ཟླ་11ཚེས་30ཉིན། རང་སྐྱོང་ལྗོངས་མི་སྤྱི་ཐིང་དང་རང་སྐྱོང་ལྗོངས་ནོར་སྲིད་ཐིང་གིས་མཉམ་འབྲེལ་ཐོག་བརྡ་ཐོ་བཏང་ནས། རང་ལྗོངས་ཀྱི་རྒན་ཡོལ་ཞུས་པའི་གཞི་རྩའི་རྒན་གསོའི་དངུལ་2021ལོར་སླར་ཡང་སྤར་འདུག་ ཤེས་རྟོགས་བྱུང་བར་གཞིགས་ན། ད་ཐེངས་སྤར་བའི་རྒན་ཡོལ་ཞུ་མཁན་གྱི་གཞི་རྩའི་རྒན་གསོའི་དངུལ་གྱི་ཁྱབ་ཁོངས་ནི། 2020ལོའི་ཟླ་12ཚེས་31ཉིན་གོང་གཏན་འབེབས་ལྟར་རྒན་ཡོལ་ཞུ་བའི་འགྲོ་ལུགས་གཉེར་ཟིན་པ་དང་འབྲེལ། ཁེ་ལས་དང་ལས་ཁུངས་བྱ་གཞག་ཚན་པའི་ཟླ་རེར་གཞི་རྩའི་རྒན་གསོའི་དངུལ་ལེན་མཁན་གྱི་རྒན་ཡོལ་ཞུ་མཁན་ཡིན་པ་དང་། རྒན་ཡོལ་ཞུ་མཁན་གྱི་གཞི་རྩའི་རྒན་གསོའི་དངུལ་སྤར་བའི་དུས་ཚོད་ནི། 2021ལོའི་ཟླ་1ཚེས་1ཉིན་ནས་ཡིན་པ་རེད།

གསར་འགོད་པར་རང་སྐྱོང་ལྗོངས་མི་སྤྱི་ཐིང་ནས་ཤེས་རྟོགས་བྱུང་བར། ད་ཐེངས་རྒན་ཡོལ་ཞུ་མཁན་གྱི་གཞི་རྩའི་རྒན་གསོའི་དངུལ་བཅད་གྲངས་ལྟར་སྤྲོད་པ་དང་། གྲོན་དངུལ་འཇལ་བ་དང་འབྲེལ་ནས་སྤྲོད་པ། གཟིགས་སྐྱོང་འོས་འཚམ་བཅས་ཟུང་འབྲེལ་གྱི་བྱ་ཐབས་སྤྱད་ནས་སྤར་ཞིང་། དེའང་ཁེ་ལས་དང་ལས་ཁུངས་བྱ་གཞག་ཚན་པའི་རྒན་ཡོལ་ཞུ་མཁན་ལ་ལྟ་རྟོག་བྱས་ཡོད། དེའི་ནང་བཅད་གྲངས་ལྟར་སྤྲོད་པ་ནི། 2020ལོའི་ཟླ་12ཚེས་31ཉིན་གོང་གཏན་འབེབས་ལྟར་རྒན་ཡོལ་ཞུ་བའི་འགྲོ་ལུགས་གཉེར་ཟིན་པ་མ་ཟད། ཟླ་རེར་གཞི་རྩའི་རྒན་གསོའི་དངུལ་ལེན་པའི་རྒན་ཡོལ་ཞུ་མཁན་ཡིན་པ་དང་མི་རེར་ཟླ་རེར་སྒོར་27སྤར་ཡོད་པ་རེད།

