ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། བོད་ཀྱི་སློབ་གསོའི་རྗེས་ལུས་ཀྱི་རྣམ་པར་རྦད་དེ་འགྱུར་ལྡོག་གཏོང་ཆེད་སློབ་གསོའི་བོད་སྐྱོར་ལས་དོན་ལ་སྐུལ་འདེད་གཏིང་ཟབ་བཏང་ཡོད། སློབ་ཁྲིད་ཀྱི་སྤུས་ཚད་ནས་སློབ་གསོའི་དོ་དམ་དང་། སློབ་གསོའི་དབུལ་སྐྱོར་ནས་ཤེས་ལྡན་མི་སྣ་གསོ་སྐྱོང་། ཚོགས་སྒྲིག་རྣམ་པའི་ཆ་སྒྲིག་རོགས་སྐྱོར་ནས་ཕྱོགས་ཡོངས་དང་། རིམ་པ་མང་བ། ཁྱབ་ཁོངས་ཆེ་བ་བཅས་ཀྱི་ཁ་གཏད་རོགས་སྐྱོར་བཅས་བར། ཀྲུང་དབྱང་གི་ཐུགས་ཁུར་དང་རྒྱལ་ཡོངས་ཀྱི་རོགས་སྐྱོར་འོག་བོད་ཀྱིས་སློབ་ཞུགས་གོང་ནས་མཐོ་རིམ་སློབ་གསོ་ཁྱོན་ཡོངས་ལ་ཁྱབ་པའི“ཀྲུང་གོའི་ཁྱད་ཆོས་དང་བོད་ཀྱི་དམིགས་བསལ་ཁྱད་ཆོས་ལྡན་པའི”དེང་རབས་སློབ་གསོའི་མ་ལག་བསྐྲུན་ནས་སྦྱོང་དུས་སློབ་མཁན་ཡོད་པ་དང་མི་ཚང་མས་མཚར་སྡུག་ལྡན་པའི་མི་སེམས་འགུལ་བའི་ལེའུ་བརྩམས་ཡོད།

ས་གནས་དེ་གའི་སློབ་གཉེར་ཆ་རྐྱེན་རྒྱུན་མཐུད་ལེགས་སུ་ཕྱིན་པ་དང་སྔོན་ཐོན་སློབ་གསོའི་འདུ་ཤེས་ཟབ་ཏུ་ཕྱིན་ནས་དམིགས་སར་འཁྱོལ་བ།

“ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་འཚོགས་ཚུན། རིམ་རྩིས་བྱས་ན་མ་དངུལ་སྒོར་དུང་ཕྱུར་35བཏང་ནས་སློབ་གསོའི་བོད་སྐྱོར་རྣམ་གྲངས་461ལག་བསྟར་བྱས་པ་དང་། སློབ་གྲྭ་འབྲིང་ཆུང་དང་བུ་བཅོལ་ཁང་78གསར་སྐྲུན་དང་བསྒྱུར་བཀོད་རྒྱས་སྐྲུན་བྱས་ཡོད”བོད་ལྗོངས་སློབ་གསོ་ཐིང་སློབ་གསོ་རོགས་སྐྱོར་དང་ལེན་ལས་དོན་འགོ་ཁྲིད་ཚོགས་ཆུང་གཞུང་ལས་ཁང་གི་འགན་འཁུར་བས“ལོ་ལྔ་ཚན་བཅུ་གསུམ་པའི”རིང་བོད་ཀྱིས་སློབ་གྲྭའི་གཞི་རྩའི་འཛུགས་སྐྲུན་རྣམ་གྲངས་2868ལག་ལེན་བསྟར་བ་དང་སློབ་གྲྭའི་ཉལ་ཁང་གི་རྒྱ་ཁྱོན་སྨི་ངོས་གྲུ་ཁྲི་300ལྷག་ཙམ་ཆེ་རུ་ཕྱིན་ཡོད། བུ་བཅོལ་ཁང་1295གསར་དུ་བསྐྲུན་པ་དང་ཤང་དང་གྲོང་རྡལ་རེར་ཉུང་མཐར་ཡང་གཞུང་བཙུགས་ལྟེ་བའི་བུ་བཅོལ་ཁང་1བསྐྲུན་ཡོད། ཞིང་འབྲོག་ཁུལ་གྱི་སློབ་གྲྭའི་བདེ་འཇགས་འཐུང་ཆུའི་ལས་གྲྭ་དང་ས་བབ་མཐོ་ཞིང་གྲང་ངར་ཆེ་བའི་ས་ཁུལ་གྱི་སློབ་གྲྭར་དྲོད་རླངས་མཁོ་འདོན་ལས་གྲྭ་སྤེལ་ནས་ཞིང་འབྲོག་ཁུལ་གྱི་ཆ་རྐྱེན་ཞན་པའི་སློབ་གྲྭ་700ལྷག་ཙམ་ལ་སྒྱུར་བཀོད་བྱས་ཡོད། ཤིན་ཏུ་དབུལ་བའི་ས་ཁུལ་དང་། ཡུལ་གཞན་དུ་གནས་སྤོས་དབུལ་སྐྱོར། ས་བབ་མཐོ་བའི་སྐྱེ་ཁམས་གནས་སྤོ་བཀོད་སྒྲིག་བྱ་ཡུལ་བཅས་ཀྱི་སློབ་གྲྭའི་ལེ་ལག་འཐུས་སྒོ་ཚང་དུ་བཏང་བར་མ་དངུལ་སྒོར་དུང་ཕྱུར་78.3བཏང་བ་དང་རྣམ་གྲངས་2167འཛུགས་སྐྲུན་བྱས་ཡོད་ཅེས་ངོ་སྤྲོད་བྱས།

བོད་ཀྱི་སློབ་གསོའི་བྱ་གཞག་ལ་གནམ་ས་བླ་འོག་ཏུ་འགྱུར་བ་ལྟ་བུའི་འགྱུར་ལྡོག་བྱུང་བ་དེ་རྨང་གཞིའི་སྒྲིག་བཀོད་ལ་མཆོང་སྐྱོད་ལྟ་བུའི་འཕེལ་རྒྱས་བྱུང་བ་ལས་མངོན་པ་མ་ཟད། ད་དུང་མི་རིགས་ཁག་གི་མང་ཚོགས་ཀྱི་སློབ་གསོ་དང་ལེན་བྱེད་པའི་དབང་ཆ་འགན་ལེན་གང་ལེགས་ཐུབ་པ་དང་། གྲོང་ཁྱེར་དང་གྲོང་གསེབ་དང་ས་ཁོངས་མི་འདྲ་བར་འདྲ་མཉམ་གྱི་སློབ་གསོ་ལོངས་སྤྱོད་ཐུབ་ཡོད་པ། སྤྱི་ཡོངས་ཀྱི་སློབ་གསོའི་འདུ་ཤེས་ཟམ་མི་ཆད་པར་ཟབ་ཏུ་ཕྱིན་པ་བཅས་ནས་ཀྱང་མངོན་ཡོད།

སློབ་གསོ་སྔོན་ལ་འཕེལ་རྒྱས་གཏོང་བའི་སྲིད་ཇུས་ཀྱི་བྱེད་ཐབས་ཁག་དོན་འཁྱོལ་བྱས་ནས་ལྗོངས་ཡོངས་ཀྱི་མི་རིགས་ཁག་གི་མང་ཚོགས་ལ་སྦྱོང་དུས་སློབ་མཁན་ཡོད་པ་དང་། ཏང་གི་ཚོགས་ཆེན་བཅོ་བརྒྱད་པ་འཚོཌ་ཚུན་སློབ་གསོའི་བོད་སྐྱོར་ལས་དོན་གྱིས་བོད་ཀྱི་སློབ་གསོའི་ཆུ་ཚད་དང་མང་ཚོཌ་ཀྱི་ཐོབ་ཚོར་ཟབ་ཏུ་ནུས་ལྡན་བཏང་ཡོད།

