འདི་ནི་སུན་ཧྥུའུ་ཆིང་དང་བཟའ་ཟླ་སྐལ་བཟང་ཡིན་པ།

1948ལོར། ལོ་19ལ་སླེབས་པའི་ང་རང་ཧོ་ནན་ཁྲང་ཀོ་རྫོང་དུ་ཀྲུང་གོ་མི་དམངས་བཅིངས་འགྲོལ་དམག་གི་དམག་སྡེ་བཅོ་བརྒྱད་ལ་ཞུགས་པ་དང་། དེ་རྗེས་བྱེས་འཐབ་དམག་སྡེ་གཉིས་པའི་ཧྲི་ཤོག་52པའི་མདའ་ཤོག་154པའི་ཆབ་སྲིད་པུའུ་རུ་ལས་སྒྱུར་བྱས་པ་ཡིན། 1950ལོར་དཔུང་སྡེས་སི་ཁྲོན་བཅིངས་འགྲོལ་གཏོང་རྒྱུའི་ལས་འགན་བསྒྲུབས་རྗེས་བོད་དུ་རྡོག་ཐོན་བྱེད་འགོ་ཚུགས།

བོད་ཞི་བས་བཅིངས་འགྲོལ་བཏང་རྗེས། ང་ཚོ་དཔུང་སྡེ་དང་མཉམ་དུ་བོད་ལྗོངས་གཞིས་རྩེའི་གྲོ་མོར་གཞུང་ལམ་དང་། མཛོད་ཁང་། དམག་སྒར་བཅས་སྐྲུན་པའི་ལས་ཀར་ཞུགས་ནས་མང་ཚོགས་ལ་འབྲུ་རིགས་སྤྲོད་ཐུབ་པ་བྱས་པ་ཡིན། གྲོ་མོར་སྡོད་པའི་ལོ་གསུམ་ནང་། བོད་ཀྱི་བབ་ཆགས་པའི་དམངས་སྲོལ་གྱིས་ང་ལ་བག་ཆགས་ཟབ་མོ་བཞག་བྱུང་ལ། ས་གནས་དེ་གའི་ལས་བྱེད་པ་དང་མང་ཚོགས་དབར་གྱི་མཛའ་གྲོགས་ཀྱང་ཟབ་ཏུ་ཕྱིན་སོང་། དེ་ནས་ཚེ་གང་གཏན་གྲོགས་ཀྱི་བཟའ་ཟླ་དང་ཡང་གཉེན་སྒྲིག་ཐུབ་སྟེ་མི་རིགས་མཐུན་སྒྲིལ་གྱི་ཁྱིམ་ཚང་ཞིག་གྲུབ།

བོད་ཀྱི་མི་རིགས་ཁག་གི་མང་ཚོགས་ཀྱི་ཡུལ་སྲོལ་གོམས་གཤིས་ཤེས་རྟོགས་དེ་བས་ཟབ་པ་དང་། བོད་ཀྱི་འཕེལ་རྒྱས་ཁྲོད་དེ་བས་མཉམ་འདྲིས་ཐུབ་པ། བོད་ཀྱི་འཛུགས་སྐྲུན་ནང་ཞུགས་ཐུབ་པ་བཅས་བྱ་ཆེད། དཔུང་སྡེས་ང་ཚོ་བློ་མཐུན་ཁག་གཅིག་སྒྲིག་འཛུགས་བྱས་ནས་གཞིས་རྩེར་བོད་ཡིག་སྦྱོང་བར་བཏང་བྱུང་། དེ་དུས་གཞིས་རྩེ་ནས་ངའི་བཟའ་ཟླ་སྐལ་བཟང་དང་ངོ་ཤེས་བྱུང་།

