1971ལོར། བོད་རང་སྐྱོང་ལྗོངས་མི་དམངས་སྲིད་གཞུང་ཁྲེང་ཏུར་བཅའ་སྡོད་དོན་གཅོད་ཁྲུའི་སྨན་ཁང(བསྡུས་མིང་ལ་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང)དངོས་སུ་བཙུགས་ཤིང་། ཁྲེང་ཏུའུ་གྲོང་ཁྱེར་ཞི་མན་ཟམ་པའི་འཕྲེད་ལམ་སྒོ་རྟགས་20པར་གནས་པ་དང་། ཉལ་ཁྲི་100དང་སྨན་བཅོས་ལག་རྩལ་མི་སྣ་40ལས་མེད་པའི་སྨན་ཁང་དེས་ཉན་བརྟག་ཡོ་བྱད་དང་ཁྲག་ཤེད་བརྟག་ཆས་འགའ་སྤྱད་དེ“བོད་ཀྱི་མི་རིགས་ཁག་གི་ལས་བྱེད་པ་དང་མང་ཚོགས་ཚོའི་བདེ་ཐང་འགན་སྲུང”གི་ལྟ་སྲུང་དམག་འཐབ་ལ་ཞུགས་འགོ་ཚུགས་པ་རེད།

2014ལོར། བོད་རང་སྐྱོང་ལྗོངས་མི་དམངས་སྲིད་གཞུང་ཁྲེང་ཏུར་བཅའ་སྡོད་དོན་གཅོད་ཁྲུའུ(བསྡུས་མིང་ལ་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ)ཡིས“རྟེན་གཞིའི་རྣམ་པའི”དོན་གཅོད་ཁྲུའུ་ཡི་འཕེལ་རྒྱས་འཆར་འགོད་བཏོན་པ་དང་། “ཕྱོགས་བདུན་གཞི་གཅིག”གི་སྒྲོམ་གཞིའི་ནང་ལྷུ་ཚིགས་ཁྲེང་ཏུའུ་དོན་གཅོད་ཁྲུའི་སྨན་ཁང་གིས“སྨན་བཅོས་བདེ་སྲུང”གི་ལྷུ་ཚིགས་གལ་ཆེན་བཟུང་ནས་བོད་ཀྱི་ལས་བྱེད་པ་དང་ལས་བཟོའི་སེམས་ཁྲལ་བསལ་ཡོད།

2018ལོའི་ཟླ་11པར། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་དེ་ཀ་པ་རིམ་པ་གསུམ་པའི་ཕྱོགས་བསྡུས་སྨན་ཁང་དུ་རིམ་པ་སྤར་ཏེ་ཚན་ཞིབ་དང་། ཤེས་ལྡན་མི་སྣ། སྨན་བཅོས་ཞབས་འདེགས་བཅས་ཀྱི་ཐད་འཕེལ་རྒྱས་མྱུར་པོ་བྱུང་ཡོད།

“འཕྲོད་བསྟེན་ཁང”ཞིག་ནས་འགོ་ཚུགས་པ།

བོད་ཞི་བས་བཅིངས་འགྲོལ་བཏང་བ་དང་བསྟུན་ནས་དམག་དཔུང་དང་མཉམ་དུ་བོད་དུ་བསྐྱོད་པའི་སྨན་བཅོས་རུ་ཁག་འབོར་ཆེན་གྱིས་བོད་ཀྱི་སྨན་བཅོས་འཕྲོད་བསྟེན་བྱ་གཞག་གི་འཕེལ་རྒྱས་ལ་སྐུལ་འདེད་བཏང་ཡོད། འོན་ཀྱང་སྨན་དང་སྨན་པ་དཀོན་པའི་གནས་ཚུལ་འོག་བོད་ཀྱི་ཉེན་ཚབས་ཆེ་བའི་ནད་པ་ནང་སར་སྨན་བཅོས་དཀའ་བའི་གནད་དོན་ཐག་གཅོད་བྱ་ཆེད། 1958ལོར་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་ཡིས་འཕྲོད་བསྟེན་ཚན་ཁག་བཙུགས་པ་རེད། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་ནང་ཁུལ་གྱི་སྒྲིག་གཞི་ཞིག་གི་ངོས་ནས་བོད་ཀྱི་ནད་པར་སྨན་བཅོས་བྱ་ཆོག་མོད། འོན་ཀྱང་ནད་ཁྲིའི་གྲངས་འབོར་ཧ་ཅང་ཉུང་བས་མང་ཆེ་བ་བོད་ཀྱི་ཉེན་ཚབས་ཆེ་བའི་ནད་པ་སྨན་བཅོས་གཞན་སྒྱུར་གྱི་ལས་འགན་འཁུར་ནས“བར་བརྒྱུད”ཀྱི་ནུས་པ་འདོན་གྱི་ཡོད།

