འདི་ནི་ལྷ་ས་གྲོང་ཁྱེར་གྱི་དབུས་སུ་གནས་པའི་གསང་སྤྱོད་ཇ་ཁང་ནང་སྐུ་མགྲོན་ཞིག་གིས་བུལ་ཐུག་འཐུང་བཞིན་པ།

ཇ་ནི་བོད་རིགས་ཀྱི་འཚོ་བའི་ནང་མེད་དུ་མི་རུང་བ་ཞིག་ཡིན་པ་དང་། བོད་རིགས་ཀྱི་ཁྱིམ་ཚང་ནང་ཉིན་ལྟར་ཇ་བསྲུབས་མ་ཕོར་པ་གང་ཡིན་གཅིག་འཐུང་དགོས་ཀྱི་ཡོད།

ལྷ་ས་གྲོང་ཁྱེར་གྱི་དབུས་སུ་གནས་པའི་གསང་སྤྱོད་ཇ་ཁང་ནང་ཉིན་ལྟར་ཡོང་མཁན་སྐུ་མགྲོན་གྱི་རྒྱུན་ཆད་རྒྱུ་མེད། ཧ་ཡང་ཆེན་པོའི་ནང་ཤ་ཁུ་ལྷོག་ལྷོག་ཏུ་འཁོལ་བ་དང་། སྒྲོག་ཙེའི་འགྲམ་དུ་མི་རྣམས་དགའ་དགའ་སྤྲོ་སྤྲོའི་ངང་དུ་གཏམ་གླེང་བྱེད་པ། ཨ་མ་རྒན་མོས་ཇ་ཕོར་བཟུང་ནས་ཇ་ཧུབ་རེ་རེ་བཞིན་དལ་ལྷོད་ངང་འཐུང་བ་སོགས་གསོན་ཉམས་དོད་པའི་འཚོ་བའི་རྣམ་པ་ལས་ས་མཐོའི་མི་དམངས་ཀྱི་རྒྱུན་གཏན་འཚོ་བ་གསལ་ལམ་མེར་མངོན་འོང་།

ཀྲང་ཆོན་ལུའུ་ཡིས་བུལ་ཐུག་ཕོར་པ་གང་དང་ཇ་མངར་མོ་ཇ་དམ་གང་ཉོས་ནས་ཞོགས་ཟས་ལ་བདེ་བའི་ངང་རོལ། “བོད་ལུགས་ཞོགས་ཟས་ཀྱི་བྲོ་བ་ཞིམ་པོ་ཡོད་པ་མ་ཟད་ལུས་ཟུངས་ཀྱང་གསོ་ཐུབ”ཅེས་ཀྲང་ཆོན་ལུའུ་ཡིས་བཤད་པ་དང་། ཁོང་གིས་ལྷ་སར་ཚོང་བརྒྱབ་ནས་ལོ་10ལྷག་ཙམ་སོང་ཞིང་། ལོ་མང་རིང་སི་ཁྲོན་གྱི་ཁྲེང་ཏུའུ་ནས་ཡིན་པའི་མི་དེ་བོད་ཀྱི་འཚོ་བའི་ནང་ཡོངས་སུ་འདྲེས་ཐུབ་པ་བྱུང་ཡོད། ཁོང་གིས“ང་ཉིན་ལྟར་ཇ་མངར་མོ་འཐུང་བར་འགྲོ་གི་ཡོད། ཇ་འཐུང་ཞོར་གསོན་ཉམས་ལྡན་པའི་བོད་ཀྱི་དམངས་སྲོལ་མང་པོ་ཞིག་ཤེས་ཀྱི་འདུག”ཅེས་བཤད།

ཇ་ཁང་ནང་ཀྲང་ཆོན་ལུའུ་ཡིས་བོད་རིགས་གྲོགས་པོ་མང་པོ་ཞིག་བསྒྲིགས་ཡོད་པ་རེད། “ན་ནིང་གློ་བུར་དུ་ངའི་ཀླད་པའི་ཁྲག་རྩ་འགག་པས་བོད་རིགས་གྲོགས་པོ་སྐལ་བཟང་ཟླ་བས་དུས་ཐོག་ཏུ་སྨན་ཁང་ལ་བསྐྱལ་སྟབས་འཕྲལ་མར་སྨན་བཅོས་བྱེད་ཐུབ་སོང”ཞེས་ཀྲང་ཆོན་ལུའུ་ཡིས་མིག་ལ་མཆི་ཞག་འཁོར་ཞིང་སེམས་འགུལ་ཐེབས་པའི་ངང་བཤད་པ་དང་། ཁོང་གིས“ངེད་གཉིས་ཀྱི་མཛའ་མཐུན་དེ་ཇ་བསྲུབས་མ་བཟོ་བར་མར་དང་ཇ་ལོ་དགོས་པ་བཞིན་ཁ་འབྲལ་ཐབས་མེད་པ་ཞིག་ཡིན”ཞེས་བཤད།