ངེད་གཉིས་ལོ་ཕྱེད་ཙམ་འགྲོགས་རྗེས་1956ལོའི་ལོ་མཇུག་ཏུ་གཉེན་སྒྲིག་བྱ་རྩིས་བྱས། སྐལ་བཟང་དང་འདྲ་བའི་ནང་སར་རྒྱུས་མངའ་མེད་པ་དང་རྒྱ་རིགས་ཀྱི་རིག་གནས་ལ་རྒྱུས་མངའ་མེད་པའི་བོད་རིགས་བུ་མོ་ཞིག་གིས་ང་ལ་བརྩེ་སེམས་དེ་འདྲ་བཅངས་སྐབས་ངས་ཀྱང་བརྩེ་སེམས་ཟབ་མོས་ཁོང་ལ་ལྟ་རྟོག་གང་ཡག་མ་བྱས་ན་ག་ནས་འགྲིག་སྙམ་ཞིང་། གཉེན་སྒྲིག་བྱས་རྗེས། ང་དང་སྐལ་བཟང་རྩ་འཛུགས་ཀྱིས་ངམ་རིང་རྫོང་དུ་ལས་བགོས་བརྒྱབ་ཅིང་། རྒྱུན་གཏན་ལས་དོན་ཁྲོད་བོད་རིགས་མང་ཚོགས་ཀྱི་གཤིས་རྒྱུད་བཟང་པོས་ང་ལ་སེམས་འགུལ་ཆེན་པོ་ཐེབས་བྱུང་།

ང་ལ་བག་ཆགས་ཟབ་ཤོས་ནི། ང་རང་ངམ་རིང་རྫོང་ནས་རྟ་བཞོན་ཏེ་ལྷ་རྩེ་རྫོང་དུ་ཏར་སྐྱེལ་བར་སྐྱོད་སྐབས། བོད་རིགས་མང་ཚོགས་ལ་གནས་ཚང་གཡར་བའི་དོན་དེ་ཡིན། སྐབས་དེ་དུས། ངམ་རིང་རྫོང་ནས་རྟ་བཞོན་ཏེ་ལྷ་རྩེ་རྫོང་བར་ཉིན་གཉིས་འགོར་བས་མཚན་མོ་ལམ་རྒྱུད་ཀྱི་བོད་རིགས་མང་ཚོགས་ཀྱི་ཁྱིམ་དུ་གནས་ཚང་གཡར་དགོས་ཀྱི་ཡོད། ཁོང་ཚོས་རང་ཉིད་ལ་ཡོད་པའི་རྩམ་པ་ཏོག་ཙམ་དེ་ཡང་ང་ལ་སྦྱིན་པ་མ་ཟད། ད་དུང་ང་ལ་ཇ་བསྲུབས་མ་ཡང་སྟེར་བྱུང་། ལམ་བར་གྱི་ངལ་དུབ་དང་། བཀྲེས་ལྟོགས། གྲང་འཁྱག་བཅས་ཚང་མ་ཡལ་ནས་ལུས་པོ་ཚ་སོབ་སོབ་ཏུ་གྱུར་བས། ངས་ཀྱང་བོད་སྐད་ཐར་ཐོར་བརྒྱབ་བཞིན་དུ་ལག་བརྡ་བྱས་ཏེ་ཁོང་ཚོ་དང་གླེང་མོལ་བྱས། ས་རུབ་རྗེས་ཁོང་ཚོས་བའི་ཉལ་ས་ཁང་པའི་ནང་དུ་བཟོས་པ་དང་ཁོང་ཚོ་ཁང་པའི་ཕྱིར་ཉལ་སོང་། “ཏང་ཡོན་ལས་བྱེད་པ་ཞིག་ཡིན་པའི་ང་ཚོས་རང་ཉིད་ལ་དཀའ་སྡུག་ཇི་ཙམ་འཕྲད་ཀྱང་མང་ཚོགས་ལ་དཀའ་སྡུག་མྱོང་དུ་འཇུག་མི་རུང་། ཁྱོད་ཚོས་ང་ལ་གནས་ཚང་གཡར་བ་ཙམ་གྱིས་ཐུགས་རྗེ་ཆེ་ཞུ་རྒྱུ་ཡིན”ཞེས་བཤད་དེ་ཨུ་ཚུགས་བརྒྱབ་ནས་ང་རང་ཁང་པའི་ཕྱིར་ཉལ་བ་ཡིན།

