི་རྒྱབ་སྐྱོར་སྲིད་ཇུས་ཤིག་རེད། ཏོག་གསར་གློ་ཚད་རིམས་ནད་ཀྱི་ཤུགས་རྐྱེན་ཐེབས་པར་བརྟེན་ཧོ་པེ་ཞིང་ཆེན་ཞེང་ཐའེ་གྲོང་ཁྱེར་སྤྱི་པའི་འགྲིམ་འགྲུལ་ཚད་ཡོད་འགན་འཁྲི་ཀུང་སིའི་གཉེར་སྐྱོང་ལ་དཀའ་ངལ་འཕྲད་ཡོད། ཀུང་སིའི་ངལ་རྩོལ་འབྲེལ་བ་ཁོའོ་ཡི་འགན་འཁུར་བས། 2021ལོར་ཀུང་སིས་འཕྲལ་མཁོའི་མ་དངུལ་དང་ལས་མིའི་དཔུང་ཁག་བརྟན་པོ་ཡོང་བའི་གནས་ཚུལ་འོག ལས་གནས་བརྟན་སྲུང་གི་ཕྱིར་སློག་དངུལ་སྒོར་ཁྲི་20.89རག་པས་གནས་སྐབས་ཀྱི་དཀའ་ངལ་སེལ་ཐུབ་ཡོད་ཅེས་བཤད།
2021ལོར་མི་སྤྱི་པུས་ལས་ཤོར་འགན་བཅོལ་གྱི་ལས་གནས་བརྟན་སྲུང་གི་ཕྱིར་སློག་སྲིད་ཇུས་ནང་ལས་མི་ཉུང་འཕྲིའི་ཚད་གཞི་ལྷུག་ཏུ་བཏང་ནས་ཁེ་ལས་འབྲིང་གྲས་དང་ཕྲན་ཚེགས་ཁེ་ལས་ཀྱི་ཕྱིར་སྤྲོད་བསྡུར་ཚད་མཐོ་རུ་བཏང་སྟེ་སྡོད་གནས་དང་། བཟའ་བཏུང་། རིག་གནས་ཡུལ་སྐོར། འགྲིམ་འགྲུལ་སྐྱེལ་འདྲེན། སྡེབ་ཚོང་སིལ་ཚོང་སོགས་རིམས་ནད་ཀྱི་ཤུགས་རྐྱེན་ཐེབས་ཆེ་བའི་ལས་རིགས་ལ་གཟིགས་སྐྱོང་བྱེད་ཤུགས་ཆེ་རུ་བཏང་བས། ཁེ་ལས་ཀྱི་ཁུར་པོ་ཡང་དུ་ཏན་ཏིག་བཏང་བ་མ་ཟད། ལས་གནས་བརྟན་སྲུང་དང་ལས་ཞུགས་རྒྱ་སྐྱེད་ཀྱི་ནུས་པ་མངོན་གསལ་དོད་པོས་ཆེ་རུ་ཕྱིན་ཡོད།
ཤེས་རྟོགས་བྱུང་བར་གཞིགས་ན། བརྒྱུད་རིམ་སྔར་བས་སྟབས་བདེ་དང་ཁེ་ལས་ཀྱི་ཁུར་པོ་ཡང་དུ་གཏོང་ཆེད། རྒྱལ་ཡོངས་ཀྱི་ཞིང་ཆེན་20ལྷག་ཙམ་གྱིས“རེ་བ་ཞུ་མི་དགོས་པར་འཕྲལ་མར་ལོངས་སྤྱོད་ཐུབ་པའི”རྣམ་པ་གསར་པ་འཚོལ་ཞིབ་བྱས་པ་སྟེ། གྲངས་གཞིར་བསྡུར་བ་བཏང་ནས་ཆ་རྐྱེན་དང་མཐུན་པའི་ཁེ་ལས་ལ་མ་དངུལ་ཐད་ཀར་སྤྲོད་པ་དེ་རེད། ཐེན་ཅིན་གྲོང་ཁྱེར་དཔེ་མཚོན་དུ་བྱས་ན། མི་སྤྱི་སྡེ་ཚན་གྱིས་ཆ་རྐྱེན་དང་མཐུན་པའི་ཁེ་ལས་ཁྲི་9.78འཚོལ་རྙེད་བྱས་པ་དང་2021ལོའི་ལོ་མཇུག་བར་ཁེ་ལས་ཁྲི་8.77ལ་ལས་ཤོར་འགན་བཅོལ་གྱི་ལས་གནས་བརྟན་སྲུང་གི་ཕྱིར་སློག་དངུལ་སྒོར་དུང་ཕྱུར་5.1རག་པ་རེད།