ཉིན་དགུང་ལྟོ་ཆས་བཟས་ཚར་རྗེས་གཉིད་ཏོག་ཙམ་ཉལ་ན། ཕྱི་དྲོ་ལས་ཀ་བྱེད་སྐབས་ཀླད་པ་བསིལ་པོ་ཡོད་པས། མི་མང་དག་ཅིག་ལ་ཉིན་དགུང་གཉིད་ཉལ་བའི་གོམས་གཤིས་ཡོད། འོན་ཀྱང་ལ་ལས་ལྟོ་ཆས་བཟས་མ་ཐག་ལམ་སེང་གཉིད་ཉལ་གྱི་ཡོད། ད་འོ་ན། དེ་འདྲ་བྱས་ཚེ་འཚམ་པོ་ཡོད་དམ། གཉིད་དུས་ཡུན་ཇི་ཙམ་ཉལ་ན་གཟུགས་པོར་ཕན་ཐོགས་ཆེའམ། གཤམ་ལ་འདིའི་ཐད་ཚན་རིག་གི་རྒྱུན་ཤེས་ཤིག་ཁྱེད་ལ་ངོ་སྤྲོད་ཞུ་རྒྱུ་ཡིན།
གཅིག ལྟོ་ཆས་བཟས་མ་ཐག་གཉིད་ཉལ་མི་རུང་།
གང་ལགས་ཤེ་ན། ལྟོ་ཆས་བཟས་མ་ཐག་ཕོ་བས་ལམ་སེང་འཇུ་མི་ཐུབ་པས་གཉིད་ཁུག་ཁག་པོ་ཡོད། དེས་ན། ལྟོ་ཆས་བཟས་ནས་སྐར་མ་15ཡས་མས་སོང་རྗེས་གཉིད་ཉལ་ན་ལེགས། ད་དུང་ཉིན་དགུང་ལྟོ་ཆས་བཟས་མ་ཐག་གཉིད་ཁུག་ཚེ། ཁྲག་ཤེད་དམའ་རུ་སོང་བ་དང་། ཀླད་པར་གསོ་རླུང་མི་འདེང་བ། འཚོ་བཅུད་ལེན་དཀའ་བས་ཀླད་པར་ཁྲག་མི་འདེང་བའི་སྣང་ཚུལ་ཐོན་སྲིད།
གཉིས། སྒྲོག་རྩེའི་སྟེང་ཁ་སྦུབ་བསློགས་ནས་ཉལ་མི་རུང་།
ཁ་སྦུབ་བསློགས་ནས་ཉལ་ན། གཟུགས་པོར་གནོད་པ་ཆེ་ལ་གདོང་པ་དང་མིག་འོག་ཏུ་སྣོན་གྱི་ཡོད་པས། མིག་ལ་གནོན་ཤུགས་བཟོ་སྲིད་ལ། བཟི་འཐོམ་ལངས་པ་དང་མིག་ཤེད་སྐྱོ་རུ་སོང་བའི་སྣང་ཚུལ་ཐོན་པ་མ་ཟད། ཀླད་པར་ཁྲག་དང་གསོ་རླུང་མི་འདེང་བས་རྒྱང་འགྲིབ་ཕོག་པ་སོགས་བྱེད་ཉེན་ཡོད།
གསུམ། ཉིན་དགུང་གཉིད་ཉལ་སྐབས་དྲོད་སྲུང་ལ་དོ་སྣང་བྱེད་དགོས།
ཉིན་དགུང་གཉིད་ཉལ་སྐབས་གཟུགས་པོ་མི་འཁྱག་པ་བྱེད་དགོས། གང་ཡིན་ཟེར་ན། གཉིད་ཤོར་རྗེས་གཟུགས་པོ་ཡོངས་རྫོགས་ལྷོད་པོར་གྱུར་བ་དང་། ཁྲག་རྩ་རྒྱས་པ། བ་སྤུའི་བུ་ག་ཆེ་རུ་སོང་བས་ཆམ་ནད་ཕོག་སླ་པོ་ཡོད། དེར་བརྟེན་གཉིད་ཉལ་སྐབས་གཟུགས་པོ་མི་འཁྱག་པ་བྱེད་དགོས་པ་དང་ཉིན་དགུང་གཉིད་ཉལ་སྐབས་ལུས་པོར་དྲོད་སྲུང་ཡག་པོ་བྱེད་དགོས།
བཞི། གཉིད་སད་མ་ཐག་འཕྲལ་མར་ལངས་མི་རུང་།
གཉིད་སད་ནས་དུས་ངེས་ཅན་ཞིག་ནང་གཞི་ནས་རིག་པ་དྭངས་སུ་འགྲོ་གི་ཡོད། གཉིད་སད་ནས་སྐར་མ་གཉིས་ཙམ་ངལ་གསོས་རྗེས་དལ་གྱིས་ལངས་ཏེ་རིག་པ་དྭངས་བར་བྱེད་དགོས། འགུལ་སྐྱོད་ཕྲན་ཙམ་བྱས་རྗེས་གཞི་ནས་ལས་ཀ་བྱས་ན་ལེགས།
ལྔ། གཉིད་ལས་སད་རྗེས་ཆུ་འཐུང་དགོས།
གཉིད་སད་མ་ཐག་ཆུ་བཏུངས་ཚེ་ཁྲག་སླ་རུ་ཕྱིན་ནས་འཁོར་སྐྱོད་ཡག་པོ་ཐུབ་པས། ལུས་སྟོབས་སླར་གསོ་ཐུབ་པ་མ་ཟད། ལས་ཀ་བྱེད་སྐབས་ཀྱང་ཀླད་པ་བསིལ་དུ་འགྲོ་སྲིད།