སློབ་གསོའི་ཤེས་ལྡན་མི་སྣའི་ཚོགས་སྒྲིག་རྣམ་པའི་བོད་སྐྱོར་དང་དགེ་རྒན་ཁྲི་ཡི་སློབ་སྐྱོར་འཆར་གཞི་སོགས་ལས“རང་རྟེན”ནུས་པ་ཆེ་རུ་ཕྱིན་པ།

ཏང་གི་ཚོགས་ཆེན་བཅོ་བརྒྱད་པ་འཚོགས་ཚུན། ཀྲུང་དབྱང་དང་ས་གནས་ཁག་གིས་དམིགས་སའི་རང་བཞིན་ལྡན་པའི་སྒོ་ནས་སློབ་གསོའི་བོད་སྐྱོར་ལ་སྐུལ་འདེད་བཏང་སྟེ། སློབ་མཚམས་རྐྱང་པ་ནས་སློབ་མཚམས་ཧྲིལ་པོ་དང་། མི་སྒེར་གྱི་རོགས་སྐྱོར་ནས་ཚོགས་སྒྲིག་རོགས་སྐྱོར། སློབ་ཁྲིད་ཚབ་སྒྲུབ་ནས་དཔེ་སྟོན་སྣེ་ཁྲིད་བཅས་ཀྱི་བར་འགྱུར་ལྡོག་བྱུང་ཡོད། “སློབ་གསོ་པུས་སློབ་གསོའི་བོད་སྐྱོར་ལས་དོན་ལ་ཞིབ་འཇུག་དང་འཆར་འགོད་གཏིང་ཟབ་བྱས་ཏེ་བོད་དུ་བརྟག་ཞིབ་ཐེངས་མང་བྱས་པ་དང་། འབྲེལ་ཡོད་ཕྱོགས་དང་མཉམ་དུ་སློབ་གསོའི་ཤེས་ལྡན་མི་སྣའི་ཚོགས་སྒྲིག་རྣམ་པའི་བོད་སྐྱོར་དང་དགེ་རྒན་ཁྲི་ཡི་སློབ་སྐྱོར་འཆར་གཞི་ལག་ལེན་བསྟར་བ། མཐོ་སློབ་དང་འབྲིང་རིམ་ལས་རིགས་སློབ་གྲྭའི་རོགས་སྐྱོར་སོགས་ཀྱི་རྣམ་གྲངས་ལག་ལེན་བསྟར་བ། 2016ལོ་ནས་2020ལོའི་ལོ་སྟོད་བར་དུ། ལས་བྱེད་པ་དང་དགེ་རྒན་2493བོད་དུ་ལས་ཀ་བྱེད་པར་ཡོང་ཡོད”ཅེས་སློབ་གསོ་པུའི་མི་རིགས་སློབ་གསོ་སིའི་འབྲེལ་ཡོད་འགན་འཁུར་བས་ངོ་སྤྲོད་བྱས།

2018ལོར་དགེ་རྒན་ཁྲི་ཡི་སློབ་སྐྱོར་འཆར་གཞི་ལག་ལེན་བསྟར་འགོ་ཚུགས་ནས་ཕུལ་བྱུང་དགེ་རྒན་ཁག་བགོས་ཀྱིས་བོད་དུ་སློབ་སྐྱོར་བྱེད་པར་མངགས་པ་དང་ཁག་ཐེངས་རེར་ལོ་གཅིག་དང་ལོ་ཕྱེད་རེད།