དེ་རྗེས་གསར་དུ་བཙུགས་ནས་ཡུན་རིང་མ་སོང་བའི་བོད་རང་སྐྱོང་ལྗོངས་ཏང་ཨུད་དང་སྲིད་གཞུང་གིས“རྒྱབ་ཕྱོགས་ཆེན་པོ”སི་ཁྲོན་ཁྲེང་ཏུར་བོད་ཀྱི་མི་དམངས་ལ་སྨན་བཅོས་སྒྲིག་གཞི་འཛུགས་པའི་འཆར་འགོད་བཏིང་བ་དང་འབྲེལ་ལོ་10ལྷག་ཙམ་གྱི་དུས་ཡུན་སྤྱད་དེ་ལས་དོན་དེ་སྤེལ་ནས་1971ལོར་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་བཙུགས་པ་དང་། ཉལ་ཁྲི་100དང་འཕྲོད་བསྟེན་ལག་རྩལ་མི་སྣ་40བཀོད་སྒྲིག་བྱས་པ་རེད།

ནང་ཁུལ་གྱི“འཕྲོད་བསྟེན་ཚན་ཁག”ཞིག་ནས་འགོ་ཚུགས་པའི་སྨན་ཁང་དེར་དུས་འགོར་དཀའ་ངལ་ཆེན་པོ་འཕྲད་ཡོད། ཁང་པ་ཐོག་གཅིག་མ་རྙིང་པ་ཁ་ཤས་དང་ཉན་བརྟག་ཡོ་བྱད་འགའ་ཞིག་རྒྱུ་ནོར་ཡོངས་རྫོགས་རེད། དཀའ་ངལ་འདི་ལྟ་བུ་ནི་1982ལོར་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་དུ་མངགས་པའི་དེ་སྔའི་ཏང་ཨུད་ཀྱི་ཧྲུའུ་ཅི་ལི་ཞའོ་ཕིང་གི་ཐོག་མའི་བག་ཆགས་རེད། བོད་སྐྱོད་མི་རབས་གཉིས་པ་ལི་ཞའོ་ཕིང་དེ་སྔའི་ཧྲང་ཧའེ་གསོ་རིག་སློབ་གླིང་དང་པོ་ནས་ཐོན་རྗེས་གཅིག་གྱུར་བཀོད་སྒྲིག་ལྟར་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་དུ་ལས་བགོས་བརྒྱབ།

ཆ་རྐྱེན་དེ་འདྲའི་འོག་ལི་ཞའོ་ཕིང་གིས་ལས་ཀར་ལོ་39གཞོལ་ཞིང་། ཁོང་གིས་ཞབས་འདེགས་ཞུ་སའི་བོད་ཀྱི་ལས་བྱེད་པ་དང་མང་ཚོགས་ཚོར་ལང་ཚོ་སྐྱེས་སུ་ཕུལ་ཡོད་ལ། “འཕྲོད་བསྟེན་ཁང”ནས་འགོ་བཙུགས་པའི་སྨན་ཁང་དེ་གོམ་པ་རེ་རེ་བཞིན་འབད་འཐབ་བྱས་ནས་ད་ཆའི“ཀ་པ་རིམ་པ་གསུམ་པའི་སྨན་ཁང”དུ་གྱུར་པའི་འོད་སྟོང་འཕྲོ་བའི་ལོ་རྒྱུས་ལ་བདེན་དཔང་ཡང་བྱས་ཡོད།

