ནང་མི་9ཡོད་པའི་ཁྱིམ་ཚང་ཞིག་གི་ནང་ཧུད་རིགས་དང་། བོད་རིགས། རྒྱ་རིགས་བཅས་མི་རིགས་3ཡོད་ལ་ནང་མི་ཚང་མས་ཕན་ཚུན་གྱི་ཡུལ་སྲོལ་གོམས་གཤིས་དང་ཆོས་དད་ལ་བརྩི་འཇོག་བྱས་ནས་མཉམ་དུ་བདེ་སྐྱིད་ལྡན་པའི་འཚོ་བར་རོལ་བཞིན་ཡོད།

ཁྱོ་ཤུག་གིས་མཉམ་དུ་བོད་རིགས་བུ་ཞིག་གསོས་པ། 

དུས་རབས་གོང་མའི་ལོ་རབས་60ཡི་ནང་དུ། ཧཱ་ལི་མཱ་དང་ཀྲའོ་པོ་ནེང་གཉེན་སྒྲིག་བྱས་ནས་ཡུན་རིང་མ་སོང་བར་ཁོང་གཉིས་ལ་བུ་ཞིག་སྐྱེས། ཀྲའོ་པོ་ནེང་ནི་རྒྱལ་ཁབ་ཀྱི་ལས་བྱེད་པ་ཞིག་ཡིན་ལ། ཧཱ་ལི་མཱས་འཚེམ་བཟོ་བྱས་ནས་ཡོང་འབབ་ཕྲན་བུ་ཡོང་གི་ཡོད་པས་འཚོ་བ་བདེ་སྐྱིད་ལྡན་པ་ཞིག་ཡོད། 

ཁྱོ་ཤུག་གིས་བོད་སྐད་སྦྱངས་ནས་ཁྱིམ་མཚེས་དང་གོ་བརྡ་ཡག་པོ་འཕྲོད་པས་ཕན་ཚུན་འཆམ་པོ་ཡོད། ཁྱིམ་མཚེས་ཀྱིས་ཡིད་སྨོན་བྱེད་པ་ཞིག་ནི། ཧཱ་ལི་མཱ་ཁྱོ་ཤུག་གིས་ལོ་བཅུ་ཕྲག་ཁ་ཤས་རིང་མི་གཞན་ལ་རོགས་རམ་བྱས་པ་དེ་རེད། རང་ཉིད་ཀྱི་འཚོ་བ་དེ་འདྲ་ཡག་པོ་མེད་ཀྱང་སྡེ་ཁུལ་ནང་གི་མི་སུ་ཞིག་ལ་དཀའ་ངལ་ཡོད་པ་ཐོས་ཚེ་དེ་མུར་རོགས་རམ་བྱེད་པ་མ་ཟད། ད་དུང་ས་ཡོམ་ཐོན་པའི་གེགས་ཁུལ་ལ་དངུལ་དང་དངོས་ཟོག་ཞལ་འདེབས་རྒྱག་སྐབས་ཀྱང་ཀུན་གྱི་སྔོན་ལ་རྒྱག་གི་ཡོད་པ་རེད།

ལོ་22གོང་དུ། ཧཱ་ལི་མཱའི་གཅུང་མོ་གྲོངས་ནས་ཟླ་བ་དྲུག་ཡིན་པའི་བུ་བསྟན་འཛིན་ཕུན་ཚོགས་དྭ་ཕྲུག་ཏུ་གྱུར་པས་ཧཱ་ལི་མཱས་ཉར་རྩིས་བྱས་མོད། ཡིན་ནའང་དེ་གོང་ཁོ་མོའི་ཚ་བོ་ཨོ་སི་མན་ཉར་ཡོད་པས། ཁྱིམ་གྱི་ཁུར་པོ་ལྕི་དྲགས་པར་བསམས་ནས། ཧཱ་ལི་མཱས་ཉིན་ཤས་རིང་ཀྲའོ་པོ་ནེང་ལ་བཤད་མ་ནུས་པ་རེད།

“བསྟན་འཛིན་ཕུན་ཚོགས་ཀྱང་ང་ཚོའི་གཉེན་ཉེ་ཡིན། ད་ཆ་ཁོང་ཚོའི་ཁྱིམ་ལ་དཀའ་ངལ་འཕྲད་པས་ང་ཚོས་རང་འགུལ་ངང་བུ་དེ་གསོ་སྐྱོང་བྱེད་དགོས”ཞེས་ཉིན་ཞིག་དགོང་ཟས་བཟས་རྗེས་ཀྲའོ་པོ་ནེང་གིས་དེ་ལྟར་བཤད།

