ཉེ་བའི་ལོ་ཤས་རིང་། ཏང་ཀྲུང་དབྱང་གི་བྱམས་བརྩེའི་ཐུགས་ཁུར་དང་། རང་སྐྱོང་ལྗོངས་དང་གྲོང་ཁྱེར་ཏང་ཨུད་དང་སྲིད་གཞུང་གི་འགྱུར་མེད་སྟོབས་ལྡན་གྱི་འགོ་ཁྲིད་འོག ལྷ་ས་གྲོང་ཁྱེར་འགྲིམ་འགྲུལ་སྐྱེལ་འདྲེན་ཅུས་ཀྱིས་ལྷ་སའི་འགྲིམ་འགྲུལ་སྐྱེལ་འདྲེན་བྱ་གཞག་རྒྱུན་མཐུད་ངང་འཕེལ་རྒྱས་འགྲོ་རྒྱུར་སྐུལ་འདེད་ཏན་ཏིག་བཏང་བས། “འཇུར་མིག་ཚོད་འཛིན”ནས“སྤྱིར་ན་འཚམ་པའི”འཕེལ་རྒྱས་གཏོང་སྟངས་སུ་བསྒྱུར་བ་དང་། “འཚོལ་ཞིབ་བྱེད་འགོ་ཚུགས་པ”ནས“མགྱོགས་མྱུར་འཕེལ་རྒྱས་འགྲོ་བའི”བར་བར་བརྒལ་བྱུང་སྟེ། འབྱོར་འབྲིང་སྤྱི་ཚོགས་ཕྱོགས་ཡོངས་ནས་བསྐྲུན་པར་འགྲིམ་འགྲུལ་སྐྱེལ་འདྲེན་གྱི་སྔོན་སྐྱོད་སྒུལ་ཤུགས་འདང་ངེས་མཁོ་འདོན་བྱས་ཡོད།

བསྡོམས་རྩིས་བྱས་པར་གཞིགས་ན། ཀྲུང་དབྱང་གི་བོད་ཀྱི་ལས་དོན་སྐོར་གྱི་བཞུགས་མོལ་ཚོགས་འདུ་ཐེངས་དྲུག་པ་འཚོགས་ཚུན། ལྷ་སའི་འགྲིམ་འགྲུལ་ལས་གྲྭའི་ཁྱབ་ཁོངས་སུ་མ་དངུལ་སྒོར་དུང་ཕྱུར་530ལྷག་ཙམ་བཏང་ནས་རྣམ་གྲངས་168ལག་བསྟར་བྱས་པ་དང་དེ་དག་ལམ་ཐིག་སྤྱི་ལེ་3700ལྷག་ཙམ་དང་འབྲེལ་བ་ཡོད། ཁོངས་གཏོགས་ཁུལ་གྱི་གྲོང་གསེབ་གཞུང་ལམ་དུ་རླངས་འཁོར་ཤར་གཏོང་ཐུབ་པའི་ལམ་ཐག་སྤྱི་ལེ་4646.6ཟིན་པ་དེ། 2015ལོའི་ལོ་མཇུག་ལས་སྤྱི་ལེ་531འཕར་བ་དང་རིམ་མཐོའི་གཞུང་ལམ་དུ་རླངས་འཁོར་ཤར་གཏོང་ཐུབ་པའི་ལམ་ཐག་སྤྱི་ལེ་200ལྷག་ཙམ་ཟིན་ཡོད། ཁོངས་གཏོགས་ཁུལ་གྱི་ཤང་གྲོང་དང་སྲིད་འཛིན་གྲོང་ཚོར་རླངས་འཁོར་ཤར་གཏོང་ཐུབ་ཚད་100%ཟིན་པ་དང་། འགྲུལ་སྐྱེལ་རླངས་འཁོར་ཤར་གཏོང་ཐུབ་ཚད་100%ཟིན་པ། རང་བྱུང་གྲོང་ཚོར་རླངས་འཁོར་ཤར་གཏོང་ཐུབ་ཚད་100%ཟིན་པ་རེད། འགྲོ་ལམ་སྐྱེལ་འདྲེན་ཁྲོམ་ར་དབྱར་མཚོ་རྒྱས་པ་ལྟར་འཕེལ་རྒྱས་ཕྱིན་ནས་རིགས་ཁག་གི་འགྲོ་ལམ་སྐྱེལ་འདྲེན་ཁེ་ལས་500ཙམ་ཟིན་པ་དང་། དེར་ལས་ཀ་བྱེད་མཁན་ཁྲི་3.5ཡོད། མི་སྣ་བཀོད་སྒྲིག་བྱེད་ཚད་རྒྱུན་ཆད་མེད་པར་ལེགས་སུ་ཕྱིན་པ་དང་། ལས་རིགས་བཀོད་སྒྲིག་གི་ལུགས་མཐུན་རང་བཞིན་ཆེ་རུ་ཕྱིན་པ། ཁྲོམ་རའི་སྤྱི་ཡོངས་བརྟན་པོ་དང་སྐྱོན་བྲལ་ངང་གོང་འཕེལ་འགྲོ་བཞིན་ཡོད།

2016ལོ་ནས་བཟུང་ལྷ་ས་གྲོང་ཁྱེར་གྱིས་གྲོང་གསེབ་ཀྱི་གཞུང་ལམ་འཛུགས་སྐྲུན་རྣམ་གྲངས་88སྔ་རྗེས་སུ་ལག་བསྟར་བྱས་པ་དང་། མ་དངུལ་བསྡོམས་སྒོར་དུང་ཕྱུར་14.3གཏོང་རྒྱུའི་མཆན་བཀོད་བཀའ་ལན་སྤྲད་ནས་ལམ་ཐག་སྤྱི་ལེ་712.3བསྐྲུན་པས། ཁོངས་གཏོགས་ཁུལ་དང་ལྷག་པར་དུ་གྲོང་གསེབ་ས་ཁུལ་གྱི་གཞུང་ལམ་ཤར་གཏོང་ནུས་པ་མངོན་གསལ་དོད་པོས་ཆེ་རུ་ཕྱིན་ཡོད། ལྷ་ཉིང་རིམ་མཐོའི་གཞུང་ལམ་དང་ལྷ་སའི་གྲོང་སྐོར་ལམ་སོགས་གཙོ་གནད་རྣམ་གྲངས་ཁག་གཅིག་སྔ་རྗེས་སུ་བསྐྲུན་ནས་རླངས་འཁོར་ཤར་གཏོང་ཐུབ་པ་དང་། ས་ཁོངས་དབར་གྱི་ཕྱོགས་རྐྱང་པའི་རླངས་འཁོར་ཤར་གཏོང་དུས་ཚོད་ཅུང་ཐུང་དུ་ཕྱིན་ཡོད། ཉེ་དུས་རང་སྐྱོང་ལྗོངས་ཀྱིས་སླར་ཡང་ལྷ་ས་གྲོང་ཁྱེར་གྱི་ཁོངས་གཏོགས་ཁུལ་དུ་གཙོ་གནད་གཞུང་ལམ་འཛུགས་སྐྲུན་རྣམ་གྲངས་མང་པོ་ལག་བསྟར་བྱས་པ་དང་། མ་འཇོག་བསྡོམས་འབོར་སྒོར་དུང་ཕྱུར་266.129གཏོང་རྒྱུའི་མཆན་བཀོད་བཀའ་ལན་སྤྲད་ནས་ལམ་ཐག་སྤྱི་ལེ་473.628བསྐྲུན་པ་དང་། མིག་སྔའི་བར་རིམ་རྩིས་བྱས་ན་གཙོ་གནད་རྣམ་གྲངས་ལས་མི་ཐེངས་ཁྲི་1.35ལྷག་ཙམ་ལས་ཞུགས་གཞན་སྒྱུར་ཐུབ་ནས་འབབ་འཕར་སྒོར་དུང་ཕྱུར་1.2ཡོང་རྒྱུར་སྐུལ་ཁྲིད་ཐུབ་ཡོད།