1.ཞིང་པའི་ཁང་སའི་ཁྲིམས་མཐུན་ཁེ་དབང་འགན་སྲུང་ལ་ཤུགས་སྣོན་རྒྱག་རྒྱུ།

《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ས་ཆ་དོ་དམ་བཅའ་ཁྲིམས་ལག་བསྟར་སྲོལ་ཡིག》ཟླ་9ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན་པ་དང་། ཞིང་པའི་འདོད་མོས་ལ་མི་བསྟུན་པར་བཙན་ཤེད་ངང་ཁང་ས་བརྒྱུད་བཤུག་བྱ་རྒྱུ་གཏན་འགོག་བྱེད་དགོས་པ་ཁ་གསལ་བཏོན་པ་དང་། ཞིང་པའི་ཁང་ས་བསྡུ་རྒྱུ་དེ་ཞིང་པ་གྲོང་ཁྱེར་དུ་གཞིས་ཚུགས་པའི་ཆ་རྐྱེན་དུ་འཛིན་པ་སོགས་གཏན་འགོག་བྱ་རྒྱུ།

2.བཟའ་ཚང་ཕན་ཚུན་ཁང་པའི་བདག་དབང་བརྗེ་བ་དང་བུ་ཕྲུག་གིས་ཁང་པའི་བདག་དབང་རྒྱུན་འཛིན་བྱེད་སྐབས་གན་ཁྲལ་འཇལ་དགོས་ཀྱི་མེད།

《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་གན་ཁྲལ་བཅའ་ཁྲིམས》ཟླ་9ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན་པ་དང་། བཟའ་ཚང་ཕན་ཚུན་ས་ཆ་དང་སྡོད་ཁང་གི་བདག་དབང་སྒྱུར་བ་དང་ཁྲིམས་གཏན་འཁེལ་བའི་རྒྱུན་འཛིན་པས་ས་ཆ་དང་སྡོད་ཁང་གི་བདག་དབང་རྒྱུན་འཛིན་བྱེད་པར་གན་ཁྲལ་འཇལ་དགོས་ཀྱི་མེད།

3.བདེ་འཇགས་ཐོན་སྐྱེད་ཀྱི་ཁྲིམས་སྲོལ་ལས་འགལ་ཚེ་མང་ཤོས་ལ་ཆད་པ་སྒོར་དུང་ཕྱུར་1གཅོད་རྒྱུ།

གསར་དུ་བཟོ་བཅོས་བརྒྱབ་པའི《ཀྲུང་ཧྭ་མི་དམངས་སྤྱི་མཐུན་རྒྱལ་ཁབ་ཀྱི་བདེ་འཇགས་ཐོན་སྐྱེད་བཅའ་ཁྲིམས》ཟླ་9ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན་པ་དང་། ཁྲིམས་འགལ་བྱེད་སྤྱོད་ལ་ཆད་པ་གཅོད་ཤུགས་ཆེ་རུ་གཏོང་རྒྱུ་ཡིན་པ། ལས་འཛོལ་ཧ་ཅང་ཚབས་ཆེན་ཐོན་ཚེ་མང་ཤོས་ལ་ཆད་པ་སྒོར་དུང་ཕྱུར་1གཅོད་རྒྱུ།

4.ཟོག་སྐྱེལ་རླངས་འཁོར་སྟོང་པའི་སྤུས་ཚད་ལོ་ལྟར་ཞིབ་བཤེར་བྱེད་དགོས་པའི་རྣམ་གྲངས་སུ་གྱུར་བ།

《འཕྲུལ་སྒུལ་འཁོར་རིགས་ཀྱི་བདེ་འཇགས་ལག་རྩལ་ཞིབ་བཤེར་རྣམ་གྲངས་དང་བྱ་ཐབས》ཀྱི་བླང་བྱ་གཞིར་བཟུང་། ཟླ་9ཚེས་1ཉིན་ནས་བཟུང་། ཟོག་སྐྱེལ་རླངས་འཁོར་དང་འདྲུད་འཁོར་ཆེ་འབྲིང་གི་བདེ་འཇགས་ཞིབ་བཤེར་བྱེད་སྐབས་རླངས་འཁོར་སྟོང་པའི་སྤུས་ཚད་ལ་ཞིབ་བཤེར་བྱ་རྒྱུ་ཡིན་པ།

