-
ཡིད་གཟབ་གྱིས། མང་ཚོགས་མང་པོར་ཁ་བསླུས་ཐེབས་འདུག
-
ཡོང་ཁུངས། ཀྲུང་གོའི་བོད་ཀྱི་གསར་འགྱུར་དྲ་བ། | སྤེལ་དུས། 2021-04-28
ཟླ་4ཚེས་25ཉིན། གསར་འགོད་པར་རང་སྐྱོང་ལྗོངས་སྤྱི་བདེ་ཐིང་ནས་ཤེས་རྟོགས་བྱུང་བར། 2021ལོའི་ཟླ་1པོ་ནས་3པའི་བར། ལྗོངས་ཡོངས་ནས་གློག་འཕྲིན་དང་དྲ་རྒྱའི་ཁ་བསླུས་གྱོད་གཞི་ཁག་398གྱོད་དོན་ཐོ་འགོད་བྱས་པར་གྱོང་གུན་སྒོར་ཁྲི་4013ཕོག་ཡོད་པ་དང་། ཟླ་4ཚེས་20ཉིན་བར། གྱོང་གུན་སྒོར་ཁྲི་བརྒྱ་ཡན་ཕོག་པའི་གྱོད་གཞི་ཁག་6ཐོན་ཡོད་པ་རེད།
གྱོད་དཔེ་དང་པོ། ལྷ་ས་གྲོང་ཁྱེར་དུ་དྲ་རྒྱའི་ཐོག་ནས་གཞན་དང་གྲོགས་པོ་བསྒྲིགས་ཏེ། རྒྱན་འགྱེད་དང་མ་འཇོག་ལ་བསླུ་བྲིད་བྱས་པའི་གློག་འཕྲིན་དང་དྲ་རྒྱའི་ཁ་བསླུས་གྱོད་གཞི་ཞིག་ཐོན་ནས་ཁྱོན་སྒོར་ཁྲི་169.2293མགོ་སྐོར་ཐེབས་པ་རེད། 2021ལོའི་ཟླ་1ཚེས་8ཉིན། ལྷ་ས་གྲོང་ཁྱེར་ཁ་བསླུས་ངོ་རྒོལ་ལྟེ་གནས་ལ་གནོད་འཚེ་ཕོག་མཁན་ལིའུ་ཆེ་གེ་མོའི(མིང་ཚབ)ཉེན་དོན་སྙན་སེང་འབྱོར་ཏེ། 2020ལོའི་ཟླ་12ཚེས་26ཉིན། ཁོས་མོའོ་མོའོ་དང་ལན་ཤིང་གི་APPཐོག་ནས་བུ་མོ་ཞིག་དང་གྲོགས་པོ་བསྒྲིགས་ཤིང་། བུ་མོ་དེས་ཁོའི་ཡིད་ཆེས་ཐོབ་རྗེས། མ་འཇོག་འབྱོར་སྐྱོང་ལ་བརྟེན་དངུལ་གསོག་ཐུབ་པར་ཁ་གཡར་ཏེ། འབྱོར་སྐྱོང་ལས་སྟེགས་རྫུན་མ་ཞིག་བསྐུར་ནས་འབྱོར་སྐྱོང་ཐོན་རྫས་ཉོ་དགོས་པའི་རེ་བ་བཏོན། 