ཧཱ་ལི་མཱ་ཁྱོ་ཤུག་གིས་དགོང་མོ་དེར་བསྟན་འཛིན་ཕུན་ཚོགས་རང་ཁྱིམ་དུ་བསུས་ནས་རང་ཉིད་ཀྱི་བུ་ཕྲུག་བཞིན་དུ་གསོ་སྐྱོང་བྱས་པ་རེད།

ཧཱ་ལི་མཱའི་ནང་དུ་སྔོན་ཆད་རང་མི་རིགས་ཀྱི་སྲོལ་རྒྱུན་དུས་ཆེན་ལས་གཏོང་གི་མེད་མོད། འོན་ཀྱང་བསྟན་འཛིན་ཕུན་ཚོགས་ཉར་བ་ནས་བཟུང་བོད་ཀྱི་ལོ་གསར་དང་ཞོ་སྟོན་སོགས་བོད་རིགས་ཀྱི་སྲོལ་རྒྱུན་དུས་ཆེན་ཡང་གཏོང་འགོ་ཚུགས་པ་རེད།

ཧཱ་ལི་མཱའི་བུ་གསུམ་པོ་ཕན་ཚུན་རོགས་རམ་དང་འཆམ་མཐུན་ངང་འཚར་ལོངས་བྱུང་བ་མ་ཟད། སློབ་ཆེན་ཐོན་ནས་སོ་སོར་ལས་ཀ་ཡང་རག་ཡོད་པ་རེད།

བུ་ཕྲུག་ཚོའི་མནའ་མ་བསུ་ལེན་ཐད་བདེ་སྐྱིད་ལྡན་ན་མི་རིགས་གང་ཡིན་ཡང་ཆོག་པ།

“ཨ་ཕ། ཨ་མ། ངས་རྒྱ་རིགས་བུ་མོ་ཞིག་མནའ་མར་བསུ་རྒྱུ་ཡིན། ཁྱེད་གཉིས་ཀྱིས་མོས་མཐུན་ཡོད་དམ”2016ལོར། བུ་འབྲིང་བ་ཨོ་སི་མན་གྱིས་དེ་ལྟར་དྲིས།

“མི་བཟང་པོ་ཡོད་པ་དང་། ཁྱོད་གཉིས་འཆམ་པོ་བྱུང་ནས་བདེ་སྐྱིད་ལྡན་ན་འགྲིག་པ”ཞེས་ཧཱ་ལི་མཱས་བཤད།

དེ་ནས་ཡུན་རིང་མ་འགོར་བར། ཨོ་སི་མན་གྱིས་སི་ཁྲོན་གྱི་བུ་མོ་ཅིང་ཚའེ་ཧུང་མནའ་མར་བསུས། དེ་ནས་བཟུང་། མི་རིགས་མང་པོའི་ཁྱིམ་ཚང་དེའི་གསོལ་ལྕོག་ཐོག་ལུག་ཤ་རྡོག་བཙོས་དང་ཚགས་ཤ་སྐམ་པོ་ཕུད་ད་དུང་ཉ་ཤ་ཡང་ཡོད་པ་རེད། རྒྱ་རིགས་བུ་མོ་ཅིང་ཚའེ་ཧུང་མནའ་མར་བསུས་པས་མི་རིགས་མང་པོའི་ཁྱིམ་ཚང་དེའི་ཁྱད་ཆོས་དེ་བས་ཕུན་སུམ་ཚོགས་སུ་ཕྱིན་ཡོད་པ་རེད།

ཧཱ་ལི་མཱའི་ཁྱིམ་དུ་དཔྱིད་གསར་དུས་ཆེན་དང་བརྒྱད་པའི་བཅོ་ལྔའི་དུས་ཆེན་གཉིས་མང་དུ་ཕྱིན་ཞིང་། མི་རིགས་མི་འདྲ་བའི་དུས་ཆེན་དེ་དག་ནང་མི་ཀུན་གྱིས་མཉམ་དུ་གཏོང་གི་ཡོད་པ་རེད།

