སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ལྕགས་ལམ་ལས་དོན་ལ་གནང་བའི་མཛུབ་སྟོན་དང་མཆན་བཀོད་མཛུབ་སྟོན་གལ་ཆེན་གྱི་དགོངས་དོན་ལག་བསྟར་དོན་འཁྱོལ་གཏིང་ཟབ་བྱས་ནས་ངལ་རྩོལ་དཔེ་བཟང་བའི་སྙིང་སྟོབས་དང་། ངལ་རྩོལ་གྱི་སྙིང་སྟོབས། བཟོ་བོའི་སྙིང་སྟོབས་བཅས་དར་སྤེལ་ཤུགས་ཆེན་བཏང་སྟེ་རྒྱ་ཆེའི་ལྕགས་ལམ་ལས་བྱེད་ལས་བཟོར་གསར་གཏོད་ལ་མཁས་པ་དང་འབད་འཐབ་བྱེད་ཕོད་པ་བྱེད་པའི་ལྕག་སྐུལ་གྱིས་འགྲིམ་འགྲུལ་སྟོབས་ཆེའི་རྒྱལ་ཁབ་ཀྱི་ལྕགས་ལམ་སྔོན་སྐྱོད་གཙོ་ཤུགས་དམག་གི་ནུས་པ་དེ་བས་ལེགས་པའི་སྒོ་ནས་འདོན་སྤེལ་བྱ་ཆེད། 2022ལོའི་དཔྱིད་གསར་སྐྱེལ་འདྲེན་འཆར་ཉེའི་མཚམས་སུ། ཚེས་16ཉིན་ཀྲུང་དབྱང་དྲིལ་བསྒྲགས་པུའུ་དང་ཀྲུང་གོ་རྒྱལ་ཁབ་ལྕགས་ལམ་ཚོགས་པ་ཚད་ཡོད་ཀུང་སིས་སྤྱི་ཚོགས་ཡོངས་ལ་2021ལོའི“ལྕགས་ལམ་བ་ཡག་ཤོས”ཀྱི་སྔོན་ཐོན་བྱས་རྗེས་ཁྱབ་བསྒྲགས་བྱས་པ་རེད། ཁྱབ་བསྒྲགས་མཛད་སྒོ་ཀྲུང་དབྱང་རླུང་འཕྲིན་བརྙན་འཕྲིན་སྤྱི་ཁྱབ་ལས་ཁུངས་སུ་སྤེལ་བ་རེད།

2018ལོ་ཚུན་དུ། ཀྲུང་དབྱང་དྲིལ་བསྒྲགས་པུའུ་དང་ཀྲུང་གོ་རྒྱལ་ཁབ་ལྕགས་ལམ་ཚོགས་པ་ཚད་ཡོད་ཀུང་སིས་ལོ་4བསྟུད་མར“ལྕགས་ལམ་བ་ཡག་ཤོས”ཀྱི་དཔྱད་འདེམས་བྱེད་སྒོ་སྤེལ་བ་རེད། བྱེད་སྒོ་དེ་རྒྱ་ཆེའི་ལྕགས་ལམ་ལས་བྱེད་ལས་བཟོས་རང་འཁྲིའི་ལས་གནས་ལ་གཞི་ཚུགས་པ་དང་རང་འགུལ་ངང་རང་འགན་གཙང་སྒྲུབ་ལ་ལྕག་སྐུལ་བྱེད་པའི་གཞི་རྟེན་གལ་ཆེན་ལ་འགྱུར་བ་དང་། སྤྱི་ཚོགས་ལས་རིགས་ཁག་གིས་ལྕགས་ལམ་ལ་ཤེས་རྟོགས་དང་རྒྱབ་སྐྱོར་བྱེད་པའི་སྐར་ཁུང་གལ་ཆེན་དུ་གྱུར་ནས་དགེ་མཚན་ལྡན་པའི་ནུས་པ་ཐོན་ཡོད་པ་རེད།

