མཐོ་རྒྱུགས་ལ་ཤུགས་རྒྱོབས།

ལོ་གཅིག་དུས་གཅིག་གི་མཐོ་རྒྱུགས་གཏོང་བའི་དུས་སུ་སླེབས་པས། གྲོང་ཁྱེར་ཡོངས་ཀྱི་མཐོ་རྒྱུགས་གཏོང་མཁན་སློབ་མའི་འགྲིམ་འགྲུལ་བདེ་འཇགས་འགན་ལེན་བྱ་རྒྱུ་དེ་ངེད་གྲོང་ཁྱེར་གྱི་འགྲིམ་འགྲུལ་དོ་དམ་སྡེ་ཚན་གྱི་ལས་དོན་གལ་ཆེན་ཞིག་ལ་གྱུར་ཡོད། མཐོ་རྒྱུགས་གཏོང་རིང་འགྲོ་ལམ་གྱི་བདེ་འཇགས་འགན་ལེན་བྱ་ཆེད། ངེད་གྲོང་ཁྱེར་གྱི་འགྲིམ་འགྲུལ་ཉེན་རྟོག་པས་འགྲོ་ལམ་གྱི་གནས་ཚུལ་དངོས་ལ་བརྟག་ཞིབ་བྱས་རྗེས་འགྲིམ་འགྲུལ་འགན་སྲུང་གི་ཇུས་གཞི་བཟོས་པ་དང་འགྲིམ་འགྲུལ་བཀག་སྡོམ་གྱི་ལམ་ཐིག་འཆར་འགོད་བྱས་ནས། མཐོ་རྒྱུགས་གཏོང་མཁན་ཚོར་རོགས་རམ་གང་ཐུབ་ཅི་ཐུབ་བྱས་ཡོད།

འགྲིམ་འགྲུལ་ཉེན་རྟོག་པས་བྱེད་ཐབས་གང་དག་སྤྱད་ཡོད་དམ་ཞེ་ན།

1.“ཡིག་རྒྱུགས་ཐད་གཏོང་རླངས་འཁོར”བཀོད་སྒྲིག་བྱས་ནས་རྒྱ་ཆེའི་ཡིག་རྒྱུགས་གཏོང་མཁན་སློབ་མར་འགྲིམ་འགྲུལ་གྱི་སྟབས་བདེ་སྐྲུན་ཡོད།ལྷ་ས་གྲོང་ཁྱེར་སྤྱི་བདེ་ཅུས་འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་ཉེན་རྟོག་པའི་སྦག་སྦག་དང་ལས་སྒྲུབ་མོ་ཊ་སྤྱད་དེ། མཐོ་རྒྱུགས་གཏོང་མཁན་ཚོར་དུས་ཐོག་ཏུ་རོགས་རམ་ནུས་ལྡན་བྱེད་ཀྱི་ཡོད་པས། སྐབས་དེ་དུས་ཁྱིམ་བདག་དང་སློབ་མ་ཚོས་འགྲིམ་འགྲུལ་དོ་དམ་སྡེ་ཚན་ལ་རེ་བ་ཞུས་ན་འགྲིག་གི་ཡོད།

2.རྒྱུགས་རའི་ཉེ་འཁོར་གྱི་འགྲིམ་འགྲུལ་སྒྲིག་ལམ་ཡག་པོ་ཡོང་བའི་འགན་ལེན་བྱ་ཆེད།འགྲིམ་འགྲུལ་ཉེན་རྟོག་ཉིང་ལག་རུ་ཁག་གིས་རྒྱུགས་གནས་ཁག་ཏུ་ཉེན་རྟོག་པ་མང་དུ་བཏང་བ་དང་སྐོར་གཡེང་བྱེད་ཤུགས་ཆེ་རུ་བཏང་སྟེ། འཁོར་རིགས་གང་བྱུང་བཞག་པ་དང་ཁ་བཀག་པའི་རིགས་དུས་ཐོག་གཙང་སེལ་བྱས་ནས། རྒྱུགས་རའི་ཉེ་འཁོར་གྱི་འགྲིམ་འགྲུལ་ཁོར་ཡུག་ཡག་པོ་ཞིག་བཏོད་ཡོད།

