འདི་ནི་གངས་ལྗོངས་ཇོ་མོ་གླང་མ་བུད་མེད་ལག་ཁྱེར་གཉེར་ཁང་གི་མི་དམངས་ཉེན་རྟོག་པས་མང་ཚོགས་ལ་མཐའ་མཚམས་ཀྱི་ལམ་ཡིག་གཉེར་བཞིན་པ།

འདི་ནི་ས་དམར་མདའ་ཤང་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་རྒན་རྒོན་ལ་འཚམས་འདྲི་བྱེད་བཞིན་པ།

ཏང་གི་ལོ་རྒྱུས་སློབ་སྦྱོང་སློབ་གསོ་སྤེལ་ཚུན། གཞིས་རྩེ་མཐའ་མཚམས་དོ་དམ་ཉིང་ལག་རུ་ཁག་གིས་ཐོག་མཐའ་བར་གསུམ་དུ་མང་ཚོགས་ཀྱི་ལངས་ཕྱོགས་སུ་བརྟན་པོར་ལངས་རྒྱུ་མཐའ་འཁྱོངས་བྱེད་པ་དང“མི་དམངས་མང་ཚོགས་བློ་ཡིད་ཚིམ་མིན”དེ་འགོ་འཛུགས་ས་དང་དོན་ལ་བབས་སར་བརྩིས་ཏེ། ཕྱོགས་ཡོངས་དང་ཟུར་ཚད་མང་པོའི་ཐོག་ནས“ངས་མང་ཚོགས་ལ་བྱ་བ་དངོས་སྒྲུབ་པའི”འཇོན་ཐང་ཆེ་རུ་དང་ཆུ་ཚད་མཐོ་རུ་བཏང་སྟེ་ཏང་གི་ལོ་རྒྱུས་སློབ་སྦྱོང་སློབ་གསོའི་ཕན་འབྲས་དེ་དམངས་ལ་བྱ་བ་དངོས་སྒྲུབ་པའི་གྲུབ་འབྲས་ལ་ཏན་ཏིག་འགྱུར་བ་བྱས་པ་རེད།

“དྲ་ཐོག་དང་དྲ་ཕྱི”མཉམ་འགུལ་གྱིས།

ཕྱོགས་ཚང་མར་ཁྱབ་པའི་ཞབས་ཞུའི་རྣམ་པ་བཏོད་པ།

འབྲོང་པ་རྫོང་ནི་གཞིས་རྩེ་གྲོང་ཁྱེར་གྱི་ཆེས་ནུབ་རྒྱུད་ཀྱི་མཐའ་མཚམས་རྫོང་ཞིག་ཡིན་པ་དང་ཆ་སྙོམས་ས་བབ་མཐོ་ཚད་སྨི་5300ཟིན་ཞིང་། ཡག་ར་མཐའ་མཚམས་མངགས་གཏོང་ཁང་གིས་ལོ་མང་རིང་ས་ཆ་དེ་བརྟན་སྲུང་བྱས།

འདི་ལོའི་ཟླ་6ཚེས་19ཉིན། ཡག་ར་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པས་ཡག་ར་ཤང་ལེགས་རྩེ་འགག་སྒོའི་ཚོང་ལས་ཁྲོམ་གཞུང་གི་ལས་ཡུལ་དུ་གྲལ་བཤེར་བྱེད་སྐབས་ཨར་སྐྲུན་ཕྱོགས་ཀྱིས་ཡུལ་དེའི་འབྲོག་པ་ཀུན་ཆེ་གེ་མོ་སོགས་ལས་མི་5ཡི་གླ་ཆ་སྒོར་ཁྲི་2ལྷག་ཙམ་འགྱངས་ཆད་བྱས་པའི་དབང་གིས་ངལ་རྩོལ་གླ་ཆའི་རྩོད་གཞི་ཡོད་པ་ཤེས་རྟོགས་བྱུང་བ་རེད། མི་དམངས་ཉེན་རྟོག་པས་གྲོས་མོལ་དང་འདུམ་འགྲིག་བྱས་པ་བརྒྱུད་ཨར་སྐྲུན་ཕྱོགས་ཀྱི་འགན་འཁུར་བས་ཟླ་6ཚེས་30ཉིན་གྱི་གོང་གླ་ཆ་ཚང་མ་སྤྲོད་རྒྱུའི་ཁས་ལེན་བྱས། ཟླ་7ཚེས་1ཉིན། མངགས་གཏོང་ཁང་གི་མི་དམངས་ཉེན་རྟོག་པས་དོ་བདག་ལ་གནད་དོན་དེའི་སྐོར་འདྲི་རྩད་བྱེད་སྐབས་རྩོད་གཞི་དེ་ཐག་བཅད་ཟིན་ནས་འགྱངས་ཆད་བྱས་པའི་གླ་ཆ་ཚང་མ་རག་པ་ཤེས་རྟོགས་བྱུང་བ་རེད། འདི་ལོ་ཚུན་དུ། མངགས་གཏོང་ཁང་གིས་ངལ་རྩོལ་གླ་ཆའི་རྩོད་གཞི་ཁག་15མཐུན་སྦྱོར་བྱས་ཏེ་འགྱངས་ཆད་བྱས་པའི་གླ་ཆ་སྒོར་ཁྲི་10ལྷག་ཙམ་ཐག་གཅོད་ཐུབ་པ་རེད།

མཐའ་མཚམས་ས་ཁུལ་གྱི་ཆ་འཕྲིན་བལྟོས་བཅས་ཀྱིས་གསང་པོ་མེད་པ་དང་ཡུལ་དེ་གའི་མང་ཚོགས་ཀྱི་ཁྲིམས་སྐྱོང་འདུ་ཤེས་ཅུང་ཞན་པས། ཡག་ར་མཐའ་མཚམས་མངགས་གཏོང་ཁང་གིས“དྲ་ཐོག་དང་དྲ་ཕྱི”ཟུང་འབྲེལ་གྱི་བྱེད་ཐབས་སྤྱད་དེ་ཐབས་ལམ་གཉིས་ལ་བརྟེན་ནས་མཐའ་མཚམས་ཁོངས་གཏོགས་ཁུལ་གྱི་བདེ་འཇགས་སློབ་གསོའི་དྲིལ་བསྒྲགས་བྱེད་སྒོ་སྤེལ་བ་རེད། དེ་ཡང་ཕྱོགས་གཅིག་ནས་སྐད་འཕྲིན་ཚོགས་པ་སོགས་ཀྱི་དྲ་རྒྱའི་སྨྱན་སྦྱོར་གང་ལེགས་སྤྱད་དེ“དྲ་ཐོག”ནས་དྲིལ་བསྒྲགས་རྒྱ་ཁྱབ་བྱས་ཏེ། མི་དམངས་ཉེན་རྟོག་པ་སྒྲིག་འཛུགས་བྱས་ནས་ཡག་ར་ཤང་གི་རིགས་ཁག་གི་ལས་ཀའི་སྐད་འཕྲིན་ཚོགས་པ་བརྒྱུད་ཁྲིམས་སྐྱོང་དང་། རྐུན་འགོག ཁ་བསླུས་སྔོན་འགོག་བཅས་ཀྱི་དྲིལ་བསྒྲགས་དཔྱད་ཡིག་སྤྲད་པ་དང་། ཕྱོགས་གཞན་ཞིག་ནས་མི་དམངས་ཉེན་རྟོག་པ་སྒྲིག་འཛུགས་བྱས་ཏེ་སྐོར་སྐྱོད“དྲ་ཕྱིའི”སྒྲོག་འགྲེལ་ཡན་ལག་རུ་ཆུང་བཙུགས་ནས་སློབ་གྲྭ་དང་། འབྲོག་ཁུལ། གྲོང་ཚོ་བཅས་སུ་བསྐྱོད་དེ་དྲིལ་བསྒྲགས་དཔྱད་ཡིག་སྤྲད་པ་དང་། མཐའ་མཚམས་འགག་སྒོ་དོ་དམ་དང་འགོག་ཟོན་གྱི་གཙོ་གནད་དང་བཅའ་ཁྲིམས་ཁྲིམས་སྲོལ་འགྲེལ་བཤད་བརྒྱབ་སྟེ་མང་ཚོགས་ཀྱི་འགོག་ཟོན་འདུ་ཤེས་ཟབ་ཏུ་བཏང་བ་རེད། མིག་སྔའི་བར། ཁྱོན་འབྲེལ་ཡོད་དྲིལ་བསྒྲགས་དཔྱད་ཡིག་120སྤྲད་པ་དང་མི་ཐེངས་300ལྷག་ཙམ་ལ་ཁྲིམས་ལུགས་ཁྱབ་གདལ་དྲིལ་བསྒྲགས་བྱས་པ་མ་ཟད། “རྒྱལ་ཁབ་ཀྱི་ཁ་བསླུས་ངོ་རྒོལ་ལྟེ་གནས”APPཤང་ཡོངས་ཀྱི་མི་ཚང་མས་ཕབ་ལེན་བྱས་ཡོད་པ་རེད།