ང་དང་སྐལ་བཟང་མི་རིགས་མི་འདྲ་བ་དང་གོམས་གཤིས་མི་འདྲ་ཡང་། ང་ཚོ་འཆམ་མཐུན་ངང་འཚོ་བ་སྐྱེལ་བཞིན་ཡོད། ད་ལྟ་ང་ཚོའི་བུ་ཕྲུག་བཞི་པོར་རང་རང་གི་ལས་ཀ་ཡོད་པ་མ་ཟད། མི་རིགས་མཐུན་སྒྲིལ་གྱི་ཁྱིམ་ཚང་ཡང་ཡིན།

མི་རིགས་ཁག་གི་མང་ཚོགས་ཀྱི་མཐུན་སྒྲིལ་མཉམ་ལས་དང་། འབད་བརྩོན་ལྷོད་མེད། ཐུན་མོང་འབད་འཐབ་བཅས་བརྒྱུད། བོད་ཀྱི་འབྱུང་འགྱུར་དེ་བས་མཛེས་སྡུག་ལྡན་པ་ཞིག་ཡོང་ངེས་ཡིན་པ་ང་ལ་ཡིད་ཆེས་ཡོད།

མི་སྣ་ངོ་སྤྲོད།

སུན་ཧྥུའུ་ཆིང་། སྐྱེས་པ། རྒྱ་རིགས། ཧོ་ནན་ཞིང་ཆེན་ཁྲང་ཀོ་རྫོང་ནས་ཡིན་པ། 1929ལོར་སྐྱེས། 1948ལོའི་ཟླ་11པར་ཀྲུང་གོ་མི་དམངས་བཅིངས་འགྲོལ་དམག་གི་དམག་སྡེ་བཅོ་བརྒྱད་ལ་ཞུགས་པ་དང་། 1949ལོའི་ཟླ་དང་པོར་བྱེས་འཐབ་དམག་སྡེ་གཉིས་པའི་ཧྲི་52པའི་མདའ་ཤོག་154པའི་ཆབ་སྲིད་པུའུ་རུ་ལས་སྒྱུར་བྱས། 1950ལོར་སི་ཁྲོན་བཅིངས་འགྲོལ་བཏང་རྗེས་གཡག་རྔ་ནས་བོད་དུ་དཔུང་འཇུག་བྱས། 1952ལོར་གཞིས་རྩེའི་གྲོ་མོར་ལམ་བཟོ་བ་དང་། མཛོད་ཁང་རྒྱག་པ། དམག་སྒར་རྒྱག་པ་བཅས་བྱས་ནས་1955ལོ་བར་ལས་ཀ་བྱས་ནས་བསྡད། 1957ལོའི་ལོ་མཇུག་ཏུ་བོད་ལྗོངས་སྤྱི་སློབ(ད་ལྟའི་བོད་ལྗོངས་མི་རིགས་སློབ་ཆེན)ཏུ་སློབ་སྦྱོང་བྱས། 1959ལོར་སླར་ཡང་བོད་དུ་ལོག་ནས་ངོ་ལོག་ཟིང་འཁྲུག་ཞོད་འཇགས་གཏོང་བའི་ནང་ཞུགས། ཕྱིས་སུ་རྩ་འཛུགས་ཀྱིས་འགྲམ་འགག་སྒོར་ལས་བགོས་བརྒྱབ་པ་དང་1982ལོར་རྒན་ཡོལ་ཞུས། ད་ཆ་བཟའ་ཟླ་སྐལ་བཟང་དང་མཉམ་དུ་ཁྲེང་ཏུར་བཞུགས་ཡོད།