ལོ་ངོ་50ཡི་སྤྱིར་བཏང་མིན་པའི་ལོ་ཟླར། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་ལ་ལོ་རྒྱུས་ཀྱི་རིས་དེབ་མཐུག་པོ་ཞིག་ཆགས་ཤིང་། “བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་མཉམ་སྡེབ”ཀྱི་གཟི་བརྗིད་མཚན་སྙན་ཐེངས་མང་ཐོབ་པ་དང་། ལོ་རེར་ཆ་སྙོམས་མི་ཐེངས་ཁྲི་25ལ་ནད་བརྟག་སྨན་དཔྱད་བྱས་པ། ལོ་རེར་ཆ་སྙོམས་གཤགས་བཅོས་ཐེངས་བདུན་སྟོང་ལྷག་ཙམ་བྱས་པ་བཅས་ལས་ལྗོངས་ནང་ཁུལ་དུ་སྐད་གྲགས་ཆོད་ཚད་དང་ཤུགས་རྐྱེན་ཐེབས་ཤུགས་མངོན་གསལ་དོད་པོས་ཆེ་རུ་ཕྱིན་ཡོད།

“མངོན་འགྱུར་ཐུབ་མི་སྲིད་པ”གྲངས་མེད་གསར་དུ་བཏོད་པ།

དཔྱད་གཞིའི་ཡིག་རིགས་ནང་། 1970ལོའི་ཟླ་1པོ་ནས་བཟུང་། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་ཡིས་ཁྲེང་ཏུའུ་གྲོང་ཁྱེར་སྲིད་གཞུང་ལ“བོད་རང་སྐྱོང་ལྗོངས་མི་དམངས་སྲིད་གཞུང་ཁྲེང་ཏུར་བཅའ་སྡོད་དོན་གཅོད་ཁྲུའི་སྨན་ཁང་སྐོར”གྱི་དགོངས་སྐོར་ཞུས་པ་ནས། ལོ་གཅིག་ནང་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་དངོས་སུ་བཙུགས་པ་དང་འབྲེལ་སྤྱོད་འགོའང་ཚུགས་པ་རེད།

རིམ་ཁག་འགོ་ཁྲིད་ཀྱི་མཐོང་ཆེན་དང་ཐུགས་ཁུར་འོག 1997ལོར་འཕྲོད་བསྟེན་པུས་མོས་མཐུན་བྱས་པ་བརྒྱུད་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་དང་ཧྭ་ཤིས་གསོ་རིག་སློབ་ཆེན་ཞོར་གཏོགས་སྨན་ཁང་དང་པོས(དེང་གི་སི་ཁྲོན་སློབ་ཆེན་ཧྭ་ཤིས་སྨན་ཁང)མཉམ་དུ་སྨན་ཁང་གཉེར་བའི་གྲོས་མཐུན་བཞག་ནས། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་དེ་ཧྭ་ཤིས་གསོ་རིག་སློབ་ཆེན་གྱི་ཞོར་གཏོགས་སྨན་ཁང་དང་པོའི་ཡན་ལག་སྨན་ཁང་དང་པོར་འགྱུར་བར་སྐུལ་འདེད་བཏང་བ་དེ་ནི་རྒྱལ་ནང་དུ་ཞིང་ཆེན་བསྒྲལ་ནས་མཉམ་འབྲེལ་ཐོག་སྨན་ཁང་གཉེར་ཐེངས་དང་པོ་རེད། དེ་ནི་སྐབས་དེ་དུས“མངོན་འགྱུར་ཐུབ་མི་སྲིད་པའི”ལས་འགན་ཞིག་རེད་ཅེས་བརྗོད་ཆོག

