ཟླ་1ཚེས་16ཉིན། བོད་རང་སྐྱོང་ལྗོངས་གནམ་གཤིས་ལས་ཁུངས་ཀྱི་གནམ་གཤིས་སྔོན་བརྡར་གཞིགས་ན།    

སྔོན་དཔག་བྱས་ན་གཟའ་འཁོར་འདིར(2022ལོའི་ཟླ་1ཚེས་17ཉིན་ནས་ཟླ་1ཚེས་23ཉིན་བར)བོད་དུ་ཆར་པའམ་གངས་འབབ་ཚད་མང་བ་དང་གཟའ་མཇུག་ཏུ་བོད་ཀྱི་ལྷོ་རྒྱུད་དང་ཤར་རྒྱུད་དུ་ཆར་པ་འབབ་ཚད་ཅུང་མང་བ་དང་། དྲོད་ཚད་འཕར་ཆག་ཆེན་པོ་འདུག

ལྟ་ཞིབ་ཚད་ལེན་གྱི་སྔོན་བརྡ་ལས་མངོན་པར། གཟའ་མིག་དམར་ནས་པ་སངས་བར་ཉིང་ཁྲི་དང་། ནག་ཆུ། མངའ་རིས་བཅས་སུ་གངས(ཆར་པ)ཆུང་བ་བབས་ནས་ས་བབ་མཐོ་བའི་ས་ཆ་ཁག་གཅིག་ཏུ་གངས་འབྲིང་བ་ནས་ཆེ་བའི་བར་འབབ་རྒྱུ་དང་། གཞིས་རྩེ་དང་། ལྷ་ས། ལྷོ་ཁ། ཆབ་མདོའི་བྱང་རྒྱུད་བཅས་སུ་གནམ་འཐིབས་ནས་གངས(ཆར་པ)ཆུང་བ་འབབ་རྒྱུ། གཟའ་སྤེན་པ་ནས་ཉི་མའི་བར། མངའ་རིས་ཀྱི་ལྷོ་རྒྱུད་དང་། གཞིས་རྩེའི་ལྷོ་རྒྱུད། ལྷོ་ཁའི་ལྷོ་རྒྱུད། ཉིང་ཁྲི་བཅས་སུ་གངས(ཆར་པ)འབྲིང་བ་འབབ་པ་ནས་གངས་དྲག་པོ་འབབ་རྒྱུ། དེ་མིན་གྱི་ས་ཁུལ་ལ་གནམ་འཐིབས་ནས་གངས་ཆུང་བ་འབབ་རྒྱུ། གཞན་ཡང་། གཟའ་འཁོར་འདིར་ནག་ཆུ་དང་། མངའ་རིས། གཞིས་རྩེའི་ལྷོ་རྒྱུད་ཀྱི་ས་བབ་མཐོ་བའི་ས་ཆར་ལྷགས་པ་ཆེ་བ་རིམ་པ་7ནས་8བར་རྒྱག་རྒྱུ་དང་། གཞིས་རྩེ་དང་། ལྷོ་ཁ། ལྷ་སའི་རོང་ཁུལ་དུ་ལྷགས་པ་རིམ་པ་4ནས་5བར་རྒྱག་རྒྱུ།  

སྔོན་དཔག་བྱས་ན། གཟའ་འཁོར་འདིར་ཆར་ཆུ་འབབ་ཚད་རྒྱུན་གཏན་ལས་ཅུང་མང་བ་དང་ཆ་སྙོམས་དྲོད་ཚད་རྒྱུན་གཏན་ལས་ཅུང་དམའ་བ་ཡོད།