ལོ་རྒྱུས་སུ་མི་རིགས་20ལྷག་ཙམ་མཚོ་སྔོན་གྱི་ས་གཞི་ཆེན་པོར་འཚོ་གནས་བྱེད་མྱོང་ཡོད་ཅིང་། རང་བྱུང་ཁོར་ཡུག་སྣ་ཚོགས་དང་། དཔལ་འབྱོར་གྱི་རྣམ་པ་མི་འདྲ་བ། རྙོག་འཛིང་ཆེ་བའི་མི་རིགས་ཀྱི་གྲུབ་ཆ་བཅས་ལས། རིག་གནས་ཀྱི་རྒྱུ་ཆ་སྣ་ཚོགས་གནས་དེར་མཉམ་འདྲེས་མཉམ་འཛོམས་བྱས་ཏེ་འོད་སྟོང་འཕྲོ་བའི་རིག་གནས་ཤུལ་བཞག་6000ལྷག་ཙམ་བཞག་ཡོད།
ཉེ་ཆར། མཚོ་སྔོན་ཞིང་ཆེན་རྟེན་རྫས་བཤམས་མཛོད་ཁང་གིས་ཇུས་འགོད་གསར་ཤོས་བྱས་ནས་བཏོན་པའི་འགྲེམས་སྟོན་ཆེ་གྲས་བཞི་དངོས་སུ་ཕྱི་ཕྱོགས་སུ་སྒོ་མོ་འབྱེད་འགོ་ཚུགས་པ་རེད། ད་ཐེངས་ཀྱི་འགྲེམས་སྟོན་ལ་མཚོ་སྔོན་གྱི་ལོ་རྒྱུས་རིག་དངོས་འགྲེམས་སྟོན་དང་། མཚོ་སྔོན་གྱི་གནའ་རྫས་རྟོག་ཞིབ་གྲུབ་འབྲས་འགྲེམས་སྟོན། ལོ་བརྒྱའི་མཚོ་སྔོན་གྱི་གསར་བརྗེའི་རིག་དངོས་དཀར་ཆག་འགྲེམས་སྟོན། མཚོ་སྔོན་གྱི་མངོན་མིན་རིག་གནས་ཤུལ་བཞག་རྩེར་སོན་འགྲེམས་སྟོན་བཅས་ཚུད་ཡོད་པ་རེད། འགྲེམས་སྟོན་གྱི་ནང་དོན་ལ“ལོ་རྒྱུས་ཀྱི་རིག་དངོས་དང་ཡི་གེ་མ་བྱུང་གོང་གི་གནོད་འཚེའི་རྗེས་ཤུལ”དང་། “གནའ་རྫས་རྟོག་ཞིབ་ཀྱི་རྗེས་ཤུལ་དང་ཤར་ནུབ་ཕྱོགས་གཉིས་སྤེལ་རེས”“གསར་བརྗེའི་གཏམ་རྒྱུད་དང་གསར་བརྗེའི་སྙིང་སྟོབས་རྒྱུན་འཛིན”“མི་རིགས་མང་པོ་འདུས་སྡོད་དང་སྲོལ་རྒྱུན་ལག་རྩལ”བཅས་ཚུད་ཡོད་པ་རེད།
“འགྲེམས་སྟོན་གྱི་དམིགས་ཡུལ་ནི་རྟེན་རྫས་བཤམས་མཛོད་ཁང་རང་ངོས་ཀྱིས་ཉར་ཚགས་བྱས་པའི་ཐོན་ཁུངས་དང་དེ་བཞིན་རིག་དངོས་ཀྱི་ཞིབ་འཇུག་གྲུབ་འབྲས་སྔོག་འདོན་གང་ལེགས་གཞིར་བྱས། མཚོ་སྔོན་རྟེན་རྫས་བཤམས་མཛོད་ཁང་གིས་མནའ་འབྲེལ་གྱི་རིག་དངོས་ཐོན་ཁུངས་བསྡུ་སྒྲིལ་བྱས་ཏེ། ཁྱོན་ཡོངས་ནས་མཚོ་སྔོན་གྱི་ཡི་གེ་མ་བྱུང་གོང་གི་ཤེས་དཔལ་ནས་ཉེ་རབས་ལོ་བརྒྱའི་བར་གྱི་འཕེལ་རྒྱས་ལོ་རྒྱུས་འགྲེམས་སྟོན་བྱས་ཡོད”ཅེས་མཚོ་སྔོན་ཞིང་ཆེན་རྟེན་རྫས་བཤམས་མཛོད་ཁང་གི་ཀོན་ཀྲང་ཝང་ཅིན་ཤན་གྱིས་ངོ་སྤྲོད་བྱས།
“ད་ཐེངས་ཀྱི་གནའ་རྫས་རྟོག་ཞིབ་གྲུབ་འབྲས་འགྲེམས་སྟོན་གྱི་ཁྱད་ཆོས་ནི་རིག་དངོས་ལ་དོ་ཁུར་བྱེད་པ་མ་ཟད། གནའ་རྫས་རྟོག་ཞིབ་པར་ཡང་དོ་ཁུར་བྱས་ནས་གནའ་རྫས་རྟོག་ཞིབ་བྱེད་རིང་གི་འདུ་ཤེས་དང་ལག་རྩལ་གསར་བརྗེར་དོ་ཁུར་བྱས་ཡོད”ཅེས་ཀྲུང་གོ་སྤྱི་ཚོགས་ཚན་རིག་ཁང་གནའ་རྫས་རྟོག་ཞིབ་ཞིབ་འཇུག་སུའོ་ཡི་ཞིབ་འཇུག་པ་གཞོན་པ་ཧན་ཅན་ཧྭ་ཡིས་བརྗོད།
