དུས་ཚོད་ནི་སྐད་ཅིག་ཉིད་དུ་འདས། 2021ལོའི“རྒྱལ་ཡོངས་ཀྱི་ཚོགས་འདུ་གཉིས”འཆར་ལ་ཉེ།

འདས་ཟིན་པའི་ལོ་གཅིག་རིང་། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་བདུན་པ་རྒྱལ་ཁའི་ངང་འཚོགས་ཏེ་དུས་རབས་གསར་པའི་བོད་ཀྱི་ལས་དོན་ཡག་པོ་སྒྲུབ་པར་རྩ་བའི་གཞི་འཛིན་ས་མཁོ་འདོན་བྱས་ཡོད། རིམས་ནད་སྔོན་འགོག་དང་ཚོད་འཛིན་དང་དབུལ་སྒྲོལ་འགག་སྒྲོལ་སོགས་རྒྱུ་རྐྱེན་མང་པོ་གཅིག་མཇུག་གཉིས་མཐུད་ཐོན་པའི་ཤུགས་རྐྱེན་འོག རང་སྐྱོང་ལྗོངས་ཏང་ཨུད་དང་སྲིད་གཞུང་གིས་ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་ཐབས་ཇུས་བཀོད་སྒྲིག་ལག་བསྟར་དོན་འཁྱོལ་གཏིང་ཟབ་བྱས་ནས་རྒྱུན་རྣམ་ཅན་གྱི་རིམས་ནད་སྔོན་འགོག་དང་ཚོད་འཛིན་དང་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱི་ལས་དོན་ཁག་ལ་སྤྱི་འདོམས་སྐུལ་འདེད་བཏང་བས། དཔལ་འབྱོར་གྱི་དམིགས་ཚད་གཙོ་བོ་བརྟན་པོའི་ངང་འཕར་བ་དང་སྤྱི་ཚོགས་སྤྱི་ཡོངས་རྒྱུན་མཐུད་ཞི་མཐུན་བརྟན་ལྷིང་བྱུང་ཡོད།

མི་དམངས་མང་ཚོགས་ཀྱི་ཐོབ་སྣང་རྒྱུན་ཆད་མེད་པར་ཆེ་རུ་ཕྱིན་པ།

2020ལོའི་ལོ་འགོར། ཏོག་གསར་གློ་ཚད་རིམས་ནད་ཐོན་ནས་དུ་བ་མེད་པའི་དམག་འཐབ་ཅིག་རྒྱལ་ཡོངས་སུ་རྒྱག་འགོ་ཚུགས་ཡོད། ལྗོངས་ཡོངས་ཀྱི་གོང་འོག་ཚང་མས་རིམས་ནད་སྔོན་འགོག་དང་ཚོད་འཛིན་ཁྲོད་ཐོག་མའི་བསམ་འདུན་དང་འགན་འཁྲི་ལག་ལེན་ཧུར་ཐག་བསྟར་ཏེ་སེམས་པ་གཅིག་ཏུ་སྒྲིལ་ནས་ཁ་གཏད་ཧུར་ཐག་འཇལ་ཡོད།

2020ལོར་རང་སྐྱོང་ལྗོངས་ཀྱིས་ཏང་ཀྲུང་དབྱང་དང་རྒྱལ་ཡོངས་མི་དམངས་ཀྱི་རྒྱུན་མཐུད་རྒྱབ་སྐྱོར་དང་རོགས་རམ་འོག ལོ་རྒྱུས་རང་བཞིན་གྱི་སྒོ་ནས་དབུལ་པོ་དབུལ་རྐྱང་གི་གནས་ལས་བསྒྲལ་ཡོད། བོད་ཀྱི་བུ་ཕྲུག་ཁྲི་350ལྷག་ཙམ་གྱི་འབད་འབུངས་ཡར་བརྩོན་ལས་སྤུས་ཚད་མཐོ་བའི་འཕེལ་རྒྱས་ཆེད་གསོན་ཤུགས་ཆེན་པོ་ཞིག་སྦྱིན་ཡོད།

“དེ་སྔ་གྲོང་ཚོའི་ནང་མི་ཕྱུགས་གཉིས་ཀས་ཆུ་ཁུངས་གཅིག་གི་ཆུ་འཐུང་གི་ཡོད། ད་ཆ་གྲོང་ཚོའི་ནང་གི་དུད་ཚང་123ཚང་མ་སྡོད་ཁང་གསར་པའི་ནང་སྤོས་ནས་མི་523ཚང་མར་བདེ་འཇགས་ལྡན་པའི་འཐུང་ཆུ་སྤྱོད་རྒྱུ་བྱུང་བ་མ་ཟད། ད་དུང་གྲོང་ཚོའི་ནང་ཐོན་ལས་མང་པོ་ཞིག་འཕེལ་རྒྱས་བཏང་ཡོད”ཅེས་ས་དགའ་རྫོང་འཕྲང་སྒོ་ཤང་གཡག་གཡག་གྲོང་ཚོའི་ཏང་ཀྲི་པུའི་ཧྲུའུ་ཅི་ཀུན་དགས་དེ་ལྟར་བཤད།

