ཀྲའོ་ཁྲུན་ཧྭ་ནི་ཧུའུ་ནན་གྱི་གཞོན་ནུ་མ་ཞིག་རེད་ལ“བོད་སྐྱོད་པ་མི་རབས་གཉིས་པ”ཞིག་ཀྱང་རེད། 1998ལོའི་ཟླ་8པར་ལོ་བཅུ་ཡི་རིང“གཞིས་ལུས་བྱིས་པར”གྱུར་པའི་ཀྲའོ་ཁྲུན་ཧྭ་ཕ་མ་དང་མཉམ་དུ་འཚོ་བ་སྐྱེལ་རྒྱུ་བྱུང་ཞིང་། དུས་དེ་ནས་བཟུང་ཆབ་མདོ་དང་ལས་འབྲེལ་ཟབ་མོ་བྱུང་ཡོད།

2007ལོའི་ཟླ་8པར་རང་ངོས་ཀྱི་འབད་བརྩོན་བརྒྱུད། ཀྲའོ་ཁྲུན་ཧྭ་ལྷ་ས་དགེ་འོས་སློབ་གྲྭར་རྒྱུཌ་འཕྲོད་ཅིང་། ཕྱིས་སུ་ལྷ་ས་གྲོང་ཁྱེར་སློབ་ཆུང་དང་པོར་དངོས་སྦྱོང་དགེ་རྒན་བྱེད་སྐབས། སྐབས་དེ་དུས་ཁོ་མོ་དང་ལོ་རིམ་གཅིག་པ་ཡིན་པའི་སྐད་ཆ་ཤོད་རྒྱུར་དེ་ཙམ་དགའ་པོ་མེད་པའི་ཨང་རྩིས་ཆེད་ལས་ཀྱི་རྒྱལ་མཚན་ངོ་ཤེས་པ་རེད།

“ང་ལ་བག་ཆགས་ཟབ་ཤོས་ནི་སློབ་ཚན་ཞོགས་པའི་ཆུ་ཚོད་བདུན་པར་འཚོགས་ཀྱི་ཡོད་མོད། རྒྱལ་མཚན་ནི་ཆུ་ཚོད་ལྔ་པ་ཙམ་ནས་སློབ་གྲྭའི་གློག་སྒྲོན་འོག་དཔེ་དེབ་ལྟ་བར་འགྲོ་གི་འདུག སྐབས་དེ་དུས་བོད་རིགས་སློབ་མ་དེ་བརྩོན་འགྲུས་དེ་འདྲའི་ཆེ་བ་ལའང་སྙམ་བྱུང”ཞེས་བཤད། ཕན་ཚུན་གཤིབ་ཡུན་རིང་དུ་སོང་བ་དང་བསྟུན་ནས་ཀྲའོ་ཁྲུན་ཧྭ་ཡིས་རྒྱལ་མཚན་སྐད་ཆ་ཤོད་རྒྱུར་དེ་ཙམ་དགའ་པོ་མེད་ཀྱང་། བརྩོན་འགྲུས་ཅན་ཞིག་ཡིན་པ་ཤེས་པ་དང་། ཁོང་གིས་བོད་རིགས་སློབ་མར་འཛིན་པའི་ལྟ་སྟངས་ལ་རྦད་དེ་འགྱུར་ལྡོག་བྱུང་ཡོད།

སློབ་གྲྭ་མ་ཐོན་གོང་ཀྲའོ་ཁྲུན་ཧྭ་ཡིས་ཆབ་མདོར་ལོག་རྒྱུའི་འདོད་ཚུལ་གསལ་པོ་བཤད་པས་རྒྱལ་མཚན་གྱིས་ཕ་ཡུལ་དུ་ལོག་རྒྱུའི་འཆར་གཞིར་འགྱུར་ལྡོག་བཏང་ནས་ཁོང་དང་མཉམ་དུ་ཆབ་མདོར་བསྐྱོད་པ་རེད།

