འདི་ནི་ཆའོ་ཆའོ(གཡས་ཀྱི་གཉིས་པ)བཟའ་ཚོ་དང་ནང་སའི་གྲོགས་པོའི་མཉམ་པར་ཡིན་པ།

1959ལོར་ངས་ཉིང་ཁྲི་རྫོང་སྦེ་པ་གྲོང་རྡལ་སྦེ་པ་གྲོང་ཚོའི་འཕྲོད་བསྟེན་ཨུ་ཡོན་བྱས་པ་ཡིན། དེ་གོང་ང་དང་རྒྱ་རིགས་བློ་མཐུན་འབྲེལ་འདྲིས་བྱ་མྱོང་མེད་པས། རྒྱ་སྐད་ཤེས་རྒྱུ་ལྟ་ཅི་ཁོང་ཚོ་དང་སྤེལ་རེས་ཀྱང་བྱེད་ཤེས་ཀྱི་མེད། ཟླ་དྲུག་པའི་ཉིན་ཞིག་གོང་རིམ་ནས་ས་གནས་ཀྱི་གཞོན་ནུ་ཁག་གཅིག་ཧྲའན་ཤིས་བོད་ལྗོངས་སྤྱི་སློབ(ད་ཆའི་བོད་ལྗོངས་མི་རིགས་སློབ་ཆེན)དུ་སློབ་སྦྱོང་དུ་སྐྱོད་དགོས་པའི་བརྡ་ཐོ་འབྱོར་བ་དང་གྲོང་ཚོས་ང་ལ་ནང་སར་སློབ་སྦྱོང་དུ་སྐྱོད་དགོས་པའི་གྲ་སྒྲིག་བྱེད་དགོས་ཚུལ་བརྗོད་བྱུང་།

ཟླ་བ་གཅིག་གི་རྗེས་སུ་ང་དང་ལྗོངས་ཡོངས་ཀྱི་ས་གནས་ཁག་གི་སློབ་མ་800མཉམ་དུ་ལྷ་སར་དུས་ཡུན་ཟླ་བ་གསུམ་རྒྱ་སྐད་གསོ་སྦྱོང་ལ་ཞུགས་པ་ཡིན། གསོ་སྦྱོང་ཚར་རྗེས། རྒན་ལགས་ཀྱིས་ང་ཚོར“ནང་སར་སླེབས་རྗེས། ནང་སའི་སློབ་མ་དང་མཐུན་སྒྲིལ་ཡག་པོ་བྱེད་དགོས་པ་དང་སློབ་སྦྱོང་དང་འཚོ་བའི་ཐད་ཁོང་ཚོར་སྐད་ཆ་མང་ཙམ་འདྲི་དགོས་པ་མ་ཟད། སློབ་སྦྱོང་ཧུར་ཐག་བྱས་ཏེ་སྦྱངས་པའི་ཤེས་བྱར་བརྟེན་ནས་བོད་ལྗོངས་འཛུགས་སྐྲུན་དང་བོད་ལྗོངས་འཕེལ་རྒྱས་གཏོང་དགོས”ཞེས་བཀའ་སློབ་གནང་བྱུང་། རྒན་ལགས་ཀྱི་སྐུལ་ལྕག་འོག་ང་ཚོ་མགྱོགས་མྱུར་ནང་སར་སྐྱོད་ནས་སློབ་སྦྱོང་བྱ་རྒྱུ་བྱུང་ན་སྙམ་བྱུང་།

ལྷ་ས་ནས་རྡོག་ཐོན་བྱས་རྗེས། ང་ཚོ་རླངས་འཁོར་དུ་ཉིན་དགུ་བསྡད་རྗེས་ཀན་སུའུ་ལན་ཀྲོའུ་རུ་འབྱོར་བ་དང་། དེ་རྗེས་མེ་འཁོར་ལ་བསྡད་ནས་ཧྲའན་ཤིས་ཞན་དབྱང་དུ་བསྐྱོད་ནས་བོད་ལྗོངས་སྤྱི་སློབ་ཏུ་དངོས་སུ་སློབ་སྦྱོང་བྱེད་འགོ་བཙུགས་པ་ཡིན། ང་ཚོ་སློབ་མ་མང་པོ་ཞིག་སློབ་གྲྭ་འགྲིམ་མྱོང་མེད་པས། བོད་ཡིག་དང་རྒྱ་ཡིག་ཤེས་ཀྱི་མེད། ཐོག་མར་སློབ་གྲྭར་འབྱོར་སྐབས། སྐད་བརྡ་མི་འཕྲོད་པ་དང་ས་ཆ་མི་འཕྲོད་པས་ན་བ་དང་ལྟོ་མི་གོམས་པའི་ཁར་ལོ་ན་ཡང་ཧེ་བག་ཆེ་བ་དང་ཆུང་བ་ལོ་བཅུ་གྲངས་དང་ཆེ་བ་ལོ་ཉི་ཤུར་སླེབས་ཀྱི་ཡོད། དོན་དངོས་དེ་དག་ལ་དམིགས་ནས་སློབ་གྲྭས་དང་ཐོག་ང་ཚོའི་འཚོ་བར་དོ་དམ་བྱེད་དགོས་པ་ནན་བཤད་བྱས་པ་མ་ཟད། དགེ་རྒན་ལས་བཟོ་ཚོས་ང་ཚོར་སེམས་ཁུར་བྱས་ཏེ་ང་ཚོ་དང་མཉམ་དུ་ལྟོ་ཟ་བ་དང་། མཉམ་དུ་སྡོད་པ། མཉམ་དུ་ངལ་རྩོལ་བཅས་བྱས་ནས་སློབ་ཁྲིད་བྱེད་པ་དང་ཆབས་ཅིག་གསོ་སྦྱོང་ཡག་པོ་བྱེད་དགོས་པ་དང་རང་ཉིད་ཀྱི་གཅེན་གཅུང་བཞིན་ང་ཚོར་གཅེས་སྐྱོང་བྱེད་དགོས་པའི་རེ་བ་བཏོན་སོང་། སློབ་གྲྭའི་རྒྱ་རིགས་སློབ་མ་ཚོ་ཡང་ཧ་ཅང་སེམས་རྩ་འཁོལ་པོ་འདུག ཁོང་ཚོས་ང་ཚོ་བོད་ནས་ཡོང་བའི་སློབ་མར་རྒྱ་སྐད་སློབ་པ་དང་འཚོ་བའི་ཐད་ཐུགས་ཁུར་དང་རོགས་རམ་མང་པོ་བྱས་བྱུང་། ལོ་ཤས་སོང་རྗེས། རྒྱ་བོད་དགེ་སློབ་རྣམས་འཆམ་མཐུན་མཉམ་གནས་དང་མཐུན་སྒྲིལ་འཆམ་མཐུན་གྱི་ཁྱིམ་ཚང་ཆེ་མོའི་ནང་འཚོ་བ་སྐྱེལ་བས། ང་ཚོས་ཏང་དང་སྲིད་གཞུང་གི་ཐུགས་ཁུར་དང་སྤྱི་ཚོགས་རིང་ལུགས་ཁྱིམ་ཚང་ཆེ་མོའི་དྲོ་སྐྱིད་དངོས་འབྲེལ་ཚོར་བྱུང་།

རིག་གནས་ཤེས་བྱ་སློབ་སྦྱོང་བྱེད་པ་དང་ཆབས་ཅིག་སློབ་གྲྭས་ད་དུང་ང་ཚོར་མར་ཁེ་སི་རིང་ལུགས་ཀྱི་མི་རིགས་ལྟ་བ་དང་། ཆོས་ལུགས་ལྟ་བ། དེ་བཞིན་ཏང་གི་མི་རིགས་སྲིད་ཇུས་དང་བོད་ནི་མེས་རྒྱལ་གྱི་ཁ་འབྲལ་ཐབས་མེད་པའི་ཆ་ཤས་ཤིག་ཡིན་པ་སོགས་ཀྱི་ཆབ་སྲིད་སློབ་གསོ་སློབ་ཁྲིད་བྱས་ཤིང་། གྲ་སྒྲིག་འཛིན་གྲྭར་སློབ་སྦྱོང་ལོ་བཞི་བྱས་རྗེས། 1964ལོར་ང་རང་སློབ་གྲྭ་དེའི་ཞིང་ལས་ཚན་རིག་ཆེད་ལས་སུ་སློབ་སྦྱོང་ལ་བཏང་བྱུང་།