2021ལོར“ལྕགས་ལམ་བ་ཡག་ཤོས”ཀྱི་མཚན་སྙན་ཐོབ་པའི་སྔོན་ཐོན་མི་སྒེར་10ཡོད་ཅིང་། ཁོང་ཚོ་ནི་ཀྲུང་གོ་ལྕགས་ལམ་ཧྲང་ཧའེ་ཅུས་ཚོགས་པ་ཚད་ཡོད་ཀུང་སི་ཧྲང་ཧའེ་མེ་འཁོར་ཞིབ་བཤེར་དུམ་བུའི་ཤུགས་འགྲེམས་མེ་འཁོར་ཚོགས་ཆུང་གི་མཛུབ་ཁྲིད་ཁ་ལོ་བ་ཧྥུང་ཅན་ཅན་དང་། ཀྲུང་གོ་ལྕགས་ལམ་ཁུན་མིང་ཅུས་ཚོགས་པ་ཚད་ཡོད་ཀུང་སི་ཁུན་མིང་བྱང་ངོས་འཁོར་རིགས་དུམ་བུའི་མེ་འཁོར་ཞིབ་བཤེར་བ་ཁྲེན་ཤང་ཧྭ། ཀྲུང་གོ་ལྕགས་ལམ་ཀྲེང་ཀྲོའུ་ཅུས་ཚོགས་པ་ཚད་ཡོད་ཀུང་སི་ལུའོ་དབྱང་བཟོ་དོན་དུམ་བུའི་དབྱང་ལན་ཏིས་ཟམ་པ་དང་ཕུག་ལམ་བཟོ་ཁུལ་གྱི་ལས་དཔོན་ལི་ཡུས་པིན། ཀྲུང་གོ་ལྕགས་ལམ་ཀོང་ཀྲོའུ་ཅུས་ཚོགས་པ་ཚད་ཡོད་ཀུང་སི་ཧེང་དབྱང་འཁོར་དོན་དུམ་བུའི་ཧེང་དབྱང་ས་ཚིགས་ཀྱི་ལས་རེས་པ་ཝང་ཅུན། ཀྲུང་གོ་ལྕགས་ལམ་ཧྲེན་དབྱང་ཅུས་ཚོགས་པ་ཚད་ཡོད་ཀུང་སིའི་ཏ་ལེན་ས་ཚིགས་འགྲུལ་སྐྱེལ་འཁོར་ཁང་གི་ལས་རེས་ཀྲན་ཀྲང་ལིའུ་ཞའོ་ཡུན། ཀྲུང་གོ་ལྕགས་ལམ་ཐའེ་ཡོན་ཅུས་ཚོགས་པ་ཚད་ཡོད་ཀུང་སི་ཧྲུའོ་ཀྲོའུ་འཁོར་དོན་དུམ་བུའི་སུང་ཅ་ཀྲོང་ས་ཚིགས་ཀྱི་ལས་སྒོའི་གཙོ་གཉེར་ཤུའེ་ཧྲེང་ལི། ཀྲུང་གོ་ལྕགས་ལམ་ཝུའུ་ཧན་ཅུས་ཚོགས་པ་ཚད་ཡོད་ཀུང་སི་ཅིན་དབྱིང་ལྕི་བའི་བཟོ་ལས་ལས་གྲྭ་འཕྲུལ་ཆས་ཞིབ་འཇུག་ཁང་གི་ཡོན་ཀྲང་གཞོན་པ་ཝང་ཅང་། པེ་ཅིང་ནས་ཀྲང་ཅ་ཁོའུ་བར་གྱི་གྲོང་སྦྲེལ་ལྕགས་ལམ་ཚད་ཡོད་ཀུང་སིའི་སྐྱེལ་འདྲེན་བདེ་འཇགས་པུའི་པུའུ་ཀྲང་གཞོན་པ་ཝང་ཅིའུ་ཅུན། ཀྲུང་གོ་ཀྲུང་ཁྲེ་ཐང་ཧྲན་མེ་འཁོར་ཨ་མའི་འཁོར་རིགས་ཚད་ཡོད་ཀུང་སི་འཁོར་ངོས་བྱ་གཞག་པུའི་མཐོ་རིམ་ལག་རྩལ་པ་ཀྲང་ཞུའེ་སུང་། མཚོ་བོད་ལྕགས་ལམ་སྤྱི་བདེ་ཅུས་གོར་མོ་ལྕགས་ལམ་སྤྱི་བདེ་ཁྲུའི་མེ་འཁོར་ཉེན་རྟོག་པའི་ཉིང་ལག་རུ་ཁག་གི་ཆབ་སྲིད་ཨུ་ཡོན་ཀྲེང་ཐེན་ཧའེ་བཅས་རེད།

“ལྕགས་ལམ་བ་ཡག་ཤོས”དེ་དག་ཚང་མ་ལྕགས་ལམ་གྱི་གཞི་རིམ་འཐབ་ཕྱོགས་དང་པོར་ལས་ཀ་བྱེད་པའི་སྤྱིར་བཏང་གི་ལས་གནས་ནས་ཡིན་ཞིང་། ལྕགས་ལམ་ལས་རིགས་ཀྱི་ལས་བྱེད་ལས་བཟོ་ཁྲི་200ལྷག་ཙམ་གྱི་ཕུལ་བྱུང་འཐུས་མི་ཤ་སྟག་རེད། ཁོང་ཚོ་ནི་སྙིང་རུས་ཆེ་ཞིང་དམ་པ་དོན་གཉེར་གྱི་ངལ་རྩོལ་བ་དང་། ཏན་ཏན་ཏིག་ཏིག་གི་འབད་འཐབ་པ། བབ་ཆགས་ཤིང་བདེན་པ་བདེན་ཐུབ་ཀྱི་ཕུགས་འདུན་དོན་གཉེར་བ་བཅས་རེད། ཧྥུང་ཅན་ཅན་གྱིས་ལག་རྩལ་བྱང་ཆུབ་པའི་སྒོ་ནས་མེ་འཁོར་ཨ་མ་ཆེ་གྲས་9ཡི་རིགས་28བཏང་ནས་བསྐྱར་དར་རྟགས་ཅན་དང་མཉམ་དུ་མེས་རྒྱལ་གྱི་ཡངས་བའི་ས་གཞི་ཆེ་མོར་བསྐྱོད་པ་དང་། ཁྲེན་ཤང་ཧྭ་ཡིས་ལོ་30ཡི་རིང་མེ་འཁོར་ཁྲི་28.8ལྷག་ཙམ་ལ་བདེ་འཇགས་ཞིབ་བཤེར་བྱས་པས་ལྕགས་ལམ་འཁོར་རིགས་ཀྱི་ཞིབ་བཤེར་ཉམས་བཟོའི་ལག་རྩལ་ཆེ་མོ་བར་གྱུར་པ། ལི་ཡུས་པིན་གྱིས་སེམས་ཐག་གཙང་བཅད་ཀྱིས་གསར་བརྗེའི་ཁྲག་རྒྱུན་རྒྱུན་འཛིན་བྱས་ཏེ་བྱ་སྤྱོད་དངོས་ལ་བརྟེན་ནས་ཕ་ཚ་བུ་རྒྱུད་མི་རབས་གསུམ་གྱིས་ལོ་60ཡི་རིང་དཔའ་བོའི་ཟམ་པ་སྲུང་བའི་འགན་འཁྲི་དང་ལས་འགན་རྒྱུན་མཐུད་བསྒྲུབས་པ། ཝང་ཅུན་གྱིས་མེ་འཁོར་གཏོང་བའི་འཐབ་ས་