2021ལོའི་ཟླ་1ཚེས་2ཉིན་ནས་ཟླ་1ཚེས་6ཉིན་བར། ལིའུ་ཆེ་གེ་མོས་ལས་སྟེགས་དེར་དངུལ་ཐེངས་41བསྐུར་བར་ཁྱོན་བསྡོམས་སྒོར་ཁྲི་169.2293ཟིན་པ་དང་། མགོ་སྐོར་ཐེབས་པ་ཤེས་རྗེས་འཕྲལ་དུ་སྙན་སེང་ཞུས་པ་རེད། གྱོད་དཔེ་གཉིས་པ། ཉིང་ཁྲི་གྲོང་ཁྱེར་དུ་དྲ་རྒྱའི་ཐོག་ནས་གྲོགས་པོ་བསྒྲིགས་ཏེ། རྒྱན་འགྱེད་འབྱོར་སྐྱོང་གི་བསླུ་བྲིད་བྱས་པའི་གློག་འཕྲིན་དང་དྲ་རྒྱའི་ཁ་བསླུས་གྱོད་གཞི་ཞིག་ཐོན་ནས་ཁྱོན་སྒོར་ཁྲི་408.07མགོ་སྐོར་ཐེབས་ཡོད་པ་རེད། 2021ལོའི་ཟླ་3ཚེས་24ཉིན། ཉིང་ཁྲི་གྲོང་ཁྱེར་བྲག་ཡིབ་ཆུས་སྤྱི་བདེ་ཅུས་ཉེས་དོན་མྱུལ་ཞིབ་རུ་ཆེན་ལ་ཝང་ཆེ་གེ་མོའི(མིང་ཚབ)ཉེན་དོན་སྙན་སེང་འབྱོར་ཏེ། 2021ལོའི་ཟླ་2པར་ཁོ་བོས“དུས་རབས་ཀྱི་ལས་འགྲོ”ཞེས་པའི་ལས་སྟེགས་ནས་བུ་མོ་གཉིས་ངོ་ཤེས་རྗེས་སྐད་འཕྲིན་གྱི་གྲོགས་པོ་བསྒྲིགས་པ་དང་། བུ་མོ་དེ་གཉིས་ཀྱིས་བསླབས་པ་ལྟར་མ་དངུལ་བསྐུར་ནས་འབྱོར་སྐྱོང་བྱས་པ་རེད། ཟླ་3ཚེས་22ཉིན་བར། ཝང་ཆེ་གེ་མོས་དངུལ་ཁང་གཱ་35ལ་ཁྱོན་བསྡོམས་སྒོར་ཁྲི་408.0727བསྒྱུར་བ་དང་། རྗེས་སུ་དངུལ་དེ་དག་འདོན་མི་ཐུབ་པ་ཤེས་རྗེས་གཞི་ནས་རང་ཉིད་མགོ་སྐོར་འོག་ཚུད་པ་ཤེས། གྱོད་དཔེ་གསུམ་པ། ཆབ་མདོ་གྲོང་ཁྱེར་འཇོ་མདའ་རྫོང་དུ་དྲ་རྒྱའི་ཐོག་ནས་གྲོགས་པོ་བསྒྲིགས་ཏེ། རྒྱན་འགྱེད་འབྱོར་སྐྱོང་གི་བསླུ་བྲིད་བྱས་པའི་གློག་འཕྲིན་དང་དྲ་རྒྱའི་ཁ་བསླུས་གྱོད་གཞི་ཞིག་ཐོན་ནས་ཁྱོན་སྒོར་ཁྲི་253.49མགོ་སྐོར་ཐེབས་ཡོད་པ་རེད། 2021ལོའི་ཟླ་4ཚེས་10ཉིན། ཆབ་མདོ་གྲོང་ཁྱེར་ཁ་རུབ་ཆུས་སྤྱི་བདེ་ཅུས་ལ་ཀྲང་ཆེ་གེ་མོའི(མིང་ཚབ)ཉེན་དོན་སྙན་སེང་འབྱོར་ཏེ། 