བོད་ལྗོངས་མི་རིགས་སློབ་ཆེན་གྱིས་བློས་འགེལ་ཆོག་པ་དང་། སྤྱོད་གོ་ཆོད་པ། གཞི་རིམ་དུ་སྐྱོད་ཐུབ་པ། གཞིས་ཆགས་ཐུབ་པ་བཅས་ཀྱི་བྱང་ཚད་མཐོ་བའི་ཤེས་ལྡན་མི་སྣའི་དཔུང་ཁག་ཅིག་དེ་བས་ལེགས་པའི་སྒོ་ནས་གཏོད་ཆེད། ཀྲུང་གོ་མི་དམངས་སློབ་ཆེན་གྱིས་གྲངས་ཉུང་མི་རིགས་ཀྱི་དམིགས་བསལ་གསོ་སྦྱོང་གི་མཁས་པ་སློབ་སྐོར་བ་དང་ནུབ་རྒྱུད་འོད་སྣང་གི་མཁས་པ་སློབ་སྐོར་བ་སོགས་ཀྱི་གསོ་སྦྱོང་འཆར་གཞིར་བརྟེན་ནས་དགེ་རྒན་འཚར་ལོངས་ཀྱི་ལས་སྟེགས་མཁོ་འདོན་བྱས་ཡོད།

སློབ་གསོའི་བོད་སྐྱོར་ནི་བྱས་རྗེས་དེང་ལ་འཇོག་པ་དང་ཕན་འབྲས་བསྐལ་བརྒྱར་ཐོན་པའི་བྱ་བ་ཞིག་རེད། བོད་ཀྱི་མཐོ་རིམ་སློབ་གསོའི་འགོ་འཛུགས་ཕྱི་བ་དང་། གྲངས་འབོར་ཉུང་བ། གཞི་ཁྱོན་ཆུང་བ་སོགས་ཀྱི་གནད་དོན་ལ་དམིགས་ནས། རྒྱལ་ཡོངས་ཀྱི་མཐོ་སློབ་30ལྷག་ཙམ་གྱིས་རང་སོ་སོའི་ལེགས་ཆའི་ཐོན་ཁུངས་ལ་བརྟེན་ནས་ཁ་གཏད་རོགས་སྐྱོར་བྱེད་ཤུགས་ཆེ་རུ་བཏང་ཡོད། བོད་ལྗོངས་སློབ་གསོ་ཐིང་མཐོ་རིམ་སློབ་གསོ་ཁྲུའི་འགན་འཁུར་བས་ངོ་སྤྲོད་བྱས་པར་གཞིགས་ན། ཉེ་བའི་ལོ་5ཡི་རིང་། ཁ་གཏད་རོགས་སྐྱོར་མཐོ་སློབ་ཀྱིས་གནས་གཏན་འཁེལ་གྱི་སྒོ་ནས་བོད་ཀྱི་མཐོ་སློབ་ཀྱི་རྐང་འཛིན་དགེ་རྒན་རབ་འབྱམས་པ་69དང་འབུམ་རམས་པ་57བསྡུས་པ་དང་། དགེ་རྒན་གྱི་ཟབ་སྦྱོང་དང་མཁས་པ་སློབ་སྐོར་བ་སོགས་མི་546བསྡུས་ཡོད་པ་རེད།

ཆེད་ལས་ཀྱི་རྩལ་ནུས་ལྡན་པའི་གོ་ཆོད་ཤེས་ལྡན་མི་སྣ་དེ་བས་མང་བ་གསོ་སྐྱོང་བྱས་ནས་འཕེལ་རྒྱས་ཀྱི་ནང་གནས་སྒུལ་ཤུགས་འཕེལ་བར་བྱས་པ།

དུས་རབས་གསར་པར་སླེབས་པས། ཏང་ཀྲུང་དབྱང་གིས་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་ཧུར་ཐག་བསྐྲུན་དགོས་པའི་བླང་བྱ་ཁ་གསལ་བཏོན་ཡོད། ཏང་ཀྲུང་དབྱང་གི་མཛུབ་སྟོན་ལས་སློབ་གསོའི་བོད་སྐྱོར་ལས་དོན་ལ་ཁ་ཕྱོགས་གསལ་པོ་བསྟན་ཡོད།

བོད་སྐྱོར་བྱེད་པ་ནི“གཞན་རྟེན”ནས“རང་རྟེན”དུ་བསྒྱུར་ནས་ས་གནས་དེ་གའི་རང་ངོས་འཕེལ་རྒྱས་གཏོང་ནུས་གང་མགྱོགས་ཆེ་རུ་གཏོང་ཆེད་རེད།