གཉིས་ཀ་ཆབ་མདོར་ཡོད་མོད། འོན་ཀྱང་རྒྱལ་མཚན་ལྷོ་རོང་རྫོང་རྔུལ་ཤོད་ཤང་སློབ་ཆུང་དུ་དགེ་རྒན་ལ་བཏང་བ་དང་། ཀྲའོ་ཁྲུན་ཧྭ་ལྷོ་རོང་རྫོང་ཤོ་པ་མདོ་གྲོང་རྡལ་སློབ་ཆུང་དུ་དགེ་རྒན་ལ་བཏང་བ་རེད། གཟའ་མཇུག་ཏུ་སླེབས་རིམ་བཞིན་གནམ་གཤིས་ལ་མི་བལྟོས་པར་རྒྱལ་མཚན་གྱིས་སྦག་སྦག་བཞོན་ནས་རྔུལ་ཤོད་ཤང་ནས་ཤོ་པ་མདོ་གྲོང་རྡལ་དུ་ཀྲའོ་ཁྲུན་ཧྭ་ལ་ལྟ་བར་ཡོང་གི་ཡོད། དེ་ལྟར་བགྲང་བྱ་གཉིས་ཙམ་སོང་བ་རེད།

2012ལོར་རྒྱལ་མཚན་དང་ཀྲའོ་ཁྲུན་ཧྭ་གཉེན་སྒྲིག་བྱས་པར་ནང་མི་རྣམས་ཀྱིས་རྒྱབ་སྐྱོར་ཆེན་པོ་བྱས་པ་མ་ཟད། ལྷོ་རོང་དུ་བསྐྱོད་དེ་ཁོང་གཉིས་ལ་སྨོན་འདུན་ཞུས་པ་རེད། 2013ལོའི་ཟླ་12པར་ཁྱིམ་ཚང་ཆུང་ཆུང་དེས་ཕྲུ་གུ་དང་པོ་དེ་དང་། 2020ལོའི་ཟླ་8པར་ཕྲུ་གུ་གཉིས་པ་དེ་བསུས་པ་རེད། ཕ་མ་གཉིས་པོས་དགའ་ཚོར་ཆེན་པོས“ང་ཚོའི་ཁྱིམ་དུ‘བོད་རྒྱ་མི་རིཌ་གཉིས་ཀྱི་བུ་དང་བུ་མོ་གཉིས་ཀ་ཡོད’”ཅེས་བཤད།

“ཚང་མས་འབད་འཐབ་པའི་ལང་ཚོ་ནི་ཆེས་མཛེས་ཤོས་རེད་ཅེས་བརྗོད་ཀྱི་ཡོད། ངའི་ངོས་ནས་བརྗོད་ན་བོད་རིགས་བུ་ཕྲུག་ལ་དགའ་ཞེན་དང་བོད་རིགས་སྤུན་ཟླ་དང་གྲོགས་སུ་གྱུར་པ་ནི་བདེ་སྐྱིད་ཆེ་ཤོས་ཤིག་ཡིན། བོད་དུ་ངའི་ཁྱིམ་ཚང་བཙུགས་ཡོད་ལ་ངའི་མི་ཚེའི་ནང་དྲོ་སྐྱིད་ལྡན་པའི་ཁྱིམ་ཚང་གཉིས་པ་དེའང་བོད་དུ་ཡོད”ཅེས་བཤད། ལོ་ལྟར་ཕ་ཡུལ་དུ་ལོག་གི་ཡོད་མོད། འོན་ཀྱང་ཀྲའོ་ཁྲུན་ཧྭ་ཡིས་རྒྱུས་མངའ་ཆེ་ཤོས་ཡོད་པ་ནི་བོད་རེད། “ཕ་ཡུལ་གཉིས་པའི”ས་བོན་ཁོང་གི་སེམས་སུ་རྩ་བ་ཚུགས་པ་དང་མྱུ་གུ་རྒྱས་ནས་ཆེས་མཛེས་སྡུག་ལྡན་པའི“མི་རིགས་མཐུན་སྒྲིལ་གྱི་མེ་ཏོག”རབ་ཏུ་བཞད་ཡོད།