ཀུན་དགས་རང་ལྗོངས་ཀྱི་ཞིང་འབྲོག་མང་ཚོགས་ཚོའི་སྐྱིད་སྣང་དང་ཐོབ་སྣང་རྒྱུན་ཆད་མེད་པར་ཆེ་རུ་ཕྱིན་པ་བརྗོད་ཡོད། 2020ལོར་རང་ལྗོངས་ཀྱི་ཐོན་སྐྱེད་རིན་ཐང་བསྡོམས་འབོར་སྒོར་དུང་ཕྱུར་1800ལྷག་ཙམ་ཟིན་པ་དང་མི་རེའི་ས་ཁུལ་གྱི་ཐོན་སྐྱེད་རིན་ཐང་བསྡོམས་འབོར་སྒོར་50000ལྷག་ཙམ་ཟིན་པ་དེ་2015ལོ་ལས་52.6%དང་40%སོ་སོར་འཕར་བ་དང་། མི་དམངས་ཀྱི་འཚོ་བའི་ཆུ་ཚད་ཕྱོགས་ཡོངས་ནས་མཐོ་རུ་ཕྱིན་ཏེ། 2020ལོའི་གྲོང་ཁྱེར་དང་གྲོང་གསེབ་ཀྱི་གྲོང་མི་མི་རེའི་ཆ་སྙོམས་བཀོལ་སྤྱོད་ཆོག་པའི་ཡོང་འབབ་སྔོན་དཔག་བྱས་ན་སྒོར་40777དང་སྒོར་14583ཟིན་པ་དེ་2015ལོའི་ལྡབ་1.6དང་ལྡབ་1.8སོ་སོ་ཡིན་པ། ལོ་6བསྟུད་མར་རང་ལྗོངས་ཀྱི་གྲོང་གསེབ་ཀྱི་གྲོང་མིའི་ཡོང་འབབ་འཕར་ཚད་རྒྱལ་ཡོངས་ཀྱི་ཨང་དང་པོར་སླེབས་ཡོད།

བློ་གཅིག་སེམས་གཅིག་གིས་བདེ་སྐྱིད་དང་བདེ་འཇགས་ཀྱི་ལེའུ་གསར་པ་བརྩམས་པ།

ལྷ་ས་གྲོང་ཁྱེར་ཆུ་ཤུར་རྫོང་དུ་གནས་པའི་ར་སྟོད་དགོན་གྱི་ཆུ་དང་། གློག ལམ་སོགས་རྨང་གཞིའི་སྒྲིག་བཀོད་ཆ་ཚང་བ་དང་། གྲྭ་ཤག་རྒྱ་ཆེ་ལ་དཀར་ཆ་དོད་པ། དགོན་པའི་ནང་གཙང་སྦྲ་དོད་ལ་གྲལ་འགྲིག་པ་བཅས་ཡོད། “ཐོས་བསམ་བྱེད་པའི་ཆ་རྐྱེན་ཡག་པོ་འདི་འདྲ་ཡོད་པ་ནི་ཏང་གི་ཆོས་ལུགས་སྲིད་ཇུས་དང་ཁ་བྲལ་ཐབས་མེད། ང་ཚོའི་དགོན་པའི་གྲྭ་དམངས་ཚོས་ཐོས་བསམ་བྱེད་རིང་དང་འཚོ་བ་སོགས་གང་ཅིའི་ཐད་ནས་ཏང་དང་སྲིད་གཞུང་གི་དྲོ་སྐྱིད་ཚོར་གྱི་འདུག”ཅེས་ར་སྟོད་དགོན་དོ་དམ་ཨུ་ལྷན་གྱི་ཀྲུའུ་རེན་གཞོན་པ་ངག་དབང་གྲགས་པས་ཚོར་སྣང་ཟབ་མོས་བཤད།