དཔལ་འབྱོར་དང་སྤྱི་ཚོགས་འཕེལ་རྒྱས་འགྲོ་བ་དང་ཆབས་ཅིག་བོད་ལ་ཆེད་ལས་ཀྱི་རྩལ་ནུས་ལྡན་པའི་གོ་ཆོད་ཤེས་ལྡན་མི་སྣ་དེ་བས་མང་བ་དགོས་ཀྱི་ཡོད། དེར་བརྟེན། ལས་རིགས་སློབ་གསོ་ཡག་པོ་གཉེར་རྒྱུ་ནི་སློབ་གསོའི་བོད་སྐྱོར་ལས་དོན་གྱི་ཤུགས་རྒྱག་ས་གསར་པ་ཞིག་ཏུ་གྱུར་ཡོད། 2014ལོ་ནས་བཟུང་། ལས་རིགས་སློབ་གསོའི་ཚོགས་པ་7དང་དམངས་གཉེར་དངོས་གཞིའི་ཚན་ཁག་སློབ་གྲྭ་13གྱིས་བོད་དང་ཁ་གཏད་རོགས་སྐྱོར་གྱི་འབྲེལ་བ་བཙུགས་པར་ཕན་འབྲས་མངོན་གསལ་དོད་པོ་ཐོན་ཡོད་པ་རེད།

“ལས་རིགས་སློབ་གསོའི་ཤར་ནུབ་མཉམ་ལས་བྱ་སྤྱོད་ཀྱི་འཆར་གཞི་2016ལོར་ལག་བསྟར་བྱེད་འགོ་བཙུགས་ཤིང་། བོད་ཀྱིས་ཆ་སྒྲིག་ཞིང་ཆེན་17དང་མཉམ་ལས་གྲོས་མཐུན་བཞག་པ་དང་། 2020ལོ་ནས་ད་བར་མ་དངུལ་སྒོར་ཁྲི་448བཏང་བ་དང་སྒོར་ཁྲི་241རི་བའི་སྒྲིག་ཆས་ཞལ་འདེབས་བརྒྱབ་པ་རེད། དེ་དང་དུས་མཚུངས། དགེ་རྒན་སྤེལ་རེས་དང་སློབ་མ་མཉམ་འབྲེལ་གསོ་སྐྱོང་སོགས་ཀྱི་ལས་དོན་ཡང་སྤེལ་ཡོད”ཅེས་བོད་ལྗོངས་སློབ་གསོ་ཐིང་གི་འབྲེལ་ཡོད་འགན་འཁུར་བས་ངོ་སྤྲོད་བྱས།

རྒྱལ་གཅེས་རིང་ལུགས་ཀྱི་སྙིང་སྟོབས་རིམ་པ་ཁག་དང་རིགས་ཁག་གི་སློབ་གྲྭའི་སློབ་གསོའི་བརྒྱུད་རིམ་ཧྲིལ་པོར་ཁྱབ་པ།

སློབ་གསོའི་བོད་སྐྱོར་བརྒྱུད་རིམ་ནང་རྒྱལ་གཅེས་རིང་ལུགས་ཀྱི་སྙིང་སྟོབས་དེ་རིམ་ཁག་དང་རིགས་ཁག་གི་སློབ་གྲྭའི་སློབ་གསོའི་བརྒྱུད་རིམ་ཧྲིལ་པོར་ཁྱབ་པ་དང་རྒྱལ་གཅེས་ཀྱི་ས་བོན་ཡང་གཞོན་ནུ་ལོ་ཆུང་ཚང་མའི་སེམས་སུ་བཏབ་ཡོད།