“ལས་སྒྲུབ་གསུམ”གྱི་བྱེད་ཐབས་གསར་པས།

མང་ཚོགས་ལ་ཞབས་འདེགས་ཞུ་བའི“མཐའ་མའི་འགག་གནད”བསལ་བ།

“ཁྱེད་རྣམས་པར་ཐུགས་རྗེ་ཆེ་ཞུ་རྒྱུ་ཡིན། མཛད་བྲེལ་ཆེ་ཡང་ད་དུང་རྒན་མོ་ང་ཐུཌ་ལ་བཞག་འདུག”ཅེས་འདི་ལོའི་དགུ་པའི་ཚེས་དགུའི་དུས་ཆེན་སྐབས་ལོ་92ལ་སླེབས་པའི་རྒན་མོ་ཚེ་རིང་ཆོས་སྒྲོན་གྱིས་ས་དམར་མདའ་མཐའ་མཚམས་མངགས་གཏོང་ཁང་གི་མི་དམངས་ཉེན་རྟོག་པའི་ལག་ནས་དམ་པོར་འཇུས་ནས་བཤད།

དུས་ཡུན་རིང་པོ་མཐོ་གྲང་ཁུལ་དུ་འཚོ་བ་བསྐྱལ་བའི་དབང་གིས་ས་དམར་མདའ་མཐའ་མཚམས་མངགས་གཏོང་ཁང་ཁོངས་གཏོགས་ཁུལ་གྱི་རྒན་རྒོན་མང་ཆེ་བར་གྲུམ་བུའི་ནད་ཕོག་པས་ཕྱིར་སྐྱོད་སྟབས་བདེ་མེད། འདི་ལོའི་དགུ་པའི་ཚེས་དགུའི་དུས་ཆེན་སྐབས་མངགས་གཏོང་ཁང་གི་མི་དམངས་ཉེན་རྟོག་པས་རྒན་རྒོན་ལ་འཚམས་འདྲི་བྱས་པ་དང་དུས་མཚུངས་ད་དུང་རྒན་རྒོན་གྱི་ཐོབ་ཐང་ལག་ཁྱེར་བོར་བརླག་སོང་ནས་སྤྱི་ཚོགས་འགན་སྲུང་སོགས་ཀྱི་ལས་སྒོ་གཉེར་ཐབས་བྲལ་བ་སོགས་ཀྱི་གནད་དོན་ལ་དམིགས་ཏེ་རང་འགུལ་ངང་རྒན་རྒོན་ལ“ཚབ་སྒྲུབ་དང་། རོགས་སྒྲུབ། ཕར་རྒྱུག་ཚུར་རྒྱུག”བཅས་ཀྱི་ཞབས་འདེགས་ཞུས་ཏེ་ཁོང་ཚོ་ཕྱིར་སྐྱོད་མི་དགོས་པར་འབྲེལ་ཡོད་ཀྱི་ལས་སྒོ་གཉེར་ཐུབ་པ་བྱས་པ་རེད།

