ཀྲུང་གོ་རྡོ་སྣུམ་བོད་ལྗོངས་གཞིས་རྩེ་ཕྱིར་ཚོང་ཡན་ལག་ཀུང་སི་གཞིས་རྩེ་གྲོང་ཁུལ་སྣུམ་སྣོན་ས་ཚིགས་ཀྱི་ཏང་ཡོན་ཚོས་སྡེ་ཁུལ་གྱི་མང་ཚོགས་ལ་འཚམས་འདྲིའི་དངོས་པོ་སྤྲོད་བཞིན་པ།

ལོ་མང་རིང་། ཀྲུང་གོ་རྡོ་སྣུམ་བོད་ལྗོངས་གཞིས་རྩེ་ཕྱིར་ཚོང་ཡན་ལག་ཀུང་སིས་ཐོག་མཐའ་བར་གསུམ་དུ་མི་རིགས་མཐུན་སྒྲིལ་ཡར་ཐོན་དེ་སྤྱི་ཚོགས་བརྟན་ལྷིང་སྲུང་སྐྱོང་དང་དཔལ་འབྱོར་འཕེལ་རྒྱས་ལ་སྐུལ་འདེད་གཏོང་བའི་ལས་དོན་གལ་ཆེན་ལ་བརྩིས་ཏེ་དམ་འཛིན་བྱ་རྒྱུ་ཐོག་མཐའ་བར་གསུམ་དུ་མཐའ་འཁྱོངས་བྱས་ནས་རང་ངོས་འཛུགས་སྐྱོང་ལ་ཤུགས་སྣོན་དང་། ལས་བྱེད་ལས་བཟོའི་བྱང་ཚད་མཐོ་རུ་གཏོང་བ། ལས་ཀའི་སྤྱོད་ཚུལ་ལེགས་སུ་གཏོང་བ། བློ་གཅིག་སེམས་གཅིག་གིས་མང་ཚོགས་ལ་ཞབས་འདེགས་ཞུ་བ་བཅས་བྱས་པ་དང་ཆབས་ཅིག དུས་ཐོག་ཏུ་མང་ཚོགས་ཀྱི“དཀའ་ཉེན་དང་སེམས་ཁྲལ། རེ་སྒུག”བཅས་ཐག་གཅོད་བྱས་པར་བརྟེན་ཀུང་སིའི་མི་རིགས་མཐུན་སྒྲིལ་ཡར་ཐོན་བྱ་གཞག་དབྱར་མཚོ་རྒྱས་པ་ལྟར་འཕེལ་རྒྱས་དང་ཀུང་སིའི་ལས་སྒོ་བརྟན་པོའི་ངང་འཕེལ་རྒྱས་ཕྱིན་ཡོད། 2020ལོར་ཀུང་སིའི་སྣུམ་གྲུབ་མ་ཕྱིར་ཚོང་བྱེད་ཚད་ཏུན་ཁྲི་22ཟིན་པ་དང་སྣུམ་ཕུད་པའི་ཡོང་འབབ་གཞན་དག་སྒོར་ཁྲི་2300ལས་བརྒལ་ཡོད། ཀུང་སིར་སྔ་རྗེས་སུ་རྒྱལ་ཡོངས“ཁམས་བདེ་བུམ་པའི”སྔོན་ཐོན་ཚོགས་ཆུང་དང་རང་སྐྱོང་ལྗོངས་ཀྱི“བདེ་འཇགས་ཐོན་སྐྱེད་ཀྱི་བྱེད་པོའི་འགན་འཁྲི་དོན་འཁྱོལ་བྱེད་མཁན”སོགས་ཀྱི་གཟི་བརྗིད་མཚན་སྙན་ཐོབ་ཡོད།

