ཉེ་བའི་ལོ་ཤས་རིང་། ཧུའུ་པེ་ཞིང་ཆེན་ཤང་དབྱང་གྲོང་ཁྱེར་གྱི་བོད་སྐྱོར་ལས་དོན་རུ་ཁག་ཁག་དགུ་པས་ཐབས་མང་མཉམ་སྤྱོད་བྱེད་རྒྱུ་མཐའ་འཁྱོངས་བྱས་ཏེ“མཉེན་ཆས”དང“མཁྲེགས་ཆས”གཉིས་ཀར་དོ་སྣང་བྱས་ནས། འཕྱོངས་རྒྱས་རྫོང་གི་སྨན་བཅོས་འཕྲོད་བསྟེན་བྱ་གཞག་འཕེལ་རྒྱས་ལ་རྒྱུན་མཐུད་རམ་འདེགས་བྱས་ཡོད།
ཐོན་ཁུངས་བསྡུ་སྒྲིལ་བྱས་ནས་མཁྲེགས་ཆས་ལེགས་སུ་བཏང་ཞིང་། འབྲེལ་ཡོད་སྨན་ཁང་དང་མཐུན་སྦྱོར་བྱས་ཏེ་འཕྱོངས་རྒྱས་རྫོང་མི་དམངས་སྨན་ཁང་ལ་གྲངས་འཛིན་རྣམ་པའི་བརྒྱུད་མང་སྙིང་པར་ཡོ་བྱད་དང་། CTPACSམ་ལག་སོགས་སྨན་བཅོས་སྒྲིག་ཆས་ཞལ་འདེབས་བརྒྱབ་ཡོད། སྨན་བཅོས་བོད་སྐྱོར་གྱི“དམག་ཧྲག”བཏོད་དེ་སྨན་བཅོས་བོད་སྐྱོར་ཤེས་ལྡན་པ་ཧྲག་འདེམས་བྱས་ནས་སྨན་བཅོས་བོད་སྐྱོར་ཤེས་ལྡན་པའི་ཆབ་སྲིད་ཚད་མཐུན་དང་། སྤྱོད་ཚུལ་བཟང་བ། གཟུགས་པོ་བདེ་ཐང་། ལག་རྩལ་ཡག་པ་བཅས་ཀྱི་འགན་ལེན་བྱས་ཡོད། གཟའ་འཁོར་རེར“ལས་ཀའི་གྲུབ་འབྲས་སྟོན་པའི”ལམ་ལུགས་བཟོས་ཏེ་སྨན་བཅོས་བོད་སྐྱོར་ཤེས་ལྡན་པས་ལས་དོན་ཧུར་ཐག་སྒྲུབ་རྒྱུར་སྐུལ་ལྕག་བྱས་ཡོད། སྨན་བཅོས་བོད་སྐྱོར་ཤེས་ལྡན་པར་འཚོ་བའི་སྒྲིག་བཀོད་སྤྲད་པ་དང་བོད་སྐྱོར་ཟ་ཁང་བསྐྲུན་ནས་འཚོ་བའི་ཐོབ་ཐང་ལེགས་སུ་བཏང་ཡོད། འཕེལ་རྒྱས་ལ་དམིགས་པ་དང་གསར་གཏོད་ལ་དམ་འཛིན་བྱས་ཤིང་། འཕྱོངས་རྒྱས་རྫོང་མི་དམངས་སྨན་ཁང་རིམ་པ་གཉིས་པའི་ཀ་པ་རིམ་པ་སོགས་ཀྱི་སྨན་ཁང་འཛུགས་གཏོད་ལ་རམ་འདེགས་བྱེད་རྒྱུ་དམིགས་ཚད་དུ་བཟུང་ནས། ཧུའུ་པེ་ཞིང་ཆེན་གྱི་ཕུལ་བྱུང་སྨན་ཁང་དོ་དམ་བྱེད་སྟངས་སྤྱད་དེ་སྨན་ཁང་དེར་སྨན་བཅོས་སྤུས་ཚད་དོ་དམ་དང་། སྨན་བཅོས་བདེ་འཇགས་དོ་དམ། སྨན་བཅོས་ལས་དོན་ཚད་ལྡན་སོགས་ཀྱི་ལམ་ལུགས་མ་ལག་འཛུགས་པ་དང་འཐུས་སྒོ་ཚང་དུ་གཏོང་རོགས་བྱས་ནས། ཤང་དབྱང་གྲོང་ཁྱེར་དང་འཕྱོངས་རྒྱས་རྫོང་གི་སྨན་བཅོས་ཐད་སྤེལ་རེས་གཏིང་ཟབ་དང་མཉམ་དུ་འཕེལ་རྒྱས་ཡོང་བར་སྐུལ་འདེད་བཏང་ཡོད།