ཐེངས་ཤིག་སློབ་གྲྭའི་ཚགས་པར་གཉེར་སྐབས་ངས་སློབ་མ་ཀའོ་ཧྲུའུ་མིང་ངོ་ཤེས་ཤིང་། བྱད་བཞིན་བཟང་ལ་གཟུགས་སྟོབས་ཆེ་བའི་ཕོ་གཞོན་དེས་ང་ལ་བག་ཆགས་ཡག་པོ་བཞག་བྱུང་། ངོ་ཤེས་པ་དང་། དགའ་པོ་བྱེད་པ། འབྲལ་མི་ཕོད་པ་བཅས་ཀྱི་ཁྲོད་ང་གཉིས་ཀྱི་བརྩེ་དུང་ཟབ་ཏུ་ཕྱིན་ནས་ལས་དབང་གིས་སེམས་གཉིས་དམ་པོར་སྦྲེལ། 1967ལོར་ང་དང་ཀའོ་ཧྲུའུ་མིང་མཉམ་དུ་སློབ་གྲྭ་ཐོན་པ་དང་ངའི་ཤུགས་རྐྱེན་འོག་ང་དང་མཉམ་དུ་བོད་དུ་ལས་ཀར་ཡོང་བའི་སེམས་ཐག་བཅད། 1968ལོར་ང་གཉིས་ཆང་ས་བརྒྱབ་ནས་བདེ་སྐྱིད་འཚོ་བ་སྐྱེལ་འགོ་ཚུགས་པ་ཡིན།

བུ་བཙས་རྗེས་ང་དང་བཟའ་ཟླ་ལས་བྲེལ་དབང་གིས་ཕྲུ་གུ་ལྟ་ཁོམ་མེད་པས། ངའི་ཕ་མ་གཉིས་ལ་བཅོལ་བ་ཡིན། ཁོར་ཡུག་དེ་འདྲའི་ཁྲོད་ཆུང་དུས་ནས་བུས་རྒྱ་སྐད་དང་བོད་སྐད་རྒྱག་ཤེས་པ་མ་ཟད། མི་རིགས་མཐུན་སྒྲིལ་གྱི་འདུ་ཤེས་བུའི་སེམས་ལ་དམ་པོར་ཟུག་ཡོད།

འགྲིམ་འགྲུལ་སྟབས་བདེ་མེད་པ་དང་། དངོས་ཟོག་དཀོན་པ། བཟའ་བཅའ་དཀོན་པ་བཅས་ཀྱི་ལོ་རབས་སུ་བོད་དང་ནང་ས་འབྲེལ་བ་བྱེད་ཁག་པོ་ཡོད། དེ་ལྟར་ཡིན་རུང་རྒྱ་རིགས་ལས་བྱེད་པས་ནང་ས་ནས་བསྐུར་བའི་བཟའ་རིགས་སྣ་ཚོགས་ང་ཚོར་ཕངས་སེམས་མེད་པར་བགོ་གི་ཡོད། བརྗེད་པར་དཀའ་བ་ཞིག་ལ། ཟླ་མཆོད་དུས་ཆེན་ཞིག་ལ་རྒྱ་རིགས་བློ་མཐུན་ཞིག་གིས་ནང་ས་ནས་བསྐུར་བའི་ཟླ་མཆོད་བག་ལེབ་ང་ཚོར་སྟེར་བྱུང་། སྦྲག་ཐོག་ནས་བསྐུར་ཙང་ཟླ་མཆོད་བག་ལེབ་ཞིབ་ཞིབ་ཆགས་འདུག་པས། ཚང་མས་ཆོབ་དང་བཅས་དེ་ནི་བཟོ་ལྟ་དཔེ་གསར་གྱི་ཟླ་མཆོད་བག་ལེབ་རེད། གཞན་ལ་ཟ་བའི་བསོད་བདེ་མེད་ཅེས་བཤད།