མི་རིགས་མཐུན་སྒྲིལ་གྱི་བྱ་གཞག་འཕེལ་རྒྱས་འགྲོ་བར་སྐུལ་འདེད་བཏང་བ།

དུས་ཡུན་རིང་པོའི་ནང་ཀུང་སིའི་ཏང་ཨུད་ཀྱིས་གྲངས་ཉུང་མི་རིགས་ལས་བྱེད་པ་འདེམས་བསྐོ་དང་། གསོ་སྐྱོང་། བེད་སྤྱོད་བཅས་བྱ་རྒྱུ་དེ་མི་རིགས་མཐུན་སྒྲིལ་ལས་དོན་གྱི་ནང་དོན་གལ་ཆེན་ཞིག་ལ་བརྩིས་ནས་གཅིག་སྡུད་གསོ་སྦྱོང་དང་། ནང་སར་གནས་སྦྱར་སྦྱོང་བརྡར། རྩལ་ནུས་འགྲན་བསྡུར། ལས་ཐོག་སྦྱོང་བརྡར་སོགས་བྱེད་ཐབས་སྣ་མང་ལ་བརྟེན་ནས་གྲངས་ཉུང་མི་རིགས་ལས་བྱེད་ལས་བཟོའི་ཕྱོགས་བསྡུས་བྱང་ཚད་དང་གསར་གཏོད་ནུས་པ་ཟམ་མི་ཆད་པར་ཆེ་རུ་བཏང་བར་བརྟེན། གྲངས་ཉུང་མི་རིགས་ཀྱི་ལས་བྱེད་པ་ཁག་གཅིག་མགྱོགས་མྱུར་འཚར་ལོངས་བྱུང་བ་དང་འབྲེལ་འགོ་ཁྲིད་ལས་གནས་སུ་བསྐྱོད་ཡོད།

ཀུང་སིས་གྲངས་ཉུང་མི་རིགས་ལས་བཟོ་འཚར་ལོངས་ཡོང་བར་ཐུགས་ཁུར་ཆེན་པོ་བྱས་ཏེ། ལས་གནས་ཐོག་ལས་བཟོའི་འཇོན་ཐང་ཆེ་རུ་བཏང་བ་དང་འཚོ་བའི་ཐད་ཁོང་ཚོའི་ཕུཌ་ཀྱི་སེམས་ཁྲལ་བསལ་བར་བརྟེན་གྲངས་ཉུང་མི་རིགས་ལས་བཟོ་རང་ཚུགས་རང་སྟོབས་དང་། མི་རིགས་ཁག་གི་ལས་བཟོ་ཕན་ཚུན་རོགས་རམ། ལས་བཟོའི་ཧུར་བརྩོན་རང་བཞིན་དང་གསར་གཏོད་རང་བཞིན་སྐོང་འཐེན་གང་ལེགས་བཅས་བྱུང་བ་དང་ཆབས་ཅིག ལོ་ལྟར་སྔོན་ཐོན་ལས་དོན་པའི་ནང་གྲངས་ཉུང་མི་རིགས་ཀྱི་ལས་བཟོ་ཡོད་པ་རེད། དེ་དང་ཆབས་ཅིག་ཀུང་སིས་ལོ་ལྟར་ལྟ་འདོད་ལ་ཉན་སྤྲོ་བའི་རོལ་རྩེད་བྱེད་སྒོ་སྤེལ་ནས་ལས་བཟོའི་ཁེ་ལས་ཀྱི་རིག་གནས་འཚོ་བ་འཁྲུག་ཏུ་གཏོང་བ་དང་བོད་རྒྱ་ལས་རོགས་དབར་གྱི་བརྩེ་སེམས་ཟབ་ཏུ་བཏང་སྟེ་མཐུན་སྒྲིལ་མཛའ་གྲོགས་ཀྱི་ཁེ་ལས་ཀྱི་རྣམ་པ་ཟབ་མོ་ཞིག་བཏོད་ཡོད།