དེ་དང་ཆབས་ཅིག ཞིང་འབྲོག་ཁུལ་གྱི་མང་ཚོགས་ས་མ་འབྲོག་ཡིན་སྟབས་མི་མང་ཆེ་བ་ཐག་རིང་ནས་ལས་སྒོ་གཉེར་བར་ཡོང་གི་ཡོད་པས་མངགས་གཏོང་ཁང་གི་མི་དམངས་ཉེན་རྟོག་པས་ད་དུང་ཐེམ་ཐོ་ཁང་དུ་མང་ཚོགས་ལ་འཁྲུད་ཆས་སོགས་གྲ་སྒྲིག་བྱས་ནས་མི་དམངས་ལ་ཞབས་འདེགས་ཞུ་བའི་ཆུ་ཚད་མཐོ་རུ་ཤུགས་ཆེན་བཏང་ཡོད།

མིག་སྔའི་བར། མངགས་གཏོང་ཁང་གིས་མང་ཚོགས་ལ་དམངས་ཕན་ཞབས་ཞུ་ཐེངས་221བསྒྲུབས་པ་དང་ཁོངས་གཏོགས་ཁུལ་གྱི་རྒན་རྒོན་ཚོར“སྒོ་རྩར་ལག་ཁྱེར་གཉེར་བའི”ཞབས་འདེགས་ཐེངས་25ཞུས་པར་ཁོངས་གཏོགས་ཁུལ་གྱི་མང་ཚོགས་ཚོའི་བསྔགས་བརྗོད་རྒྱ་ཁྱབ་ངང་ཐོབ་ཅིང་། མངགས་གཏོང་ཁང་གིས་དམངས་ཆེད་དང་། དམངས་ལ་སྟབས་བདེ་སྐྲུན་པ། དམངས་ལ་ཕན་པ་འདོགས་པ་བཅས་ཀྱི་ཞབས་ཞུའི་སྤུས་ཚད་ཟམ་མི་ཆད་པར་མཐོ་རུ་གཏོང་བའི་སྒུལ་ཤུགས་སུ་གྱུར་ཡོད།

དྲ་རྒྱའི་ཐོ་འགོད་སྙན་སེང་ལས།

མང་ཚོགས་ཀྱིས་ལག་ཁྱེར་གཉེར་བར“ཕར་རྒྱུག་ཚུར་རྒྱུག”བྱེད་མི་དགོས་པ།

“ད་ཆ་ང་ཚོར་མཐའ་མཚམས་ཀྱི་ལམ་ཡིག་སྐར་མ་གཅིག་ཀྱང་མི་འགོར་བར་རག་གི་འདུག”རྒྱུན་དུ་མཐའ་མཚམས་རྫོང་དུ་འགྲོ་འོང་བྱེད་མཁན་མང་ཚོགས་པད་མ་དོན་གྲུབ་ལ་ད་ཆ་ལག་ཁྱེར་གཉེར་སྐབས་སྟབས་བདེ་རུ་ཕྱིན་པའི་མྱོང་ཚོར་ཟབ་མོ་བྱུང་ཡོད།

མཐའ་མཚམས་ཀྱི་ལམ་ཡིག་ནི་མང་ཚོགས་མཐའ་མཚམས་རྫོང་དུ་སྐྱོད་པའི་དཔང་ཡིག་གལ་ཆེན་ཞིག་རེད། སྲོལ་རྒྱུན་གྱི་ལག་ཁྱེར་གཉེར་སྐབས་མང་ཚོགས་ཀྱིས་ངོ་སྤྲོད་ཡི་གེ་སོགས་དཔྱད་གཞིའི་ཡིག་རིགས་མཁོ་འདོན་བྱེད་དགོས་པས་ལག་ཁྱེར་གཉེར་བའི་བརྒྱུད་རིམ་རྙོག་འཛིང་ཆེ་ལ་དུས་ཚོད་མང་པོ་འགོར་གྱི་ཡོད།

གནས་ཚུལ་དེར་དམིགས་ནས་གཞིས་རྩེ་མཐའ་མཚམས་དོ་དམ་ཉིང་ལག་རུ་ཁག་གངས་ལྗོངས་ཇོ་མོ་གླང་མ་བུད་མེད་ལག་ཁྱེར་གཉེར་ཁང་གིས“གློད་སྡོམ་ཞབས”གསུམ་གྱི་སྒྱུར་བཅོས་གཏིང་ཟབ་ཏུ་བཏང་སྟེ་ལག་ཁྱེར་གཉེར་བའི་སྐར་ཁུང་མང་དུ་བཏང་བ་དང་། བློ་འདྲིའི་ལས་སྟེགས་བཙུགས་པ། ལག་ཁྱེར་གཉེར་བའི་བརྒྱུད་རིམ་སྟབས་བདེ་རུ་བཏང་བ། སྒེར་གཉེར(དམངས་གཉེར)ཁེ་ལས་ཀྱི་ཐོ་འགོད་སྙན་སེང་མ་ལག་སྒོ་དབྱེ་སོགས་ཀྱི་བྱེད་ཐབས་བརྒྱུད་མཐའ་མཚམས་ལམ་ཡིག་གཉེར་བར་དེ་བས་སྟབས་བདེ་བསྐྲུན་པས་མང་ཚོགས་ཀྱི་གདེང་འཇོག་བཟང་པོ་མགྲིན་གཅིག་ཏུ་ཐོབ་ཡོད།

“ང་ཚོར་གནད་དོན་ཆེན་པོ་ཞིག་ཐག་གཅོད་བྱེད་རོགས་བྱས་ནས་ནང་མི་བཞིའི་ཇོ་མོ་གླང་མའི་ཕུགས་འདུན་མངོན་འགྱུར་བྱུང་སོང་བས་སེམས་གཏིང་ནས་ཐུགས་རྗེ་ཆེ་ཞུ་རྒྱུ་ཡིན”ཞེས་འདི་ལོའི་ཟླ་8ཚེས་30ཉིན་ཧུའུ་ནན་ནས་ཡོང་བའི་ཡུལ་སྐོར་བ་གཉིས་ཀྱིས་ཐེམ་ཐོ་བཟོས་མེད་པའི་བྱིས་པ་གཉིས་འཁྲིད་ཡོདཔས་བྱིས་པ་དེ་གཉིས་ལ་འབྲེལ་ཡོད་ཀྱི་མཐའ་མཚམས་ཀྱི་ལམ་ཡིག་གཉེར་ཐབས་བྲལ་བས་ལག་ཁྱེར་གཉེར་ཁང་གི་ལས་དོན་མི་སྣར་གང་མགྱོགས་ལག་ཁྱེར་གཉེར་རོགས་བྱ་རྒྱུའི་རེ་ཞུ་བྱས། གནས་ཚུལ་ཤེས་རྟོགས་བྱས་རྗེས་ལག་ཁྱེར་གཉེར་ཁང་གི་ལས་དོན་མི་སྣས་ཡུལ་སྐོར་ཅུས་དང་མཐུན་སྦྱོར་ཧུར་ཐག་བྱས་ཏེ་ཁོང་ཚོར་ཇོ་མོ་གླང་མར་སྐྱོད་པའི་མཐའ་མཚམས་ལམ་ཡིག་བཟོས་པས“ངས་མང་ཚོགས་ལ་བྱ་བ་དངོས་བསྒྲུབ་རྒྱུ”དེ་མང་ཚོགས་ལ་དཀའ་ངལ་ཐག་གཅོད་བྱེད་པའི་ཕྱོགས་གང་ས་ཅི་ཐད་ནས་དངོས་འབྲེལ་མཚོན་པར་བྱས་པ་རེད།

ད་བར་གཞིས་རྩེ་མཐའ་མཚམས་དོ་དམ་ཉིང་ལག་རུ་ཁག་གིས“ངས་མང་ཚོགས་ལ་བྱ་བ་དངོས་སྒྲུབ་པའི”གཏམ་རྒྱུད་མུ་མཐུད་རྩོམ་བཞིན་མཆིས།