2019ལོའི་ཟླ་ལྔ་པ་ནི་མུའུ་སི་ལིན་གྱི་སྨྱུང་གནས་ཟླ་བར་འཁེལ་ཡོད་ལ། ཅིང་ཚའེ་ཧུང་གི་ཕྲུ་གུའི་སྐྱེ་ཟླ་ཡང་ཤར་གྲབས་ཡོད་པས་འཚོ་བཅུད་ཁ་གསབ་བྱེད་དགོས་པར་བརྟེན་སྒྱུག་མོ་ཧཱ་ལི་མཱ་ལ་ཅི་ལྟར་ཤོད་དགོས་པ་མ་ཤེས།

“ཚའེ་ཧུང་། ཁྱོད་ཀྱིས་ག་རེ་ཟ་འདོད་ན་དེ་ཟོ། གཟུགས་པོ་གལ་ཆེ་ཤོས་རེད”ཅེས་པའི་ཧཱ་ལི་མཱའི་སྐད་ཆ་ཚིག་གཅིག་པུ་དེས་ཅིང་ཚའེ་ཧུང་གི་སེམས་པ་དྲོ་སོབ་སོབ་བཟོས། ཁོ་མོས་ཀྱང་སྒྱུག་མོའི་འཚོ་བའི་གོམས་གཤིས་ལ་བརྩི་འཇོག་ཡག་པོ་བྱེད་ཀྱི་ཡོད། ཕྲུ་གུ་བཙས་རྗེས་ཁྱོ་ཤུག་གཉིས་ཀྱིས་ཁོ་གཉིས་ཐུན་མོང་གི་བསམ་འདུན་ལྟར་ཧུད་རིགས་ཞེས་ཐོ་བཀོད།

“ཁྱིམ་ཚང་གཅིག་ནང་མི་རིགས་མང་པོ་འཚོ་བ་སྐྱེལ་གྱི་ཡོད་ལ། མི་རིགས་སོ་སོས་རང་ཉིད་ཀྱི་ཐུན་མོང་མ་ཡིན་པའི་གོམས་གཤིས་དང་། རིག་གནས། འཛེམ་བྱ་སོགས་ལ་བརྩི་སྲུང་བྱེད་ཀྱི་ཡོད། ཁྱིམ་ཚང་ཆེན་པོ་འདི་ཞི་མཐུན་ཡོང་དགོས་ན་ཕན་ཚུན་འདྲ་མཉམ་དང་། ཕན་ཚུན་བརྩི་བཀུར། ཕན་ཚུན་བཟོད་སྒོམ་བཅས་བྱེད་དགོས”ཞེས་ཧཱ་ལི་མཱས་བཤད།

ཁྱིམ་སྲོལ་རྒྱུན་འཛིན། མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ།

ཧཱ་ལི་མཱའི་ཁྱིམ་ནི་ལྷ་ས་གྲོང་ཁུལ་རྙིང་པའི་ཝ་པ་གླིང་སྡེ་ཁུལ་དུ་ཡོད་ལ། ཁྱིམ་གྱི་སྨི་བཅུ་ཕྲག་ཁ་ཤས་མཚམས་སུ་ལོ་300ལྷག་གི་ལོ་རྒྱུས་ལྡན་པའི་ལྷ་ས་དབྱི་སི་ལན་ཕྱག་ཁང་ཆེ་མོ་ཡིན། ནུབ་ངོས་སུ་སྤྱི་ལེ་གཅིག་ཡས་མས་བསྐྱོད་ཚེ་ལོ་རྒྱུས་དེ་བས་རིང་པའི་གཙུག་ལག་ཁང་ཡིན། ལོ་རྒྱུས་དང་ས་ཁམས་ཀྱིས་རྐྱེན་ཝ་པ་གླིང་སྡེ་ཁུལ་དེ་ནི་བོད་རིགས་དང་། རྒྱ་རིགས། ཧུད་རིགས། པའེ་རིགས། ཏུང་ཞང་རིགས། ས་ལར་རིགས། ཡུ་གུར་རིགས་སོགས་མི་རིགས་11འདུས་སྡོད་ཁུལ་ཞིག་ཏུ་གྱུར་ཡོད་པ་དང་། མི་རིགས་མང་པོའི་ཁྱིམ་ཚང་གིས་སྡེ་ཁུལ་དེའི་ཁྱིམ་ཚང་བསྡོམས་འབོར་གྱི་བཞི་ཆ་གཅིག་ཟིན་ཡོད་པ་རེད།