5.ཚད་བརྒལ་དང་སྔོན་བརྒལ་གྱི་གསོ་སྦྱོང་བྱས་ཚེ་འགན་འཁྲི་བདའ་འདེད་གཏོང་རྒྱུ་ཡིན་པ།

《སློབ་གསོ་ལྟ་སྐུལ་སློབ་སྟོན་གྱི་འགན་འཁྲི་བདའ་འདེད་བྱ་ཐབས》ཟླ་9ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན་པ་དང་། རིམ་ཁག་དང་རིགས་ཁག་གི་སློབ་གྲྭ་དང་སློབ་གསོའི་སྒྲིག་གཞི་གཞན་དག་ལ་ཚད་བརྒལ་དང་སྔོན་བརྒལ་གྱི་གསོ་སྦྱོང་བྱེད་པ་དང་། དྲིལ་བསྒྲགས་རྫུན་མ་བྱེད་པ། དུས་བརྒལ་གྲོན་དངུལ་བསྡུ་བ་སོགས་ཀྱི་བྱེད་སྤྱོད་ལྡན་ཚེ་འགན་འཁྲི་བདའ་འདེད་གཏོང་རྒྱུ།

6.ཉེས་རྡུང་གཏོང་བ་དང་ངན་སྨྲས་བྱེད་པ་སོགས་ཀྱི་བྱེད་སྤྱོད་དེ་བརྙས་བཅོས་བྱེད་པར་གཏན་འཁེལ་བྱ་རྒྱུ།

《ན་སོ་དར་ལ་མ་བབས་པའི་མི་སྣའི་སློབ་གྲྭའི་སྲུང་སྐྱོང་གཏན་འབེབས》ཟླ་9ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན་པ་དང་། སློབ་མའི་དབར་ལོ་ན་ཆེ་ཆུང་དང་། གཟུགས་སྟོབས་ཆེ་ཆུང་། ཡང་ན་མི་གྲངས་མང་ཉུང་སོགས་ཐད་ལེགས་ཆ་ལྡན་པའི་ཕྱོགས་ཀྱིས་བསམ་ངན་ཁོག་བཅུག་གམ་ཡང་ན་རྐང་བཙུགས་ནས་གཞན་ལ་ཉེས་རྡུང་དང་། བཙན་འཕྲོག ངན་སྨྲས་སོགས་བྱས་ཏེ་ཕ་རོལ་གྱི་མི་ལུས་ལ་གནོད་འཚེ་གཏོང་བ་དང་། རྒྱུ་ནོར་གྱི་གྱོང་གུན་བཟོ་བ། བསམ་བློར་ཕོག་ཐུག་གཏོང་བ་སོགས་བྱས་ཚེ་བརྙས་བཅོས་བྱས་པར་གཏན་འཁེལ་བྱ་རྒྱུ།

7.གནམ་གྲུའི་སྤ་སེའི་གྲོན་དངུལ་ཉིན་7ནང་ཕྱིར་སློག་བྱས་ཚར་བ་བྱེད་དགོས།

《སྤྱི་པའི་མཁའ་འགྲུལ་སྐྱེལ་འདྲེན་གྱི་འགྲུལ་པའི་ཞབས་ཞུའི་དོ་དམ་གཏན་འབེབས》ཟླ་9ཚེས་1ཉིན་ནས་བཟུང་ལག་བསྟར་བྱ་རྒྱུ་ཡིན་པ་དང་། མཁའ་འགྲུལ་ཀུང་སི་དང་མཁའ་འགྲུལ་ཕྱིར་འཚོང་གི་ཚབ་བྱེད་མི་སྣས་འགྲུལ་པའི་གོ་ཆོད་སྤ་སེའི་གྲོན་དངུལ་ཕྱིར་སློག་གི་རེ་ཞུ་འབྱོར་རྗེས་ཉིན་7ནང་ཕྱིར་སློག་གི་འགྲོ་ལུགས་གཉེར་ཚར་བ་བྱེད་དགོས།