2004ལོའི་ཟླ་7ཚེས་25ཉིན་བོད་ལྗོངས་སྣེ་གདོང་རྫོང(ད་ཆའི་སྣེ་གདོང་ཆུས)སྐྱེད་པ་ཤང་སྨོན་གྲོང་གྲོང་ཚོའི་ཨུ་ལྷན་གྱི་ཀྲུའུ་རེན་ཡེ་ཤེས་བསྟན་འཛིན་གྱིས་གྲོང་ཚོ་ཨུ་ལྷན་ལ་ལོ་30ཞབས་འདེགས་ཞུས་པའི་ལག་སྐོར་ཁ་པར་དེ་ཁ་བཏགས་ཀྱིས་བཏུམས་ནས་སྐུད་མེད་ཁ་པར་བསྒར་མཁན་ལྷོ་ཁ་ས་ཁུལ(ད་ཆའི་ལྷོ་ཁ་གྲོང་ཁྱེར)གློག་འཕྲིན་ཀུང་སིའི་ཅིང་ལི་བསྟན་འཛིན་གྱི་ལག་ཏུ་སྤྲད་པ་རེད། དེ་ཐོག་ནས་བོད་ཀྱི་ཤང་ཚང་མར་ཁ་པར་ཤར་གཏོང་ཐུབ་ནས་ལག་སྐོར་ཁ་པར་གྱི་ལས་འགན་ཡོངས་སུ་བསྒྲུབས་པ་མཚོན་གྱི་ཡོད།

2017ལོར་4Gདུས་རབས་ཤར་ཚུན། བོད་ཀྱི་འཕྲིན་གཏོང་རྨང་གཞིའི་སྒྲིག་བཀོད་འཛུགས་སྐྲུན་མགྱོགས་མྱུར་འཕེལ་རྒྱས་སོང་ཡོད། 2020ལོའི་ལོ་སྨད་བར། བོད་ཀྱི་སྲིད་འཛིན་གྲོང་ཚོ་5417ལ་4Gདྲ་རྒྱ་ཤར་གཏོང་ཐུབ་པ་དང་སྲིད་འཛིན་གྲོང་ཚོ་5439ལ་འོད་སྐུད་དྲ་ཆེན་ཤར་གཏོང་ཐུབ་ནས་དེ་གཉིས་ཤར་གཏོང་ཐུབ་ཚད་99%ཟིན་ཡོད། སྲིད་འཛིན་གྲོང་ཚོར་འོད་སྐུད་དྲ་ཆེན་ཤར་གཏོང་ཐུབ་ཚད་དེ་གོང་གི་4%ནས་99%བར་མཐོ་རུ་ཕྱིན་པ་དང་4Gདྲ་རྒྱ་ཤར་གཏོང་ཐུབ་ཚད་0ནས་99%བར་མཐོ་རུ་ཕྱིན་ཡོད། ལྗོངས་ཡོངས་སུ་འཕྲིན་གཏོང་འོད་སྐུད་ཀྱི་སྤྱིའི་རིང་ཚད་སྤྱི་ལེ་ཁྲི་24.08ཟིན་པ་དང་དྲ་སྦྲེལ་དྲ་ཆེན་མཐུད་མཚམས་ཁྲི་216.5ཟིན་ནས་འཕྲིན་གཏོང་འཕེལ་རྒྱས་ཆུ་ཚད་དེ་ནང་སའི་ཞིང་ཆེན་དང་སྤྱིའི་ཆ་ནས་སྙོམས་ཡོད།

ད་ཆ་5Gའཕྲིན་གཏོང་ལག་རྩལ་གངས་ལྗོངས་ས་མཐོར་ཁྱབ་གདལ་བྱུང་ནས་སྨན་བཅོས་དང་ཡུལ་སྐོར་སོགས་ལས་རིགས་མང་པོར་བཀོལ་སྤྱོད་ཐུབ་ཡོད། 2020ལོའི་ཟླ་5པར། བོད་ཀྱི་5Gརིག་ལྡན་སྨན་བཅོས་མཉམ་འབྲེལ་ཚོད་ལྟ་ཁང་དང་པོ་ལྷ་ས་གྲོང་ཁྱེར་མི་དམངས་སྨན་ཁང་དུ་བཙུགས་ཏེ་5Gཡི་མྱུར་ཚད་མགྱོགས་པ་དང་འགག་ཚད་དམའ་བའི་ལེགས་ཆ་སྤྱད་ནས་རྒྱང་བཀོལ་སྨན་བཅོས་བྱེད་སྟངས་ནད་ཐོག་སྨན་བཅོས་སུ་སྤྱད་པ་མ་ཟད། ད་དུང་ནད་པ་མང་པོ་སེང་དྲག་སོང་ཡོད།

གཡོན་གྱི་པར་གོང་མ་ནི། ་སྐེད་པར་BPའཕྲུལ་ཆས་བཏགས་པ་དང་ལག་ཏུ“ཏཱ་ཀེ་ཏཱ”ཁྱེར་བའི་བོད་རིགས་ཀྱི་བུད་མེད་ཚོང་པ་ལྷག་སྒྲོན་གྱིས་སི་ཁྲོན་གྱི་ཚོང་པ་དང་ཚོང་འགྲིག་བཞིན་པ།(1994ལོར་ཤིན་ཧྭ་གསར་འགྱུར་ཁང་གི་གསར་འགོད་པ་ཐུབ་བསྟན་གྱིས་པར་བླངས)

གཡས་ཀྱི་པར་གོང་མ་ནི། 2004ལོའི་ཟླ་7ཚེས་25ཉིན་བོད་ལྗོངས་ལྷོ་ཁ་གྲོང་ཁྱེར་སྣེ་གདོང་རྫོང(ད་ཆའི་སྣེ་གདོང་ཆུས)སྐྱེད་པ་ཤང་སྨོན་གྲོང་གྲོང་ཚོའི་ཨུ་ལྷན་གྱི་ཀྲུའུ་རེན་ཡེ་ཤེས་བསྟན་འཛིན་གྱིས་གྲོང་ཚོའི་ཨུ་ལྷན་ལ་ལོ་30ཞབས་འདེགས་ཞུས་པའི་ལག་སྐོར་ཁ་པར་འདི་ཁ་བཏགས་ཀྱིས་བཏུམས་ནས་སྐུད་མེད་ཁ་པར་བསྒར་མཁན་ལྷོ་ཁ་ས་ཁུལ(ད་ཆའི་ལྷོ་ཁ་གྲོང་ཁྱེར)གློག་འཕྲིན་ཀུང་སིའི་ཅིང་ལི་བསྟན་འཛིན་གྱི་ལག་ཏུ་སྤྲོད་བཞིན་པ།

པར་འོག་མ་ནི། ཇོ་མོ་གླང་མའི་སྒར་ས་ཆེན་པོར་5Gབརྡ་རྟགས་ཁྱབ་པ། 

(2020ལོའི་ཟླ་5ཚེས་3ཉིན་ཤིན་ཧྭ་གསར་འགྱུར་ཁང་གི་གསར་འགོད་པ་ཕུར་བུ་བཀྲ་ཤིས་ཀྱིས་པར་བླངས)