དང་པོར་ཚད་གཞི་དམ་སྲུང་གིས་ལམ་ཐིག་ཧྲིལ་པོའི་མེ་འཁོར་བབས་ཚུགས་ཀྱི་ལས་རེས་པའི་ཁྲོད་ལོ་ན་གཞོན་ཤོས་ཀྱི་དབུ་བཞུགས་ལག་རྩལ་པར་གྱུར་པ། ལིའུ་ཞའོ་ཡུན་གྱིས་ཐོག་མཐའ་བར་གསུམ་དུ་འགྲུལ་པ་སེམས་ནང་བཅངས་པས་སྤྱིར་བཏང་གི་འགྲུལ་སྐྱེལ་ཞབས་ཞུའི་ལས་གནས་ཐོག་བསྔགས་བརྗོད་ཚད་མེད་ཐོབ་པ། ཤུའེ་ཧྲེང་ལི་ཡིས་སེམས་ནང“རྒྱལ་ཁབ་ཀྱི་དོན་ཆེན”བཅངས་ནས་ལོ་མང་རིང་ཏ་ཆིན་ལྕགས་ལམ་གྱི་ཟོག་འདྲེན་གཡུལ་ས་གཙོ་བོར་འབད་འཐབ་བྱས་པ། ཝང་ཅང་གིས་ལྕགས་ལམ་བདག་སྐྱོང་འཕྲུལ་ཆས་ཆེ་རིགས་30ལྷག་ཙམ་རྒྱུན་འཁྱོངས་ལྷོད་མེད་ངང་རང་བརྟེན་ཞིབ་བཟོ་བྱས་ཏེ་ཐོན་རྫས་མང་པོ་ས་མཐོའི་ལྕགས་ལམ་ཐོག་སྤྱད་པ་མ་ཟད་ད་དུང་རྒྱལ་མཚམས་ནས་དོན་ཏེ“རྒྱུད་གཅིག་ལམ་གཅིག”འཛུགས་སྐྲུན་ལ་གཟི་བརྗིད་བསྣན་པ། ཝང་ཅིའུ་ཅུན་གྱིས་སྤྲོ་སེམས་ཆེན་པོས་པེ་ཅིང་ནས་ཀྲང་ཅ་ཁོའུ་བར་གྱི་མྱུར་བགྲོད་ལྕགས་ལམ་འཛུགས་སྐྲུན་ལ་རམ་འདེགས་བྱས་ཏེ“སྤུས་རྟགས་འདུ་འགོད་ཀྱི་རིག་ནུས་ཅིང་ཀྲང”གི་དམིགས་ཚད་མངོན་འགྱུར་བྱ་ཆེད་དགེ་མཚན་ལྡན་པའི་ལེགས་སྐྱེས་ཕུལ་བ། ཀྲང་ཞུའེ་སུང་གིས་རིག་ནུས་བཟོ་སྐྲུན་ཐད་བློ་རྩེ་བརྟན་པོས་འགག་སྒྲོལ་བྱས་ཏེ་མྱུར་བགྲོད་ཤུགས་འགྲེམས་མེ་འཁོར་ལག་རྩལ་ཁྱབ་ཁོངས་ཀྱི་སྟོང་ཆ་མང་པོ་གསབ་པ། ཀྲེང་ཐེན་ཧའེ་ཡིས་ལམ་ཚད་ཧྲིལ་པོའི་ས་བབ་མཐོ་ཤོས་ཀྱི་ལྕགས་ལམ་སྤྱི་བདེ་མངགས་གཏོང་ཁང་དུ་འབད་འཐབ་ལོ་བཅུ་ལྷག་ཙམ་བྱས་ཏེ་ཚེ་སྲོག་ལ་བརྟེན་ནས་བབས་ཚུགས་ཁུལ་གྱི་བདེ་འཇགས་སྲུང་སྐྱོང་བྱེད་བཞིན་པ་ལ་སོགས་རེད།