མི་རིགས་མཐུན་སྒྲིལ་གྱི་སློབ་གསོ་སྤེལ་ཤུགས་ཆེ་རུ་བཏང་བ།

ཀུང་སིའི་ཏང་ཨུད་ཀྱིས་མི་རིགས་སྲིད་ཇུས་དང་ཁྲིམས་སྲོལ་དེ་ཏང་ཡོན་གྱི་སློབ་སྦྱོང་འཆར་གཞི་དང་ལས་བཟོ་ཡོངས་ཀྱི་ཆབ་སྲིད་རིགས་པའི་གཞུང་ལུགས་སློབ་སྦྱོང་གི་འཆར་གཞིའི་ནང་བཅུག་སྟེ། མི་རིགས་སྲིད་ཇུས་སློབ་སྦྱོང་ཧུར་ཐག་བྱེད་པ་དང་འབྲེལ《བོད་རང་སྐྱོང་ལྗོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་དཔེ་བཟང་ཁུལ་གཏོད་འཛུགས་བྱེད་རྒྱུའི་སྲོལ་ཡིག》ཆེད་དོན་སློབ་སྦྱོང་བྱས་པ་མ་ཟད། ལས་བཟོ་ཡོངས་སྒྲིག་འཛུགས་བྱས་ནས་ཡིག་རྒྱུགས་བཏང་ཞིང་། དེ་མིན་ད་དུང“མཐུན་སྒྲིལ་ལ་སྣང་ཆེན་གྱིས་མེས་རྒྱལ་ལ་དགའ་ཞེན་བྱེད་པའི”སྒྲོག་འགྲེལ་བྱེད་སྒོ་སྤེལ་བ་རེད།

ཀུང་སིས་རྒྱུན་རྣམ་ཅན་གྱི་སློབ་གསོ་དང་གཅིག་སྡུད་སློབ་གསོ་ཟུང་འབྲེལ་བྱ་རྒྱུ་མཐའ་འཁྱོངས་བྱས་ཏེ་བྱེད་སྒོ་གཞི་རྟེན་དུ་བྱས་ནས་ལོ་ལྟར་ནང་དོན་གསར་པ་དང་། ལོ་ལྟར་བྱེད་ཐབས་གསར་པ། ལོ་ལྟར་ཕན་འབྲས་གསར་པ་བཅས་ཡོད་པ་བྱས་ཡོད། སྲོལ་རྒྱུན་གྱི་དུས་ཆེན་དཔེར་ན། དཔྱིད་གསར་དུས་ཆེན་དང་། བོད་ཀྱི་ལོ་གསར། ཟླ་མཆོད་དུས་ཆེན་སོགས་སུ“ང་ཚོའི་དུས་ཆེན”ཞེས་པའི་བྱེད་སྒོ་སྤེལ་ཏེ་དུས་ཆེན་ལ་འཚམས་འདྲི་དང་། བཞུགས་མོལ་སོགས་ལ་བརྟེན་ནས་མི་རིགས་ཁག་གི་ལས་བྱེད་ལས་བཟོ་ཚོས་ཕན་ཚུན་དབར་གྱི་འཚོ་བའི་གོམས་གཤིས་ཤེས་རྟོགས་དང་རིག་གནས་ཀྱི་མོས་སེམས་ལ་ཤུགས་སྣོན་བརྒྱབ་སྟེ། མི་རིགས་ཁག་གི་མང་ཚོགས་ཕན་ཚུན་མཐུན་སྒྲིལ་ཐུབ་པར་སྐུལ་འདེད་བཏང་ཡོད།