2014ལོར། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་དེ་སི་ཁྲོན་སློབ་ཆེན་ཧྭ་ཤིས་སྨན་ཁང་གི་ཁ་གཏད་བོད་སྐྱོར་ཚན་པར་དངོས་སུ་གྱུར་པ་རེད། མིག་སྔའི་བར། ཧྭ་ཤིས་སྨན་ཁང་གིས་སྔ་རྗེས་སུ་ལས་སྒོའི་རྐང་འཛིན་པ་9ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་དུ་ཡོན་ཀྲང་ངམ་སྨན་ཁང་གི་འགོ་ཁྲིད་བྱེད་པར་མངགས་པ་དང་དུས་མཚུངས། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་གིས་ཀྱང་ལས་སྟེགས་དེ་སྤྱད་ནས་2015ལོ་ནས་ད་བར་སྨན་དོན་མི་སྣ་108ཧྭ་ཤིས་སྨན་ཁང་དུ་གསོ་སྦྱོང་བྱེད་པར་བཏང་ཡོད།

2009ལོར། རྒྱལ་ཁབ་ཀྱི་ཀ་པ་རིམ་པ་གཉིས་པའི་སྨན་ཁང་གི་ཞིབ་བཤེར་རྩིས་ལེན་བྱས་པ་བརྒྱུད་སྨན་ཁང་ལ་རིམ་པ་མེད་པའི་ལོ་རྒྱུས་མཇུག་འགྲིལ་བ་རེད།

2011ལོར། “ཁ་པ་རིམ་པ་གསུམ་པ”འཛུཌ་གཏོད་བྱེད་འགོ་བཙུགས་པ་དང་འབྲེལ་ལོ་གཉིས་ཀྱི་རྗེས་སུ་ཞིབ་བཤེར་རྩིས་ལེན་བྱས་པ་རེད།

2018ལོར། ཀ་པ་རིམ་པ་གསུམ་པའི་སྨན་ཁང་དུ་དངོས་སུ་རིམ་པ་སྤར་བ་རེད།

བྱེའུ་ཕྲུག་རྒུམ་བུས་གསོས་ནས་འཕུར་རྩལ་བསླབས། གསོ་ལན་འཇལ་བ་འཇིག་རྟེན་ཆོས་ཉིད་ཡིན།

ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་གི“གསོ་ལན་འཇལ་བའི”བརྩེ་བ་དེ་ནི་བོད་ལ་བསྒྲུབས་པའི་བྱ་བ་ཙག་ཙིག་རེ་རེ་ལས་མངོན་བཞིན་ཡོད།

ཝུན་མིང་ཁུན་ནི་འཕྲོ་འགྱེད་ཚན་ཁག་གི་ལག་རྩལ་མཁས་ཅན་ཡིན་པ་དང་། 2018ལོར་རང་འགུལ་ངང་ས་བབ་སྨི་4700ཟིན་པའི་ཁ་གཏད་རོགས་སྐྱོར་སྨན་ཁང་ནག་ཆུ་གྲོང་ཁྱེར་ཨ་མདོ་རྫོང་མི་དམངས་སྨན་ཁང་དུ་འགྲོ་རྒྱུའི་རེ་འདུན་ཞུས། མ་གཞི་ལོ་ཕྱེད་ལ་མི་ཐེངས་རེ་བརྗེ་རེས་བྱེད་པའི་ཁ་གཏད་རོགས་སྐྱོར་བྱ་ཡུལ་དུ་ཁོང་གིས་ཟླ་19རིང་ལས་གནས་བརྟན་སྲུང་བྱས་པ་རེད། “ང་ཕྱིན་པའི་ལོ་དེར་ཨ་མདོ་རྫོང་མི་དམངས་སྨན་ཁང་གི་འཕྲོ་འགྱེད་ཚན་ཁག་ཏུ་སྨན་པ་གཅིག་ལས་མི་འདུག གལ་སྲིད་ཁོང་འཁོར་ཞག་དང་སློབ་སྦྱོང་ལ་ཕྱིན་ཚེ་ཚན་ཁག་དེ་རྒྱུན་གཏན་ལྟར་འཁོར་སྐྱོད་ཐུབ་ཀྱི་མེད་པས་སྨན་པ་བསྟེན་པའི་བརྒྱུད་རིམ་གཅིག་མེད་པར་ཆགས་ཀྱི་ཡོད་ལ། ནད་ཐོག་སྨན་བཅོས་བྱེད་མཁན་གྱི་སྨན་པའི་ངོས་ནས་བརྗོད་ན། ནད་གཞི་ཁག་གཅིག་ལ་བརྟག་དཔྱད་ཡག་པོ་བྱེད་མི་ཐུབ”དེས་ན་ལོ་29ལ་སླེབས་པའི་ན་གཞོན་དེས་འདི་གར་ཁག་ཐེངས་གསུམ་བསྡད་པ་རེད།