2021ལོའི་ཟླ་2ཚེས་24ཉིན། ཆ་རྒྱུས་མེད་པའི་མི་ཞིག་གིས་ཁོ་པ་རྐང་དངུལ་གྱི་སྐོར་སྤེལ་རེས་ཞེས་པའི་སྐད་འཕྲིན་ཚོགས་པ་ཞིག་ལ་བཅུག་པ་དང་། ཟླ་3ཚེས་29ཉིན་ཚོགས་པ་དེས་འོས་སྦྱོར་བྱས་པའི་རྐང་དངུལ་APPནས་མ་འཇོག་བྱས་པ་རེད། དེ་རྗེས་ཀྲང་ཆེ་གེ་མོས་རང་ཉིད་ཀྱིས་བཏང་བའི་མ་དངུལ་རྣམས་འདོན་མི་ཐུབ་སྟབས་གཞི་ནས་མགོ་སྐོར་འོག་ཚུད་པ་ཤེས། ཀྲང་ཆེ་གེ་མོས་སྔ་རྗེས་སུ་དངུལ་ཁང་གཱ་6ལ་ཁྱོན་བསྡོམས་སྒོར་ཁྲི་253.49བསྒྱུར་ཡོད། གྱོད་གཞིའི་དོ་དམ་བྱེད་ཁོངས་གཞིར་བཟུང་། ཟླ་4ཚེས་11ཉིན་གྱོད་གཞི་དེ་ཆབ་མདོ་གྲོང་ཁྱེར་འཇོ་མདའ་རྫོང་སྤྱི་བདེ་ཅུས་ཉེས་དོན་མྱུལ་ཞིབ་རུ་ཆེན་ལ་རྩིས་སྤྲད་པ་རེད། གྱོད་དཔེ་བཞི་པ། ལྷ་ས་གྲོང་ཁྱེར་དུ་འགོ་ཁྲིད་ཡིན་ཁུལ་བྱེད་པའི་གློག་འཕྲིན་དང་དྲ་རྒྱའི་ཁ་བསླུས་གྱོད་གཞི་ཞིག་ཐོན་ནས་ཁྱོན་སྒོར་ཁྲི་120ལྷག་མགོ་སྐོར་ཐེབས་ཡོད་པ་རེད། 2021ལོའི་ཟླ་4ཚེས་16ཉིན། ལྷ་ས་གྲོང་ཁྱེར་ཁ་བསླུས་ངོ་རྒོལ་ལྟེ་གནས་ལ་ཁེ་ལས་ཤིག་གི་ནོར་དོན་མི་སྣ་ལི་ཆེ་གེ་མོའི(མིང་ཚབ)ཉེན་དོན་སྙན་སེང་འབྱོར་ཞིང་། ཟླ་4ཚེས་16ཉིན། གནོད་འཚེ་ཕོག་མཁན་ལི་ཆེ་གེ་མོར་མི་ཞིག་གིས་ཁོ་པའི་འགོ་ཁྲིད་ཡིན་ཁུལ་གྱིས་QQཚོགས་པ་ཞིག་ལ་བཅུག་པ་མ་ཟད། མཉམ་ལས་ཀུང་སིར་གན་རྒྱ་ཕྱིར་སློག་བྱེད་དགོས་པར་ཁ་གཡར་ཏེ། ཁོ་པར་ཕ་རོལ་གྱི་དམིགས་འཛུགས་དངུལ་ཁང་རྩིས་ཐོར་སྒོར་ཁྲི་120སྒྱུར་དགོས་པའི་རེ་བ་བཏོན། ལི་ཆེ་གེ་མོས་མགོ་སྒོར་ཐེབས་པ་ཤེས་རྗེས་འཕྲལ་དུ་སྙན་སེང་ཞུས་པ་རེད། གྱོད་དཔེ་ལྔ་པ། ལྷ་ས་གྲོང་ཁྱེར་དུ་འགོ་ཁྲིད་ཡིན་ཁུལ་བྱེད་པའི་གློག་འཕྲིན་དང་དྲ་རྒྱའི་ཁ་བསླུས་གྱོད་གཞི་ཞིག་ཐོན་ནས་ཁྱོན་སྒོར་ཁྲི་289མགོ་སྐོར་ཐེབས་ཡོད་པ་རེད། 