འདི་ནི་གཅེན་གཅུང་གཉིས་ཀྱིས་ཉོས་མ་ཐག་པའི་རླངས་འཁོར་བཏང་སྟེ་དྲོད་ཁང་ནས་ཐོན་པའི་སྔོ་ཚལ་སོས་པ་ཚོང་ཁང་དུ་དབོར་བཞིན་པ།

འདི་ནི་སྐལ་བཟང་དབང་མོ(གཡས)དང་གཅེན་མོ་བདེ་སྐྱིད་སྒྲོལ་མས་སྔོ་ཚལ་ཚོང་ཁང་ནང་ལས་ཀ་བྱེད་བཞིན་པ།

འདི་ནི་མཉམ་ལས་ཁང་གི་ཁོངས་མི་ལྷ་མོས་སྔོ་ཚལ་ལ་གཡོག་བྱེད་བྱེད་བཞིན་པ།

 འདི་ནི་སྐལ་བཟང་དབང་མོ(གཡོན)དང་གཅེན་མོ་བདེ་སྐྱིད་སྒྲོལ་མས་པ་སྣམ་རྫོང་གི་སྔོ་ཚལ་ཚོང་ཁང་མདུན་དུ་བརྒྱབ་པའི་པར་ཡིན་པ།

བོད་ཀྱི་གཞིས་རྩེ་གྲོང་ཁྱེར་དུ་གནས་པའི་པ་སྣམ་རྫོང་ནི་བོད་ཀྱི་སྔོ་ཚལ་ཐོན་སྐྱེད་རྟེན་གཞི་གཙོ་བོའི་གྲས་ཤིག་ཡིན། ད་ལོ་ལོ་26ལ་སླེབས་པའི་བུ་མོ་སྐལ་བཟང་དབང་མོ་ནི་རྫོང་དེའི་དཔའ་རྩལ་ཤང་བན་ཚང་གྲོང་ཚོ་ནས་ཡིན་པ་དང་2018ལོར་བོད་ལྗོངས་ལས་རིགས་ལག་རྩལ་སློབ་གླིང་ནས་ཐོན་རྗེས་ཕ་ཡུལ་དུ་ལས་གཏོད་བྱས་ཏེ་གཅེན་མོ་བདེ་སྐྱིད་སྒྲོལ་མ་དང་མཉམ་དུ་ཤིང་འབྲས་དང་སྔོ་ཚལ་འདེབས་འཛུགས་ཀྱི་ལས་ལ་གཞོལ་ཡོད།

2019ལོར་སྲིད་གཞུང་གི་བོད་སྐྱོར་མ་དངུལ་གྱི་རོགས་སྐྱོར་བརྒྱུད། གཅེན་གཅུང་གཉིས་པོས་བན་ཚང་གྲོང་ཚོར་དྲོད་ཁང་13བརྒྱབ་ཡོད། ཤིང་འབྲས་དང་སྔོ་ཚལ་སྣ་ཁ་གསར་པ་ནང་འདྲེན་དང་ལག་རྩལ་གྱི་ཉམས་མྱོང་གསོག་འཇོག་བྱས་པ་བརྒྱུད། དྲོད་ཁང་གི་ཡོང་འབབ་ཆེས་ཆེར་འཕར་བ་རེད། ལོ་འདིའི་ཟླ་8པར་སྐལ་བཟང་དབང་མོས་སློབ་ཆེན་སློབ་མའི་ལས་གཏོད་ཁ་གསབ་མ་དངུལ་རེ་ཞུ་བྱས་ཏེ་ཁོང་གཉིས་པོས་པ་སྣམ་རྫོང་གྲོང་དུ་སྔོ་ཚལ་ཚོང་ཁང་ཞིག་བཙུགས་པ་རེད། གཅེན་མོས་དྲོད་ཁང་དོ་དམ་དང་ལས་མིར་གསོ་སྦྱོང་བྱེད་ཅིང་གཅུང་མོས་ཤིང་འབྲས་དང་སྔོ་ཚལ་གྱི་ཕྱིར་ཚོང་དང་ཚོང་ཁང་གཉེར་སྐྱོང་གི་འགན་འཁུར་ཏེ་མཉམ་ལས་དམ་ཟབ་བྱས་པས་བྱ་གཞག་ཀྱང་ཡར་ངོའི་ཟླ་ལྟར་གོང་ནས་གོང་དུ་འཕེལ་བཞིན་ཡོད།

སྐལ་བཟང་དབང་མོས་ད་དུང་ཤིང་འབྲས་དང་སྔོ་ཚལ་གཉེར་སྐྱོང་བྱེད་མཁན་གྱི་གྲོང་མི་གཞན་དག་དང་འབྲེལ་བ་བྱས་ཏེ་མཉམ་ལས་ཁང་ཞིག་བཙུགས། གྲོང་མི་དབུལ་པོ་དང་དབང་པོ་སྐྱོན་ཅན་ལ“དབུལ་ཞྭ”འཕུད་རོགས་བྱས་པ་དང་འབྲེལ་ཉེ་འགྲམ་གྱི་མི་མཉམ་ལས་ཁང་ནང་ཞུགས་ནས་ཐུན་མོང་ཐོག་འབབ་འཕར་ཕྱུག་འགྱུར་ཡོང་བར་སྐུལ་ཁྲིད་ཀྱང་བྱས་ཡོད། སྐལ་བཟང་དབང་མོས། སླད་ཕྱིན་ངས་གཞིས་རྩེར་ཡང་ཚོང་ཁང་ཞིག་འཛུགས་རྩིས་ཡོད་ལ་ང་ཚོའི་སྔོ་ཚལ་རྟེན་གཞིར་གྲང་ཉར་མཛོད་ཅིག་ཀྱང་བསྐྲུན་རྩིས་ཡོད། དེ་ལྟར་བྱས་ཚེ་མི་དེ་བས་མང་བས་སྔོ་ཚལ་སོས་པ་ཟ་ཐུབ་ཅེས་བརྗོད།