ཝུའུ་ཡུན་ཧུང་ནི་ཡོན་ཀྲང་གཞོན་པ་ཡིན་ཞིང་། གསང་རྒྱུད་ཟགས་གཤེར་རྙིང་ཚབ་གསར་བྱེད་ཚན་རིག་ཚན་ཁག་གི་སྣེ་ཁྲིད་པ་དང་སི་ཁྲོན་སློབ་ཆེན་ཧྭ་ཤིས་སྨན་ཁང་ཁོག་ནད་ཚན་ཁག་གི་འབུམ་རམས་པ་ཡིན་པ་དང་། ཨ་མདོ་རྗོང་དུ་སྡོད་རིང་ཁག་ཐེངས་གཅིག་པའི་རུ་མི་ཁག་གི་སྣེ་ཁྲིད་དེ་ཁོ་ཚོ་དང་མཉམ་དུ་ཨ་མདོ་རྫོང་གི་ལས་བྱེད་པ་429ཡི་བདེ་ཐང་ལ་བརྟག་དཔྱད་བྱས་པ་དང་འབྲེལ་ཡུན་རིང་བོད་དུ་བསྡད་པའི་མི་སྣར་བདེ་ཐང་གི་གནད་དོན་ཡོད་པར་དམིགས་ཏེ། ས་མཐོར་ཁྱུག་དབྱིངས་ནས་ཐད་གཏོང་ཐེངས་དང་པོ་བྱས་ཤིང་། ཚན་རིག་ཁྱབ་གདལ་གྱི་ནང་དོན་ལ་ས་མཐོར་གཉིད་ཡག་པོ་མི་ཁུག་པར་ལེགས་བཅོས་ཇི་ལྟར་བྱེད་དགོས་པ་སོགས་ཚང་མས་དོ་ཁུར་བྱེད་པའི་ནང་དོན་མང་པོ་ཚུད་ཡོད་པ་རེད།

2009ལོའི་ཟླ་12ཚེས་9ཉིན། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་གིས་བོད་ལྗོངས་མི་རིགས་སློབ་གླིང་གི་གསོ་རིག་ཚན་ཁག་དང་སློབ་མའི་དངོས་སྦྱོང་མཉམ་ལས་ཀྱི་གྲོས་མཐུན་བཞག་པ་དང་། 2013ལོའི་ཟླ་6ཚེས་24ཉིན། བོད་ལྗོངས་སློབ་ཆེན་གསོ་རིག་སློབ་གླིང་དང་སློབ་མའི་དངོས་སྦྱོང་རྟེན་གཞིའི་གྲོས་མཐུན་བཞག་པ། 2019ལོར་བོད་ལྗོངས་བོད་ལུགས་གསོ་རིག་སློབ་ཆེན་དང་ནད་ཐོག་སྨན་བཅོས་སློབ་ཁྲིད་སྨན་ཁང་གི་གྲོས་མཐུན་བཞག་ནས་སྒོ་བྱང་བཀལ་བ་རེད།