2021ལོའི་ཟླ་4ཚེས་19ཉིན། ལྷ་ས་གྲོང་ཁྱེར་ཁ་བསླུས་ངོ་རྒོལ་ལྟེ་གནས་ལ་ཁེ་ལས་ཤིག་གི་ནོར་དོན་མི་སྣ་དབྱང་ཆེ་གེ་མོའི(མིང་ཚབ)ཉེན་དོན་སྙན་སེང་འབྱོར་ཞིང་། 2021ལོའི་ཟླ་4ཚེས་19ཉིན། ཁོ་པའི་QQཐོག་དྲ་མིང་ལ་ཀུང་སིའི་ཏུང་ཧྲི་ཀྲང་ཧོང་ཆེ་གེ་མོ(མིང་ཚབ)ཞེས་པ་ཞིག་གི་བརྡ་ཐོ་འབྱོར་ཏེ། ཁོ་པ་ལས་ཀའི་QQཚོགས་པ་ཞིག་ཏུ་འཛུལ་དགོས་ལུགས་བཤད་པ་དང་། ཁོ་པས་ཕ་རོལ་ནི་ཀུང་སིའི་ཏུང་ཧྲི་ཀྲང་རེད་སྙམ་ནས་ལས་ཀའི་ཚོགས་པ་དེར་འཛུལ། དེ་རྗེས་ཕ་རོལ་གྱིས་ཀུང་སིས་བཞག་པའི་གན་རྒྱ་དེ་ཀུང་སིར་ཕན་པ་མེད་པར་ཁ་གཡར་ནས། ཕ་རོལ་པོས་མཁོ་འདོན་བྱས་པའི་དངུལ་ཁང་གི་རྩིས་ཐོར་དངུལ་བསྒྱུར་དགོས་པའི་རེ་བ་བཏོན་པར་ཁྱོན་བསྡོམས་སྒོར་ཁྲི་289མགོ་སྐོར་ཐེབས་ཡོད་པ་རེད། 
ཉེན་རྟོག་ཕྱོགས་ཀྱིས་དྲན་སྐུལ་བྱས་དོན། མིག་སྔར། རང་ལྗོངས་སུ་དྲ་རྒྱ་ནས་དངུལ་བུན་གཡར་བའི་རིགས་ཀྱི་ཁ་བསླུས་དང་། དྲ་རྒྱ་ནས་གྲོགས་པོ་བསྒྲིགས་ཏེ་མ་འཇོག་དང་རྒྱན་པོ་འགྱེད་དུ་འཇུག་པའི་རིགས་ཀྱི་ཁ་བསླུས། དྲ་རྒྱའི་ཞབས་ཞུའི་མི་སྣ་ཡིན་ཁུལ་གྱི་ཁ་བསླུས། དྲ་རྒྱའི་ཞོར་ལས་ཀྱི་ཁ་བསླུས། ཡིད་རྟོན་གྲོས་འདྲི་རྫུན་མའི་རིགས་ཀྱི(སློབ་གྲྭའི་དངུལ་བུན་གྱི་ཐོ་སུབ་པ)ཁ་བསླུས། འགོ་ཁྲིད་དང་ངོ་ཤེས་ཡིན་ཁུལ་རིགས་ཀྱི་ཁ་བསླུས། སྤྱི་བདེ་དང་། ཞིབ་དཔྱོད། ཁྲིམས་ཁང་བཅས་ཡིན་ཁུལ་བྱེད་པའི་ཁ་བསླུས་སོགས་མང་པོ་ཐོན་གྱི་ཡོད་པས། རྒྱ་ཆེའི་མང་ཚོགས་ཚོས་ངེས་པར་དུ་དོགས་ཟོན་ཆེན་པོ་བྱས་ཏེ་མགོ་སྐོར་འོག་མི་ཚུད་པ་བྱེད་དགོས།
འགན་འཁུར་རྩོམ་སྒྲིག་པ། 次旦多吉