2019ལོར། བཟའ་ཟླ་གྲོངས་རྗེས་མཐའ་འཁོར་གྱི་ཁྱིམ་མཚེས་མང་པོས་རོགས་རམ་བྱས་པ་དང་། ཁ་ཤས་ཀྱིས་ཁ་ལག་བཟོས་ནས་བསྐྱལ་བ་དང་། ཁ་ཤས་ཀྱིས་ཁྱིམ་ལས་བྱེད་རོགས་བྱས་པ་དང་། ཁ་ཤས་ཀྱིས་ཧཱ་ལི་མཱ་ལ་སེམས་གསོ་གཏོང་བ་སོགས་ནི་ཁོ་མོས་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བ་ལག་བསྟར་བྱས་པར་འབྲས་བུ་ཡག་ཤོས་ཐོབ་པ་ཞིག་རེད།

སྒྲོལ་འཛོམས་ཀྱི་བུ་ཕྲུག་སློབ་གྲྭ་འགྲིམས་སྐབས་ཧཱ་ལི་མཱ་ཁྱོ་ཤུག་གཉིས་ཀྱིས་རོགས་རམ་བྱེད་མྱོང་ཡོད་པས། ཨ་ཁུ་ཀྲའོ་པོ་ནེང་གྲོངས་པ་ཐོས་འཕྲལ་སྒྲོལ་འཛོམས་གཟའ་འཁོར་རེ་རེ་བཞིན་ཧཱ་ལི་མཱའི་ནང་དུ་བསྐྱོད་དེ་གྱོན་ཆས་འཁྲུད་རོགས་བྱས་པར་ཧཱ་ལི་མཱ་ཐེངས་མང་བཀག་རྐྱེན་ད་ཆ་ཧཱ་ལི་མཱར་ཇ་མངར་མོ་སྐོལ་རོགས་བྱེད་ཀྱི་ཡོད་པ་རེད།

སེམས་འགུལ་ཐེབས་པའི་གཏམ་རྒྱུད་རེ་རེ་ནི་མི་རིགས་མཐུན་སྒྲིལ་ཁྱིམ་ཚང་གཅིག་ལྟར་བརྩེ་བའི་སྙན་འཇེབས་ཀྱི་དབྱངས་རྟ་རེ་རེར་གྱུར་ཡོད། “ཀྲུང་ཧྭ་མི་རིགས་ནི་ཁྱིམ་ཚང་ཆེན་པོ་ཞིག་ཡིན། ང་ཚོ་ཚང་མ་ཨ་མ་ཀྲུང་གོ་ལགས་ཀྱི་བུ་ཕྲུག་ཡིན། བུ་ཕྲུག་ཚོ་མཐུན་སྒྲིལ་བྱུང་ན་རྒྱལ་ཁབ་སྟོབས་ལྡན་ཡོང་གི་རེད་ལ་ང་ཚོའི་འཚོ་བ་ཡང་དེ་བས་སྐྱིད་པོ་ཡོང་གི་རེད”ཅེས་ཧཱ་ལི་མཱས་རྟག་ཏུ་བུ་རབས་ཚ་རྒྱུད་ཚོར་མི་ཡག་པོ་ཞིག་བྱས་ནས་ཧུར་བརྩོན་ཡར་ཐོན་བྱེད་དགོས་པའི་ཁ་ཏ་བསླབ་བྱ་བྱེད་ཀྱི་ཡོད་པ་རེད།

ཧཱ་ལི་མཱས“ཁྱིམ་སྲོལ་བཟང་པོ་རྒྱུན་འཛིན་བྱ་རྒྱུ་ནི་ངེད་མི་རིགས་མང་པོའི་ཁྱིམ་ཚང་བདེ་སྐྱིད་ཡོང་བའི‘མན་ངག’ལྟ་བུ་ཡིན། ཚང་མས་ཕན་ཚུན་རོགས་རམ་དང་ཕན་ཚུན་འཆམ་མཐུན་བྱས་ཏེ་མི་རིགས་མཐུན་སྒྲིལ་གྱི་མེ་ཏོག་ནམ་ཡང་བཞད་པར་བྱེད་དགོས”ཞེས་ཧཱ་ལི་མཱས་བཤད།