བདེ་ཐང་གི“རྒྱབ་ཕྱོགས་ཆེན་པོ”སྲུང་མཁན།

བོད་ཀྱི་དཔལ་འབྱོར་དང་སྤྱི་ཚོགས་མགྱོགས་མྱུར་འཕེལ་རྒྱས་བྱུང་བ་དང་བསྟུན་ནས། བོད་དང་ནང་སའི་དཔལ་འབྱོར་དང་སྤྱི་ཚོགས་དབར་གྱི་འབྲེལ་བ་ཉིན་བཞིན་ཇེ་ཟབ་ཏུ་འགྲོ་བཞིན་ཡོད་པ་དང་ཆབས་ཅིག བོད་ཀྱི་མི་དམངས་ཀྱིས་སྔར་བས་མཛེས་སྡུག་ལྡན་པའི་འཚོ་བར་བཅངས་པའི་རེ་སྒུག་དང་བསྟུན་ནས་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་དང་བོད་རང་སྐྱོང་ལྗོངས་ཀྱི་འཕེལ་རྒྱས་དང་བརྟན་ལྷིང་གི་སྤྱི་ཡོངས་ལ་ཞབས་འདེགས་དེ་བས་ཡག་པ་ཞུ་ཆེད། 2014ལོར་སྐབས་དེ་དུས་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་ཡི་ཀྲུའུ་རེན་གྱི་འགན་འཁུར་མཁན་ཀྲོང་ཅིན་སུང་དང་དོན་གཅོད་ཁྲུའི་འགོ་ཁྲིད་ཚན་ཁག་གིས“རྟེན་གཞིའི་རྣམ་པའི”དོན་གཅོད་ཁྲུའུ་ཡི་འཕེལ་རྒྱས་བསམ་ཕྱོགས་བཏོན་པ་རེད།

རྒྱབ་ལྗོངས་ཆེན་པོ་དེ་འདྲར་བརྟེན་ནས་ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་ལ་ལོ་ངོ་བཅུ་ཕྲག་ཁ་ཤས་རིང་གི་འཕེལ་རྒྱས་མགྱོགས་ཤོས་བྱུང་ཡོད།

2018ལོའི་ཟླ་11པར། ཀ་པ་རིམ་པ་གསུམ་པའི་ཕྱོགས་བསྡུས་སྨན་ཁང་དུ་སྤར་ནས་ལམ་ཚད་རྡོ་རིང་ལྟ་བུའི་འཕེལ་རྒྱས་བྱུང་ཡོད།

2020ལོར། གོ་གནས་འཕར་རྒྱུ་ཡོད་ལ་ཆག་རྒྱུའང་ཡོད་པའི་མི་དོན་ལམ་ལུགས་སྒྱུར་བཅོས་དང་། རིམ་གསུམ་སྨན་བཅོས། རིམ་གསུམ་ལྟ་འདོམས། རིམ་གསུམ་ལས་རྗེས་སྒྱུར་བཅོས་སོགས་སྒྱུར་བཅོས་རབ་དང་རིམ་པར་སྐུལ་འདེད་བརྟན་པོ་བཏང་བ་རེད།

2021ལོར། སྨན་ཁང་གིས་རེས་སྐོར་གཉིས་པའི་བསྐྱར་སྐྲུན་རྒྱས་སྐྲུན་ལས་གྲྭར་སྐུལ་འདེད་མགྱོགས་པོ་བཏང་ཞིང་། ལས་མཇུག་འགྲིལ་རྗེས་སྔོན་དཔག་བྱས་ན་ནད་ཁྲི་1000ལྷག་ཙམ་མཁོ་འདོན་བྱས་ནས་མིག་སྔའི་སྨན་བཅོས་ཐོན་ཁུངས་ཛ་དྲག་པའི་རྣམ་པ་ཞི་ལྷོད་དུ་ཤུགས་ཆེན་འགྲོ་སྲིད།