ཇ་བསྲུབས་མ་ནི་སྤྱིར་བཏང་གི་བཏུང་བྱ་ཞིག་ཡིན་མོད། འོན་ཀྱང་དེའི་ལོ་རྒྱུས་རིང་བ་དང་དེའི་ནང་བརྩེ་བ་ཟབ་མོ་འདུས་པས། ཚ་སོབ་སོབ་ཀྱི་ཇ་བསྲུབས་མ་ལས་མི་རིགས་མཐུན་སྒྲིལ་གྱི་དྲི་བསུང་འཐུལ་འོང་།

བོད་ལ་1963ལོར་གཞི་ནས་ཇ་ཞིང་དང་པོ་དེ་བྱུང་བ་དང་། དེའི་གོང་ལ་འཚོ་བའི་ནང་སྤྱོད་པའི་ཇ་ལོ་ཚང་མ་ཡུན་ནན་དང་། སི་ཁྲོན། ཧྲའན་ཤིས་སོགས་ནས་ཇ་རྟའི་ཚོང་ལམ་བརྒྱུད་ཟམ་མི་ཆད་པར་ཁལ་མས་བོད་ལ་དབོར་འོང་གི་ཡོད། མངའ་རིས་ས་ཁུལ་སྒར་རྫོང་གུ་རུ་རྒྱ་སྨུག་ལ་གནའ་རྫས་རྟོག་ཞིབ་བྱེད་སྐབས་ལོ་1800གོང་གི་ནང་སའི་ཇ་ལོ་སོགས་ཀྱི་དངོས་རྫས་ཐོན་ཡོད་པ་རེད།

ལོ་ངོ་སྟོང་ཕྲག་འགའི་རིང་། ལྷོ་བྱང་གཉིས་ལ་འགྲོ་འོང་བྱེད་པའི་ཁལ་མ་དག་རི་མཐོ་དང་གྲོག་རོང་གཡང་གཟར་བརྒྱུད་དེ་ཀྱག་ཀྱོག་གི་ལམ་ཕྲན་དུ་མར་རྟ་དང་དྲེལ་གྱི་རྨིག་རྗེས་ཟབ་མོ་བཞག་ཡོད། འཛམ་གླིང་ཡང་རྩེའི་ཀྱག་ཀྱོག་གི་ཇ་རྟའི་ཚོང་ལམ་དང་། ཐང་བོད་གནའ་ལམ་སོགས་ཀྱི་གནའ་བོའི་ཚོང་འགྲུལ་ལམ་བུ་བརྒྱུད་དེ་བོད་ལ་ནང་སའི་ཇ་ལོ་དང་། བུ་རམ། ཉིན་རེའི་མཁོ་ཆས་སོགས་དབོར་འོང་བ་ལས་མི་རིགས་ཁག་གི་བཟའ་བཏུང་རིག་གནས་མཉམ་འདྲེས་ཀྱི་དཔང་པོ་བྱས་ཡོད།

“ཇ་བསྲུབས་མ་ནི་བོད་ཀྱི་བཟའ་བཏུང་ཁྲོད་ཀྱི་བཏུང་བྱ་གཙོ་བོ་ཞིག་ཡིན་པ་དང་། བོད་ཟས་དེ་ནང་སའི་གཡོས་སྦྱོར་ལུགས་དང་བོད་ཀྱི་ཟས་རིགས་གཡོས་སྦྱོར་ལོ་ངོ་སྟོང་ཕྲག་ནང་ཕན་ཚུན་མཉམ་འདྲེས་ལས་བྱུང་བའི་སྙིང་པོ་ཞིག་ཡིན”ཞེས་བོད་རང་སྐྱོང་ལྗོངས་གཡོས་སྦྱོར་བཟའ་བཏུང་དང་མགྲོན་ཁང་ལས་རིགས་མཐུན་ཚོགས་ཀྱི་ཚོགས་གཙོ་གཞོན་པ་ཧྲེན་པིང་གིས་བཤད།