ར་སྟོད་དགོན་ནི་རང་ལྗོངས་ཀྱི་ཆོས་ལུགས་ཞི་མཐུན་དང་། བསྟན་དོན་ལམ་ལྷོངས། དགོན་སྡེ་ཞི་མཐུན་བཅས་ཀྱི་བསྡུས་རིས་ཤིག་རེད། ཉེ་བའི་ལོ་ཤས་རིང་རང་ལྗོངས་ཀྱིས་ཆོས་ལུགས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་དང་དུས་རབས་གསར་པའི་ཏང་གི་བོད་སྐྱོང་མཛད་ཇུས་ལག་བསྟར་དོན་འཁྱོལ་གཏིང་ཟབ་དང་། ཏང་གི་ཆོས་ལུགས་སྲིད་ཇུས་ལག་བསྟར་དོན་འཁྱོལ་གཏིང་ཟབ། ཁྲིམས་བཞིན་ཆོས་ལུགས་ལས་དོན་ལ་དོ་དམ་བཅས་བྱས་ཏེ“ཁྲིད་སྟོན”ཐད་འབད་བརྩོན་བྱས་ནས་ཆོས་ལུགས་སྤྱི་ཚོགས་རིང་ལུགས་སྤྱི་ཚོགས་དང་འཚམ་མཐུན་ཡོང་བར་ཁྲིད་སྟོན་ཧུར་ཐག་བྱས་ཡོད།

བོད་མེས་རྒྱལ་ལྷོ་ནུབ་ཀྱི་མཐའ་མཚམས་སུ་གནས་ཤིང་། མཐའ་མཚམས་མི་རིགས་ས་ཁུལ་ཡིན་ལ་ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་ཀྱི་གཡུལ་ས་གཙོ་བོ་ཡང་རེད། བློ་མཐུན་ཞི་ཅིན་ཕིང་གིས་སྲོག་ཤིང་གནང་བའི་ཏང་ཀྲུང་དབྱང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག ལྗོངས་ཡོངས་ཀྱི་གོང་འོག་ཚང་མས་ཐོག་མཐའ་བར་གསུམ་དུ་རྒྱལ་ཁབ་ཀྱི་བདེ་འཇགས་དང་སྤྱི་ཚོགས་བརྟན་ལྷིང་སྲུང་སྐྱོང་ཨང་དང་པོར་བཞག་སྟེ། སྤྱི་ཚོགས་རིང་ལུགས་ཀྱི་ལྟེ་བའི་རིན་ཐང་ལྟ་བ་ལག་བསྟར་དང་། འཐབ་རྩོད་ཀྱི་སྙིང་སྟོབས་དར་སྤེལ། འཐབ་རྩོད་ཀྱི་འཇོན་ཐང་ཆེ་རུ་གཏོང་བ། འགན་འཁྲི་དང་ལས་འགན་ཕྲག་ཏུ་འཁུར་བ། ཁ་ཕྲལ་ལ་ངོ་རྒོལ་བྱེད་པའི་འཐབ་རྩོད་གཏིང་ཟབ་སྤེལ་བ། ཁ་ཕྲལ་གཏོར་བཤིག་གི་བྱེད་སྤྱོད་ལ་འགོག་རྒོལ་དང་རྡུང་རྡེག་ཚ་ནན་གཏོང་བ། རྒྱལ་ཁབ་ཀྱི་བདེ་འཇགས་དང་སྤྱི་ཚོགས་བརྟན་ལྷིང་སྲུང་སྐྱོང་གི་ཟངས་གྱང་ལྕགས་རྩིག་བརྟན་དུ་གཏོང་བ་བཅས་བྱས་ཏེ། ས་མཐོའི་ས་གཞི་ཆེན་པོ་ཞི་མཐུན་ལྷིང་འཇགས་དང་མི་རིགས་ཁག་གི་མི་དམངས་བདེ་སྐྱིད་ཁམས་བཟང་ཡོང་བའི་འགན་ལེན་བྱས་ཡོད།

མི་རིགས་མཐུན་སྒྲིལ་ཡར་ཐོན་གྱི་གླུ་དབྱངས་ཕྱོགས་ཡོངས་ནས་ལེན་པ།

2020ལོའི་ཟླ་5ཚེས་1ཉིན《བོད་རང་སྐྱོང་ལྗོངས་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་སྲོལ་ཡིག》(གཤམ་དུ《སྲོལ་ཡིག》ཞེས་བསྡུ་རྒྱུ)དངོས་སུ་ལག་ལེན་བསྟར་བ་ལས། རང་ལྗོངས་རྒྱལ་ཡོངས་སུ་ས་གནས་ཁྲིམས་འཛུགས་རྣམ་པར་བརྟེན་ནས་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་འཛུགས་གཏོད་བྱེད་མཁན་ཞིང་ཆེན་ཨང་དང་པོར་གྱུར་པ་དང་རང་ལྗོངས་ཀྱིས་འབད་བརྩོན་ཆེན་པོས་མི་རིགས་མཐུན་སྒྲིལ་ཡར་ཐོན་དཔེ་བཟང་ཁུལ་སྐྲུན་པའི་རྒྱང་སྐྱོད་ལམ་གསར་པ་འགོ་བཙུགས་པ་མཚོན་གྱི་ཡོད།