མི་རིགས་མཐུན་སྒྲིལ་གྱི་རྣམ་པ་ཟབ་མོ་མུ་མཐུད་གཏོད་པ།

ཀྲུང་གོ་རྡོ་སྣུམ་བོད་ལྗོངས་ཕྱིར་ཚོང་ཀུང་སིའི་འགྱུར་མེད་སྟོབས་ལྡན་གྱི་འགོ་ཁྲིད་དང་ཡང་དག་པའི་བཀོད་སྒྲིག་འོག ཀུང་སིས་ལས་བཟོའི་ལྟོ་ཆས་ཀྱི་གནད་དོན་ཐག་གཅོད་དང་ངལ་ནུས་འགན་གཙང་ཀུང་སི་དང་མཐུན་སྦྱོར་བྱས་ཏེ། ཡུལ་སྐོར་ལམ་ཐིག་གི་སྣུམ་སྣོན་ས་ཚིགས་སུ་མ་བྱན་དང་གཙང་སྦྲ་བྱེད་མཁན་བཀོད་སྒྲིག་བྱས་ནས་ལས་བཟོའི་ཐོན་སྐྱེད་དང་འཚོ་བའི་ཆ་རྐྱེན་སྔར་བས་ལེགས་སུ་བཏང་ཡོད། གྲོ་མོ་དང་སྐྱིད་གྲོང་སོགས་ས་ཚིགས་སུ་ཐབ་ཆས་བསྐྱལ་བ་དང་གཉའ་ནང་ས་ཚིགས་ཀྱི་འཐུང་ཆུའི་གནད་དོན་ཐག་གཅོད་བྱས་པར་བརྟེན་ལས་བཟོའི་ཐོབ་སྣང་དང་སྐྱིད་སྣང་སྔར་བས་ཆེ་རུ་ཕྱིན་ཡོད། 2020ལོའི་དཔྱིད་གསར་དུས་ཆེན་དང་བོད་ཀྱི་ལོ་གསར་རིང་གྲོང་སྡོད་མང་ཚོགས་ལ་སྣུམ་དང་། ཇ་བག་ཆུང་། འབྲས་སོགས་སྒོར་ཁྲི་3.7རི་བའི་འཚམས་འདྲིའི་དངོས་པོ་བསྐྱལ་ནས་ཀྲུང་དབྱང་ཁེ་ལས་ཀྱི་འགན་འཁྲི་སྔར་བས་མངོན་པར་བྱས་ཡོད། ཀུང་སིའི་ཁོའོ་རིམ་པ་གཞོན་པ་ཡན་གྱི་ལས་བྱེད་པ་21གིས་གྲོང་ཚོ་བཞི་ཡི་དུད་ཚང་77གྱི་མང་ཚོགས་234དང་ཆ་འགྲིག་རོགས་སྐྱོར་གྱི་འབྲེལ་བ་བཙུགས་པ་དང་འཚམས་འདྲི་ཐེངས་གཉིས་བྱས་པར་སྒོར་ཁྲི་2.7རི་བའི་འཚམས་འདྲིའི་དངོས་པོ་སྤྲད་པ་རེད།

དེ་དང་ཆབས་ཅིག་ལས་མི་སྒྲིག་འཛུགས་བྱས་ཏེ་བསམ་གྲུབ་རྩེ་ཆུས་ཉི་རི་གཞུང་ཤང་དུ་གྲོང་སྡོད་ལས་དོན་སྤེལ་ཞིང་། རིམ་རྩིས་བྱས་ན་སྒོར་ཁྲི་300ལྷག་ཙམ་བཏང་ནས་འབྲུབ་འགོག་ཆུ་ཡུར་དང་། གཞུང་ལམ། ཁྲོན་པ་སོགས་ཉམས་བཟོ་བྱས་ཏེ་ས་གནས་ཀྱི་རྨང་གཞིའི་སྒྲིག་བཀོད་ལེགས་སུ་བཏང་བ་རེད། མ་དངུལ་སྒོར་ཁྲི་20ལྷག་ཙམ་བཏང་ནས་ས་གནས་དེ་གའི་ཞིང་འབྲོག་མང་ཚོགས་ལ་འབྲུ་དང་། འབྲས། བཟའ་སྣུམ་སོགས་འཚོ་བའི་མཁོ་ཆས་ཉོས་ནས་ཞིང་འབྲོག་མང་ཚོགས་ཀྱི་འཚོ་བའི་ཆ་རྐྱེན་ལེགས་སུ་བཏང་བ་རེད། མ་དངུལ་སྒོར་ཁྲི་10ལྷག་ཙམ་བཏང་ནས་ཤིང་སོན་ཉོས་ཏེ་ས་གནས་དེ་གའི་རང་བྱུང་ཁོར་ཡུག་ལེགས་སུ་བཏང་བར་བརྟེན་གྲོང་སྡོད་ལས་དོན་ལ་ས་གནས་དེ་གའི་སྲིད་གཞུང་གི་བསྔགས་བརྗོད་ཐོབ་ཡོད།