བོད་ཟས་ཀྱི་མ་བྱན་ཆེ་མོ་ཞིག་ཡིན་པའི་ཧྲེན་པིང་བོད་ཟས་ལ་རྒྱུས་མངའ་ཟབ་མོ་ལྡན་པ་སྟེ། “གཡོས་སྦྱོར་ལུགས་མང་པོའི་ལོ་རྒྱུས་བརྒྱུད་རིམ་དང་འདྲ་བར་བོད་ཟས་དེའང་ཕྱོགས་མང་པོའི་ལེགས་ཆ་བླངས་ཏེ་རང་སོའི་ཁྱད་ཆོས་ལྡན་པ་ཞིག་ཆགས་ཡོད”པུར་རྒྱལ་བཙན་པོའི་སྐབས་དང་ལྷག་པར་དུ་འུན་ཤིང་ཀོང་ཇོ་བོད་ལ་ཕེབས་པའི་རྗེས་བོད་དང་ནང་སའི་དབར་དཔལ་འབྱོར་དང་རིག་གནས་སོགས་ཐད་སྤེལ་རེས་ཤུགས་ཆེན་བྱུང་བ་དང་བོད་རྒྱའི་བཟའ་བཏུང་རིག་གནས་རིམ་བཞིན་མཉམ་འདྲེས་ཇེ་ཟབ་ཏུ་ཕྱིན་ཡོད།

ལོ་ངོ་སྟོང་གི་མཆོང་སྐྱོད་བྱུང་ནས་ལྕེ་ཐོག་གི་ཞིམ་ཟས་དེ་ཕན་ཚུན་བར་ཐག་རིང་ཡང་མཉམ་སྤྱོད་ཐུབ་པ་ཞིག་ཏུ་གྱུར་ཞིང་། ད་ཆ་བོད་ཀྱི་ཤ་རྩིབ་མ་དང་། བོད་པའི་ཤ་མོག་མོག བེ་ཤ་དང་བྱ་ཤ་མཉམ་བརྔོས། འབྲིའི་ཞོ་སོགས་བོད་ཀྱི་ཁྱད་ཆོས་ལྡན་པའི་བཟའ་བཏུང་ལ་མང་ཚོགས་མང་པོས་དགའ་པོ་བྱེད་ཀྱི་ཡོད་པས། ཟས་རིགས་དེ་དག་ས་གནས་དེ་གའི་མང་ཚོགས་ཀྱིས་ཕྱོགས་བཞི་མཚམས་བརྒྱད་ནས་འོང་བའི་སྐུ་མགྲོན་ལ་སྣེ་ལེན་ཞུ་བའི་ཚལ་སྣེ་གྲགས་ཅན་ཞིག་ཆགས་ཏེ་མི་རིགས་ཀྱི་དམངས་སྲོལ་མངོན་པའི་སྐར་ཁུང་གལ་ཆེན་ཞིག་ཏུ་གྱུར་ཡོད།

“སྤྱི་ཚོགས་ཀྱི་སྤེལ་རེས་དང་འགྲོ་འོང་རྒྱུན་ཆད་མེད་པར་ཟབ་ཏུ་སོང་བ་དང་མི་དམངས་ཀྱི་འཚོ་བའི་ཁ་ཐབས་ལེགས་སུ་ཕྱིན་པ་དང་སྦྲགས་བོད་ཀྱི་ཞིམ་ཟས་སྔར་བས་སྣེ་ཁ་ཕུན་སུམ་ཚོགས་སུ་ཕྱིན་ཡོད། སི་ཁྲོན་གྱི་ཚལ་དང་། ཧུའུ་ནན་གྱི་ཚལ། ཀོང་ཏུང་གི་ཚལ་སོགས་གཡོས་སྦྱོར་ལུགས་མི་འདྲ་བ་དག་རིམ་བཞིན་ས་མཐོའི་ཁྱིམ་ཚང་ཁྲི་སྟོང་དུ་མར་ཁྱབ་པ་མ་ཟད། བོད་ཟས་ཀྱི་གཡོས་སྦྱོར་ལག་རྩལ་དང་ཟས་རིགས་རྒྱུ་ཆ་སོགས་ཐད་ཟམ་མི་ཆད་པར་མཉམ་འདྲེས་དང་གསར་གཏོད་བྱེད་བཞིན་ཡོད”ཅེས་ཧྲེན་པིང་གིས་བཤད།