དེ་དང་ཆབས་ཅིག ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའུ་ཡི་ཏང་ཙུའི་ཚན་ཁག་གིས་ལོ་གཅིག་ལྷག་ཙམ་རིང་གྲོས་བསྡུར་དང་བསམ་གཞིག་བྱས་རྗེས། 2019ལོར“ཀྲུང་གོའི་ས་མཐོའི་ནད་ཀྱི་སྨན་ཁང་རྩེ་གྲ་སྐྲུན་པ”ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་གི་འཕེལ་རྒྱས་དམིགས་ཚད་དུ་བརྩི་དགོས་པ་བཏོན་པ་རེད།

ཁྲེང་ཏུར་ཞབས་ཞུའི་ས་ཚིགས་18བཙུགས་ནས་རྒན་ཡོལ་ཞུས་རྗེས་ཁྲེང་ཏུར་བཀོད་སྒྲིག་བྱས་པའི་བློ་མཐུན་རྒན་གྲས་ལ་གཟའ་འཁོར་རེར་སྨན་བཅོས་ཐེངས་རེ་བྱེད་པའི་སྒོ་རྩའི་ཞབས་འདེགས་མཁོ་འདོན་བྱས་པ་དང་། བཅའ་སྡོད་ས་ཚིགས་སུ་ལོ་རེར་ཆ་སྙོམས་ཞབས་འདེགས་ཐེངས་700ཙམ་དང་སྨན་སྐྱེལ་ཐེངས་ཁྲི་ཙམ་ཟིན་ནས“དོ་དམ་བྱེད་དགོས་རིགས་ཚང་མར་དོ་དམ་བྱེད་པ”མངོན་འགྱུར་བྱུང་ཡོད།

ཨ་མདོ་རྫོང་མི་དམངས་སྨན་ཁང་ལ་ཁ་གཏད་རོགས་སྐྱོར་བྱས་ནས་ས་གནས་དེ་གའི་སྨན་ཁང་གིས་མི་ཐེངས་6000ལྷག་ཙམ་ལ་སྒོ་བསྟེན་དང་དོས་དྲག་སྨན་བཅོས་བྱེད་པར་མཛུབ་ཁྲིད་བྱས་ཏེ། མྱུར་སྐྱོབ་ཐུབ་ཚད་97%ཟིན་པ་དང་། གྲོང་སྡོད་དཔུང་ཁག་ཁག་ཐེངས་19ཡི་མི་80ལྷག་ཙམ་མངགས་ནས་སྔ་རྗེས་སུ་གཞིས་རྩེ་གྲོང་ཁྱེར་བཞད་མཐོང་སྨོན་རྫོང་དང་ནག་ཆུ་གྲོང་ཁྱེར་ནག་ཆུ་རྫོང་གི་ཤང་དང་གྲོང་ཚོ་6ལ་ཞབས་འདེགས་ཞུས་པ་དང་རིམ་རྩིས་བྱས་ན་སྒོར་ཁྲི་20ལྷག་ཙམ་རི་བའི་སྨན་རྫས་སྤྲད་པ་རེད།

ལོ་50ཡི་རིང་མེད་པ་ནས་ཡོད་པའི་བར་དང་། ཆུང་བ་ནས་ཆེ་བའི་བར། སྟོབས་ཆུང་ནས་སྟོབས་ཆེན་བར། ཁྲེང་ཏུར་བཅའ་སྡོད་བོད་ལྗོངས་དོན་གཅོད་ཁྲུའི་སྨན་ཁང་ལ་རིམ་བཞིན་འགྱུར་ལྡོག་ཆེན་པོ་བྱུང་བ་དང་ངར་ཤུགས་དང་སྤྲོ་སེམས་ཆེན་པོར་བརྟེན་ནས་བོད་ཀྱི་སྨན་བཅོས་བྱ་གཞག་འཕེལ་རྒྱས་ཀྱི་མདུན་གྲལ་དུ་སླེབས་ཡོད།