གྲོན་དངུལ་འཇལ་བ་དང་འབྲེལ་ནས་སྤྲོད་པ་ནི། མི་རེར་ཟླ་རེར་གྲོན་དངུལ་འཇལ་བའི་ལོ་ཚད(དངོས་སུ་གྲོན་དངུལ་འཇལ་བའི་ལོ་ཚད་དང་ལས་ཀར་སླེབས་ནས་གྲོན་དངུལ་འཇལ་བའི་ལོ་ཚད་ཚུད་པ། ལོ་གཅིག་མ་སོང་བ་རྣམས་ལོ་གཅིག་ལྟར་བརྩི་རྒྱུ)ལྟར་ལོ་གཅིག་ཕྱིན་རྗེས་རིགས་གཉིས་པའི་ཁུལ་ལ་སྒོར་1དང་། རིགས་གསུམ་པའི་ཁུལ་ལ་སྒོར་2 རིགས་བཞི་པའི་ཁུལ་ལ་སྒོར་3 ལྗོངས་ཕྱིའི་འགན་བཅོལ་ཚན་པར་ཞུགས་མཁན་ཚོར་སྒོར་1བཅས་སྤར་ཡོད། གྲོན་དངུལ་འཇལ་བ་དང་འབྲེལ་ནས་སྤྲོད་པ་དེ་ནི། རྒན་ཡོལ་ཞུ་མཁན་ལ་2020ལོའི་ཟླ་12པར་གཞི་རྩའི་རྒན་གསོའི་དངུལ(དྲོད་སྲུང་གྲང་འགོག་གྲོན་དངུལ་དང་། འདས་པོའི་རྗེས་འཇུག་གི་ཁ་གསབ་རོགས་དངུལ། ཐེངས་གཅིག་རང་བཞིན་གྱི་འཆི་གོད་གསབ་དངུལ། འགྲིམ་འགྲུལ་གྲོན་དངུལ། ལས་རིགས་ཀྱི་ལོ་ཕོགས་སོགས་གཞི་རྩའི་རྒན་གསོའི་དངུལ་མིན་པའི་རྣམ་གྲངས་ཚུད་མེད་པ)གཞི་གྲངས་སུ་བྱས་ཏེ་0.2%བསྒྱུར་ནས་མི་རེའི་ཟླ་རེའི་སྤོར་དངུལ་རྩིས་རྒྱག་གི་ཡོད་པ་རེད།

གཟིགས་སྐྱོང་འོས་འཚམ་བྱས་ནས་སྤྲོད་པ་དེ་གོང་གསལ་གྱི་གཏན་འབེབས་ལྟར་གཞི་རྩའི་རྒན་གསོའི་དངུལ་མང་དུ་བཏང་རྗེས། 2020ལོའི་ཟླ་12ཚེས་31ཉིན་བར་ལོ་70ཡན་དང་ལོ་80མན་གྱི་རྒན་ཡོལ་ཞུ་མཁན་ལ་མི་རེར་ཟླ་རེར་སླར་ཡང་སྒོར་30སྤར་བ་དང་། ལོ་80ལ་སླེབས་པའི་རྒན་ཡོལ་ཞུ་མཁན་ལ་མི་རེར་ཟླ་རེར་སྒོར་60སྤར་ཡོད་པ་རེད།

ཤེས་རྟོགས་བྱུང་བར་གཞིགས་ན། ད་ཐེངས་གཞི་རྩའི་རྒན་གསོའི་དངུལ་སྤར་ནས་སྤྲོད་རྒྱུའི་མ་དངུལ་དེ་དག་ཁེ་ལས་ཀྱི་ལས་བཟོའི་གཞི་རྩའི་རྒན་གསོ་འགན་བཅོལ་ནང་ཞུགས་མཁན་ལ་ཁེ་ལས་ཀྱི་གཞི་རྩའི་རྒན་གསོ་འགན་བཅོལ་གྱི་ཐེབས་རྩ་ནས་གཏོང་གི་ཡོད་པ་དང་། ལས་ཁུངས་བྱ་གཞག་ཚན་པའི་ལས་མིའི་གཞི་རྩའི་རྒན་གསོ་འགན་བཅོལ་ནང་ཞུགས་མཁན་ལ་ལས་ཁུངས་བྱ་གཞག་ཚན་པའི་གཞི་རྩའི་རྒན་གསོ་འགན་བཅོལ་གྱི་ཐེབས་རྩ་ནས་གཏོང་གི་ཡོད་པ་རེད།