སློབ་གསོ་པུའི་སྐད་ཡིག་ཉེར་སྤྱོད་ཞིབ་འཇུག་སུའོ་ཡིས་ཉིང་ཁྲིར་སྐད་ཡིག་ཚད་ལྡན་གྱི་གསོ་སྦྱོང་འཛིན་གྲྭ་གཉེར་ནས་བོད་ཀྱི་ཆུས་དང་རྫོང་74ལ་སྐད་ཡིག་ལས་བྱེད་པ་དང་། སྐད་ཡིག་རྐང་འཛིན་དགེ་རྒན། སྐད་ཡིག་སློབ་དཔྱོད་པ་སོགས་མི་200གསོ་སྦྱོང་བྱས་ནས་རྒྱལ་ཁབ་ཀྱི་སྤྱི་སྤྱོད་སྐད་ཡིག་ཁྱབ་གདལ་གཏོང་བར་སྐུལ་འདེད་བཏང་བ་དང་། པེ་ཅིང་གིས་ཁ་གཏད་རོགས་སྐྱོར་ལས་དོན་དེ་མི་རིགས་མཐུན་སྒྲིལ་གྱི་འདུ་འགོད་ཅིག་ཏུ་བཏོད་ནས《བོད་ཀྱི་འཇའ་ཚོན》དང《ཁྱིམ་ནི་ཡུལ་སྨད་དང་རྒྱལ་ཁབ་ནི་ཀྲུང་གོ་ཡིན》སོགས་ཕུལ་བྱུང་བརྩམས་ཆོས་གསར་རྩོམ་བྱས་ནས་སློབ་གྲྭར་འཁྲབ་སྟེ་མི་རིགས་དབར་གྱི་འགྲོ་འོང་དང་། སྤེལ་རེས། མཉམ་འདྲེས་བཅས་ལ་ཤུགས་སྣོན་བརྒྱབ་ནས་མི་རིགས་མཐུན་སྒྲིལ་གྱི་བསམ་བློའི་རྨང་གཞི་བརྟན་དུ་བཏང་བ། ཀྲུང་གོ་སྲིད་ཁྲིམས་སློབ་ཆེན་གྱིས“བླ་སྲོག་གཏོད་པའི་འདུ་འགོད”སྤེལ་ནས་མི་རིགས་ཁག་གི་མང་ཚོགས་ཀྱིས་རླབས་ཆེན་མེས་རྒྱལ་དང་། ཀྲུང་ཧྭ་མི་རིགས། ཀྲུང་ཧྭ་རིག་གནས། ཀྲུང་གོ་གུང་ཁྲན་ཏང་། ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་བཅས་ལ་བཅངས་པའི་མོས་སེམས་ཟམ་མི་ཆད་པར་ཟབ་ཏུ་བཏང་ཡོད།

འདི་ལོ་ནི་བོད་ཞི་བས་བཅིངས་འགྲོལ་བཏང་ནས་ལོ་ངོ་70འཁོར་བའི་ལོ་ཞིག་ཡིན་ལ། “ལོ་ལྔ་ཚན་བཅུ་བཞི་པའི”འགོ་ཚུགས་ཀྱི་ལོ་ཞིག་ཀྱང་ཡིན། ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ལྡན་པའི་སྤྱི་ཚོགས་རིང་ལུགས་ཀྱི་དགོངས་པའི་མཛུབ་ཁྲིད་འོག་མེས་རྒྱལ་ས་གནས་ཁག་ནས་ཡོང་བའི་སློབ་གསོའི་བོད་སྐྱོར་ལས་དོན་པས་མཐུན་སྒྲིལ་རྡོག་རྩ་གཅིག་སྒྲིལ་དང་བློ་རྩ་བརྟན་པོས་ཡར་རྒྱས་བརྩོན་ལེན་བྱས་ཏེ། བོད་ཀྱི་སློབ་གཉེར་ཆ་རྐྱེན་ལེགས་སུ་གཏོང་བ་དང་སློབ་གསོ་སློབ་ཁྲིད་ཀྱི་སྤུས་ཚད་མཐོ་རུ་གཏོང་བར་རོགས་རམ་བྱ་ཆེད་མུ་མཐུད་འབད་བརྩོན་ལྷོད་མེད་བྱེད་བཞིན་ཡོད།