བཟའ་བཏུང་ལས་རིགས་ཡར་ངོའི་ཟླ་ལྟར་འཕེལ་རྒྱས་བྱུང་བ་དེས་བོད་ཀྱི་ཞིང་འབྲོག་པ་སྔར་ལས་མང་བ་ཞིམ་ཟས་ལ་རོལ་བའི་ནང་ཞུགས་ཡོད། ཆབ་མདོ་གྲོང་ཁྱེར་སྨར་ཁམས་ཚྭ་ཁ་ལྷོའི་འཇང་རིགས་མི་རིགས་ཤང་གི་ཅ་ཅ་ཐུག་པ་དེ་སྐད་གྲགས་ལྡན་པའི་མིང་བྱང་ཞིག་ཏུ་གྱུར་ཡོད། ཐུག་པ་ཕོར་པ་གང་དེ་ཁམ་གང་ནང་བཏུང་ཐུབ་ལ་བྲོ་བ་ཡང་ཧ་ཅང་ཞིམ་པོ་ཡོད།

ཇ་རྟའི་ཚོང་ལམ་གྱི་ས་ཚུགས་གཙོ་བོ་ཞིག་ཡིན་པའི་སྨར་ཁམས་རྫོང་གིས་མི་རིགས་མང་པོ་ཕན་ཚུན་འགྲོ་འོང་དང་མཉམ་འདྲེས་ཀྱི་ལོ་རྒྱུས་ཀྱི་དཔང་པོ་བྱས་ཤིང་། ནུབ་བྱང་རྒྱུད་ཀྱི་ཐུག་པའི་ཁྱད་ཆོས་ལྡན་པའི་ཅ་ཅ་ཐུག་པ་ནི་དེའི་ཁྲོད་ཀྱི་ཡ་གྱལ་ཞིག་རེད། 2010ལོར་ཚྭ་ཁ་ལྷོའི་ཅ་ཅ་ཐུག་པ་དེ་བོད་རང་སྐྱོང་ལྗོངས་མངོན་མིན་རིག་གནས་ཤུལ་བཞག་གི་མིང་གཞུང་ནང་བཅུག་པ་རེད།

ད་ཆ་ཚྭ་ཁ་ལྷོའི་འཇང་རིགས་མི་རིགས་ཤང་གི་མང་ཚོགས་སྔར་ལས་མང་བས་རང་ཁྱིམ་མཛེས་བཟོ་བྱས་ནས་ཞིང་ཁྱིམ་སྤྲོ་ཁང་བཟོས་ཏེ་འབབ་འཕར་ཕྱུག་འགྱུར་བྱུང་ཞིང་། འགོ་ལྷ་སྒྲོལ་མའི་ཚོང་ཉིན་རེ་བཞིན་རྒྱ་ཆེ་རུ་འགྲོ་བཞིན་ཡོད་པ་དང་། ད་ཆ་ལོར་ཡོང་འབབ་སྒོར་ཁྲི་50ལས་བརྒལ་བ་མ་ཟད། ཁོང་གིས་ཉེ་འཁོར་གྱི་མང་ཚོགས་10ལས་ཞུགས་ཐུབ་པ་བྱས་ནས་མཉམ་དུ་ཡོང་སྒོ་གསོག་པའི་ལམ་ལ་སྐྱོད་བཞིན་ཡོད།

ཟས་ནི་མི་ཡི་འཚོ་རྟེན་ཡིན། བོད་ཀྱི་བཟའ་བཏུང་རིག་གནས་དེ་ལོ་ངོ་སྟོང་གི་རིང་མི་རིགས་ཕན་ཚུན་དབར་སྤེལ་རེས་དང་། འགྲོ་འོང་། མཉམ་འདྲེས་བཅས་བྱེད་པའི་ཁྲོད་སྣ་མང་དང་སྤུས་དག་གི་ཕྱོགས་སུ་ཟམ་མི་ཆད་པར་བསྐྱོད་ནས་རོ་འཛིན་གྱི་མྱོང་བའི་ཁྲོད་མི་རིགས་ཁག་ཕན་ཚུན་མཐུན་སྒྲིལ་གྱི་བརྩེ་བ་ཟབ་མོ་ཞིག་ངང་གིས་མངོན་བཞིན་ཡོད། (ཤིན་ཧྭ་གསར་འགྱུར་ཁང་ལྷ་ས་ནས་ཟླ་7ཚེས་2ཉིན་འབྱོར་བའི་གློག་འཕྲིན་གཞིར་བཟུང)

 འདི་ནི་ལྷ་ས་གྲོང་ཁྱེར་གྱི་དབུས་སུ་གནས་པའི་གསང་སྤྱོད་ཇ་ཁང་གི་ཞབས་ཞུ་བས་ཇ་མངར་མོ་བཟོ་བཞིན་པ།