མིག་སྔར་ཏོག་གསར་རིམས་ནད་སྔོན་འགོག་དང་ཚོད་འཛིན་བྱེད་པའི་སྒང་ཡིན་པ་མ་ཟད། ཆམ་རིམས་ནད་དུག་མཆེད་མང་བའི་དུས་ཀྱང་ཡིན་པས། ཆམ་རིམས་ནད་དུག་དང་ཏོག་གསར་ནད་དུག་འགོ་སྲིད་པའི་ཉེན་ཁ་ཆེ་བའི་དུས་བབ་འོག་ཚང་མས་དོ་སྣང་ཆེན་པོ་བྱེད་དགོས་ཀྱི་ཡོད།
ཤེས་རྟོགས་བྱུང་བར་གཞིགས་ན། 2017ལོ་ནས་བཟུང་ཁྲེང་ཀོན་ཆུས་ཀྱིས་ལོ་65ཡན་གྱི་ཐེམ་ཐོ་ཆུས་ཁོངས་སུ་ཡོད་པའི་གྲོང་མི་དང་ཞིང་འབྲོག་པ་དང་དེ་བཞིན་ཁྲེང་ཀོན་ཆུས་ཀྱི་ལས་ཁུངས་དང་ཁེ་ལས་བྱ་གཞག་ཚན་པའི་རྒན་ཡོལ་ཞུས་པའི་ལས་བྱེད་ལས་བཟོ་ཚོར་རིན་མེད་ཀྱི་ཆམ་རིམས་སྔོན་འགོག་ཁབ་བརྒྱབ་པས་སྤྱི་ཚོགས་སུ་ཕན་འབྲས་བཟང་པོ་ཐོན་པ་དང་ཆབས་ཅིག་ཆམ་རིམས་སྔོན་འགོག་ནུས་ལྡན་བྱུང་ཡོད་པ་རེད།
ཁྲེང་ཀོན་ཆུས་ནད་ཡམས་སྔོན་འགོག་ཚོད་འཛིན་ལྟེ་གནས།
ཚེས་18ཉིན། གསར་འགོད་པས་ཁྲེང་ཀོན་ཆུས་ནད་ཡམས་སྔོན་འགོག་ཚོད་འཛིན་ལྟེ་གནས་ནས་ཤེས་རྟོགས་བྱས་པར་གཞིགས་ན། 2021ལོར་ཁྲེང་ཀོན་ཆུས་ཀྱིས་རྒན་རྒོན་ལ་རིན་མེད་ཀྱི་ཆམ་རིམས་སྔོན་འགོག་ཁབ་རྒྱག་པའི་དམངས་ཕན་སྲིད་ཇུས་མུ་མཐུད་ལག་བསྟར་བྱས་པ་རེད། ཟླ་10ཚེས་18ཉིན་ནས་ཟླ་11ཚེས་30ཉིན་བར། ཁྲེང་ཀོན་ཆུས་སྡེ་ཁུལ་ཁག་གི་འཕྲོད་བསྟེན་ཞབས་ཞུའི་ལྟེ་གནས(ས་ཚིགས)དང་ཤང་འཕྲོད་བསྟེན་ཁང་16ཏུ་ཡིན་པ། ཞར་བྱུང་། ཟླ་10ཚེས་18ཉིན་ནས་ཚེས་30ཉིན་བར་ལོ་གསུམ་ཡན་གྱི་མི་ཚོགས་ལ་རིན་མེད་ཀྱི་ཆམ་རིམས་སྔོན་འགོག་ཁབ་རྒྱག་ཆོག་པ་དང་། ཟླ་10ཚེས་30ཉིན་གྱི་རྗེས་ནས་ཆམ་རིམས་སྔོན་འགོག་ཁབ་རྒྱག་པར་རིན་པ་སྤྲོད་དགོས་ཀྱི་ཡོད་པ་རེད། ཁྲེང་ཀོན་ཆུས་ནད་ཡམས་སྔོན་འགོག་ཚོད་འཛིན་ལྟེ་གནས་ཀྱི་ལས་དོན་མི་སྣས་སྟོན་ཁ་དང་དགུན་ཁའི་དུས་སུ་རྒྱ་ཆེའི་མང་ཚོགས་ཚོས་ཏོག་གསར་རིམས་འགོག་སྨན་ཁབ་གཟེད་དགོས་པ་མ་ཟད། ད་དུང་དུས་ཐོག་ཏུ་ཆམ་རིམས་སྔོན་འགོག་ཁབ་ཀྱང་གཟེད་ནས་ནད་འགོག་ནུས་པ་ཆེ་རུ་གཏོང་དགོས། དེ་དང་ཆབས་ཅིག ད་ཐེངས་རིན་མེད་ཀྱི་ཆམ་རིམས་སྔོན་འགོག་ཁབ་རྒྱག་པའི་གྲངས་འབོར་ལ་ཚད་ཡོད་པས་རྒན་རྒོན་དང་། བྱིས་པ། གཅོང་ནད་ཕོག་མཁན་བཅས་དང་དེ་བཞིན་སྨན་དོན་མི་སྣས་དུས་ཐོག་ཏུ་སྨན་ཁབ་གཟེད་རྒྱུའི་རེ་བ་ཡོད་ཅེས་དྲན་སྐུལ་བྱས་པ་རེད།