1994ལོར་ང་དང་བཟའ་ཟླ་རྒན་ཡོལ་ཞུས་པ་ཡིན། རྒན་ཡོལ་ཞུས་རྗེས་ང་ཚོས་ཁྱིམ་གྱི་སྒོ་རའི་ནང་ཤིང་འབྲས་བཏབ་པ་དང་། ཉིན་ལྟར་རྩྭ་ངན་བཀོག་པ་དང་ལུད་རྒྱག་པ། ཡལ་གཅོད་རྒྱག་པ་སོགས་བྱེད་ཀྱི་ཡོད། བུས་རྒྱུན་དུ་ཚ་བོ་དང་ཚ་མོ་ཁྲིད་ནས་ང་ཚོར་ལྟ་བར་ཡོང་སྟེ། ནང་མི་ཚང་མ་དགའ་སྤྲོ་འཆམ་མཐུན་ངང་སྡོད་ཀྱི་ཡོད།

ལོ་78ལ་སླེབས་པས་ངས་ད་ཆ་ལས་ཀ་ལྕི་པོ་བྱེད་མི་ཐུབ་རུང་། མི་རིགས་མཐུན་སྒྲིལ་གྱི་གཏམ་རྒྱུད་ན་གཞོན་ཚོར་བརྗོད་ནས་ཁོང་ཚོས་མི་རིགས་མཐུན་སྒྲིལ་ལ་གཅེས་སྤྲས་བྱེད་པ་དང་ལས་སླ་པོར་བྱུང་བ་ཞིག་མིན་པའི་ད་ཆའི་བདེ་སྐྱིད་འཚོ་བར་གཅེས་སྤྲས་བྱེད་དགོས་པའི་སློབ་གསོ་ཁྲིད་སྟོན་བྱེད་ཀྱི་ཡོད། ང་ཚོའི་བོད་ཀྱི་འབྱུང་འགྱུར་དེ་བས་མཛེས་སྡུག་ལྡན་པ་ཞིག་ཡོང་བའི་སྨོན་འདུན་ཞུ་རྒྱུ་ཡིན། (བདེ་ཆེན་སྒྲོལ་དཀར་གྱིས་བསྒྱུར། པ་སངས་ཀྱིས་ཞུས)

མི་སྣ་ངོ་སྤྲོད།

ཆའོ་ཆའོ། བུད་མེད། བོད་རིགས། ཉིང་ཁྲི་གྲོང་ཁྱེར་བྲག་ཡིབ་ཆུས་ནས་ཡིན་པ། 1942ལོའི་ཟླ་10པར་སྐྱེས། 1959ལོའི་ཟླ་7པར་ཀྲུང་གོ་གུང་ཁྲན་ཏང་ལ་ཞུགས་པ་དང་ལོ་དེར་བོད་ལྗོངས་སྤྱི་སློབ་ཏུ(ད་ཆའི་བོད་ལྗོངས་མི་རིགས་སློབ་ཆེན)སློབ་སྦྱོང་ལ་བསྐྱོད། སློབ་གྲྭ་ཐོན་རྗེས་ཁོང་ཉིང་ཁྲིར་ལོག་པ་དང་སྔ་རྗེས་སུ་སྤོ་བོ་རྫོང་ཁྲབ་རྨོག་གྲོང་རྡལ་དང་། ཉིང་ཁྲི་རྫོང་གྲོ་འཐག་བཟོ་གྲྭ ཀོང་པོ་རྒྱ་མདའ་རྫོང་ཞིང་འབྲོག་ཅུས། ཉིང་ཁྲི་ས་ཨུད་གཞུང་ལས་ཁང་སོགས་ཀྱི་ཚན་པར་ལས་ཀ་བྱས། 1994ལོའི་ཟླ་7པར་ཉིང་ཁྲི་ས་ཨུད་གཞུང་ལས་ཁང་གི་ཁོའོ་ཡོན་ལས་གནས་ནས་རྒན་ཡོལ་ཞུས་པ་དང་ད་ཆ་ཉིང་ཁྲི་གྲོང་ཁྱེར་བྲག་ཡིབ་ཆུས་སུ་ཚེ་མཇུག་གི་བདེ་སྐྱིད་འཚོ་བར་རོལ་བཞིན་ཡོད།