3.རྒྱ་ཆེའི་མཐོ་རྒྱུགས་གཏོང་མཁན་ཚོར་བདེ་འཇགས་དང་ཁ་ཁུ་སིམ་པའི་ཡིག་རྒྱུགས་གཏོང་ས་ཞིག་བསྐྲུན་ཆེད།ཡིག་རྒྱུགས་གཏོང་རིང་། ལྷ་ས་འགྲིམ་འགྲུལ་ཉེན་རྟོག་པས་རྒྱུགས་གནས་ཁག་གི་སྒོ་འགྲམ་གྱི་ལམ་བུར་འཕྲུལ་འཁོར་གྱི་དུང་བརྡ་སྒྲོག་མི་ཆོག་པའི་མཚོན་རྟགས་བཙུགས་ནས། རྒྱ་ཆེའི་ཁ་ལོ་བ་ཚོར་རྒྱུགས་རའི་འགྲམ་ནས་སྐྱོད་སྐབས་འགྲིམ་འགྲུལ་སྒྲིག་ལམ་ལ་སྲུང་བརྩི་ཞུས་ཏེ། མོ་ཊ་དལ་དུ་གཏོང་བ་དང་དུང་བརྡ་སྒྲོག་མི་ཆོག་པའི་དྲན་སྐུལ་བྱས་པ་རེད།

4.ཡིག་རྒྱུགས་གཏོང་བའི་རིང་། མཐོ་རྒྱུགས་གཏོང་མཁན་སློབ་མ་སྐྱེལ་བསུ་འམ་ཡང་ན་ཡིག་རྒྱུགས་ཀྱི་ལས་དོན་སྒྲུབ་མཁན་འཁོར་རིགས་ལ་འགྲིམ་འགྲུལ་གྱི་ལས་འཛོལ་ལྷགས་ཀྱང་། མི་སྣ་འཆི་རྨས་དང་གྱོང་གུན་ཚབས་ཆེན་ཐོན་མེད་རིགས། དོ་བདག་ཕྱོགས་གཉིས་པོའི་ཆ་འཕྲིན་དང་རླངས་འཁོར་གྱི་ཆ་འཕྲིན་ཐོ་འགོད་བྱས་རྗེས། “སྔོན་ལ་ཡིག་རྒྱུགས་དང་རྗེས་ལ་ཐག་གཅོད”ཀྱི་རྩ་དོན་གཞིར་བཟུང་འཁོར་རིགས་སྔོན་ལ་བཏང་སྟེ་རྗེས་སུ་ཐག་གཅོད་ཡག་པོ་བྱ་རྒྱུ་དང་འབྲེལ་འགྲིམ་འགྲུལ་ཐད་ནས་སྟབས་བདེ་སྐྲུན་གང་ཐུབ་བྱས་ཡོད་པ་རེད།

5.ཡིག་རྒྱུགས་གཏོང་རིང་། རྒྱུགས་རའི་ཉེ་འཁོར་དུ་འཁོར་རིགས་འགྲུལ་བཞུད་ཉུང་དུ་གཏོང་བ་དང་འགྲིམ་འགྲུལ་འགག་པའི་གནས་ཚུལ་མི་ཐོན་པའི་ཆེད།རྒྱ་ཆེའི་གྲོང་མི་ཚོས་རབ་བྱུང་ན་རང་ཉིད་ཀྱི་འཁོར་རིགས་ཕྱིར་མ་བཏང་བར་སྤྱི་སྤྱོད་རླངས་འཁོར་ལ་བཞུགས་རྒྱུའི་དྲན་སྐུལ་བྱས་པ་དང་ཆབས་ཅིག ཁ་ལོ་བ་ཚོར་རྒྱུགས་གནས་ཡོད་ས་དང་། མཐོ་རྒྱུགས་གཏོང་མཁན་སྐྱེལ་བསུའི་དུས་ཚོད་ལས་གཡོལ་ཏེ་ལམ་ཐིག་གཞན་དག་སྐོར་ནས་དུས་མཚམས་གཅིག་ལ་འགྲུལ་བཞུད་བྱེད་མཁན་མང་པོ་མི་ཡོང་བ་བྱེད་དགོས་པའི་དྲན་སྐུལ་བྱས་ཡོད་པ་རེད།

སློབ་མའི་རོགས་སྐྱོབ་འབྲེལ་གཏུགས་ཁ་པར། 

0891—6324629 

0891—6659937