མཚོ་སྔོན་གྱི་གནའ་རྫས་རྟོག་ཞིབ་པས་མི་རབས་ནས་མི་རབས་བར་རི་ཀླུང་མང་པོ་བརྒལ་ཅིང་གནས་ལམ་ཐང་སྡེར་དུ་བྱས་ཏེ་དཀའ་བ་མང་པོ་སྤྱད་ཡོད། ཉེ་བའི་ལོ་གསུམ་རིང་། མཚོ་སྔོན་ཞིང་ཆེན་གྱི་རིག་དངོས་སྲུང་སྐྱོབ་དང་བེད་སྤྱོད་ཀྱི་ཆུ་ཚད་རིམ་བཞིན་མཐོ་རུ་ཕྱིན་པ་དང་གནའ་རྫས་རྟོག་ཞིབ་ཀྱི་བརྟག་དཔྱད་དང་། རྩད་ཞིབ། སྔོག་འདོན་བཅས་ཀྱི་རྣམ་གྲངས་30ལྷག་ཙམ་ལག་བསྟར་བྱས་པ་རེད། འདི་ལོའི་ཟླ་10པར། མཚོ་སྔོན་གྱི་དུར་ལམ་ཆུ་ཚའི་བང་སོའི་ཚོགས་དང་མཚོ་སྔོན་དམར་གཙང་རྫོང་གི་ལ་ཅ་རྗེས་ཤུལ་ལོ་བརྒྱའི་རིང་གནའ་རྫས་རྟོག་ཞིབ་ཆེན་པོ་བརྒྱ་ཤེས་རྟོགས་བྱུང་བའི་ནང་བཅུག་པ་དང་། འདི་ལོའི་ཟླ་4པར་2018ལོའི་ཞུའེ་ཝུའེ་བང་སོ་ཨང་དང་པོ་2020ལོའི་ལོ་འཁོར་གྱི་རྒྱལ་ཡོངས་ཀྱི་གནའ་རྫས་རྟོག་ཞིབ་ཀྱི་ཤེས་རྟོགས་གསར་པ་ཆེན་པོ་བཅུར་བཅུག་པ་རེད།
འགྲེམས་སྟོན་བྱ་ཡུལ་གྱི་ཐང་བོད་གནའ་ལམ་གྱི་གློག་རྡུལ་ས་བཀྲ་དང་གྲོ་ཚང་དགོན་པ(ཆ་ཤས)ཚད་གསུམ་འགྲེམས་སྟོན་བྱས་པར་ལྟ་སྐོར་བ་མི་ཉུང་བ་ཞིག་གི་ཡིད་དབང་བཀུག་ཡོད་པ་རེད“འགྲེམས་སྟོན་ལ་གནའ་ཤུལ་སྔར་མ་ལྟར་སླར་གསོ་དང་སྨྱན་སྦྱོར་སྣེ་མང་གི་འགྲེམས་སྟོན་སོགས་བྱེད་ཐབས་སྣ་ཚོགས་སྤྱད་ནས། ཁྱོན་ཡོངས་དང་། རིག་གཞུང་གཏིང་ཟབ། ཚད་མཐོའི་སྒྱུ་རྩལ་བཅས་ཀྱི་འགྲེམས་སྟོན་ཕན་འབྲས་གཏོད་གང་ཐུབ་བྱས་པས། ལྟད་མོ་བས་ཉེ་ས་ནས་གནའ་རྫས་རྟོག་ཞིབ་ལ་ལྟ་ཐུབ་པ་བྱུང་སྟེ། སྤྱི་ཚོགས་དང་སྤྱི་དམངས་རིག་དངོས་སྲུང་སྐྱོང་ལ་ཞུགས་པའི་སྤྲོ་སེམས་འཕེལ་ཡོད”ཅེས་ཝང་ཅིན་ཤན་གྱིས་བརྗོད།
ཉེ་བའི་ལོ་གསུམ་རིང་། མཚོ་སྔོན་ཞིང་ཆེན་གྱི་རྟེན་རྫས་བཤམས་མཛོད་ཁང་41ལ་དྲ་ཐོག་དང་དྲ་ཕྱི་ནས་ལྟ་སྐོར་བྱེད་མཁན་མི་ཐེངས་ཁྲི་2600ཟིན་པ་དང་། རིག་དངོས་སྤུས་ལེགས་འགྲེམས་སྟོན་ལ་ལྟ་སྐོར་བྱེད་མཁན་མི་ཐེངས་ཁྲི་241ལས་བརྒལ་བ། དྲ་རྒྱའི་གླེང་གཞི་ལྟ་ཀློག་བྱེད་ཚད་ཁྲི་2300ལྷག་ཙམ་ཟིན་ནས་མཚོ་སྔོན་ཞིང་ཆེན་གྱི་རྟེན་རྫས་བཤམས་མཛོད་ཁང་དེ་དམིགས་བསལ་ཁྱད་ཆོས་ལྡན་པའི་ཡུལ་སྐོར་བྱ་ཡུལ་ཞིག་ཏུ་གྱུར་ཡོད་པ་རེད།
འདི་ནི་ལྟ་སྐོར་བས་མཚོ་སྔོན་ལོ་རྒྱུས་རིག་དངོས་འགྲེམས་སྟོན་ཚོམས་ཆེན་དུ་ལྟ་སྐོར་བྱེད་བཞིན་པ།
འདི་ནི་2018ལོའི་ཞུའེ་ཝུའེ་བང་སོ་ཨང་དང་པོ་ནས་ཐོན་པའི་སེང་གེ་ཁ་སྦྱོར་ཉི་ཟླའི་གསེར་བརྒྱན་ཡིན་པ།