བོད་རང་སྐྱོང་ལྗོངས་གནས་གཤིས་ལས་ཁུངས་ཀྱིས་ཟླ་1ཚེས་17ཉིན་གནས་ཚུལ་སྤེལ་བར་གཞིགས་ན། གཟའ་འཁོར་འདིའི(ཟླ་1ཚེས་18ནས་24ཉིན་བར)གཟའ་ལྷག་པ་དང་ཕུར་བུར་བོད་ཀྱི་དབུས་ཤར་རྒྱུད་དུ་གངས་འབབ་རྒྱུ་དང་། གངས་བབས་རྗེས་དྲོད་ཚད་མངོན་གསལ་དོད་པོས་ཆག་རྒྱུ་རེད་འདུག གནམ་གཤིས་སྡེ་ཚན་གྱིས་འབྲེལ་ཡོད་སྡེ་ཚན་ལ་གངས་གསོག་ཐེབས་པ་དང་ཁྱགས་པ་བརྒྱབ་པ་ལས་འགྲིམ་འགྲུལ་སྐྱེལ་འདྲེན་ཐད་ཤུགས་རྐྱེན་ཐེབས་པར་དོགས་ཟོན་བྱེད་དགོས་པ་དང་། གཟའ་འཁོར་འདིའི་ནང་དྲོད་ཚད་འཕར་ཆག་ཆེ་བ་དང་ལྷགས་པ་ཆེ་བའི་གནམ་གཤིས་སྟོན་མང་བས། སྤྱི་དམངས་ཚོས་གྲང་འགོག་དྲོད་སྲུང་བྱ་རྒྱུར་དོ་སྣང་བྱེད་དགོས་པ་མ་ཟད། འབྲེལ་ཡོད་སྡེ་ཚན་གྱིས་གྲོང་ཁྱེར་གྱི་མདོང་ལམ་ལ་ཁྱགས་པ་མི་ཐེབས་པ་བྱེད་དགོས་པ་དང་སྦྲགས། ནགས་ཚལ་དང་རྩྭ་ཐང་གི་མེ་འགོག་ལས་དོན་ཡག་པོ་བསྒྲུབ་དགོས་པའི་དྲན་སྐུལ་བྱས་ཡོད།

རང་སྐྱོང་ལྗོངས་གནམ་གཤིས་ལས་ཁུངས་ཀྱི་ལྟ་ཞིབ་ཚད་ལེན་གྱི་སྔོན་བརྡ་ལས་མངོན་པར་གཞིགས་ན། གཟའ་འཁོར་འདིའི་གཟའ་ཟླ་བ་དང་མིག་དམར་ལ་ཉིང་ཁྲི་དང་ལྷོ་ཁའི་ལྷོ་རྒྱུད་དུ་སྤྲིན་པ་མང་པོ་འཁོར་རྒྱུ་དང་། ས་ཆ་ཁག་གཅིག་ལ་གངས(ཆར་པ)ཆུང་བ་འབབ་རྒྱུ། དེ་མིན་གྱི་ས་ཁུལ་གཞན་ལ་གནམ་དྭངས་ནས་སྤྲིན་པ་ཉུང་བ་འཁོར་རྒྱུ།

གཟའ་ལྷག་པ་དང་ཕུར་བུར་ཉིང་ཁྲི་དང་ནག་ཆུའི་དབུས་ཤར་རྒྱུད་དང་། ཆབ་མདོར་གངས(ཆར་པ)ཆུང་བ་འབབ་རྒྱུ་དང་། ས་ཆ་ཁག་གཅིག་ལ་གངས་འབྲིང་བ་འབབ་རྒྱུ། ལྷ་ས་དང་ལྷོ་ཁར་གནམ་འཐིབས་ནས་གངས་ཆུང་བ་འབབ་རྒྱུ། ས་བབ་མཐོ་བའི་ས་ཆ་ཁག་གཅིག་ལ་གངས་འབྲིང་བ་འབབ་རྒྱུ། དེ་མིན་གྱི་ས་ཁུལ་གཞན་ལ་གནམ་དྭངས་ནས་སྤྲིན་པ་མང་པོ་འཁོར་རྒྱུ།

གཟའ་སྤེན་པ་དང་ཉི་མར་མངའ་རིས་སུ་སྤྲིན་པ་མང་པོ་འཁོར་རྒྱུ་དང་། ས་ཁུལ་གཞན་ལ་གནམ་དྭངས་ནས་སྤྲིན་པ་ཉུང་བ་འཁོར་རྒྱུ། གཞན་ཡང་གཟའ་འཁོར་འདིའི་ནང་ནག་ཆུ་དང་། མངའ་རིས། གཞིས་རྩེའི་ལྷོ་རྒྱུད་ཀྱི་ས་བབ་མཐོ་བའི་ས་ཆར་ལྷགས་པ་ཆེ་བ་རིམ་པ་7ནས་8བར་རྒྱག་རྒྱུ། གཞིས་རྩེ་དང་། ལྷོ་ཁ། ལྷ་སའི་ཡར་ཀླུང་གཙང་པོ་རྒྱུག་ཁུལ་དུ་ལྷགས་པ་རིམ་པ་4ནས་5བར་རྒྱག་རྒྱུ།

སྔོན་དཔག་བྱས་ན། གཟའ་འཁོར་འདིའི་ནང་ཉིང་ཁྲི་དང་། ནག་ཆུའི་ཤར་རྒྱུད། ལྷོ་ཁ་བཅས་ལ་ཆ་སྙོམས་གངས་སམ་ཆར་པ་འབབ་ཚད་ཅུང་མང་བ་དང་ས་ཁུལ་གཞན་ལ་རྒྱུན་གཏན་ལས་ཅུང་ཉུང་བ་ཡོད།ལྗོངས་ཡོངས་སུ་གཟའ་འཁོར་འདིའི་ཆ་སྙོམས་དྲོད་ཚད་ཅུང་མཐོ་ཙམ་ཡོད་པ་རེད།