ལྷ་ས་གྲོང་ཁྱེར་གྱི་རྒན་ཡོལ་ཞུས་པའི་ལས་བྱེད་པ་ཟླ་བས་འདི་ནི་བྱེད་སྟངས་བཟང་པོ་ངོ་མ་ཞིག་རེད། 《སྲོལ་ཡིག》གིས་ཁྲིམས་ལུགས་ཀྱི་ཐད་ནས་རང་ལྗོངས་ཀྱི་མི་རིགས་མཐུན་སྒྲིལ་གྱི་བྱ་གཞག་འཕེལ་རྒྱས་དེ་བས་ལེགས་སུ་གཏོང་བར་འགན་ལེན་བྱས་ཡོད་ཅེས་མྱོང་ཚོར་ཟབ་མོའི་སྒོ་ནས་བཤད།

ཉེ་བའི་ལོ་ཤས་རིང་། རང་ལྗོངས་ཀྱིས་མི་རིགས་ལས་དོན་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་རྣམ་བཤད་གལ་ཆེན་ཕྱོགས་ཡོངས་ནས་ལག་བསྟར་བྱས་ཏེ་བློ་བརྟན་འགྱུར་མེད་ངང་ཀྲུང་གོའི་ཁྱད་ཆོས་ལྡན་པའི་མི་རིགས་གནད་དོན་ཐག་གཅོད་བྱེད་པའི་ཡང་དག་པའི་ལམ་དུ་སྐྱོད་པ་དང་། མི་རིགས་མཐུན་སྒྲིལ་ཡར་ཐོན་གཏོད་འཛུགས་བྱེད་སྒོ་གཏིང་ཟབ་སྤེལ་བ། མི་རིགས་མཐུན་སྒྲིལ་གྱི་དྲིལ་བསྒྲགས་སློབ་གསོ་རྒྱ་ཁྱབ་སྤེལ་བ། “ཁ་འབྲལ་ཐབས་མེད་པ་གསུམ”གྱི་བསམ་བློ་མི་སེམས་སུ་གཏིང་ཟབ་ཟུག་པར་སྐུལ་འདེད་གཏོང་བ་བཅས་བྱས་པས། མི་རིགས་ཁག་གི་མི་དམངས་འཆམ་མཐུན་མཉམ་གནས་དང་། ཕྱར་བ་གྲུ་འདེགས། ཞི་མཐུན་འཕེལ་རྒྱས་བཅས་ཀྱི་རྣམ་པ་བཟང་པོ་ཞིག་ཆགས་ཡོད།

ད་ཆ་ས་མཐོའི་ས་གཞི་ཆེན་པོར་མཐུན་སྒྲིལ་གྱི་རོལ་དབྱངས་ཕྱོགས་ཡོངས་ནས་དཀྲོལ་བ་དང་། ཞི་མཐུན་གྱི་དབྱངས་རྟ་དེ་བས་སྙན་འཇེབས་ལྡན་པར་གྱུར་ཡོད། ལྗོངས་ཡོངས་ཀྱི་མི་རིགས་ཁག་གི་མང་ཚོགས་རྣམས་སེ་འབྲུའི་རྡོག་པོ་བཞིན་གོང་བུ་གཅིག་ཏུ་བསྒྲིལ་ནས་སེམས་མཐུན་ལག་སྦྲེལ་དང་། མཐུན་སྒྲིལ་འབད་འཐབ། གོང་བུ་འགྲིལ་ཤུགས་དང་ལྟེ་བར་ཕྱོགས་ཤུགས་ཆེ་རུ་གཏོང་བ་བཅས་བྱས་ཏེ་མཐུན་སྒྲིལ་དང་། འབྱོར་ཕྱུག ཤེས་དཔལ། ཞི་མཐུན། མཛེས་སྡུག་བཅས་ལྡན་པའི་སྤྱི་ཚོགས་རིང་ལུགས་དེང་རབས་ཅན་གྱི་བོད་ལྗོངས་གསར་པ་སྐྲུན་པའི་རྒྱང་སྐྱོད་ལམ་དུ་གོམ་ཞེང་ཆེན་པོས་མདུན་སྐྱོད་བྱེད་བཞིན་ཡོད།